Ɨfaʼ 13

Bɨ Tsɔ́ʼ a Banabasɨ bo Sɔlɨ Ntyigɨ awa ghe

1A ndáŋwi Antyokɨ ntóm Ŋwi tsɨ tse abɔʼnɨ bɨdiʼ bɨ aŋwaʼnɨ bə tse tsí ɨwu mbe: Banabasɨ, Simiɔn (wa bɨ kɨ́nə́ ntɔ́ŋə́ ngə́ Wu Shwi), Lushɔsɨ (wa a lónɨ́ a Sirin), Manain (wa bɨ kúgɨ́nɨ́ ayi a ndá Ɛrɔd wa a bénɨ́ gobɨna) abɔʼnɨ Sɔlɨ ə. 2A nkfu za bo kɨ́nə́ ngúʼsə́ a Maʼmbyí nkə́ nchigɨ nji tsə ntsaʼtɨ Ŋwi, Azhwi zə Fɛmnɨ a sóŋ a mbó bo ngə́, “A nɨ fɨgɨ a Banabasɨ bo Sɔlɨ ndɛn á bo faʼ ɨfaʼ wa ma tsɔʼnɨ awa a faʼə ghe.”

3Bo chígɨ́ nji tsə ntsaʼtɨ Ŋwi ntiʼ nkɨ ntsaʼtɨ a Ŋwi, ɨ nyɔŋ mbó ɨma atú Banabasɨ bo Sɔlɨ ntiʼ soŋ ngə́ á bo ghen.

Banabasɨ bo Sɔlɨ Soŋ Nkən wu Shiʼnɨ a Saibrusɨ ə

4Ma lan, mbáʼ a kɨ́nə́ ntyígə́ Azhwi zə Fɛmnɨ ntyígə́ awa lá, bo shíʼ ngɛn a Selɨsia; ntiʼ ndo ɨwu ngyiŋ nɨyen a mu nkyi ngɛn a Saibrusɨ ə. 5Bo ghɨnə ngyén nkón a Salamisɨ, ɨ soŋ anu a Ŋwi a mu ndáŋwi bə Yuda tsa tsɨ tsínɨ́ ɨwu ə. Yoane Marɨkusɨ a tsí bo bo a ngá akwatɨ a mbó bo a nye ɨfaʼ məwa.

6Bo ghɨnə ngɛ́n a nye ɨdiʼ ɨtsum a mu adiʼ za nkyi karɨsɨnɨ lá, ngyen nkuʼ a Bafosɨ, adiʼ wa bo bómnɨ́ a ŋwɔn mɨfu wa ɨkum ɨyi bénɨ́ Ba-Yeso ghe. Wɛrə a bé ŋwɔn bə Yuda wa a kɨ́nə́ sóŋə́ ngə́ zɨə nɨ ntom Ŋwi ə. 7Wɛrə a bé ɨson Səzhiyosɨ Baolosɨ wa a bénɨ́ gobɨna adiʼ za nkyi karɨsɨnɨ lá. Səzhiyosɨ Baolosɨ a bé ŋwɔn wa a yígɨ́nɨ́nɨ́ tsɛʼ nkə. Gobɨna wa a tɔ́ŋ a Banabasɨ bo Sɔlɨ bɨ yen a ɨshi zɨ mbɨ́ʼ ngə́ wɛrə a kə́ ndǒ ndzuʼ anu a Ŋwi ə. 8Lá Elimasɨ (nə nɨ ɨkum ɨyi a nye nɨgham nɨ bə Grikɨ ə) ŋwɔn mɨfu wa a lɨ́ʼ awa, ndɔbtɨ mbəŋ ntəm gobɨna wa a nye abeməntəm za. 9Lá Sɔlɨ, zɨ wa bɨ kɨ́nə́ nkə́ ntɔ́ŋə́ ngə́ Baolo, a lón nɨ Azhwi zə Fɛmnɨ; a kyérɨ́ a ŋwɔn mɨfu wa 10ntiʼ soŋ ngə́, “Gho mɔn Dəbɨrɨ! O nɨ ŋwɔn kɨban anu atsum za a nɨ zə shiʼnɨ ə. O lon nɨ ntám tsɨ tɔmnɨnɨ, nkə́ ngáʼə njwə́ŋtɨ́ ntwě nkənu Maʼmbyí ɨ bənkɨ a zɛrə a nye ɨchwenu ə! 11Maʼmbyí a mɨ zə́ abó atú gho tɨtsɔŋnɨ ə; o mɨ fɨgɨ, ɨ koʼ ɨdiʼ a mbɨ́ŋə́ ndzě a nye nkfu zɨ tse ghe.”

