San Juan 4
4
Jesús mu̶u̶d je̱'e̱ Samaria to'oxyu̶jk
1Je̱'e̱ fariseotu̶jk ñejwu̶u̶ygyu̶x je̱'e̱ du'un ko je̱'e̱ Jesús y'u̶xpu̶jkpu̶du̶jk najty ni'igyu̶ myáyu̶ch y ko najty ni'igyu̶ may jya'ay yajnu̶u̶béty ni'igu̶ ka'p je̱'e̱ Juan, 2(ka'p najty je̱' ja'ayyajnu̶u̶be̱jtp je̱'e̱ Jesús, je̱'e̱ dyiscípulotu̶jk najty ja'ayyajnu̶u̶be̱jtku̶xp). 3Ko je̱'e̱ Jesús du'un nejwu̶u̶y, chi jim Judea chonnu̶, y wyimbijtnu̶ jim Galilea.
4Ko najty wyimbijtnu̶, jim Samaria naaxjooty najty jyatytyimyñaxu̶'u̶wa'añ. 5Chi oy jya'ady ma je̱'e̱ kajpt tu'ug xyu̶u̶'átyu̶ñ Sicar, Samaria naaxjooty, mu̶wingón je̱'e̱ naax mu̶dyiibu̶ je̱'e̱ Jacob y'ung José myooyu̶ñ. 6Jim najty je̱'e̱ Jesús yajpaady ma je̱'e̱ nu̶u̶gópt mu̶dyiibu̶ tyijku̶xypyu̶ñ, je̱'e̱ Jacob ñu̶u̶gópt. Jesús tu̶ najty je̱'e̱ y'anukxu̶u̶yñu̶ mu̶u̶d je̱'e̱ tu'uyo'oyu̶u̶, chi ñaxwech nu̶u̶gopt'aguuy. Timykyugu̶'u̶waanu̶py najty je̱'e̱ xu̶u̶. 7-8Je̱'e̱ dyiscípulotu̶jk kajptjooty najty je̱'e̱ tu̶ ñú̶kxku̶xy; nu̶kxy najty tijaty juuygyu̶xy tii kyaaygyu̶xu̶py y'uukku̶xu̶byu̶ñ. Ko je̱'e̱ Samaria to'oxyu̶jk tu'ug jya'ty ma je̱'e̱ nu̶u̶góptu̶ñ nu̶u̶ yajpu̶dzu̶u̶mbu̶, y chi je̱'e̱ Jesús nu̶maay je̱'e̱ to'oxyu̶jk:
—U̶u̶ch je̱'e̱ nu̶u̶ we̱e̱nu̶ moogy.
9Peru̶ je̱'e̱ judío ja'ay ka'p je̱'e̱ ñaymyé̱kxu̶gu̶xy mu̶u̶d je̱'e̱ samaria ja'ay ajku̶xy, chi je̱'e̱ to'oxyu̶jk Jesús adzooy:
—¿Ti u̶u̶ch je̱'e̱ nu̶u̶ ko miich xy'amdoowu̶? Miich judío ja'ay miich, y u̶u̶ch samaria ja'ayu̶ch.
10Chi je̱'e̱ Jesús y'adzoowu̶:
—Ko u̶xyu̶py je̱'e̱ oybyu̶ m'oknejwu̶'u̶y mu̶dyiibu̶ je̱'e̱ Dios yejkypyu̶ñ mu̶u̶d miich kyu̶xpu̶, y nan ko u̶xyu̶py nandu'un m'oknejwu̶'u̶y pu̶n je̱'e̱ nu̶u̶ yam xy'amdoowu̶byu̶ñ, ni'igu̶ miich u̶xyu̶py nu̶u̶ je̱' m'amdoowu̶py, y je̱'e̱ju̶tz u̶xyu̶py je̱'e̱ nu̶u̶ miich xymyooby je̱'e̱ mu̶dyiibu̶ je̱'e̱ jugy'ajt wiinu̶u̶xu̶u̶bu̶ ye̱jkpu̶ñ.
11Chi je̱'e̱ to'oxyu̶jk je̱'e̱ Jesús nu̶maay:
—Windzú̶n, miich ka'p tii mmu̶u̶du̶ch tii je̱'e̱ nu̶u̶ mu̶u̶d mjuudu̶chu̶ñ, y janch ku̶u̶k yu̶'u̶ jiibu̶ nu̶u̶gópt: ¿y maa je̱'e̱ nu̶u̶ mbu̶ga'añ mu̶dyiibu̶ u̶u̶ch xymyo'owaambu̶ñ je̱'e̱ mu̶dyiibu̶ je̱'e̱ jugy'ajt wiinu̶u̶xu̶u̶bu̶ ye̱jkpu̶ñ? 12¿Nej jakni'igyu̶du̶m je̱'e̱ ane̱'e̱mu̶ñ miich mu̶k mmu̶u̶du̶ch ni'igu̶ ka'p je̱'e̱ Jacob, je̱'e̱ nmu̶j'áp nmu̶jteedy ajtu̶m ajku̶xy? Je̱' u̶u̶ch adayaaba nu̶u̶gópt xyajmu̶wu̶'u̶mu̶u̶ygyu̶x, je̱'e̱ mu̶dyiibu̶ ijty je̱' y'uukypyu̶ñ y mu̶dyiibu̶ ijty je̱'e̱ y'ung y'ana'k y je̱'e̱ wyaj jyu̶yujk nandu'un y'uukku̶xypyu̶ñ.
