Acts 19

Paul da Ephesus ta pure ena

1Eto Apollos da Corinth ta mihinu Paul na enda orohuta pambuto da Ephesus ta puvuto ambotani hambuto 2enana ta degi ke einge eto ingina, “Ungo God ke be eheve Ahihi Otohu na ungo ta degi puveite?” ainge enu enana na, “Dago Ahihi Otohu kiaera,” ainge eo 3Paul na, “Ungo bapataito eheva amita be amo deire?” ainge enu ke mine einge ea, “John ta bapataito ta ahe poekari avo agi ue bapataito uera,” ainge eo 4Paul na einge ena, “John na bapataito ena amita be amo Israel embomeni na ari sasapura toto embo ambota puvuresuja avo ke be hotembara bapataito ena. Eto embo amo Bada Iesu ra.” Eto ainge enu 5ingito embomeni tapa Bada Iesu ta toho asi bapataito ea, 6eto Paul na enana ta hamo ta ingeni tembenu Ahihi Otohu na enana ta degi puvunu ke ingari nei te nei te na God ta ke hande ea, 7embo amo 12 aingera. 8Eto Paul na Judea embomeni ta giu ari bande ta hariga tapa 3 ainge horeto ke ngahia na embomeni ta degi ke einge ena, “God na amita embomeni toho be ere uhua avoeto Iesu enana ta king ikehija.” ainge enu ke avo mine ara ea 9rate embo nei nei na ke ingae tumo eto vahineto mihie Iesu ta irari degi avo embo tapa ta tihi ta ke sapura na ea. Eto ainge eo Paul na toto ambotani humbuto embo javo Tyrannus ta ke kasari bande ta pambuto iji vahai vahai ke hande eo ke avo embomeni na kasea. 10Eto jua heriso amita jo ta ke hande uo Judea embomeni te enda nei embomeni te aingeto enda Asia ta mihie God ta ke ingia.

Embo Sceva ta meniundi 7 amita ke

11Eto God na sovera ikihioi Paul na ari nei te nei te uoi embo kokojekagora. 12Eto God na ainge pere unu embo na Paul ta asukari be rete tuhari bo avo humbuto pehari embo ta ikeore embo kokojekihahera eto embo ta jo ta ahihi sasapura toto pambuhahera. 13Eto Judea embo ta ahihi sasapura ohimbari embo nei nei na degi tapa ta pahue eto kito Bada Iesu ta javo humbuto ahihi sasapura ohimbari eto ahihi sasapura ta degi ke einge ea, “Paul na Bada Iesu ke eaguja amita javo ta toto pambuvu,” ainge pere ere ijiahera. 14Eto Judea Priest okose javo Sceva ta meni undi tapa seven amina ari ainge ere uahera. Eto iji vahai ke ainge eo 15ahihi sapura na ke mine einge ena, “Iesu amo na kiarira eto Paul amo na kiarira te ungo God ta sovera umbae embopora ungo amunure?” ainge eto 16embo ahihi sapura na horari embo amina isoro peni vahai be eto Sceva ta meniundi ta bo jigito perara enu hamo teho memenga hambuhe amita bande toto pambua. 17Eto Judea embomeni te enda nei embomeni te aingeto da Ephesus ta mihie duru avo ingito joru peni vahai eto Bada Iesu ta javo amo dombo be ainge ijie jakeka ea. 18Eto ke be ari embo isapamane na embo tapa ta degi enana ta saruka ari harikea. 19Eto embo nei nei ta saruka ari books avo embo tapa ta tihi ta undukeo evekena. Eto books amita mine amo koro silver na ari tapa 50,000 ainge avo evekena. 20Eto ari ainge pere uo Bada ta ke na pajito enda enetena.