Elimasɨ a byí ndzúʼ adzaŋ za ndzumnɨ ɨ lámnɨ́ ɨmɨgɨ ɨmyi, wɛrə a tiʼə númə́ shwítɨ́ ɨdiʼ ndǒ a ŋwɔn wa a chinɨ chwa abó azhi ɨ tsagɨnɨ ayi ɛ. 12Mbáʼ gobɨna wa a zɛ́nɨ́ anu za a fúnɨ́ lá, ɨ nɨŋ ntəm ɨyi a nye Kristo; mbɨ́ʼ ngə́ ɨnu tsa bɨ díʼnɨ́ ayi ɨwu mbɨ́ʼ a Maʼmbyí tsɨ kɨ́ʼnɨ́ ayi be tɨsɨŋə.

Banabasɨ bo Baolo Soŋ Nkən wu Shiʼnɨ Antyokɨ ə

13Baolo bo bɨ ngaŋ aku ɨchi yíŋ nɨyen a mu nkyi ndo a Bafosɨ ngyen fu a Bəga wa a bénɨ́ ntáʼmbagə wu wi a mu mbuʼ Bamfilya ghe. Ɨwu, Yoane Marɨkusɨ a nyɛ́ʼtɨ́ awa mbə́ mbən a Yerosalɛm ə. 14Bo ghɛ́n nɨ mbyi ndo a Bəga ngyen fu Antyokɨ wa a tsínɨ́ a mu Bisidya ghe. A ghɨnə mbé a Njwi Alaʼ Ŋwi, bo ghɛn nkon a mu ndáŋwi bə Yuda ɨ shiʼtɨ ntsi a tɨshe ə. 15Bɨ ghɨnə ntɔ́ŋ nɨgham nɨ Ŋwi a mu Nyɔngɔŋ Mǒse abɔʼnɨ ɨnu tsa ntóm Ŋwi ŋwánɨ́nɨ́, ɨtú ndáŋwi bə Yuda tsa tsagɨ nkən a mbó bo ɨ sóŋə́ ngə́, “Ɨbɔmbɨma ɨbɨgɨ, be nɨ tsi nɨ nɨgham nə tse na nɨ mɨ wɔŋtɨ ɨbɛn benə nɨ nɛrə, nɨ soŋ a mbó bo ghe.” 16Baolo a ló ntɛm atɨ́, nchitɨ awa, ntiʼ mbiʼnɨ ngamə ngə́:

“Ɨbɛn bə Izrai abɔʼnɨ bən ba bɨ ghúʼsɨ́nə́ a Ŋwi: á nɨ zuʼə! 17Ŋwi, zɨ wa ɨbɛn bə Izrai ghúʼsɨ́nə́ a tsɔ́ʼ bɨta ɨbɨgɨnə bə kɔ́ʼɔ́nguʼ, ngɨ awa a nye alaʼ zə wi a nkfu za bo kɨ́nə́ nchyɛ̌ Alaʼ Gyibto tso bɨngyenɨ-yenɨ ə. Ŋwi a fɨ́gɨ́ awa Alaʼ Gyibto nɨ mɨtən ɨmyi mə wi, 18nkɨ nchigɨ ntəm#13:18 Ɨŋwaʼnɨ tsɨ lvuŋ tsɨ mɔʼɔ tsa bɨ tsánɨ́ mbyi ɨ ŋwaʼnɨ soŋ be ngə wɛrə a lə atú nɨ bo ghe. nɨ bo a mu mɨkɨghonɨ atú ɨlom mɨghúm mi nɨkwa ghe. 19Wɛrə a tsə́nkɨ́ ɨlaʼ tsi samba a mu ɨshe Kananɨ ntiʼ ngɨ ɨbɛn ɨbyi a nye bɨboŋ bɨ ɨshe məza. 20Ɨnu tsiŋ ɨtsum lɔ́gɨ́ adiʼ lá atú ɨlom nkɨ tsi nɨkwa nɨ mɨghúm mɨntə̧̂ ghe.