13Chi je̱'e̱ Jesús y'adzoowu̶:
—Ku̶xyu̶ pu̶njaty adayaaba nu̶u̶ uukku̶xpu̶ñ ma adayaaba nu̶u̶góptu̶ñ, tu̶dzu̶'u̶wu̶u̶ju̶p je̱'e̱ ja'adu'ook ajku̶xy, 14peru̶ je̱'e̱ mu̶dyiibu̶ je̱'e̱ nu̶u̶ uukp mu̶dyiibu̶ u̶u̶ch nyejkypyu̶ñ, ka'p je̱'e̱ nimu̶naaxu̶u̶ ja'adu'ook y'oktu̶dzu̶u̶yu̶nu̶ch. Je̱' ko je̱'e̱ nu̶u̶ mu̶dyiibu̶ u̶u̶ch nyejkypyu̶ñ du'un je̱'e̱ y'awimbídu̶ch ma je̱'e̱ ja'ayu̶ñ neby tu'ug nu̶u̶gópt mu̶dyiibu̶ je̱'e̱ jugy'ajt wiinu̶u̶xu̶u̶bu̶ ye̱jkpu̶ñ.
15Chi je̱'e̱ to'oxyu̶jk y'adzooy:
—Windzú̶n, u̶u̶ch yu̶'u̶ jiibu̶ nu̶u̶ moogy, ka'pu̶ u̶u̶ch n'oktu̶dzu̶u̶yu̶nu̶ch y ka'pu̶ u̶u̶ch ya nmiinu̶ch ma adayaaba nu̶u̶gópt nu̶u̶ yajpu̶dzu̶u̶mbu̶.
16Chi je̱'e̱ Jesús ñu̶maayu̶:
—Nu̶kx je̱'e̱ mniya'aydyu̶jk wow y mu̶dmínu̶ch ya.
17Chi je̱'e̱ to'oxyu̶jk y'adzooy:
—Ka'p u̶u̶ch nniya'aydyu̶jk.
Y chi je̱'e̱ Jesús ñu̶maayu̶.
—Tu̶y'ajtu̶ñ je̱'e̱ du'un neby mmu̶na'añu̶ñ ko ka'p je̱'e̱ mniya'aydyu̶jk, 18je̱' ko mu̶gooxk je̱'e̱ ya'aydyu̶jk tu̶ mmu̶dtzu̶na'ay, y je̱'e̱ mu̶dyiibu̶ cham mmu̶u̶du̶ñ ka'p je̱'e̱ mniya'aydyu̶jk'adyii. Tu̶y'ajtu̶ñ je̱'e̱ du'un neby tu̶ mmu̶na'añu̶ñ.
19Ko je̱'e̱ to'oxyu̶jk adaa du'un mu̶dooy, chi myu̶naañ:
—Windzú̶n, miich je̱' miich da'a tu'ug je̱'e̱ Dios y'ayuuknajtzkapxu̶u̶ybyu̶. 20U̶u̶ch je̱'e̱ nmu̶j'áp nmu̶jteedy ajku̶xy je̱'e̱ samaria ja'ay ajku̶xy, yaa je̱'e̱ Dios jékyu̶p o'owu̶dajty ajku̶xy ma adayaaba koptu̶ñ; peru̶ miich judío ja'ay ajku̶xy du'un miich mmu̶naangu̶xy ko jim Jerusalén u̶u̶ch je̱'e̱ Dios mu̶baad n'o'owu̶dajtku̶xy.
