Fəə 32
32
Wír veé Israyi fér shibvə̀m, a ghvəm
(Remrí 9.6‑29)
1Wír veé Israyi yiì lò, e yèn ji Mooser dù ne, e laàtí a e gwan, e làa yòʼ dzə́ə səy, áwune nèn bàʼtí e Aaron ghaŋ, a ghiʼ wun jii, «Shaà, e fèr nyùy#32.1: fèr nyùy; Kìn jii: fèr anyùyi., e fò e vèr, é wù wáa dànèr ver. Ké Mooser və̀y wo wù‑uù fəərin ver fó wòŋ Ejiv, bó vèr yòʼ kì kinyo ke kí kooyin wun.»
2Aaron suúy aáwune jii, «Vèn kati ri ayèreŋ vee *kisha ke mbàm ke baar kí fo vikìy véné vitùʼùr, à fo wón vén vee vikìy wùn à vee vilume, e wìy, e fò e mò.» 3Wìr dzə̀m nèn shòʼtí ayèreŋ vév vee kisha ke mbàm ke baar kí, e wìy, e fò e Aaron. 4Wù sə́, e tòn, e fèr wan nàʼ woo lumèn sho.
Wíri yén, e nèn a ndzəʼ jii, «Éèy Isray, Nyùy wor éèy. Nyùy wo wù‑uù fəərin ver fó wòŋ Ejiv və̀ne.»
5Aaron yén bey, e nèn bòm kíy cù e wàn nàʼ və̀y mbìy, e fò sáʼ e wír veé Israyi jii, «Á bvəə́shi, a ker a ŋkàʼ wóo ghvəm Nyùy Tàr.» 6Wù yòŋ bèy, yì bvəə́shí, e jàv, wír veé Israyi wìy e nyám si, a yiì cu sho, ton se tonèn sí, seéri se á yíi kfər ji cu kikòŋnìn. Á yiì bèy, e nèn dzə̀ʼə̀m, a yi vitú vév, a no meluʼ, e yiì lò tsə̀ə́m ceŋ, a sheʼrí shibvə̀m.
7 Nyùy Tàr nèn sùúy e Mooser jii, «Á səy cér, e yèn wír vé ve wò‑oò yiìn, á fəə́, e kòʼ fó wòŋ Ejivi. Áwune yiì ne joonè. 8Áwune kù lò ne, e màʼtì dzə́ə ye mò‑oò tirin áwune shó, e fèr wan nàʼ e kisha ki ji shibvə̀m, a ghvəm, a seerí nyám si, a cù sho. Jòkìnyàʼ, aá yii bèy, yoŋ ji dzə̀ á nyùy wov wo wù‑uù fəərin áwune fó wòŋ Ejiv.» 9Nyùy kfən sùúy e Mooser jii, «M kì ji wír vìne tàv kitú feyì. 10Leéy kinyo ke m lo, e yiì aáwune kí, lá à yòʼ jìvír mo. M shwìíy ne kilòŋ bìʼ áwune, a m kù‑úù laar áwune. M laarì, é m nèn yiì, é yé yee rámé wìy a dzə kitúm ke ghaʼán kí.»
11Mooser yú bey, e kù nèn a lon Nyùy Tàr woo Nyùy və lónén, a suúy jii, «Éè Nyùy Tàr, à kì yíi a shwiíy kilòŋ rú bìʼ wír vé bèn à, wír ve wò‑oò fəərin fó wòŋ Ejiv e vitaáví vé ve ghaʼtín ví. 12A dzə̀ à wàa tàʼ rú ji wír veé Ejivi wìy sìíy, a nyè lám ji wò‑oò fəər wír vé fo Ejiv ji à laar áwune áàgwan, aá lay fó kitu ke nsay ŋkuuŋkùŋ à? Ku yàr kilòŋ ke shwiiyín kí, e kùvsín kwaʼtì yé yee ji à kù laar wír vée. 13Kuúmé aŋgàa lìm vé vee Abraham wùn à Aysi, à Jakovi. Kuúmé ji wò‑oò lìʼ, e kàn ké kee kitú ji à wíy kùʼùr a rám yév, é yí wáa dzə nyanyày moo mejiy meé yuv, áà kfən fò rám rən nsay ye wò‑oò kàʼàn atàr vév shó, é yì wáa dzə ji yéev ŋkuuŋkùŋ.» 14Á bèy, Nyùy Tàr nèn kùvsín kwaʼtì ye wù kì sí kérí ji wun laar a wír və́, e làa yòʼ dzə́ə laàr áwune.
15Mooser nèn sə̀y fó gwan, a wù sí kfə́n e bàm e viwaŋ ve tiy ví vibaà ve á saŋen ntò se *mensàŋ sho mbìv sidzə̀m, à fó mbìy, à fó bàm. 16Kù‑uù fèr Nyùy Tàr viwaŋ ve tiy vin, kfən sàŋ wun nsər se sí‑iì dzəə̀n shó. 17Joshua‑aà sə́y wùn Mooser, wù lò, e yù, a wíri rəə́me, e sùúy e Mooser jii, «M yú, a shirəə́ shi kóʼ fo vibàn vé kilaʼáy moo shé rər bey.»