Nkfu məziŋ yenə ntsa, wɛrə a gha bɨta bɨ abyɛn a mbó bo ɨ kɔʼ kuʼ nkfu ntom Ŋwi Samwɛrɨ ə. 21Bo tíʼ mbítɨ́ a ɨfɔ, Ŋwi a gha awa nɨ Sɔlɨ mɔn Kishɨ wa a lónɨ́ a mbó atsé zə wi zə Bɛnjamɛn ngə́ á be ɨfɔ ɨwa atú ɨlom mɨghúm mi nɨkwa ghe. 22Ŋwi a ghɨnə fɨ́gɨ́ ayi, ntiʼ ngɨ a Devidɨ a nye ɨfɔ ghe. Nə nɨ anu za Ŋwi a sóŋnɨ́ mbɨ́ʼ Devidɨ a zɛnə ghe: ‹Ma zɛnə ngə́ Devidɨ mɔn Yesi a nɨ abə́ŋ a ŋwɔn za ma kɔŋnɨ, mbe ŋwɔn wa a ghɨ ghɨ atsum za ma lɔnə ngə́ á ghɨə.› 23Tsɛʼ adzaŋ za Ŋwi a káʼnɨ́, a bé Yeso, ŋwɔn ɨlə̌ Devidɨ wa Ŋwi a ghɨ́nɨ́ a nye ndoŋ ɨbɛn bə Izrai ghe. 24Bɔŋ á Yeso a mbiʼnɨ ɨfaʼ ɨyi, Yoane a sóŋ anu a Ŋwi a mbó ɨbɛn bə Izrai bɨtsum ngə́ á bɨ bəŋ mɨntəm ɨma a nye mɨbvu ɨma, ntiʼ nkwarɨ nkyi ɛ. 25Adzaŋ za Yoane a kɨ́nə́ mɛtɨ a za wɛrə a fúnɨ́ abyɛn a faʼə, wɛrə a sóŋ a mbó ɨbɛn ba ngə́, ‹Nɨ wiʼtɨ ngə́ ma lá ɨwa le? Ka ma be aghan ŋwɔn wa nɨ zhwíʼtɨ́nə́ ngə́ á ghɨ́ ngyen lá. Lá zhwiʼtɨnə! Wɛrə a mɨ yen a ndzum me, ma kaʼ kɨ nkuʼnɨ aghan a ntsɔ́ʼtɨ́ ngobɨ ɨchi a mɨku zɨə.›

26Ɨbɔmbɨma ɨban, ɨbɛn bɨ ɨlə̌ Abraʼm abɔʼnɨ bən bɨtsum ba bɨ ghúʼsɨ́nə́ a Ŋwi: bɨ tsagɨ nkən ɨloŋ məwen lá a mbó bɨgɨnə ghe! 27Mbɨ́ʼ ngə́ ɨbɛn ba bɨ tsínə́ a Yerosalɛm abɔʼnɨ bɨta bɨ ɨlaʼ ɨba sé zhi ngə́ Yeso lá Ndoŋ ə, bo sé kɨ ndzuʼ nkɨ nji mɨgham mɨ ntóm Ŋwi ma bɨ tɔ́ŋnə́ a Njwi Alaʼ Ŋwi tsum lá. Lá bo ghɨ́ mɨgham mɨ ntóm Ŋwi fu a nye nkənu a nye adzaŋ za bo sóŋnɨ́ ngə́ á bɨ zhwitɨ a Yeso ghe. 28Bo báʼtɨ́ nkeʼ tsi be nɨ yentəzɔʼ a nchɛrɨ ɨsáʼ ngə́ á bɨ zhwitɨ ayi ɨ tsinɨ lá, bo sóŋ a mbó Branto ngə́ á ghɨ á bɨ zhwitɨ ayi ɛ. 29Bo ghɨnə ngɨ́ ɨnu ɨtsum tsa aŋwaʼnɨ a Ŋwi a sóŋnɨ́ mbɨ́ʼ ayi, ɨ shiʼsɨ ayi atɨ abaŋnɨ-baŋnɨ, ngɛn nyɔŋ ayi a mu nɨshe ghe. 30Lá Ŋwi a zhwémnɨ́ ayi a mbó nɨvwo, 31atú njwi tsə ghaʼnɨ wɛrə kə́ fúə a ɨshe a ɨshi ɨbɛn ba bɨ yénɨ́nɨ́ bo zɨ ndo a Galili ngɛn a Yerosalɛm lá. Bo tiʼ mbe bətɛmə-ndzě ɨbyi a mbó ɨbɛn bə Izrai ghe. 32Bɨgɨ tsi ɨghan lá a ngyiŋə nɨ nkən wu shiʼnɨ a mbó bən ngə́ anu za Ŋwi a káʼnɨ́ bɨta ɨbɨgɨnə bə kɔ́ʼɔ́nguʼ, 33məzen wɛrə a ghɨnə a kɔʼ fu a nye nkənu a mbó bɨgɨnə ɨbɔ ba, a nzhwémnɨ́ Yeso a mbó nɨvwo; tsɛʼ adzaŋ za bɨ kɨ́nɨ́ nkɨ́ ŋwaʼnɨ a mu bɨsalmsɨ ba bɨ kɔʼnɨ nkuʼ a nye ɨdiʼ tsi bá ngə́,

