Ɨfaʼ 12

Ɛrɔd a Ndɨ́gɨ́ Ndáŋwi ə

1A mu njwi mətsa, Ɨfɔ Ɛrɔd a chwúʼ ntíʼə ndɨ́gɨ́ ngaŋ ndáŋwi tsə tse ghe. 2Wɛrə a zhwítɨ́ a Jemsɨ mɨma Yoane nɨ lumban ə. 3Mbáʼ wɛrə a zɛ́nɨ́ ngə́ məzen a ghɨ́ ɨnye bə Yuda bɔŋ lá, wɛrə a ghɛ́n nɨ mbyi nko a Bita ghe. (Məzen a fú lá a nkfu Nɨdorɨ nɨ Abán tɨ Mbɛgə ghe.) 4Mbáʼ bɨ kónɨ́ a Bita lá, ɨ nɨŋ ayi atsáŋ ə. Bɨ ghá ayi a mbó ɨkarɨ bɨgwe tsi nɨkwa, mbáʼ a tsínɨ́ bɨgwe bi nɨkwa a mu táʼ akarɨ ngə́ á bɨ ndyɛ́mə́ ayi ɛ. Ɛrɔd a kyáŋtɨ́ ngə́ bɨ mɨ sáʼ ayi asaŋəsaŋ mbáʼ nɨdorɨ Tsa-yɛʼnɨ minə ghe. 5Ma lan, bɨ lɛ́n a Bita atsáŋ, lá ndáŋwi ghɨ́ atsaʼtɨ a Ŋwi zə tən a mbó Ŋwi mbɨ́ʼ ayi ɛ.

Ntsendá Ŋwi Fɨgɨ a Bita Atsáŋ ə

6A bé nɨ ɨtfúʼ á njwi lán á Ɛrɔd a fɨgɨ ayi ngyen nɨ zɨ a ɨshi ɨbɛn, Bita a nɔ́ŋ ndyě a tɨtərɨ bɨgwe bi bɨbá ghe. Bɨ kórɨ́ a Bita nɨ mɨnkɨ mɨ atɨŋə mi mɨmbá, bə mɔʼɔ bɨgwe tɛmnkɨ a ntsu abuʼ atsáŋ za ndyɛ́mə́ a zɛrə ghe. 7Ntsendá Ŋwi zɨ Maʼmbyi vwúkɨ́ ntɛ́m ɨwu, nkaʼ wu tse ɨ baŋ a mu atsáŋ za. Ntsendá Ŋwi za ɨ chwá a Bita a mbyɛʼnɨ zɨ nchiʼ ayi a vwukɨ a fɨlye, ntiʼ soŋ wəmbo ngə́, “Yaŋnɨ ndo atɨ́ ə!” Mɨnkɨ mɨ atɨŋə ma byí nkyɛkɨ a nye mbó mɨ Bita ngvokɨ a tɨshe. 8Ntsendá Ŋwi za tíʼ sóŋ wəmbo ngə́, “Wəgɨ ɨtsɛʼ ɨtso abɔʼnɨ ngobɨ ɨtso ə.” Bita a ghɨ́ mə lá. Ntsendá Ŋwi za tíʼ nkwiʼtɨ ngə́, “Lyibtɨ atsɛʼ azo zə abyɛn ntiʼ ndzɔŋ aghə.” 9Bita a zɔ́ŋ ayi bo zɨ fu a mu atsáŋ za; lá wɛrə a sé zhí ngə́ anu za Ntsendá Ŋwi za kɨ́nə́ ngɨə a bé ngótɨ́ anu kə ngáŋ ə; wɛrə a tɔ́ŋ ngə́ zɨə kə́ ndyě ndzɛm nəzhwɨgɨnɨ ə. 10Bo tsá ntsambyi adiʼ za bɨgwe kɨ́nə́ ndyɛmə, ndzɔŋtɨ ntsa a zə ndzɔŋ ndzum, ngyen fu a nye ntsu nká ntáʼmbagə wa wa bɨ nyɛ́tɨ́nɨ́ nɨ ɨtɨŋə lá. Ntsu nká wa ŋáʼnɨ́ a mbó bo tsɛʼ zɨzɨ, bo tsa abyɛn ə. Bo ghɛ́ntɨ́ a mu kɔŋ-ndóm, Ntsendá Ŋwi za tiʼ ngvukɨ nyɛʼtɨ a Bita ghe.

11Bita a tíʼ njí anu za a fúnɨ́ a nye zɨ ntiʼ soŋ ngə́, “Tɨtsɔŋnɨ ma zhi ngə́ a lanɨ mbe tsɛʼ nkənu ə! Maʼmbyí a tsagɨ ntsendá ɨzhi ngə́ á ɨ yen ɨ fɨgɨ aghan a mu mɨtən mɨ Ɛrɔd abɔʼnɨ atsum za bə Yuda kɨ́nə́ njwíʼtə́ ngə́ á fuə.”

