Kintaŋ 20
20
Mooser dzə́v kilán, mendzə́v mè wáa fəə
(Fəə 17.1‑7)
1Màŋgòŋ woó Isray e dzə̀m nèn wìy lò, e wìy e woʼ yee Tsin. Á meé fó e ŋwee mbìyi fó kiya, e nèn dù, a beè e Kadesh.#20.1: Wír veé Israyi‑iì wìy é Kadesh fèn, a sì é bǎm viyá vinín mo vé‑eè tòmbìy wìy fo, e nèn tèn fó nəə́ e wòŋ Kanan. Nyùy nèn yiì, á ghán é woʼ moo kiyá mkweè bèy, e bóo kfə̀n wìy fo lèn. (Leéy 13.26, 14.25). Miriam nèn kpù fó, á dzəə̀mè.
2Bó mendzə́v mè yòʼ‑oò ló a dzə fo me yì‑iì dzə̀ á wàa no, màŋgòŋ nèn bàʼtí vitú vév, e taàmé Mooser wùn Aaron. 3Á wáa tàʼ melaà wùn à Mooser, a suúy jii, «Kì yée fó a dzə ji vèr‑iì kpù é ghan se afə́r vérí‑iì kpukin e Nyùy Tǎr si. 4Wò‑oò li kintatì ke wìr Nyùy Tàr, e wìy ka shó e woʼ fen? Yì‑iì dzə̀ ji vèr à nyám sér sí tátí, e kpùkír fèn à? 5Wò‑oò lì ver fó Ejiv, a wìy sho e kirə̀ʼ ké lòn kin ji ka? Vifá ve yi vi yòʼ kúy fèn, kìn vicí vé *fig, kìn vitiír vé *vayin, kìn kicí ké *grenadin, a bó shindzə́v shée no shi yòʼ dzə̀ sá.»
6Mooser wùn Aaron nèn lò fo màŋgòŋ si, e dù e shùu *kibàn ké ntàsín, e gvə̀ʼtí, e tsə̀m sí fo nsay. Rán Nyùy Tàrí nèn bvə̀ysín aáwuné si. 7Nyùy Tàr suúy e Mooser jii, 8«Lì mbàŋ ye yì dzəə̀n é mbìy ŋkùv mensàŋ, é vèn Aaron bánén màŋgòŋ, e sùŋnín e kilán kìsə ki, a wíri yéné, é kí fəə́r mendzə́v. Á mo à yíi yiì, é mendzə́v mè fəə́ fó kilan, é màŋgòŋ wùn à nyám sév sí nó.»
9Mooser ku nèn lì mbàŋ fo mbìy ŋkùv mensàŋ mo Nyùy Tàr kì yòŋèn e wun. 10Wùn Aaron bánén màŋgòŋ e shùu kibàn, wù suúy aáwune jii, «Antavkìtu vìn, vèn yuúrí, e yù. Vèn taʼ é vèr fəə́r mendzə́v fó kilan fèn, e fò e vèn á?» 11Wù yòŋ bèy, e nàn kiwó, e dzə̀v kilán e mbàŋ rə akàŋ abaà, mendzə́v mè meé fó fo, màŋgòŋ wùn à nyám si nó.
12 Nyùy Tàr nèn yòŋ e Mooser wùn Aaron jii, «Mo bó vèn yoʼ lò wày shilív e mǒ wùn, e yiì, wír veé Israyi yén vitaáví vém, mo woo Nyùy, bo yòʼ wíy lì ven màŋgòŋ və̀n, e dù sho e wòŋ wo m foon aáwune.»
13Á nèn lò, e yòŋ ndzə́v rən ji Meriba#20.13: Meriba: E Lǎm Hibru, nsàv yìr rən dzə̀ jii, «kitáŋnìn.» (Leéy: Fəə 17.7)., bìʼ fo dzəə̀n fo wír veé Israyi‑iì taŋnin wùn à Nyùy Tàr, wù dìn aáwune mo wù dzəə̀n jeéy ji Nyùy.