‹O nɨ mɔn ɨghan wu mbáŋnɨ́,

ɨ sɨŋə wen ma nɨ ta ɨgho ghe.›

34 # 13:34 Asaya 55:3 Nə nɨ za Ŋwi a sóŋnɨ́ mbɨ́ʼ nzhwemnɨ zɨ a mbó nɨvwo, ɨ láʼ keʼ bye a mu nɨshe ghe:

‹Ma mɨ gha a mbó bən ɨfɔ́gə́ za ɨ nɨ zɨ fɛmnɨ, za ka ɨ be ayi zɨ ntámtɨ,

za ma káʼnɨ́ a Devidɨ nɨ zɛrə lá.›

35 # 13:35 Salmsɨ 16:10 Ma lan, wɛrə a kwiʼ nkɨ soŋ a mu salmsɨ wu mɔʼɔ ngə́:

‹O mɨ koʼ nyɛʼtɨ ngaŋ afaʼ ɨzo za ɨ faʼnə nɨ táʼ ntəm, á ɨ bye a mu nɨshe ghe.›

36Mbɨ́ʼ ngə́ Devidɨ a fáʼ ɨnu tsa Ŋwi a kɨ́nə́ ndǒ a nkfu nɨwə̌ ɨni, ntiʼ nkfo bɨ twəŋ ayi abɔʼnɨ bɨta ɨbyi bə kɔ́ʼɔ́nguʼ, mbəmnye ɨzhi bye a mu nɨshe ghe. 37Lá məzen a sé fú a nye zɨ wa Ŋwi a zhwémnɨ́nɨ́ a mbó nɨvwo ə. 38Adzaŋ məwen nə ɨbɔmbɨma ɨban, bɨgɨ lǒ ngə́ á nɨ zhi ngə́ bɨ tsǎ lá a ndzum Yeso ɨ sǒŋ nkən mbɨ́ʼ ndɨgɨnɨ mɨbvu a mbó bɨŋ ə, 39a ntsǎ a ndzum zɨ bɨ kyɛtɨ mɨnkɨ mɨ abuʼ mɨ mɨbvu mɨtsum, anu za Nyɔngɔŋ Mǒse a kɨ chínɨ́ keʼ ghɨ a nye ŋwɔn tsum wa a nɨŋnɨ ntəm ɨyi a nye zɨə. 40A nɨ tiʼ lá ndə̌tú ɨtsən mbɨ́ʼ anu za ntóm Ŋwi sóŋnɨ́ a fu a nye bɨŋ ə. Ntóm Ŋwi sóŋ ngə́:

41‹Zɛnə a zɨŋ ə, bən ba nɨ ghamnɨ ɨnu tɨbɔŋ mbɨ́ʼ a za Ŋwi a soŋnɨ! A kɨʼnɨ awən, á nɨ kfokə!

