Kintaŋ 1
1
Kintaŋ ke wìr veé Isray ke mbìy ki
1Mo wír veé Israyi‑iì dzə́ e woʼ yee Sinay, lòo dzə e kiya ke kí‑iì meen ji baà mo áwune‑eè loòn fó Ejiv,#1.1: mo áwune‑eè loòn fó Ejiv: Leéy: Fəə 12.40‑42. wáa dzə e kishiíy ké mbìy ki é ŋwee woo baà, Nyùy Tàr nèn lò, e sùŋnín e Mooser e mvə̀m *kibàn ké ntàsín. 2-3Wù wáa suŋnín, a yòŋ jii, «Vèn Aaron ku tàŋ wír veé Israyi adzə̀m mo rám sév sí dzə̀kìn, e vitǎr vitàr, e sàŋ yír sé vilum adzə̀m e kitu kitu. Á ku tàŋ vilum veé Isray adzə̀m ve á gheenen, ve dzə̀ á dù é shùu rər, a dzə̀ vee kèʼ fó kiya mbaà, a dù duùn fó mbìy, e sìysì, aá wáa dzə aàkáŋ aàkáŋ. 4Vèn ku lì wír e mòʼón mòʼón fo ram se sí dzəə̀n, aá wáa sə ven. A wìr wo á li, kù dzə̀ kilìmbìy e wun kfəə. 5Yír sé wìr ve á yíi a sə ven sí dzə̀ jii:
Fo rám Ruben, aá li Elisur woo wan Shedeur.
6Fo yé Simeone, aá li Shelumiel woo wan Tsurishadday.
7Fo yé Judàa, aá li Naashon woo wan Amminadav.
8Fo yé Issakari, aá li Netanel woo wan Tsuyar.
9Fo yé Sebulune, aá li Eliav woo wan Helon.
10Ké wón Joosev ki dzə̀ jii:
Fo ram ye dzəə̀n yé Efrayim, aá li Elishama woo wan Ammihud.
Fo ram ye dzəə̀n yé Manasse, aá li Gamaliel woo wan Pedasur.
11Fo rám Benjamine, aá nèn lì Abidan woo wan Gidiyone.
12Fo yé Dane, aá li Ahiyeser woo wan Ammishadday.
13Fo yé Asheri, aá li Pagiel woo wan Okran.
14Fo yé Gadi, aá li Eliasav woo wan Deyuel.
15Fo yé Navtalìi, aá li Ahira woo wan Enan.»
16Á wír ve vé‑eè liìn fo wír veé Israyí mvəm, wir mòʼón fo ram yee shó, a wìr dzə̀m‑eè dzə̀ kilìmbìy e wun kfəə.
17Mooser wùn Aaron nèn lì wír ve Nyùy‑iì yòŋèn vin, 18wáa dzə e kishiíy ké mbìy ki fó ŋwee woo baà, wùn áwune báʼtí wír veé Isray adzə̀m, á táŋ áwune é kfəə sí kfəə si, mo rám sév sí dzə̀kìn. Á wáa taŋ, a saŋ yír sé vilum e kitu kitu, vee kèʼ fó kiya mbaà, a dù duùn fó mbìy, 19mo Nyùy Tàr‑iì yòŋèn e Mooser. Mooser ku nèn tàŋ áwune bey, e woʼ yee Sinay fèy.
20Fo rám Ruben woo wan Isray mbìyi, wìr dzə̀m woo kèʼ fó kiya mbaà, a dù duùn fó mbìy, wo yì‑iì dzə̀ wù dù rə́r, á sáŋ yír sév é kitu kitu mo kfə́ə sév sí dzə̀kìn e vitǎr vitàr, 21á wáa dzə wír kishóv ghii tàn aànsə̀kìi nshòv ntuùfú e mkweè (46,500).
22Fo rám Simeon, wìr dzə̀m woo kèʼ fó kiya mbaà, a dù duùn fó mbìy, wo yì‑iì dzə̀ wù dù rə́r, á sáŋ yír sév é kitu kitu mo kfə́ə sév sí dzə̀kìn e vitǎr vitàr, 23á wáa dzə kishóv ghii taár aànsə̀kìi nshòv bvə̀ʼə̀ e mtàn (59,300).
24Fo rám Gad, wìr dzə̀m woo kèʼ fó kiya mbaà, a dù duùn fó mbìy, wo yì‑iì dzə̀ wù dù rə́r, á sáŋ yír sév é kitu kitu mo kfə́ə sév sí dzə̀kìn, e vitǎr vitàr, 25á wáa dzə wír kishóv mtàn e ghiì ntuùfú aànsə̀kìi nshòv sitàn e mkweè (45,650).
26Fo rám Juda, wìr dzə̀m woo kèʼ fó kiya mbaà, a dù duùn fó mbìy, wo yì‑iì dzə̀ wù dù rə́r, á sáŋ yír sév é kitu kitu mo kfə́ə sév sí dzə̀kìn e vitǎr vitàr, 27á wáa dzə wír kishóv ghií ntuùfú aànsə̀kìi nshòv sikweè e msaàmbà (74,600).
28Fo rám Issakar, wìr dzə̀m woo kèʼ fó kiya mbaà, a dù duùn fó mbìy, wo yì‑iì dzə̀ wù dù rə́r, á sáŋ yír sév é kitu kitu mo kfə́ə sév sí dzə̀kìn e vitǎr vitàr, 29á wáa dzə wír kishóv ghii kweè aànsə̀kìi nshòv sikweè e mtàn (54,400).
