Colossians 3

1Rate ungo amo God ta tihi ta Keriso ga tapa vasiri te erari embopo avoeto ungota hotembari jo tapa na uhu i ta ari avo be hotembevujo. Ai ta amo Keriso na God Mamo ta avo arumba peni amita ingeni be hena ta arumbeto mihia. 2Avoeto enda ta ari toto ungota hotembari na degi amita ari avo eheheto hotembevujo. 3Eto ungo Keriso ga pehari embopo rate ungota vasiri be amo Keriso, God ta degi mihia amita jota nununga ari mihia. 4Eto Keriso amo ungota irari be avoeto Keriso egerembeto puvurou amo ungo amite tapa usasa javotoho be ai ta puvuresova.

Irari mahu eto irari eha amita ke

5Eto enda ta ujeje sasapura ungota hamota mihia avo tevujo pehare, eto ari amo erevira tiha paiha sesena sasapura neite neite ue ino na arako uje ue ari sasapura neite neite ue donda humbasi ue tunga ta hotembagova (amo donda rate embo ta God eaguja.) 6eto ainge eagora embomeni amo God ta ke agi ae avoeto God na tumo peni vahai be aisuja. 7Eto ari ainge amina ungo tihi jigihoi ere uaeheva 8te ari ainge amo eha oroho emikote tovujo irae ai. Eto ke amo tumo te hini kambari te embo nei uje ae ari te urumbari te ke sasapura masa te amo ungota pe ta eto ivivi ta mane puvuresuja. 9-10Eto ungo na ke sokova mine ara mane aisova te ari tapa mahu hamo ari avo toto ari eha eto hamo eha asuketo miheva amo no hamo eha ari embo God amina no jota pure ururou ungo amita tombu hajire vahai ue amita ari be kesova. 11Eto ari amita heta amo enda nei embo rete Judea embo rete hamo kakamba humbari embo eto hamo kakamba umbae embo rete ke nei ari embo rete kiari kiae embo rete tapa amo Keriso ta tihi ta amina tihi jigihoi amita jota iragora. 12Eto ungo amo God ta embomeni avoeto God na osa ue amita toho ava siriketo umbuna avoeto ungona ari erevi amo hambo turarako evujo. Eto hamo ta turasova amo jo ari, hondate ari, meni isapa sira ari, sasaimbari, embo osa vesa ari, 13-14eto ari ainge avo tureto ue tapa amita hamota amo osa ari amina tatapeketo humbasuja. Eto embo osa vesa ari amo erevira, embo amuna no degi ta tumo ue ke au ingito amo hotembeto tojo eto Bada na ari no hotembeto toaguja ainge dombo hotembeto toari mine ara evujo. 15Eto God na ungo tapa toreketo humbei hamo vahai ere ova avoeto Keriso ta peka na ungota jo simba aja ue God osa evujo. 16Eto Keriso ta ke javotoho neite neite ari amina ungota jota iroja umbuvujo. Eto kiari javotoho amina oje kahari mine ara evujo. Eto God ta ke ta ‘Psalms’ kajari mihia amite eto ekalesia ta haveni ototohu kajari mihia amite na God ta degi haveni ijie jo tapa na osa osa evujo. 17Eto ungo ari do asova eto ke do aisova amo Bada Iesu ta javota eto amita Mamo God osa evujo.

Ekalesia ta irari amita ke

18Eto ungo evohu tapa ta degi ke erena amo ungo Bada avoeto ipone ta ke agi evujo. 19Eto ungo ipone na airi ta degi ngahia mane aisova te osa evujo 20eto ungo meniundi na Bada ta ari be avo ue ungota emone mamone ta ke avo iji tapa agi evujo. 21Eto ungo emone mamone na meniundi isembeove pure peive eagora avoeto isembari isapamane avo tovujo. 22Eto ungo embo nei ta ke agi ue pure ari embomeni na ungota pure tihi jigari embopo ta ke tapa avo agi evujo. Eto ungota pure simba ari embo mihie ungota pure kogue osa aja mane aisova te iji tapa pure ue Bada osa eagova avoeto evujo. 23Eto ungo pure tapa do aisova amo embo avoembo ae rate Bada avoembo pure ere ona ke ainge ijie jo tapa na pure evujo. 24Eto ungo erevi be hotembevujo, ungota pure tihi jigari embo be amo Keriso eto amita embomeni na hoteto humbasora donda amo ungona humbasova. 25Eto God na embo tapa amo heka vahai ta ari sirikihe ari sasapura ari embo tapa ta hajire amo amina ikau kesora.

Currently Selected:

Colossians 3: OKVH

Highlight

Copy

Compare