Titus 3
3
Eto embomeni na ari javotoho are.
1Eto ke mahu ijiera ainge dombo ejo no embomeni ingito enda ta tihi jigari embopo ta ke agi ue ari javotoho tapa avo asi nununga are. 2Eto embo na embo nei ta javo humbuto au mane sapura aisuja te peka ari tunga humbari ke ainge ijie, namei amo embo peni umo isapa ke ainge ijie iresora.
3Eto iji mahu amo ungotena sarika ue ke agi ae degi nei sapura ta pahue enda ta uje neite neite na andirari amo ari sapura neite neite ue embo nei ta donda kito tumo ue mine tara asi ere uahera. 4Rate ungotenau orekari embo God na kito jo enu osa ue 5ungotena oreketo umbuna, amo ungotena ari jajavotoho avo eto ae rate amita jo ari na einge ena. Eto amita Ahihi Otohu na enu meni eha ingarako eto embo ehaha jajavotoho ea. 6Eto God na ungotenau orekari embo Iesu Keriso ta pure avo kogue Ahihi Otohu ungotenau jo ta overekena 7eto amita hondate ari amina ungotena embo sasapura mane embo jajavotoho ere ora amo vasiri daroho avo hoteto iresi simba ere ora. 8Eto ke erena erevi ke be avoeto no embomeni ta degi ao ingora erena. Eto God humota ere ora embomeni na ke erevi ingihe ari jajavotoho asi tunga ikasora. Eto embo tapa amuna ke javotoho erevi ingihiroro amo ungota degi irari javotoho puvuresuja. 9Rate Judea ta ke pepeni neite neite amite eto Judea ta Ohihi ta hihi sokova neite neite kakajekari avo kogue tumo ue boru jumbuhe ke sapura eagora avo tojo. Eto ke sokova amo be ambu ra. 10Eto jujune ke aro ingesi jujumi ujekari embo amita degi ke ejo ingioi eto ao ingito toae au amo ehako ejo ingito toae au kito avo tojo oenga iroi 11eto umo kogoa embo amo ari sapura na jo andirari avoeto ari sapura amita na pehumba aisuja.
Ahari ta ke tutumo
12Eto na jajemo iji amo na da Nicopolis ei ta iresona avoeto embo Artemis te embo Tychicus te ikano no degi ta pambaro kito umo etokito nau degi ta puvujo. 13Eto enda ta ke pepeni papeni simba ari embo Zenas te embo Apollos te degi ta pahue indari te donda nei do jigama ue pambasora avo pere hondate ejo pambari pere are. 14Eto ungotenau embomeni na kupi pegogo ambo ue ombari asari humbasi amo jo tapa na pure tunga iketo pure javotoho asora amita kiari avo umbara erena.
15Eto embomeni tapa namote mihera amina umo ere pekihera. Eto embomeni dago osa ue God humota eagora avo ere pekihera, ejo ingore.
Eto God ta hondate ari ungota degi iroi.
Currently Selected:
Titus 3: OKVH
Highlight
Copy
Compare
Share
Want to have your highlights saved across all your devices? Sign up or sign in
© 1988, Wycliffe Bible Translators, Inc. All rights reserved.