12Mbáʼ wɛrə a zhínɨ́ a məzen lá, ngɛn a ndá Mɛrɨ wa a bénɨ́ nɨmi bɨ Yoane Marɨkusɨ, adiʼ wa ɨbɛn bə ghaʼnɨ ghótɨ́nɨ́ ɨwu ntsáʼtə́ a Ŋwi ə. 13Bita a kwɛ́ntɨ́ ntsundá abyɛn, ŋwɔn afaʼ wa ɨkum ɨyi bénɨ́ Roda a yen a ŋaʼ a wɛrə ghe. 14Wɛrə a zúʼ nji Bita, ndorɨ tsɛʼ dorɨnɨ a nye ndóm wa wɛrə a bə́nɨ́ nkɨə mbən nɨ ndzum tɨ ŋaʼ ntsundá wa, ngɛn soŋ ngə́ Bita a tɛm abyɛn ə. 15Bɨ sóŋ wəmbo ngə́, “O bánə́ ghe!” Lá wɛrə a nyə́m tsɛʼ nyəmnɨ ngə́ a nɨ nkənu ə. Ma lan, bɨ tíʼ nchwɨ́gɨ́ wəmbo ngə́, “A nɨ ntsendá Ŋwi ɨzhi ɛ.”

16Lá Bita a kə́ nkwě ntsundá wa tsɛʼ kwɛnə. Bo ghɨnə ŋáʼ a wɛrə, ndze ayi, a be tsɛʼ anu zə kɨʼnɨnɨ a mbó bo ghe. 17Bita a chítɨ́ awa, ntiʼ fɨʼtɨ a mbó bo adzaŋ za Maʼmbyí a fɨ́gɨ́nɨ́ ayi atsáŋ ə. Wɛrə a sóŋ ngə́, “A nɨ soŋ a məzen a mbó Jemsɨ abɔʼnɨ ɨbɛn bə mɔʼɔ ba bɨ nɨŋnɨ mɨntəm ɨma a nye Kristo ghe.” Wɛrə a tíʼ ndo ngɛn ayi adiʼ adaŋ ə.

18Njwi lanə, ndum bvugɨnɨ a tɨtərɨ bɨgwe ba bɨ kɨ́nə́ ndyɛmə a Bita bo tiʼə mbítə́ ngə́, “A fu anu ake a nye Bita le?” 19Ɛrɔd a ghá ntɨgə ngə́ á bɨ núm ndɔ́n ayi ɛ, lá bo kɨ chi keʼ ayi ze. Wɛrə a tíʼ mbítɨ́ bɨgwe ba nɨ ɨbítɨ tsə ghaʼnɨ, ntiʼ nga ntɨgə ngə́ á bɨ zhwitɨ awa ghe.

Mbáʼ məzen atsum a tsánə, Ɛrɔd a tíʼ ndo a Yudiya ngɛn a Seseria ntsi ɨwu atú ndvuŋ nkfu tse ghe.

Adzaŋ za Ɛrɔd a Kfónə́

20Ntɔŋ Ɛrɔd lwí tsɛʼ nkan a nye ɨbɛn bɨ Taya bo Saidɔn ə. Ma lan, bo tíʼ ngɨ ngǒtə ngɛn a ndzé zɨə. Bo fóm ntsambyi ndɛtɨ ntəm Blasɨtusɨ, wa a bénɨ́ ntsendá zɨ ngwi ngə́ á wɛrə kwatɨ awa ghe. Bo tíʼ ngɛn nkwatɨ a Ɛrɔd mbuʼtɨ mbó wəmbo ngə́ á bo bo ghɨ mbɔnɨ mbɨ́ʼ ngə́ mɨdzɨ mɨ alaʼ ɨma kə́ ndǒ lá alaʼ Ɨfɔ Ɛrɔd ə.

21A ɨtfúʼ njwi tse wa bo kyáŋtɨ́nɨ́, Ɨfɔ Ɛrɔd a kɔ́ʼsɨ́ akɔ́ʼɔ́sɨ a ɨfɔ azhi, ɨ ŋáŋnɨ́ atú abərɨ azhi, ntiʼ nchwuʼ ngamə a mbó ɨbɛn ba. 22Ɨbɛn ba tɔ́nkɨ́ ngə́, “A se ŋwɔn mɨsɔŋ a ntsu a ngámə́ ghe, a chwúə ŋwi tse ghe!” 23Tsɛʼ a nyom məwa, ntsendá Ŋwi zɨ Maʼmbyí ɨ byí mbúʼ a Ɛrɔd ɨ máʼ a tɨshe, mbɨ́ʼ ngə́ wɛrə a sé kɔ́ʼsɨ́ a Ŋwi atɨ́ ə. Ɨkɨŋɔŋnɨ kfúrɨ́ ayi, wɛrə a kfoə.

24Le buŋ nɨgham nɨ Ŋwi kə́ ngɛn ɨ ghɛnɨ nɨ mbyi ɛ.

25Banabasɨ bo Sɔlɨ tíʼ mɛtɨ a za bo fúnɨ́ abyɛn a faʼə ntiʼ ndo a Yerosalɛm nkwɛn awa ghe, ɨ tɨ kwě ndɔgɨ a Yoane wa ɨkum ɨyi wu mɔʼɔ bénɨ́ Marɨkusɨ ə.

Currently Selected:

Ɨfaʼ 12: MNT

Highlight

Copy

Compare