1 Timothy 3
3
Bishop te Deacon te enana daingeto iresora ta ke.
1Ke peni amo erevira. Eto embo na bishop ta pure asi tunga ikasuja amo pure peni humbasi uje aisuja. 2Eto bishop aisuja embo amo ari einge eto iresuja. Amita irari nei avoeto embo na mane pehumba aisora. Eto amita ae jimbari amo heriso mane, vahai jimbasuja eto amita okope unduresi evivi sununu mane asuja te amita vasiri te ari te na embo tapa avo unduhurou embomeni na kogue osa aisora. 3Eto nei amo ahe poekari embo aisuja. Eto nei amo wine peni mane indesuja eto tumo embo mane aisuja eto jujune ke mane aisuja rate pekari, osari embo aisuja eto koro osa mane aisuja. 4Eto embo amina amita ae te meniundi te omena javotoho ue meniundi na embo amo otohu ke ijie amita ke agi ara ahe poekasuja. 5Eto ke erena amita be amo embo amina amita ae te meniundi te tihi jigae aisuja amo God ta embomeni ekalesia daingeto tihi jigou? 6Eto embo eha ihiketo God ambo ambo ere ua amina bishop mane aisuja amo Satan uhu ta ari sapura eto enda ta vena ainge dombo embo amina hotembari peni ue “Na na” aisuja. 7Eto bishop asuja embo avo ekalesia na pere mane ra te embo tapa na kito osa aisora eto ainge ae amo embo tapa na pehumba aisora eto pehumba amo Satan ta vage ra.
Deacon ta irari amita ke
8Eto embo amuna deacon aisuja amo embomeni na kito jakeka asora embo amina deacon aisuja amo ke sokova embo mane aisuja, wine peni mane indesuja, eto koro uje eto ke popoja na ijie mane humbasuja. 9Eto jo vivisako te na God ta ke be avo jigama aisuja. 10Eto embo amo eto kioro amita pure javotoho au kito aro deacon aisuja. 11Eto ainge dombo deacon ta ae amo jakeka ari haitekora eto ke sokova sio sao mane aisuja eto amita visi ta undurari ujeje mane asuja avo embo tapa na evohu avo kito ari haiteko ke aisora. 12Eto nei amo deacon aisuja embo amina ae heriso mane jimbasuja te vahai be jimbasuja eto meni hatira simba aisuja. 13Eto embo na deacon eto pure javotoho ere uma sovera ari humbuto amo Iesu Keriso humota be ururou avo God na kito kore aisuja.
God ta ari amo peni bera
14Eto na Paul nane no degi ta sausau pambasi uje ere ona 15te ari nei na puvuto peikau kito amo inena God ta ekalesia embomeni ta irari inena kioa ahari erevi ere kajihena. Eto God vasiri te amita ekalesia amo eingera, embo na bande tutuvi enda ta koveto hurukeore turi eaguja ainge dombo ekalesia amo ke be ari ta tutuvi ra. 16Eto embo na ke nei do mane aisora te God ta ari amo peni be amo erevira
“Keriso visi te puvuna Amita ari sapura irae avo ahihi otohu na kito embo javotoho ke ena. Eto anera na amita vasiri ere koguahera. Eto embomeni na amita ke enda tapa ta hande uo ke be ea. Eto God na amita usasa ta jiginu vihina”.
Currently Selected:
1 Timothy 3: OKVH
Highlight
Copy
Compare
Share
Want to have your highlights saved across all your devices? Sign up or sign in
© 1988, Wycliffe Bible Translators, Inc. All rights reserved.
