Tateta 32
32
Isileli tubunao idi bágala be anasíuna vau tetelidi
(Tateta 32:1—34:35)
Isileli tubunao bulumakau goura yaina sisaakululu tetelina
1E tomotayadi bogina sigite yau koya goi nava geya asouta, go sem tuta maanawena akaaiyaka. Tuwo sima sigúguna go, Eroni yaina sidigo kadi,
‘Kutāoya ida basaleliuyao adi tokwaluyao kumadagīdi bei sivakededa. Amo Moseseyana, tauyana Itipita goi iikabida imemeda, geya tayagoiyeta kaga nakona iisowóduwo yaina, tauna ikaimúmuna.’#Guinuwa 7:40.
2Tuwo Eroni idigo kana,
‘Monemiyao, natumiyao idi gipolu goura kokitakīdi komēdi kovinīgu.’
3Tuwo moitamo tomotayadi idi gipolu goura sikitakidi simedi Eroniyana sivini. 4Gipoluyadi ikabidi, ikaupapaevedi. Ikaupapaevedi ikavava, bulumakau bonatuna maisiyana imadagi. Ikavava, e tomotayadi sidigo kadi,
‘Kita Isileli tubunao, ame ida basaleliu boi Itipita goi ikalaoduweda!’#1 Tolovina 12:28; Guinuwa 7:41.
5Eroni igite kaga siguinuwe, e bulumakauyana matana goi aba kasala tayamo ikaudakodako. Ikavava, idigo kana,
‘Itomo uyáwana aikanina taodūgu Yauwe yaina.’
6Tuwo vanuwo itomo nobuyana giyaina sitáoya sina idi yoguyoguyao vininabeso manuna sikaumatedi. Maniyedi sigabudi sivakasavedi go, sikasaledi Yauwe yaina. Go maniyedi sigabudimo idi kabivekoveko vininabeso manuna. Sigabudi ikavava, e situsobu sikáika, oine sinim, siuyawana besobeso be taiyao simasisi goyogoyo.#1 Korinta 10:7.
Yauwe ina egamogamogu goi itugavila, e Isileli tubunao geya imtulidita tetelina
7E Yauwe ilatuwokoigu idigo kana,
‘Woilīm kusōu kūna! Im bodao, tauyadi boi Itipita goi kwabidi kumemedi bogina toinidi sikaigoyaidi. 8Enaoyana alatuuwokoidi sisabookuliye bogina sivasulaigi. Bulumakau bonatuna goura simadagi, yaina goi sivatugúyala sikanakabobo be nakae yoguyogu vininabeso manuna bogina sigabudi sivakasavedi go sikasaledi bulumakauyana yaina. Sidigo kadi,
“Isileli tubunao, ame ida basaleliu Itipita goi ikalaoduweda.”’
9Yauwe tuwaina kana,
‘Amo tomotayadi bogina agitedi, ayagoidokoidi. Kidi taiyadi tuntunidi. 10Tauna ame taabu kusanaabodēgu, e bei magu egamogamogu toina yaidi amtulidi. Go kom amta bei akisailim, tubumowo boda tayamo gagaina.’#Yoyowo 14:12.
11Go yau akawanoi makimaki Yauwe guna Yaubada yaina adigo kagu,
‘O Yauwe, manakae kuegamogamogu im bodao yaidi? Amo tauyadi Itipita goi boi kukabidi, im togaga gagaina goi kumedi.#Yoyowo 14:13-19. 12Manakae? Bego da Itipita sitagiwoim kadi,
“Yauwe guinuwa goyogoyoina pasina ina bodao, kidi Isileli tubunao, Itipita goi ikabidi, imedi koya goi ikaumatedi, e bei geya maisidimo poyapoya ame goi”?
¡Neta taabu kuegamoogamōgu go, guinuwa goyogoyoina ame manuna kutugavīla! 13Neta im pakonayao Eberamo, Aisake, be Isileli kunuwokavatēdi. Boi toinim yoim goi kukatótula#22:16-17; Iberiu 6:13-14. yaidi kulatuwokoidi kam,
“Tubumiyao bei akisailidi adi badabada nakae utuna yábana goi go, poyapoya ame ana madabokina boi adigedige tubumiyao bei avinidi, e kidi sikabi idi kaba lovina.”’#Aba Vatowo 12:7, 13:15, 15:5,18, 17:8, 22:16-18, 26:4, 35:12.
14E tuwo moitamo Yauwe ina egamogamogu manuna itavívila, tauna boi vailai idigedige ina bodao geya ivinidita.#Iyona 3:10.
Mosese ina egamogamogu, gurewa aiyuwo ikauvisivisidi tetelina
15E koyayana goi asou ana guna tovaita Iyosuwa taiyao go, gurewa aiyuwo paaevaidi nimagu goi akaavaledi. Gurewayadi yatadi Yaubada toinina nimana goi ina kanasíuna ana kaba vatulúkwana iginidi. Dadava yuwoyuwo goi iginidi. 16Gurewayadi moe Yaubada ina guinuwa, e nakae gininayadi gurewa aiyuwo goi moe Yaubada toinina iginidi.