30Fo rám Sebulun, wìr dzə̀m woo kèʼ fó kiya mbaà, a dù duùn fó mbìy, wo yì‑iì dzə̀ wù dù rə́r, á sáŋ yír sév é kitu kitu mo kfə́ə sév sí dzə̀kìn e vitǎr vitàr, 31á wáa dzə wír kishóv ghii kweè aànsə̀kìi nshòv saàmbà e mtàn (57,400).
32Fo wón Joosevi vee rám Efrayim, wìr dzə̀m woo kèʼ fó kiya mbaà, a dù duùn fó mbìy, wo yì‑iì dzə̀ wù dù rə́r, á sáŋ yír sév é kitu kitu mo kfə́ə sév sí dzə̀kìn e vitǎr vitàr, 33á wáa dzə wír kishóv ghii tàn aànsə̀kìi mkweè (40,500).
34Vee rám Manasse, wìr dzə̀m woo kèʼ fó kiya mbaà, a dù duùn fó mbìy, wo yì‑iì dzə̀ wù dù rə́r, á sáŋ yír sév é kitu kitu mo kfə́ə sév sí dzə̀kìn e vitǎr vitàr, 35á wáa dzə wír kishóv ghii baà aànsə̀kìi nshòv sikweè e mtaár (34,200).
36Fo rám Benjamin, wìr dzə̀m woo kèʼ fó kiya mbaà, a dù duùn fó mbìy, wo yì‑iì dzə̀ wù dù rə́r, á sáŋ yír sév é kitu kitu mo kfə́ə sév sí dzə̀kìn e vitǎr vitàr, 37á wáa dzə wír kishóv ghii kweè aànsə̀kìi nshòv sitàn e mtaár (35,400).
38Fo rám Dan, wìr dzə̀m woo kèʼ fó kiya mbaà, a dù duùn fó mbìy, wo yì‑iì dzə̀ wù dù rə́r, á sáŋ yír sév é kitu kitu mo kfə́ə sév sí dzə̀kìn e vitǎr vitàr, 39á wáa dzə wír kishóv ghií saàmbà aànsə̀kìi nshòv sibaà e mntuùfú (62,700).
40Fo rám Asher, wìr dzə̀m woo kèʼ fó kiya mbaà, a dù duùn fó mbìy, wo yì‑iì dzə̀ wù dù rə́r, á sáŋ yír sév é kitu kitu mo kfə́ə sév sí dzə̀kìn e vitǎr vitàr, 41á wáa dzə wír kishóv ghii tàn aànsə̀kìi nshòv mòʼón e mkweè (41,500).
42Fo rám Navtali, wìr dzə̀m woo kèʼ fó kiya mbaà, a dù duùn fó mbìy, wo yì‑iì dzə̀ wù dù rə́r, á sáŋ yír sév é kitu kitu mo kfə́ə sév sí dzə̀kìn e vitǎr vitàr, 43á wáa dzə wír kishóv ghií kweè aànsə̀kìi nshòv sitaár e mtàn (53,400).
44Á wír ve Mooser wùn Aaron‑eè taŋen, a sə́ vilìmbìy veé Isray áwune. A vilìmbìy vìn vi‑iì dzə̀ nshòv sibaà e ghvə̀m, a kee shó ki tíy e rám rəə́ yir. 45Á bèy, lùmèn woó Isray e dzə̀m woo kèʼ fó kiya mbaà, a dù duùn fó mbìy, wo yì‑iì dzə̀ wù dù é shùu rər, wo vé‑eè taŋen mo kfəə́ si‑iì dzə̀kìn 46nèn a dzə kishóv mtàn e ghiì tàn aànsə̀kìi nshòv sitaár e ghií ntuùfú (603,550).
47Yii bèy, á yòʼ‑oò lo tàŋ wír veé ram Levi e mvə̀m kintaŋ fèn. 48Kí‑iì dzə̀ bey, bìʼ fo Nyùy Tàr‑iì yòŋèn ne e Mooser jii, 49«Kù wíy jòʼsì rám Levi ye bó á yòʼ wíy taŋ, e tatí e kintaŋ ke wìr veé Isray. 50Á kù wíy lèm wír veé ram Levi, aá wáa leéy fo *kibàn ké mensàŋ, a leéy fo vifá ve ker veé mvəm wó vi, à kifá kidzə̀m kee fó ki, a geʼ sho. Á lóo ghan, aáwune wáa beʼ kibàn ké mensàŋ, à vifá ve ker və́ ví, lóo tam kibeey, á tùúy vibàn vév é ghaa kibàn ké mensàŋ. 51Lóo dzə, aá sí shóʼoy kibàn ké mensàŋ, a dù sho fomóʼó, bo kù shóʼoy wír veé ram Levi. Lóo dzə ji á sí tuuyì, bo kù tuuy áwune. A wìr wo bó yòʼ dzəə̀n rám Levi kòʼtí e ghaŋ wo, bo á kù laar ŋgaàŋ láarin. 52Wír veé Israyi wíy a tam vév vee vibàn, e ram sí ram sí mo kfəə́ si dzə̀kìn, wir mòʼón mòʼón e wun káŋ, aáwuné sar cícíwàr. 53Wír veé ram Levìi wíy tam vév, e kaarí kibàn ké mensàŋ, e tar ji lá ŋgeʼ si yòʼ gbù e wír veé Israyí kitu. Wír veé ram Levìi wíy a leéy fo kibàn ké mensàŋ ki.»
54Wír veé Israyi kù‑uù yiì kinyo kidzə̀m réŋréŋ mo Nyùy Tàr‑iì suuyin e Mooser.
Currently Selected:
Kintaŋ 1: LNB
Highlight
Share
Copy
Want to have your highlights saved across all your devices? Sign up or sign in
© 2022 CABTAL
