Hebrews 5

1Eto priest peni ta pure amo einge eaguja, embo vahai humbuto ikeore amina embo ta ari sasapura na kitohosira eagora avoeto God ta degi peka humbasi pene gaga ta hande ikaguja. 2Eto embo amite tapa amo embo avoeto ivo ambu embo amo kiari avoeto embo amuna ari sapura ta pahuroro kito ke seima kekaha eto oreto humbasuja. 3Eto embo tapa ta ari sasapura pere mane rate embo amite tapa amita ari sasapura avoeto peneha ikaguja. 4Eto embo na priest peni umo oenga mane hetasuja te God na ijukau hetasuja amo priest peni Aaron na ena ainge dombo.

5Eto Keriso na umo oenga priest peni ae rate God na sago kiagora amita degi usasa ikenu humbuto hetenu amita degi ke einge ena. “Umo Meni nau eto na no Mama ra.” 6eto ke nei amo, “Umo embo Melchizedek na ena ainge dombo inena Priest eto daroho iresoa.” ke ainge God na ena. 7Eto Iesu na enda ta mihie hori gaga ijie si te tihi sisivu te tapa God na pehari ta oreketo umbaja pari ena amo meni isapasira ue God otohu ue pari ena amo God na amita pari ingina. 8Eto umo God ta Meni rate daingeto God ta ke agiari Meni aisuja avoeto osaga memenga ere koguahija amina kiari humbunu inono ena. 9Eto humbuto amita pure avo enu irae enu embo amuna amita ke agi eto amita degi vasiri daroho humbuto iresuja. 10Eto embo Melchizedek na ena ainge dombo ungotenau priest peni dombo Keriso amo God na ikena.

Ungo God ta ke toto pambavojo

11Eto amita ke neite neite nanena avo ingaeheva te ungo na ke ehaha ingari uje ae ue ingito ingarako ere ova avoeto daingeto ke ehaha emo aro ingovo. 12Eto ungo na ke ahe poekari embopo aheva te God ta ke ngangahia mane, avo ungo na ingesova amo ehako ingesova ehako ingesova ainge ue indari ngahia indae meni isapa emi kajarako uore ere ovova. 13Eto embo amuna God ta ke javotoho Keriso ta degi umbera amo humbuto hamo ae avoeto emi mu pere indagora amo meni isasarahora. 14Te embo na indari ngahia indaguja embo amo God ta ke ingito hamo eto sapura davore javotoho davore amo kiari avoeto meni isapa mane rate embo be ra.

Currently Selected:

Hebrews 5: OKVH

Highlight

Copy

Compare