Fəə 36
36
1«Besalel wùn Oholiav kù yíi a fèr vifá vidzə̀m réŋréŋ mo Nyùy Tàr‑iì suuyin. Aá kù yíi a lìm wùn aàŋgàa fèr ámóʼó adzə̀m ve Nyùy Tàr‑iì foon áwune sá vifií vé lìm, aá fíʼ kiíy móo fèr vifá ve kibàn ké Nyùy Tàr vidzə̀m.»
2Mooser súŋnín bey, e nèn jàŋ Besalel wùn Oholiav, à wìr dzə̀m wo Nyùy Tàr‑iì foon wun vifií vé lìm, shilív shé ŋgaàŋ shi kfə́n a lùm sa, e sùúy aáwune ji á tsəə́m á lim. 3Mooser fó áwune vifá vidzə̀m ve wír veé Israyi kì wìyìn shó ji á baʼri á kibàn ké Nyùy Tàr shó. Wíri ku nèn kfə̀n a wìy aàfómo vév ámóʼó kijàvndzə kidzə̀m. 4Kí gháʼ, vé lìme tiír lim. Wìr fèr e dzə̀m màʼtì kifá ke a kù‑uù dzə̀ yiì wun bìʼ kibàn ké Nyùy Tàr, 5e dù, e yèn Mooser, e sùúy sho jii, wíri sí wiy e vifá vi, a ví kuʼ, shaasìn ve dzə̀ á wàa yiì lim ye Nyùy Tàr‑iì yòŋèn ji á wáa yiì. 6Mooser nèn fò sáʼ ji lá lùmèn kìn wiíy yòʼ dzəə fò á fómo ji wo kibàʼrì ke kibàn ké Nyùy Tàr. Sáʼ rə̀ne ghánén kibeey kidzə̀m. Á bèy, wíri nèn yàr, e làa yòʼ dzə́ə a wìy aàfómoó. 7A vifá ve vé‑eè foon ne vi‑iì kùʼnìn ne, e shaà ve yì‑iì dzə̀ á yiì lim rə̀n sho.
Kibaʼrì ke kibàn ké Nyùy Tàr
(Fəə 26.1‑37)
8Vé fèr ámóʼó nèn a fèr ndzə̀y seé wǔn kibàn ké Nyùy Tàr, a kù‑uù fer wír ve vé‑eè kiìn ne lim, e shaàsìn. Ndzə̀y sin si‑iì dzə̀ vintsə̀m e ghvə̀m, a dzə̀ ndzə̀y ye á baan e làv wo fəvír woo fèm, e tàtí wùn à wo wù səə́ne moo yúv, à wo wù səə́ne moo yòm, à wo wù baŋ ji rèm, aá tsə́m nshwìnin *kifa keé yuv ke kí kér vav si shó. 9Vintsə̀m vé ndzə̀y vidzə̀m vi‑iì kér mfìʼ e mòʼón, kóy saàmbà fo vidà, a mbvə̀ʼ dzə̀ kóy e fur. 10Áwune nèn tsəə̀mé vee vitàn e kilàŋsìn, ví kfə́n kiŋkàŋ kimòʼón, e yiì sa e vee vitàn vi réŋréŋ bey. 11Á nèn wàyrí dzə́ŋ si é shuù se ndzə̀y see fó ghaŋ, e yiì bèy viŋkàŋ vee vibaà vidzə̀m, aá fér dzə́ŋ sìn e ndzə̀y se sí səə́ne moo yúv sí. 12Fo kiŋkàŋ ké ndzə̀y ké mbìy ki, vé‑eè wàyrí dzə́ŋ si mtàn, e wàyrí e kímóʼ kí sá bèy, dzə́ŋ sìy si wáa kìʼnìn. 13Á nèn nàŋsín viŋgov mtàn e *kisha ke mbàm ke baar kí, e wòvsín ndzə̀y sin sho, sí nèn kfə̀n simòʼón se dzə̀ sí lìm kibàn kifur.
14Á kfə̀n‑eè fèr vintsə̀m vé ndzə̀y vímóʼ ví nshòv mòʼón e ghvə̀m a dzə̀ e wúy bvəyi ji sí yíi a neŋ e kitu ke ndzə̀y seé wǔn kibàn. 15Vintsə̀m vee nshòv mòʼón e ghvə̀m vìn vi‑iì dzə̀ réŋréŋ vidzə̀m, kóy saàmbà e kimbéʼ ki fó vidà, kóy e fur fo mbvə̀ʼ. 16Vé‑eè tsəə̀mé vee vitàn kiŋkàŋ kimòʼón, e tsəə̀mé vee ntuùfú kiŋkàŋ kfə́ jeéy, 17e wàyrí dzə́ŋ si mtàn e kiŋkàŋ ke ndzə̀y ké mbìy ki, a dzə̀ é mbìv yee mòʼón, e wàyrí e kímóʼ kí sá bèy, ji á tátí á ké mbìy ki shó. 18Á nèn fèr viŋgov mtàn e kisha kee *brons ki, e wòvsín dzə́ŋ si shó, e tàtí viŋkàŋ vé ndzə̀y vee vibaà ji ví fer kibàn kifur. 19Vé‑eè fèr sá vikfə́vsì vímóʼ ví vibaà ve ví yíi a sətí kibàn fó yuv, aá fér kímóʼ kí e gúrí, e fèr kímóʼ kí e jùv nyàm ndzə̀v.
