Fəə 35
35
Nsər yee kùm kishiíy ké bam
1Mooser kùm kfəə́ yeé Isray e dzə̀m, e sùúy aáwune jii, «Vèn yuúrí vinyo ve Nyùy Tàr yòŋèn ji vèn wáa yiì vi. 2Vèn kér a vishiíy ntuùfú vé a lìm lim yén. Ke kí meen ji saàmbà, bo dzə̀ á kishiíy ké bam, a dzə̀ kishiíy kee jeéy kí ke á meemè bìʼ Nyùy Tàr. A wìr yiì lim e kishiíy fóo fèy, bo á kù yúyri a ŋgaàŋ. 3Lá vèn yòʼ tòn a və́y e věn virə̀ʼ ve vèn dzə́ sho e kishiíy ké bam.»
Vifá ve kibàʼrì ve kibàn ké Nyùy
(Fəə 25.1‑9)
4Mooser kfən sùúy e kfəə́ yeé Isray e dzə̀me jii, Nyùy Tàr yoŋ a ji 5wíri báʼtí, e fò á cu e Nyùy Tàr. Wìr wo wù koŋ, e fo cu e Nyùy Tàr, é wù fó *kisha ke mbàm ke baar kí wùn à ke fəvír kí, à kisha kee *brons ki, 6wùn à ndzə̀y yee làv wo fəvír woo fèm, à làv wo wù səə́ne moo yúv, à wo wù səə́ne moo yòm, à làv wo wù baŋ ji rèm, à ndzə̀y ye á fèrìn e wúy bvəyi, 7wùn à gúrí, à juv nyàm ndzə̀v, à vicí vé kibàʼrì vee *akaasia vi, 8wùn à meŋgvə́r me làm mè, à virə̀ʼtìn ve meŋgvə̀r wùn à vé kilay ví, 9à *síbaŋ yee oniks wùn à síbaŋ símóʼ sí se á yíi laʼtí e taà cù shiŋkèéy shé kikum#35.9: shiŋkèéy shé kikum: Leéy: 25.7., e kfə̀n laʼtí e wun kifìn keé nsaŋ#35.9: kifìn keé nsaŋ: Leéy 28.4, 15‑30..
Vifá veé mvə̀m kibàn ké Nyùy Tàr
(Fəə 39.32‑43)
10Wìr woo ŋgaà fèr e dzə̀m e věn mvəm ku wìy, a yiì lim ye Nyùy Tàr yòŋèn ji á wáa yiì e dzə̀m. 11Á ku bàʼrì kibàn ké Nyùy Tàr, e fèr kikfə́vsì ke kibàn wùn à viŋgov və́ ví, à vintàràŋ vi, à mbàŋ si, à vitóm vi, à viyiy vi. 12Á fer sá ŋkùv mensàŋ wùn à vintoòr və́ ví, à nsər ye dzəə̀n kirə́ʼ ké kiman, à raŋ ye yí kiŋ fóo, 13e kfə̀n fèr kidàŋ wùn à vintoòr və́ ví, à vifá və́ ví, à kibán ke cù kee ké Nyùy Tàr kí. 14Á fer sá kitiir ke làm wùn à vifá və́ ví, à lam sə́ sí, à meŋgvə́r me làm mè, 15e kfə̀n fèr *kíy cù kilay wùn à vintoòr və́ ví, à meŋgvə́r me yoʼ mè, à kiláy ke rəʼtìn kí, à ndzə̀y se á sə́ti shúu kibàn ké Nyùy sho si, 16aá nèn fèr *kíy cù woo wó cù ye tonèné, e fèr kintaàr kfə́ e brons, e fèr vintoòr və́ wùn à kibér ke vifa və́ ví, à màkìghìn wo á wíy a sù wó wùn à wuú shó, e fèr sa kiyiy ke màkìghìn. 17Á fer sá ndzə̀y se sí kiŋ maàndzə wùn à vitóm və́ ví, à viyiy vév ví, à ndzə̀y se sí sə́ti shúu kày wo wú nəə e maàndzə kibàn ké Nyùy Tàr, 18e fèr viŋkùm ve kibàn ké Nyùy wùn à viŋkùm ve kày yeé maàndzə vi, aàkfəə̀ véví, 19e nèn fèr ndzə̀y se á yíi tsəm kijuŋ ji atàá cùu yií lóo dù ji á yii cu e mǒ kirə̀ʼ kee jeéy kí, aá maʼ. Kù dzə̀ ndzə̀y sin see jeéy se Aaron wùn à wóné yíi a màʼ, e bó a yiì cu.
