Kintaŋ 2
2
Nsìysì kibeèy
1 Nyùy Tàr lò, e yòŋ e Mooser wùn Aaron jii, 2«Wír veé Israyi kù wíy a tam vibàn vév é vilaʼáy vilaʼáy, a fo ntàm fo *kibàn ké ntàsín, e kaarí, e tar. Wìr mòʼón mòʼón wíy a dzə e wun ram mo kisəəm kee tàr wóv kfəə ki dzəə̀n.»
3Mo Nyùy‑iì yòŋèn bey, kiláʼáy ke kí‑iì dzəə̀n é mbìv kibàn ké ntàsín yee fo shùy yii tó ki‑iì dzə̀ ké ram se sí dzəə̀n wùn à yé Judàa. Vé‑eè dzə̀ aáwuné sar cícíwàr mo akáŋ véví‑iì dzəə̀n. Kilìmbìy ke rám Juda ki‑iì dzə̀ Naashon woo wan Amminadav, 4a mànjòŋ və‑əə̀ dzə̀ kishóv ghií ntuùfú aànsə̀kìi nshòv sikweè e msaàmbà (74,600).
5Rám ye yí‑iì tamen e yé Judàá ghaŋe‑eè dzə̀ yé Issakar, a kilìmbìy ki dzə̀ Netanel woo wan Tsuyar, 6a mànjòŋ və dzə̀ kishóv ghii kweè aànsə̀kìi nshòv sikweè e mtàn (54,400). 7Ye yí batiné nén a dzə yé Sebulun, a kilìmbìy ki dzə̀ Eliav woo wan Helon, 8a mànjòŋ və dzə̀ kishóv ghii kweè aànsə̀kìi nshòv saàmbà e mtàn (57,400). 9Mànjòŋ woó kilaʼáy ké Juda e dzə̀m mo akáŋ véví dzə̀kìné nén a dzə kishóv ghii kweè aànsə̀kìi nshòv ntuùfú e mwaamé é wiì (186,400). Wír veé Israyi lóo fəə fo kibeèy, áwune wàa lev fo mbìy.
10Kiláʼáy ke kí‑iì dzəə̀n é mbìv kibàn ké ntàsín yee tsə́n kí‑iì dzə̀ ké ram se sí‑iì dzəə̀n wùn à yé Rubene. Vé‑eè dzə̀ aáwuné sar cícíwàr mo akáŋ véví‑iì dzəə̀n. Kilìmbìy ke rám Ruben ki‑iì dzə̀ Elisur woo wan Shedeur, 11a mànjòŋ və‑əə̀ dzə̀ kishóv ghií tàn aànsə̀kìi nshòv ntuùfú e mkweè (46,500). 12Rám ye yí‑iì tamen e yé Rubené ghaŋe‑eè dzə̀ yé Simeon, a kilìmbìy ki dzə̀ Shelumiel woo wan Tsurishadday, 13a mànjòŋ və dzə̀ kishóv ghii taár aànsə̀kìi nshòv bvə̀ʼə̀ e mtàn (59,300). 14Rám Gadi nen sə̀ʼ, a kilìmbìy ki dzə̀ Eliasav woo wan Reuel, 15a mànjòŋ və dzə̀ kishóv mtàn e ghiì ntuùfú aànsə̀kìi nshòv sitàn e mkweè (45,650). 16Mànjòŋ woó kilaʼáy ké Ruben e dzə̀m mo rám sí dzə̀kìn nén a dzə kishóv mtàn e ghiì kweè aànsə̀kìi nshòv mòʼón e mtàn e wiì (151,450), aáwune wíy a lev ji káŋ woo baà. 17Á bèy, é kibàn ké ntàsín wùn à kaŋ Levi nèn ŋàʼáy, a lev fo kintìntìn, réŋréŋ mo vé‑eè tamen é kilaʼáy, aáwuné sar cícíwàr.