20Á kfən fèr vintàràŋ ve tiirín ví e kicí kee *akaasia ki, 21a ví‑iì dzə̀ kóy e baà e kimbéʼ ki fó vidà, mbvə̀ʼ wáa dzə ntàm se kiwo sitaár. 22Vé‑eè bèéy shóy sé kintàràŋ see sibaà fo vé‑eè yíi a tatí e viyìy, e bèéy bèy, vintàràŋ ve kibàn vidzə̀m.
23Fo mbìv kibàn ye yì leey tsə́n, vé‑eè fèr vintàràŋ mbaà, 24e fèr viyiy mkweè e kisha ke mbàm ke fəvír kí, a dzə̀ ve á yíi a wayrí e sar se vintàràŋ vee mbaà. Kintàràŋ ki‑iì kér viyiy vibaà mo virə́ʼ ve beeyín ví dzəə̀n.
25Fo mbìv kibàn ye yì leey fó kùy, vé‑eè fèr sá vintàràŋ mbaà, 26e kfə̀n fèr viyiy vee kisha ke mbàm ke fəvír kí mkweè, viyiy vi wáa dzə e sar kintàràŋ vibaà vibaà, vintàràŋ vidzə̀m.
27Fo kirəv ké bàm kí, e mbìv yee fo shùy yii nəə, á nèn fèr vintàràŋ vee fó ntuùfú, 28e kfə̀n fèr sa vintàràŋ vímóʼ ví vibaà, a dzə̀ veé buu se kibàn see fó bàm. 29Vé‑eè fèr vin, ví táʼám fó sar, e tàtí fo yuv fo kfə́vi‑iì dzəə̀n, kù bey, buú see sibaà sidzə̀m. 30Vintàràŋ veé kirəv ké bàm kí, ví nén a dzə waamé. Viyiy vee fó vi wáa dzə nshòv ntuùfú e ghvə̀m, aá fér e kisha ke mbàm ke fəvír kí, a ví dzə̀ vibaà vibaà, e sar kintàràŋ.
31Vé‑eè fèr sá mbàŋ se sí ghár vintàràŋ ve kibàn e kicí kee akaasia ki, sí wáa dzə nshòv sitàn e ghvə̀m, sitàn fo vintàràŋ veé kirəv keé mbìv yee tsə́n, 32sitàn fo keé mbìv yee kuy, sitàn sa fo ké bàm kí, e mbìv yee fo shùy yii nəə. 33Mbàŋ ye yì‑iì timnìn kirə́v dzə̀ kfə́, a yì kéʼ fó mbìy, e dù, e màysì fo bàm e fur. 34Mo á fèrìn vifá vìn, e nèn lì kisha ke mbàm ke baar kí, e làʼtí e wǔn vintàràŋ, e kfə̀n làʼtí e wǔn mbàŋ si, kí sə́tí, e nèn fèr akfə́v ve á yíi a ghar mbàŋ si, aá ku fèr sa e kisha ke mbàm ke baar kí.
35Á nèn fèr raŋ e ndzə̀y ye á baan e làv wo fəvír woo fèm, e tàtí wùn à wo wù səə́ne moo yúv, à wo wù səə́ne moo yòm, à wo wù baŋ ji rèm. Á kfə̀n‑eè tsə̀m nshwìnin kifa keé yuv ke kí kér vav si#36.35: nshwìnin kifa keé yuv ke kí kér vav si: Leéy: 25.18. shó. 36Raŋ rə̀ne‑eè kér e vitom vímóʼ ví vikweè ve á fèrìn e kicí kee akaasia ki, e làʼtí kisha ke mbàm ke baar kí é wùn wó, kí sə́tí. Viŋgov və́ ví wáa dzə sa kisha ke mbàm ke baar kí, a viyiy ve vitóm vee vikweè vi tíy sho vi dzə̀ vee kisha ke mbàm ke fəvír kí.
37Á nèn kfə̀n fèr ndzə̀y se á sə́ti shúu kibàn shó, aá fér sá e ndzə̀y ye á baan e làv wo fəvír woo fèm, e tàtí wùn à wo wù səə́ne moo yúv, à wo wù səə́ne moo yòm, à wo wù baŋ ji rèm, aá kfən nàŋsín e tsə̀m. 38Á nèn fèr vitóm ve nshìy rə̀n vitàn e kicí kee akaasia ki, e làʼtí kisha ke mbàm ke baar kí é wùn wó, kí sə́tí. Á kfən fèr viŋgov e kisha ke mbàm ke baar kí, e fèr viyiy və́ vitàn e kisha kee brons ki.
Currently Selected:
Fəə 36: LNB
Highlight
Copy
Compare
Share
Want to have your highlights saved across all your devices? Sign up or sign in
© 2022 CABTAL