Mbɨ́ʼ ngə́ anu za ma ghɨnə ɨ sɨŋə, a nɨ anu zə tse za nɨ chinɨ keʼ nɨŋ mɨntəm ɨmən ɨwu,

mbáʼ be ŋwɔn tse a kwɛ fɨʼtɨ ɨ fɨʼtɨnɨ a mbó bɨŋ ə!› ”

42Adzaŋ za Baolo bo Banabasɨ kɨ́nə́ fúə a mu ndáŋwi bə Yuda za lá, ɨbɛn ba bə́ ngón awa ngə́ á bo bə ngyen a nye Njwi Alaʼ Ŋwi za ɨ yenə nkwiʼ fɨʼtɨ ɨnu tsen tsə mɔʼɔ a mbó bo ghe. 43Ngǒtə ghɨnə shɛ́mnkɨ́, bə Yuda bə ghaʼnɨ abɔʼnɨ ɨbɛn ba bɨ kwɛ́nə mbəŋ mɨntəm ɨma ɨ nɨŋ a nye mbɔm nguʼsɨ Ŋwi bə Yuda tíʼə númə́ ndzɔ́ŋə́ a Baolo bo Banabasɨ ə. Ntóm Yeso tsa ghám a mbó bo, ngwɔŋtɨ awa ngə́ á bo nchyɛ̌ tsɛʼ a mu abɔŋəntəm a Ŋwi ə.

44Njwi Alaʼ Ŋwi za ɨ kɨ́nə́ shíʼə ghɨnə ngyén, ŋwɔn tsum a mu ntáʼmbagə wa a yen a ndzúʼ nɨgham nɨ Maʼmbyí ɛ. 45Bə Yuda ghɨnə ndzɛ́n ɨnɔ ɨbɛn wa, aghɨʼnɨ a lwɨgɨ mɨntəm ɨma; bo tiʼ ndɨʼkɨ anu za Baolo a kɨ́nə́ sóŋə́ nkɨ ndzɔm ayi ɛ. 46Lá Baolo bo Banabasɨ ghám tɨ nɨbɔgɨ ngə́: “A chi nkuʼnɨ ngə́ á bɨ fom soŋ nɨgham nɨ Ŋwi lá a mbó bɨŋ ə. Lá mbáʼ nɨ tonɨ awən a nɛrə, nkeʼ wiʼtɨ ngə́ nɨ kuʼnɨ a nkúŋə́ a mu ntsi ntən nɨnkoŋ za lá, ma lan, bɨgɨ mɨ nyɛʼtɨ awən ɨ ghɛn a mbó ba a se bə Yuda be ə. 47Mbɨ́ʼ ngə́ ntɨgə za Maʼmbyí a ghanə a mbó bɨgɨ ɨ zɛnə ngə́:

‹Ma ghɨnə awən a nye nkaʼ a mbó ba a se bə Yuda be,

taŋ á bɨ chi loŋ mbyi tsum ə.› ”

48Mbáʼ ba a se bə Yuda be zúʼnɨ́ a məzen lá, ɨnye ɨtsa shá, ntiʼ nkɨ soŋ ngə́ nkən Maʼmbyí bɔŋ be tɨsɨŋə. Ɨbɛn ba bɨ kwɛ́nə ntsɔ́ʼ awa ngə́ á bɨ ghɨ́ ntsí nɨ ntsi ntən nɨnkoŋ za tíʼ mbəŋ mbe ɨbɛn ba bɨ nɨ́ŋnɨ́ mɨntəm ɨma a nye Kristo ghe.

49Nɨgham nɨ Maʼmbyí dzágɨ́nɨ́ a mu mbuʼ za tsum ə. 50Lá bə Yuda tótɨ́ mbáŋnɨ́ tsɨ fɨgɨnɨ tsɨ ntáʼmbagə wu wi wa abɔʼnɨ bəngye bə fɨgɨnɨ ba bɨ kɨ́nə́ ngúʼsə́ a Ŋwi ə. Bo bíʼnɨ́ ndɨgɨ Baolo bo Banabasɨ nkɨ nkɨŋ awa a mu mbuʼ ɨza ghe. 51Ntóm Yeso tsa kfútɨ́ abvuŋnɨ a mɨku bo a ndiʼə ngə́ ɨnɨŋ ngɨ́ʼ mɨ tsi a nye ɨbɛn bɨ ntáʼmbagə wu wi wa mbɨʼ ɨnu tsɨ tɔmnɨnɨ tsa bo ghɨnɨ ntiʼ ndo ɨwu ngɛn Aikonium ə. 52Nɨdorɨ abɔʼnɨ Azhwi zə Fɛmnɨ lwɨ́gɨ́ ɨbɛn bɨ Antyokɨ ba bɨ nɨ́ŋnɨ́ mɨntəm ɨma a nye Kristo ghe.

Currently Selected:

Ɨfaʼ 13: MNT

Highlight

Copy

Compare