18Kiláʼáy ke kí‑iì dzəə̀n é mbìv kibàn ké ntàsín yee fo shùy yii nəə ki‑iì dzə̀ ké ram se sí‑iì dzəə̀n wùn à yé Efrayime. Vé‑eè dzə̀ aáwuné sar cícíwàr mo akáŋ véví‑iì dzəə̀n. Kilìmbìy ke rám Efrayim ki‑iì dzə̀ Elishama woo wan Ammihud, 19a mànjòŋ və dzə̀ kishóv ghii tàn aànsə̀kìi mkweè (40,500). 20Ye yí bátir áwuneé nén a dzə yé Manasse, a kilìmbìy ki dzə̀ Gamaliel woo wan Pedasur, 21a mànjòŋ və dzə̀ kishóv ghii baà aànsə̀kìi nshòv sibaà e mtaár (32,200). 22Rám Benjamine nen sə̀ʼ, a kilìmbìy ki dzə̀ Abidan woo wan Gidiyone, 23a mànjòŋ və dzə̀ kishóv ghii kweè aànsə̀kìi nshòv sitàn e mtaár (35,400). 24Mànjòŋ woo Efrayim kilaʼáy e dzə̀m mo rám sí dzə̀kìn nén a dzə kishóv wií aànsə̀kìi nshòv waamé e wiì (108,100). Áwune wíy a lev ji káŋ woo taár.
25Kiláʼáy ke kí‑iì dzəə̀n é mbìv kibàn ké ntàsín yee kuy ki‑iì dzə̀ ké ram se sí‑iì dzəə̀n wùn à yé Dane. Vé‑eè dzə̀ aáwuné sar cícíwàr mo akáŋ véví‑iì dzəə̀n. Kilìmbìy ke rám Dan ki‑iì dzə̀ Ahiyeser woo wan Ammishadday, 26a mànjòŋ və dzə̀ kishóv ghií saàmbà aànsə̀kìi nshòv sibaà e mntuùfú (62,700). 27Ye yí bátir wune nén a dzə yé Asher, a kilìmbìy ki dzə̀ Pagiel woo wan Okran, 28a mànjòŋ və dzə̀ kishóv ghii tàn aànsə̀kìi nshòv mòʼón e mkweè (41,500). 29Rám Navtalìi nen sə̀ʼ, a kilìmbìy ki dzə̀ Ahira woo wan Enan, 30a mànjòŋ və dzə̀ kishóv ghii kweè aànsə̀kìi nshòv sitaár e mtàn (53,400). 31Mànjòŋ woo Dan kilaʼáy e dzə̀m mo rám sí dzə̀kìn nén a dzə kishóv ghií ntuùfú aànsə̀kìi nshòv saàmbà e mtàn e wiì (157,600), aáwune wíy a lev bám, rám yee shó, aáwuné sar cícíwàr.
32Á mànjòŋ Isray wo vé‑eè taŋen mo rám sí dzə̀kìn. A vé‑eè dzə̀ é vilaʼáy vilaʼáy, aàkáŋ aàkáŋ. Áwune adzə̀me nén a dzə wír kishóv mtàn e ghiì tàn aànsə̀kìi nshòv sitaár e ghií ntuùfú (603,550). 33Yii bèy, á yòʼ‑oò lo tàŋ wír veé ram Levi e mànjòŋ woó Isray mvəm mo Nyùy Tàr‑iì yòŋèn e Mooser.
34Wír veé Israyi‑iì lo yiì kinyo kidzə̀m ke Nyùy Tàr‑iì yòŋèn e Mooser. Vee shóo‑oò tàm aáwuné sar cícíwàr, e yiì lò, e ŋàʼáy fo kibeèy, e nèn a lev, a dù réŋréŋ mo vé‑eè dzə́ aàkáŋ aàkáŋ mo kfə́ə sév sí dzə̀kìn.
Currently Selected:
Kintaŋ 2: LNB
Highlight
Share
Copy
Want to have your highlights saved across all your devices? Sign up or sign in
© 2022 CABTAL