Fəə 1
1
Á nəʼsì wír veé Isray e Ejiv
1Wón Jakov ve wùn áwune, à kfə́ə sév sí‑iì duùn é Ejivi dzə̀ jii, 2Ruben wùn à Simeon, à Levi, à Juda, 3à Issakar, à Sebulun, à Benjamin, 4à Dan, à Navtali, à Gad, e lì Asher. 5Kfə́ə Jakov e dzə̀m, e lì Joosev wo wù‑uù siìn é Ejivi‑iì dzə̀ wír msaàmbà.#1.5: msaàmbà: Leéy sá: Kèʼlo 46.27. Yii bèy, ŋwàʼ woo fó ŋgùʼ wúmóʼó kér jii, nshòv sitàn e msaàmbà. Dzə̀ kíwun ke kí fəəsin é Lìm Aŋgàa Ntum 7.14. Kímóʼ kí dzə̀ jii, e wìr Hibru liì, á yòʼ yii táŋ wón vee vikìy.
6Ghán sí dù, Joosev wùn aàfə́r vəə́, à ŋgwàʼ yeé ghan fóo fèy nèn kpùkír. 7Yii bèy, rám yév yee wír veé Israyi wáa dzəə́, a kùʼ feyì. Áwune kùʼ, e rùn woŋ woo shooy, a beemé e ŋàáŋàŋ.
8Á nèn wìy kòʼór fon wùmòʼ é wòŋ Ejiv, a bó wù yòʼ kì kinyo kùm Joosev. 9Wù suúy e wír vəə́ jii, «Wír veé Israyi kùʼ ne e ŋàŋ, a beemé vèsən. 10Vèsən shwéʼ dzə́ə yée sə̀r fo á wáa kùʼ, e dù, e meé e kiliŋ ke a rə́r sí kì gbù e vèsə́n kitu, áwune tòm aŋgàa vibàn vesən, e fùnèn vèsən, e lèʼ fó wòŋàn.» 11Mo wù suuyin bey, wùn à wír vəə́ nèn lèm vitú ve lìm ji ví wáa rəʼə́y a wír veé Isray e líme, aá wáa bom ŋkàlaʼ yee Pitom wùn à yee Rameses ji wáa dzə vitáv vé vifa ve yi ve Farao#1.11: Farao: Dzə̀ dzə́ə yìmòʼ ye vé‑eè yoŋ afon veé Ejiv sho, a nsàv dzə̀ aáwuné làm ji «ntoʼ ye kuʼùn.», wun woo fon woó Ejiv. 12Mo vé‑eè nəʼsì áwune bey, áwune kù‑uù kuʼ, sə́ fó səə́n. Wír veé Ejivi nèn lò, a fàn áwune fánen, 13e nèn màysì, a nə̀ʼsì áwune, á wáa lìm lim, a sòrkìr. 14Wír veé Ejivi‑iì yiì, dzəʼə̀me wáa tav, a ghaʼ áwune, bìʼ lim kishàʼàr wùn à yé nsay ye tsəmén, à lim seé kwaʼ si sidzə̀m. Áwune kú a lìm lim sìn sidzə̀m, a sòrkìr.
15Fòn woó Ejiv nèn lò, e sùúy e Shifra wùn Pua, ve yì‑iì dzəə̀n amáŋkooy wìr veé *Hibru jii, 16«Vèn lóo koóy wón wìr vee Hibru, yén wán woo lumèn, á yùyrí, yén woo wiíy, á màʼtì e tin.» 17Yii bèy, amáŋkooy vìne wáa dzə wír ve vé‑eè fan Nyùy, á nèn a lèm wón vee vilum atin, e làa yòʼ dzə́ə a yiì mo fòn‑eè suuyin. 18Á bèy, fòn toóy amáŋkooy vìy, e dzə̀r aáwune jii, «Vèn mùm kee ben a dzə̀ ka? Vèn yèe, e bó a màʼtì wón vee vilum atin?»
19Áwune bìnèr e fòn jii, «Vikǐy Hibrùu yòʼ dzə̀ á moo vikìy veé Ejiv bèy. Áwune shwìr á e wan wo dzəə́n féyì. Wiíy yú wán, wù nèn dzə̀ə́ a dzəə́n, é bo máŋkooy wáa wìy.» 20Nyùy ku nèn a leéy fo amáŋkooy vìyi, wír veé Israyi kú a kùʼ, a ghaʼtí ghaʼtín. 21Bìʼ fan Nyùy ye amáŋkooyi‑iì kérí, Nyùy nèn fò áwune sév see kfəə́.
22Fòn nèn lò, e fò sáʼ e wír vəə́ adzə̀m jii, «A wìr Hibru dzə̀ə́ wán woo lumèn, vèn màʼày é ndzəv yee Naay, wù dzəə́ woo wiíy, á lèm e tin.»
Currently Selected:
Fəə 1: LNB
Highlight
Copy
Compare
Share
Want to have your highlights saved across all your devices? Sign up or sign in
© 2022 CABTAL