Wíri wíy e vifá vév vé cù vi
20Á bèy, wír veé Israyi nèn lò fo Mooser si, e dù, a baʼtí. 21Wìr dzə̀m wo wù‑uù kér shií, a shilív sə́ shí lum e kinyò fèn nèn lò, a wìy e vifá vi jeéy jeéy, a fo ji cu ye á wáa bàʼrì a *kibàn ké ntàsín shó, a fèr vifá veé kirə̀ʼ ké cù, e kfə̀n a fèr ndzə̀y sé atàá cù sho. 22Á ku nèn a wìy bèy, à vilum, à vikìy. Wìr dzə̀m wo shilív sə́ shí‑iì lumè wáa wìy e vinta vi wùn aàyèreŋe, aàndzə̀ŋgwáŋé, aàshàŋe, à vifá ve sùsù ve á fèrìn e kisha ke mbàm ke baar kí, a cù Nyùy Tàr shó. 23Wìr dzə̀m wo wù‑uù kér ndzə̀y yee làv wo fəvír woo fèm, à làv wo wù səə́ne moo yúv, à wo wù səə́ne moo yòm, à làv wo wù baŋ ji rèm, à ndzə̀y ye á fèrìn e wúy bvəyi, à ŋgaà gúrí, à ŋgaà jùv nyàm ndzə̀v ku nèn a wìy sa sho. 24Wír ve yì‑iì dzə̀ á wàa ker kisha ke mbàm ke fəvír kí wùn à kisha kee brons ki wáa wìy sa, a fo cu sho e Nyùy Tàr. Wír ve vé‑eè kér kicí kee *akaasiàa wáa wìy sa sho ji á wáa yiì a lim símóʼ sí shó. 25Vikìy adzə̀m ve vé‑eè kiìn móo tsəm vifáa kú a wìy e vifá ve áwune tsəmen e làv wo wù səə́ne moo yúv wùn à wo wù səə́ne moo yòm, à wo wù baŋ ji rèm, e kfə̀n a wìy e ndzə̀y se á baan e làv wo fəvír woo fèm. 26Vikìy adzə̀m ve melív mev mè‑eè lumè, aá kfə̀n kì móo te làv e wúy bvəyi ku nèn a te. 27Vilìmbìy vi wáa wìy kév e *síbaŋ se á yoŋ ji oniks wùn à símóʼ sí sá ji á láʼtí e taà cù shiŋkèéy shé kikum, e kfə̀n làʼtí e wun kifìn keé nsaŋ. 28Á wáa wìy sa e virə̀ʼtìn vi wùn à meŋgvə́r me làm mè, à virə̀ʼtìn ve meŋgvə̀r me yoʼ mè, à kiláy ke rəʼtìn kí. 29Á mo wír veé Isray adzə̀me‑eè wiy e vifá ve kibàʼrì ve Nyùy Tàr‑iì suuyin ji Mooser sə́ fo áwune ví. Aá wiy bèy, cu Nyùy Tàr shó e kishéʼrì ki, kù mo shilív shé wìr shi‑iì lumè.
Vé lìm ve vé‑eè baʼrì kibàn ké Nyùy Tàr
(Fəə 31.1‑11)
30Mooser nèn sùúy e wír veé Israyi jii, «Vèn leéy, e yèn mo Nyùy Tàr shoʼon ne Besalel woo wír woo rám Juda, wo tàr wov dzəə̀n Uri woo wan Hur. 31Wù bùʼ ne wun e Kiyoy ke wun woo Nyùy#35.31: Kiyoy ke wun woo Nyùy; Kìn jii: vitaáví vé wun woo Nyùy. ki, e fò wun kiwó ke fèr, wù wáa ker vifií vée lìm kfəə́ se lìm sidzə̀m. 32A dzə̀ wù rə̀tì, e fèr vifá, ví wàa dzə jeéy, a fèr vifá ve á fer e kisha ke mbàm ke baar kí kidzə̀m, kìn dzə̀ ve á fer e kisha ke mbàm ke fəvír kí, kìn e kisha kee brons ki, 33a sem tíy see síbaŋ, a fèr vifá ve sùsù sho, e kfə̀n a sem vicí, e bóo kfə̀n a yiì lim símóʼ sí sidzə̀m se wìr fèr yii limè. 34Nyùy Tàr kfə̀n fò ne sa wun vifií vée yeʼéy wír ámóʼó lim see shooy, e kfə̀n fò sá vifií vee shooy e Oholiav woo wír woó ram Dan, a tàr wov dzə̀ Ahisamak. 35Nyùy Tàr fò ne áwune vifií vé kfəə se lìm sidzə̀m se yii lim wír ve á sém vifá ve semén ví wùn à ve á sáŋ nsáŋtií, à ve á náŋsin, tsə́m ndzə̀y e làv wo wù səə́ne moo yúv wùn à wo wù səə́ne moo yòm, à wo wù baŋ ji rèm. Á kfə̀n kì sá móo ba ndzə̀y, bo taaka ndzə̀y yee làv wo fəvír woo fèm. Áwune dzə̀ ben, aá kì fer feyì. Á dzə̀ kibáʼtín fó yiì lim e dzə̀m.
Currently Selected:
Fəə 35: LNB
Highlight
Copy
Compare
Share
Want to have your highlights saved across all your devices? Sign up or sign in
© 2022 CABTAL