17E Iyosuwa itaaiyakeka go, tomota inovedi sitalamgemge, e ilatuwokoigu kana,
‘Ida tunagu goi ana taiyakeka nakae yaviya butukáona!’
18Go yau adigo kagu,
‘Ana taiyakeka geya yaviya ana tovakumgoyao idi duduwo geya. Nakae ana taiyakeka geya yaviya ana toneneta idi táiya geya. Go sem yau anove ana taiyakeka nakae tomota sivesivesi!’
19Tuwo kasou kana go, tutayana ima tunagu goi kavakakana, e akandobala bulumakau bonatunayana goura agite be nakae tomota silauláusa agitedi. Tuwo aegamogamogu toina, e gurewayadi aiyuwo alavedi sisou koya unana goi sitavisi. 20Alavedi ikavava, abala ana bulumakauyana boi siimadagi akabi, yeu goi agabu iséwaya. Ikule ikavava, akauvetevete ana kadókana poyapoya kaukauna nakae, e bwae taiyao apopolidi go, Isileli tubunao alovinaedi sinim.
21E Eroni alatuwoko adigo kagu,
‘Ava goyo amo tomotayadi siguinuwe yaim bei kom im katumapu goi kuvakededi, e goyo gagaina siguinuwe?’
22Eroniyana idigo kana,
‘Guna tomoya, taabu kuegamoogamōgu yaigu. Amo tomotayadi kom bogina kuyagoidokoidi; kidi sinapu goyo nukotodi ikabi. 23Silatuwokoigu kadi,
“Ida basaleliu ana tokwalu manuda kumadāgi bei ivakededa. Amo korotoyana Mosese, tauyana Itipita goi ikalaoduweda, geya tayagoiyeta kaga nakona isowóduwo yaina, tauna ikaimúmuna.”
24Tuwo alatuwokoidi kagu,
“Avatau neta mana goura, e ikābi ivinīgu.”
Tuwo sivinigu, gourayadi alavedi yeu sinaena goi. Go akandobala, e yeuyana goi ame bulumakau bonatunayana toinina isowóduwo!’
25Go akandobala tomotayadi agitedi siguinuwa owáowana unana Eroni itagonedi, tauna ima kaleyayao itoboinedi sikaiwotetema. 26Tuwo idi tunagu ana kaba siu goi atáoya, niyagu gagaina adigo kagu,
‘Avatauwa komi neta Yauwe ina bodao, kōma yaigu!’
E tuwo Livai tubunao liliudi sideli sima sigúguna yaigu. 27Tuwo alatuwokoidi adigo kagu,
‘Yauwe kita Isileli tubunao ida Yaubada ibóbwara ame nakae, idigo kana,
“Madabokimi imi sisi kokabīdi, e tunagu madabokidi goi koketōiya go, tuwowomiyao, ami gomanao, imi bodao be nakae semiyao kokaumatematēdi.”’
28E tuwo moitamo Livai tubunao sitáoya, sina siguinuwe nakae alatuwokoidi. Tauna koroto adi badabada 3,000 ame maliyalinayana goi sikámasa. 29E Livai tubunao alatuwokoidi, adigo kagu,
‘Ame tuta Yauwe ikimasabemi toinina ina topaisewayao. Imi kabikáwana goi madabokimi bogina kotagona bego semiyao kokaumatedi, tauna Yauwe bei ikaipakuyemi.’#Aba Vatowo 49:7.
Mosese ina kawanoi tomota manudi
30E vanuwo itomo ana tomotayadi alatuwokoidi adigo kagu,
‘Komi kobágala go, bagalayana gagaina. Ame bei atuko ana Yauwe yaina. Nakona itoboinegu imi bagalayana anuwoli.’
31Tuwo moitamo atukomna ana Yauwe yaina, e adigo kagu,
‘Amo tomotayadi goyo gagaina bogina siguinuwe. Goura simadagi bego toinidi idi basaleliu. 32Go Yauwe, akawanoi yaim bego ame tuta, neta im nuwonúwana nakae, idi bágala kunuwotao. Go neta geya, akawanoi yaim, im buki#Nuwogau 21:27. goi yoigu boi kuginigini, e kutaūwe.’#Same 69:28; Nuwogau 3:5.
33Go kina Yauweyana idigo kana,
‘Avatauwa neta sitapepeko yaigu, e amo tauyadi yoidi bei guna buki goi atauwedi. 34Tuwo ame tuta kūna tomotayadi kuvakedēdi nako goi bogina alatuwokoim. Go kunōve. Guna anerose bei ivakumgoiyem. Go liuna ana maliyalina goi bei idi bágala pasina aliunedi.’
35Tuwo Yauwe vísiya ietune ina tomotayadi yaidi goi unana Eroni silovinae bego bulumakau goura imadagi manudi. Tauna idi goyo pasidi vísiya sibabane.
Currently Selected:
Tateta 32: GVS
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
