1 Corinthians 3

God ta pure ari embomeni

1Eto nau namei kamei, na ungota degi pambuhena amo ungo God ta Ahihi humbari embopo ta degi God ta ke ngangahia avo ahena te ungo God ta kiari na pajirae rate Keriso ta degi meni isasaraho na arako ove kito toa. 2Eto ungo indari be avo indari inono ae kito emi mu pere ikeo indieva te eha oroho emo ainge dombo indari be avo indari inono ae 3enda ta ujeje ta ere pambuhova amo ungota degi boru jumbari isapamane be mihia avoeto erena. 4Eto ungo na ‘Na Paul ta ambotani,’ eto ‘Na Apollos ta ambotani,’ ke ainge ereva amo enda embo ta ari avo ere ova. 5Eto Apollos amunure? Eto Paul amunure? Embo amo teho Bada ta pure embo amita ke avo kaiha ururoro ungo na ingova siriketo ikena 6eto na Paul na ji ve urari embo eto Apollos amo ji urea aita umo overekena te God na eoi ji amo pajiraguja 7eto ji ve urari embo amo tehora eto umo overekari embo amo tehora te God na vahai au ji amo pajiresuja. 8Eto ve urari embo te umo overekari embo te amo hotembari vahai na pure ere uma pure ta mine amo God na ikau humbasora 9eto dago God ga tapa hevuketo pure amita avo ere ora avoeto ungo amo dagota pure mane rate God ta pure ra. Eto ungo amo God ta bande avoeto God na ere gerikihia. 10Eto God na nau degi ta kiari javotoho ikena avoeto bande ta tutuvi hurukeo embo nei nei na tutuvi aita bande gerikihera avo be kogue gerikara uje ereona. 11Amita be amo God na tutuvi ikena amo tutuvi nei irae rate Iesu Keriso vahai na heteto mihia. 12Avoeto embo amuna tutuvi ai ta bande gerikasi uje aisuja amo ‘Gold’ retemo ‘Silver’ rete koro rete, ji rete, sasaha rete, ‘Rice’ vehu rete donda deina gerikasuja 13amo Bada ta iji puvuresuja amo sapura rete javotoho re amo iji amikote kesuja amo sapura retemo javotohore amo ji vevere na au kesuja, 14amo evekae iresuja embo amina amita pure ta mine amo humbasuja 15te embo bande sapura gerikasuja amo evekau irae au teho iresuja, eto embo amo ji peri na joeketo evikihirou God na orekasuja te embo amo hamo pupuho te iresuja.

16Eto God ta bande Otohu amo ungora te God ta Ahihi Otohu amo ungota degi ta iraguja te ungo kiaerete? 17Eto embo na God ta bande Otohu avo teto aimbasuja embo amo God na tau irae aisuja. Eto God ta bande amo Otohu ra eto ungo amo bande Otohu ra. 18Eto umo oenga jandireketo no degi ta ke sokova aojo. Eto umo kiari embo ke erea te kiae embo sira eto God ta degi kiari umbaehea. 19Amita be amo God na enda embo tapa amita kiari avo kogue enana ta ke avo huti ke eria amita ke amo einge kajari mihia, “God na eoi enda ta kiari embopo ta ke amo vage ta tarako eaguja.” ainge 20eto ke nei amo, “God na enda embopo ta kiari avo kogue kiari be mane ke eaguja,” 21avoeto ungo embo ambo ambo ari embopo na kogue na na avojo 22eto amita be amo Paul rete Apollos rete Cephas rete enda donda rete vasiri te pehari te ari mahu rete eha puvuroute tapa amo ungota pure ari donda ra 23eto ungo amo Keriso ta toho eto Keriso amo God ta tohora.

Currently Selected:

1 Corinthians 3: OKVH

Highlight

Copy

Compare