Da Ephesus embomeni na jujune peni vahai ea

21Eto jua heriso enda ai ta mihahija Paul na Ahihi Otohu na uje enu enda Macedonia te Greece te amita orohuta pambuto Jerusalem pambasi uje ena, “Eto ai mihima egerembeto pambuto da Rome kesona,” Paul na ke ainge 22eto amita hondate ari embo heriso Timothy te Erastus te aingeto ikenu da Macedonia ta pahuo iji isapa Paul na Asia Province ta da Ephesus ai pure ena. 23Eto iji aramite Bada Iesu ta ke ahe poekari avoeto da Ephesus embomeni na ereto jujune peni vahai ea 24amita be amo embo Demetrius na ingeni na temple isasaraho amo enda ta god evohu javo Artemis ta jakeka ari bande ainge avo silver na ove ena. Eto bande isasaraho avo embo Demetrius te amita pure ari embomeni te na ombuto koro isapa mane be ere humbuhahera, 25eto embo amina amita pure vahai embomeni jage enu puvuo einge ena, “Nau namei kamei ungo kogova ungotena pure eremina koro ere humbuhora 26te embo Paul na god ingeni na ove ari amo god be mane ke avo da Ephesus te Asia Province ta embomeni tapa jo kajehei ahereketo embo isapamane na Paul ta ke avo ke be erera. 27Avoeto ungotenau pure avo au sapura asuja eto pure pere mane ungotenau god evohu Artemis amo Asia embomeni te enda tapa embomeni na jakeka eagora amo amita temple teho asuja eto ungotenau god ta javo irae aisuja.” ainge enu 28ke avo ingito embomeni na gagaha te puvuto ke einge ea, “Da Ephesus ta god Artemis amo peni be ra.” ainge eo 29da tapa embomeni na ingito jajage te puvuto da Macedonia embo heriso Paul ga pahue ke hande ari embo javo Gaius te Aristarchus te kito andito goruketo humbuto enana ta ke kasari degi ai pambua. 30Eto Paul na ke kasari degi ta pambuto embomeni ta degi ke asi uje ena rate ambotani nei uhoho na haekea. 31Eto Province ta embo okokose na Paul tunga humbuto ke kasari ta mane horasuja ainge eto ke ikeo puvuna. 32Eto embo tapa jajage hohori te o a te puvua rate ke ingari embo irae amo jajage ea amite ke be amo deire amo kiae teho puvua. 33Eto Judea embomeni na embo Alexander mimikeo arahata puvuna embomeni na Alexander na ari sapura ari ke eo Alexander na ke jamo ara ingeni na ahe ahe eto amina ari sapura do ae avo eto embo ta degi ke asi unu 34embomeni na Alexander Judea embo kito gagaha peni vahai be 2 hours amita jo ta ke einge ea, “Da Ephesus ta God Artemis amo peni be ra,” ainge ea.

35Eto da ta ke hande ari embo okose na puvuto embo ke ere ijiea avo enu jamo eo ke einge ena, “Ephesus embomeni nau ke ingivujo. God Artemis amo peni be eto amita temple ta koro otohu uhu ta veari amo Artemis ove ari avo da Ephesus na simba eaguja amo embo tapa na kiarira 36eto embo nei na ke do mane asuja avoeto ungo jamo eto nei do mane asova eto ari sio sao avojo. 37Eto ungo na embo erevi humbuto puveva amo dagota temple ta donda pegene ae eto dagota god evohu amo sapura ke ae. 38Rate embo Demetrius te amita pure ari embopo te na embo ta pehumba asi uje asora amo court humbari embo mihia avoeto court ari iji te puvuto pehumba mine ara aisora. 39Eto ungo do uje asova amita ke amo iji mahu ikari mihia ai horukasova. 40Eto ungo eha isoro asi ere ova amita be amo irae avo eto ungotenau embo okokose na ke aro ke mine do avo, ke mine ari irae,” 41ainge enu sisiketo pambua.

Currently Selected:

Acts 19: OKVH

Highlight

Copy

Compare