18Mooser sháʼnín jii, «Àáy, rəə́ və̀ne yòʼ koó ji wó wìr ve á soon, wú yòʼ koó sa ji wó wìr ve á tònèn áwune. M yú rəə́ a dzə̀ wó yòv.»
19Mooser lòo meʼ fo mentsə̀m, e yèn shibvə̀m shee wan nàʼ shìy, e kfə̀n yèn, a wíri ceŋ, kaári, kí ŋáv wun, wù sán viwaŋ ve tiy ve wù‑uù béʼé e nsay, ví bvə́ʼə́y é sar gwan. 20Wù nèn dù, e boò shibvə̀m she vé‑eè fèrìn shiy, e tòn, e jò, shí kfə́n é meŋkfə̀ŋ. Wù nèn lì, e shwìr é mendzə̀v, e kàn wír veé Isray, á nó. 21Mooser dzə́r e Aaron jii, «Wír vìne kì yèe le e wò, é bo à yii, aáwune jáy kfə́ə jay və̀n?»
22Aaron bìnèr jii, «Tàr wor, lá à yòʼ shwìíy kilòŋ wòsò. À kì sá kijuujùŋ mo wír vìne dzəə̀n kibáʼtín fó yiì kinyo ke bi kí. 23Áwune‑ee suúy e mò jii, m fer á nyùy#32.23: m fer á nyùy; Kìn jii: m fer á anyùy., e fò aáwune, é wù wáa dànèr a áwune. Áwune yòʼ kì á kinyo ke kí kooyin Mooser və̀y wo wù‑uù fəərin áwune fó wòŋ Ejiv. 24M nèn yòŋ aáwune jii, a fə̀m kér la yèreŋ, wù shòʼ, e fò á e mò. Áwune ku nèn shòʼtí, e fò, m máʼ e və̀y, e lòo sìn, a fəə́ ne wan nàʼ və̀n.»
25Mo Mooser yenen ji Aaron màʼtì a ne wíri, á wáa yiì mo á koŋè, e shòór vitú aàŋgaà vév vibàné si, 26wù nèn tìím e shùu kày, e dzəə ye yì nəə e kilaʼáy, e sàʼ jii, «Wìr wo wù ghvə́m a dzə̀ Nyùy Tàr, wù kfə́n fen.» Á bèy, wír veé ram Levi adzə̀me nèn bàʼtí e wun ghaŋ. 27Mooser suúy aáwune jii, Nyùy Tàr woo Nyùy wìr veé Isray suuy a jii, wìr dzə̀m li á nyùy rə rə̀r e wun kiyeŋ, e ghànén a e nsàn se vibàn, e kèʼ fo shùu kày wúmóʼó, e dù e wúmóʼó, e yùyrí a afə́r və́ wùn à ŋkar sə́ sí, aàŋgàa shùu lav vəə́. 28Wír veé ram Levìi ku nèn yùnín Mooser, e yùyrí wíri é kishiíy fóo fèy moo ansə̀kì ataár bèy. 29Mooser suúy aáwune jii, «Vèn shòʼ ne vitú vén lán ji wír vee jeéy ji atàá cù ve á wíy a lìm fo Nyùy Tàr. Mo wìr mòʼón mòʼón fo vèn yuyrin ne wán və, e yùyrí fə́r və, bo Nyùy Tàr bùʼ ne ven lán e mbùʼmé və.»
30Mooser bvəə́shí, e sùúy e wíri jii, «Vèn jày jay wo tavín féyì. Yii bèy, m kfə̀n‑éè kóʼ é gwan, e dù, e yèn Nyùy Tàr ji m sà‑áà lóo lon, é wù laysin ajay vén á.» 31Mooser nèn kfə̀n kòʼ é gwan, e tìím e Nyùy Tǎr si, a lon wun, a suúy jii, «Éè Nyùy Tàr, wír vìne jày jay wo tavín féyì. Áwune fèr shibvə̀m e kisha ke mbàm ke baar kí, a ghvəm ji Nyùy. 32Ku làysìn jay wov. Aà dzə̀ làa yòʼ làysìn, à fə̀ə́r yír yém fo wò ŋwàʼ wo à saŋen yír sé wìr vé sho.»
33 Nyùy Tàr bìnèr e Mooser jii, «M yíi fəə́r yír sí fó ŋwàʼ, a dzə̀ sé wìr ve á jayin kinyo e mò. 34Ku yòʼ dù lèn, a tsəəné wíri, a dù sho e kirə̀ʼ ke mò‑oò suuyin ne e wò. Á kuumé ji nshìylav yem yíi a dù fo wò mbìy. Yii bèy, ghán sí yíi gheén, é m maʼ ŋgeʼ e wír vìné kitu, bìʼ jay wov.»
35Á bèy, Nyùy Tàr nèn màʼ yàsí wo ghaʼán e wír vìne wùn, bìʼ fo vé‑eè ghiʼin Aaron, wù fèr shibvə̀m shee wan nàʼ.
Currently Selected:
Fəə 32: LNB
Highlight
Copy
Compare
Share
Want to have your highlights saved across all your devices? Sign up or sign in
© 2022 CABTAL
