Lim Aŋgàa Ntum 5

Ananiar wùn Safira bòʼtí Nyùy

1Wìr wùmòʼ wáa dzə sa fo, a yír rəə́ dzə̀ Ananiar, yé wiiy və Safira. Wù nèn fiìnè sa kibvəə̀ kfə́ ké sum kímóʼ kí, 2wùn wiíy súŋnín, e bàr mbàm. Wù lì kibér, e wìy, e fò áàŋgàa ntum Jesuse. 3Pita nèn dzə̀r shó jii, «Ananiar, à biìmé, Satan nəə́ e wò shiliv, à wíy, a boʼtí Kiyoy ke Ranén kí ji ka? 4À fiìnè súm a dzə̀ wó, a mbàm si dzə̀ sé. Yií ka, bo à yii kinyo kee ben? À yén ké ji à bóʼti wír, aà bóʼti a dzə̀ Nyùy.» 5-6Ananiar yú bey, e kù nèn gbù fo nsay, e kpù. Wónlě vilume tàʼ ndzə̀y, e boò dzə́n rə́ shó, e dù, a dzəə̀mè. Wíri yú kinyo kee shooy, e fàn feyì.

7Shintàm shi lòo koʼtí, wiiy və nəə́, a bó wù yóʼ ne kìíy kinyo ke kí kooyin lúm və. 8Pita dzə́r shó jii, «Ku sùúy kinyo ke ru kí, mbàm sìn si dzə̀ se vèn lum wò kì fiìnèn súm shó sidzə̀m à?» Wù biímé ji dzə̀ á síwun sidzə̀m. 9Pita nèn kfə̀n dzə̀r jii, «Vèn lum wò yòʼ kì kwàʼ ji ka féyì, e bóo wìy, a mùm Kiyoy ke Nyùy Tàr? Yú mo wíri giv nsən e shùu lav. Dzə̀ nsən se wìr ve á duùn ne, e dzəə̀mè lum wò, a kfən, aá kù beʼèy sa wò lèn, e dù, e dzəə̀mè.» 10Mo Pita suuy bèy, Safira ku nèn gbù fo nsay e si wo, e kpù. Wónlě vilum vìyi nəə́, e yèn, a wù kpú ne sa, á nèn bèʼèy, e dù, e dzəə̀mè e lum və́ ghaŋ. 11Wír Jesus adzə̀me yú kinyo kee shooy, e fàn feyì. A kù dzə̀ mo wír ámóʼó‑oò yú sa, fanè.

Aŋgàa ntum Jesuse yii viŋgaʼnìn ve vinyò

12Aŋgàa ntum Jesuse wáa yiì viŋgaʼnìn ve vinyò vinín e wírí mvəm, á wáa yen vitaáví vé Nyùy. Wùn aŋgàa biimé adzə̀me kfə́n a tarnín e lav cù, a dzə̀ʼə̀m e ŋgày ye á yoŋ ji ye Solomon. 13Wíri wáa leéy, a fàn fó a tatí wùn áwune. Yii bèy, a wìr dzə̀m búri áwune féyì, 14a wíri wáy shilív e Tàr wov Jesus wùn nyanyày nyanyày, nəə aáwuné kintatì, à vikìy, à vilum. 15Wíri lo, á wàa fətí aŋgàa yàsí, a dù, a neèr e ghaŋ se dzəə. Á wàa neŋ fo e vikun, kìn é ghàm si, a shìy ji Pita yíi lòo shaà, a fə̀m dzə̀ kindzə̀ə́ndzəm kfə́, é kí ku gbù aáwuné wùn. 16Wíri kfə́n a wìykìr sa fo ntèʼ seé ghaa Jerusalem anín, a ker aŋgàa yàsí, e kfə̀n a ker wír ve *anyùyi jívir áwune, a yen aŋgàa ntum Jesus sho, á wáa bonén adzə̀m.

Vé wòŋe ban aŋgàa ntum Jesus

17Taà cù wo kuʼùn wùn à ŋgoo rə ye dzəə̀n wír veé mbìv *Sadusii nèn kèʼ, a ghèʼ aŋgàa ntum Jesus, 18e nèn tùm wíri, á dù, e koò aŋgàa ntum Jesus, e fìn e lav. 19Yii bèy, yiì lòo dzə vitsə́ʼ, nshìylav Nyùy Tàr wìy, e mvə̀ʼtì shuu se lav sháŋ, e fə̀ə́r áwune. Á lòo fəə, wù suúy jii, 20«Vèn du é lav cù, a fìʼtì dzəʼə̀m ye fíy rə̀ne e wíri.» 21Áwune ku nèn a dù mo wù suuyin. Ndzə jàv, á nəə́ é lav cù, a yeʼéy wíri fó.

