Fəə 31
31
Aŋgàa fèr kibàn ké Nyùy Tàr
(Fəə 35.30–36.1)
1 Nyùy Tàr suúy e Mooser jii, 2«Leéy, e yèn mo m shoʼon ne Besalel woo wír woo rám Juda, wo tàr wov dzəə̀n Uri woo wan Hur. 3M bùʼ ne wun e Kiyoy kém kí,#31.3: M bùʼ ne wun e Kiyoy kém kí; Kìn jii: M bùʼ ne wun e vitaáví vém ví. e fò wun kiwó ke fèr, wù wáa ker vifií vée lìm kfəə́ se lìm sidzə̀m. 4A dzə̀ wù rə̀tì, e fèr vifá, é ví wáa dzə jeéy, a fèr vifá ve á fer e *kisha ke mbàm ke baar kí kidzə̀m, kìn dzə ve á fer e kisha ke mbàm ke fəvír kí, kìn e kisha kee *brons ki, 5a sem tíy see *síbaŋ sí, a fèr vifá ve sùsù sho, e kfə̀n a sem vicí, e bóo kfə̀n a yiì lim símóʼ sí sidzə̀m se wìr fèr yii limè. 6M shòʼ ne sa Oholiav woo wan Ahisamak, woo wír woó ram Dan ji wù wáa sə Besalel. M kfə̀n fò ne sa vifií vee jeéy ví e vé fèr ámóʼó adzə̀m ji áwune fíʼ a fèr vifá vidzə̀m réŋréŋ mo m naàrìn e wò. 7Áwune wíy fèr *kibàn ké ntàsín wùn à ŋkùv mensàŋ, à nsər rə shó, à vifá vidzə̀m veé kibàn ví, 8e kfə̀n fèr sa kidàŋ wùn à vifá və́ ví, à kitiir ke làm ke á wíy fèr e kisha ke mbàm ke baar kee wúntí kíwun ki, e fèr vifá veé ghaŋ wo vidzə̀m, e kfə̀n fèr *kíy cù kilay. 9Áwune wíy fèr sa *kíy cù woo wó cù ye tonèné, à vifá və́ ví, à màkìghìn mendzə̀v, à kiyiy kfə́ kí shó, 10e kfə̀n fèr sa ndzə̀y sé Aaron se á wíy naŋsín, e tsəm ji ndzə̀y sé taà cù, e kfə̀n fèr sé won və́ se áwune wíy a lìm sho ji atàá cù. 11Áwune wíy fèr sa meŋgvə́r me yoʼ, à kiláy ke rəʼtìn kí ke á wíy a tòn e mǒ kirə̀ʼ kee jeéy. Áwune kù wíy fèr vifá vìn vidzə̀m réŋréŋ mo m naàrìn e wò.»
Nsər se kishiíy ké bam
12 Nyùy Tàr nèn sùúy e Mooser jii, 13«Suúy e wír veé Israyi ji m yoŋ a jii, ‹Vèn kú a lèm kishiíy kém ké bam ki. Dzə̀ kisəəm ké vèr à wír veé Israyi, a kí kù wíy a dzə bèy e ŋgwàʼ sí ŋgwàʼ si ji vèn fiʼ kìíy ji dzə̀ mo woo Nyùy Tàr wo wù kù yii, bo vèn wáa dzə aránén ji wír vém.
14« ‹Vèn kú a lèm kishiíy kin ki ji kishiíy kee jeéy fo vèn. A wìr bìvír, bo á fəər fo wír vəə́ mvəm. 15Vèn lim líme vishiíy ntuùfú, lóo dzə e kee saàmbà ki, bo sì kishiíy ké bam, kishiíy ke á meeme bìʼ Nyùy Tàr, a dzə̀ kishiíy kee jeéy kí. A wìr lìm kifá e kishiíy fen, bo á kù yúyri ŋgaàŋ. 16Wír veé Israyi kù wíy a lèm kishiíy ké bam kìn ji ŋkàʼ mo rám sév sí wíy a dzə, é wáa dzə *mensaŋ me mè jòʼsìn, e dù, e mày. 17Wíy a dzə kisəəm ké vèr à wír veé Isray ke kí jòʼsìn jii, mò‑oò bòm yúv wùn à nsay kishiíy ntuùfú, wáa dzə e kee saàmbà ki, m nèn màʼtì lim, e meèmè.› »
18 Nyùy Tàr màysì, e sùŋnín e Mooser e Gwan Sinay, e nèn fò viwaŋ ve tiy vee vibaà ve ntò se mensàŋ si dzəə̀n shó, a sáŋ wun woo Nyùy e kiwó kfə́ kí.
Currently Selected:
Fəə 31: LNB
Highlight
Copy
Compare
Share
Want to have your highlights saved across all your devices? Sign up or sign in
© 2022 CABTAL