Fòn woó Edom ŋwéy wír veé Isray dzə́ə
14Mooser nèn tùm wíri fó Kadesh ji á du, e yèn á fon woó Edom#20.14: Edom: Kirə́ʼ kin ki dzə̀ é mbìv yee tsə́n fo Ndzə́v Shiŋgwaŋe. Wír vee fóo‑oò ràmtìn fo Esav woo fər Jakov woo tàr à rám Isray., e sùúy a sho ji wír fòn vee wón Israyi suuy a jii, fòn kì á ŋgeʼ sidzə̀m se sí kooyin ver. 15Á kì á mo atàr vérí‑iì səyin é Ejiv, vèr áwune dzə̀ʼə̀m fo viyá viyá. Wír vee fóo nə́ʼsí á vèr aàtàr vérí e dzəə ye bi, 16vèr tóŋ e Nyùy Tàr, wù yú tóŋ yér, e tsə̀nsí a nshìylav rə, yì fəə́r ver fó Ejiv. Lèn və̀n, a vèr sì á e Kadesh, ŋkàlaʼ ye yì dzəə̀n á e fòn shùu bìíy. 17Á ku biìmé a ji vèr tósín á nsay fòn. Vèr yòʼ yíi nəə́ a e sum sé vifa ve yi, kìn e sé vitiír vé vayin si, a bó vèr yòʼ yíi no a ndzə́v sév se tuŋén sí. Vèr kù yíi shaà a tìítiy fo dzəə ye á yoŋ ji Dzəəfòn#20.17: Dzəəfòn: Dzə̀ dzə́ə ye kuʼùn é mbìv Ndzə́v Shiŋgwaŋe yee fo shùy yii tó. Dzəə̀ rə̀n kòʼ fó fo, e dù bèy, e bàʼ e wòŋ Siiria.. Vèr yòʼ yíi bìn a e koy ŋkoòvì, kìn é koy yìyí, a bó vèr tósín á nsay fòn.
18Yii bèy, Fòn Edom dù, e bìnèr jii, «Bó yòʼ dzə̀ vèn shaà fó fèn. A vèn mùm, bo vèr fəə́, e kìʼ ven e rə́r sí.» 19Wír veé Israyi bìnèr jii, «Vèr yíi a shaà dzə́ə dzə́ə. A kí kòóy ji vèr lo, e nò ndzə́v sév, kìn nò nyám sér, bo vèr waà laʼà. Á ku biìmé, é vèr láʼtí á wuú, e shaà shaàn.»
20Fòn Edom ku kfə̀n bìnèr ji vèn yòʼ yíi shaà. Wír veé Edome nèn fə̀ə́r nyanyày vilum, e bàʼtí shúu rər wo tavíné, e taàmé áwune. 21Mo wír veé Edome shaʼnin fo Isray shaa fo áwuné nsay bèy, Isray nèn bàr dzə́ə.
Kpú Aaron
22Màŋgòŋ woó Isray e dzə̀m lò fo Kadesh, e ghàn, e mèé e Gwan Hor. 23Mo á meen é Gwan Hor e ghaa bìíy yeé Edom, Nyùy Tàr nèn sùŋnín e Mooser wùn Aaron jii, 24«Aaron yíi kpu, e tatí atàr və́. Wù yòʼ wíy nəə́ e nsay ye m foon e wír veé Israyi, bìʼ fo vèn wun‑eè tavin kitú, e ŋwày jí yem yee kùm mendzə́v meé Meriba. 25Lì Aaron wùn wan və Eleasar, e kòʼ shó e Gwan Hor. 26Shóʼ ndzə̀y sé Aaron si, e màʼ e wan və Eleasar wùn. Aaron yíi kpu fo, e tatí atàr və́.»
27Mooser ku nèn yiì mo Nyùy Tàr yòŋèn, e lì, wùn áwune kóʼ. Wùn à Aaron kóʼ é Gwan Hor, a màŋgòŋ dzə̀m yéné. 28Mooser dù, e shòʼóy ndzə̀y sé Aaron, e nèn màʼ e wan və woo Eleasar wùn. Aaron ku nèn kpù é kitu ke gwan foo fèy. Mooser wùn Eleasar nèn a səʼə́y fo gwan. 29Wír veé Israyi kiíy ji Aaron kpù á ne, màŋgòŋ e dzə̀m nèn dìy kpú rə́ kishiíy mtaár.
Currently Selected:
Kintaŋ 20: LNB
Highlight
Share
Copy
Want to have your highlights saved across all your devices? Sign up or sign in
© 2022 CABTAL