Taà cù wo kuʼùn və̀y wùn aàŋgaà və́ ŋgoo nèn sìíy, e jàŋrì atǎr wìr veé Isray adzə̀m, wùn áwune dzə̀ʼə̀m, e tsə̀nsí vé rərí ji á du, e lì a wír vìy fo sháŋ, e wìy sho. 22Áwune dù, e mèé fo, e tàʼ ntéŋ, e nèn kfə̀n, e fìʼtì jii, 23«Vèr dù, e mèé e shùu lav sháŋ, e yèn, a wú dzə̀ e finèn, a vé rərí tíy, shiy shúu lav. Á mvə́ʼ lav, e làa yòʼ yen wír sho.» 24Kitú ke vé rər ve vé‑eè shiy lav cù wùn à vitú ve atàá cùu yú bey, kí tárír áwune. Á wáa ghaynín jii, sà kòóy ka wír vìy a? 25Wìr ku nèn tò fó ndzə, e sùúy jii, «Wír ve vèn‑ee fìnèn é lav vìyi vìsə lèn, aá tíy e lav cù, yéʼey wíri.» 26Kitú ke vé rər kiy ki nèn dù wùn à wír vəə́, e lì áwune. Yii bèy, e làa yòʼ a kàn kànèn, bìʼ fo wíri‑iì baʼtin fó anín, a vé rərí fan fo wíri wáa tsəmrí áwune e tíyí.

27Á wìy sho, e kòʼór e vé wòŋ vìyí si. Taà cù wo kuʼùn wáa dzətí aáwune jii, 28«Bó vèr yòʼ‑oo lo kàntì ji lá vèn yòʼ dzə́ə a yeʼéy wír kinyo ke Jesus à? Vèn yén ri kinyo ke vèn yiìn kí. Vèn sàmèr ne yéʼéy yén Jerusalem e dzə̀m, a tàʼ ji wíri wáa bashí ver ji vèr kì fo Jesus kpu.»

29Pita wùn aàŋgàa ntum Jesuse nèn bìnèr adzə̀m jii, «Vèr kér fó a yu a dzə̀ kinyo ke Nyùy, e shaà ké wìr. 30Nyùy atàr vesən‑eè lo fə̀ə́r Jesus fo kpu, Jesus, wo vèn‑eè yuyrin é kintam. 31Nyùy kóʼór wun, e dzə̀ʼə̀r e wùn koy yìyí ji wáa dzə wun Taà Vitu, e kfə̀n a dzə Ŋgaà Lùŋèr. A wù yii bèy ji wír veé Israyi fíʼ bìnèr melív mev, é wù laysin vinyo vév ve bi ví. 32Vèr ku nèn a fìʼtì vinyo vee shooy. A fiʼtì vèr à Kiyoy ke Ranén kí ke Nyùy fó e wír ve á yú wune adzə̀m.»

33Vé wòŋe yú kinyo kìy, wún wóví kìn, á wáa tàʼ, e yuyrí áwune. 34Yii bèy, Gamalia woo ŋgaà saʼ wùmòʼ nànèn, a dzə̀ wír woó mbìv *Farasi, kfə́n a dzə wír wo wù duŋrì nsər Nyùy, a wíri ghvə́m wun e ŋàŋ. Wù suúy, á fəə́r wír vìy fo ndzə shishàr. 35Wù siíy, a tir vé wòŋe jii, «Wìr veé Isray, vèn kwaʼti kinyo ke á taʼ, e yiì e wír vìne kijuŋ. 36Vèn wáa kuumé ji kù‑uù dzə̀ é ghan símóʼ sí fen, wìr wùmòʼ nànèn, aá yoŋ ji Tudar, a suúy ji wun dzə̀ wír wo kuʼùn wùmòʼ. Wíri tátí wun moo ghii kweè bèy. Á wìy yùyrí wun, wír vəə́ táʼrí, kinyo kfə́ kí lày. 37Wùmòʼ nèn kfə̀n nànèn sa e ghan se vé‑eè táŋ wír veé wòŋ, a dzə̀ wír woó Galeli, a yír rəə́ dzə̀ ji Judar. Wù‑uù sə̀ŋrì sá wír anín e wùn bàm, á wìy yùy, wír vəə́ táʼrí, kinyo kfə́ kí lày. 38Fo kin ki, m nén a tir ven ji vèn maʼti á wír vìn, e làa yòʼ yiì kinyo sho. A bèn dzə̀ ji vinyo ve áwune yii, kfə̀n yéʼey vìn vi lò a dzə̀ fo wìr, bo ví wíy ŋeemé, e lày. 39Wáa dzə ji ví lò a dzə̀ fo Nyùy, bo bó yòʼ dzə̀ vèn ghàʼ wír vìn. A tàm vèn nèn lò, a tsəy kóy a dzə̀ vèn à Nyùy.»

40Vé wòŋe yú ntir Gamalia rə̀n, e nèn biìmé, e jàŋ aŋgàa ntum Jesus vìy. Áwune wìy, á tám, e kàntì ji áwune wáa yen a fó kfə̀n a suúy kinyo kímóʼ kí e wìr ji Jesus, e nèn màʼtì, á wáa dù. 41Áwune lò fo vé wòŋé si, a dù, a sheʼrí ji áwune ghèén a e wìr ve dzə̀ á wàa shoór bìʼ Jesus. 42Áwune dù bèy, e kù nèn a yeʼéy wíri vishiíy vidzə̀m e lav cù, e kfə̀n a yeʼéy e melaʼ, a fìʼtì sáʼka wo juŋ ji Jesus dzə̀ á *Mfə̀ə́r.

Currently Selected:

Lim Aŋgàa Ntum 5: LNB

Highlight

Copy

Compare