21Chi je̱'e̱ Jesús adzooy je̱'e̱ to'oxyu̶jk:
—To'oxyu̶jk, mu̶jpu̶daaku̶gyu̶ch adaa nmu̶dya'agy, je̱' ko pyade̱e̱mby je̱'e̱ tiempo mu̶naa; mu̶naa je̱'e̱ Dios Teedy oy maa mu̶baad m'o'owu̶dajtku̶xy, ka'p jyatytyimyaaju̶ch ma adayaaba koptu̶ñ y nan ka'p jyatytyimyjerusalénu̶ch. 22Miich samaria ja'ay ajku̶xy ka'p miich mnejwu̶u̶ygyu̶xy pu̶n m'o'owu̶dajtku̶xypyu̶ñ, peru̶ u̶u̶ch judío ja'ay ajku̶xy nnejwu̶u̶ygyu̶xypyu̶ch pu̶n u̶u̶ch n'o'owu̶dajtku̶xypyu̶ñ, je̱' ko jim je̱'e̱ aanu̶mu̶ ni'idzooku̶ñ chooñ ma je̱'e̱ judío ja'ay ajku̶xyu̶ñ. 23Peru̶ pyade̱e̱mby je̱'e̱ tiempo mu̶naa, y cham je̱'e̱ du'un tu̶ paady mu̶naa je̱'e̱ ja'ay mu̶dyiibu̶ je̱'e̱ Dios Teedy jaanch o'owu̶dajtku̶xpu̶ñ; wan tu'ug'aa tu'ugjoot o'owu̶dajtku̶xy, du'un neby naty je̱'e̱ Dios y'Espíritu pyube̱jtu̶gu̶xyu̶ñ. Je̱' ko du'un je̱'e̱ Dios Teedy tzoky ko pu̶n tu'ug'aa tu'ugjoot o'owu̶dajtu̶gu̶xpu̶ñ, wan du'un o'owu̶dajtu̶gu̶xy. 24Dios Espíritu je̱', je̱'e̱ mu̶dyiibu̶ je̱'e̱ Dios jaanch o'owu̶dajtku̶xpu̶ñ wan tu'ug'aa tu'kjoot o'owu̶dajtku̶xy, du'un neby naty je̱'e̱ Dios y'Espíritu pyube̱jtu̶gu̶xyu̶ñ.
25Mu̶'it je̱'e̱ to'oxyu̶jk nu̶maay je̱'e̱ Jesús:
—U̶u̶ch nnejwu̶u̶ybyu̶ch ko je̱'e̱ Mesías myina'añ (je̱' u̶u̶ch du'un ndijpy je̱'e̱ Cristo) y ko naty je̱' myiñ, mu̶'it je̱'e̱ tu̶y'ajt ku̶xyu̶ xy'awaanda'awaanu̶ ajtu̶m ajku̶xy.
26Chi je̱'e̱ Jesús je̱'e̱ to'oxyu̶jk nu̶maay:
—U̶u̶ch je̱'e̱ Cristo, je̱'e̱ mu̶dyiibu̶ yam xymyu̶dmu̶dyaakpu̶ñ.
27Mu̶'it je̱'e̱ Jesús dyiscípulotu̶jk oy jya'tku̶xy, y chi mu̶k mu̶daj mu̶maaygyu̶xy ko je̱'e̱ Jesús to'oxyu̶jk najty mu̶dmu̶dya'agy. Peru̶ ka'p je̱'e̱ Jesús ni pu̶n yajtu̶u̶y tii najty je̱'e̱ to'oxyu̶jk chojkypyu̶ñ, o tii najty yajmu̶dmu̶dyaakypyu̶ñ. 28Chi je̱'e̱ to'oxyu̶jk myajt jim u̶xyo'oy y ñu̶kxy kajptjooty, y oy je̱'e̱ ja'ay nu̶ma'ay:
29—Miingu̶x, jam je̱'e̱ ja'ay tu'ug ok'ijxu̶m ajku̶xy mu̶dyiibu̶ u̶u̶ch ku̶xyu̶ tu̶ xy'awaandaayu̶ tijátyu̶ch tu̶ nduñu̶ñ. ¿Nej ka'p je̱'e̱ da'a jye̱'e̱ju̶ch je̱'e̱ Cristo?
30Chi je̱'e̱ mayjya'ay kajptjooty chóngu̶xy y ñú̶kxku̶xy ma je̱'e̱ Jesús najtyu̶ñ. 31Cham najty je̱'e̱ Jesús dyiscípulotu̶jk jya'anu̶ma'ayii ajku̶xy:
—Windzú̶n, kay oy ii we̱e̱nu̶.
32Chi je̱'e̱ Jesús y'adzoowu̶ ajku̶xy:
—U̶u̶ch nmu̶u̶du̶ch je̱'e̱ kaayu̶ñ uuku̶ñ mu̶dyiibu̶ miich ka'p mnejwu̶u̶ygyu̶xyu̶ñ.
33Chi je̱'e̱ discípulotu̶jk amíñ u̶xyu̶py ñayyajtu̶u̶du̶gu̶u̶yu̶ ajku̶xy:
—¿Nej tu̶ je̱'e̱ kaayu̶ñ uuku̶ñ da'a yajmiinu̶xyu̶?
34Chi je̱'e̱ Jesús ñu̶maayu̶ ajku̶xy:
—Je̱'e̱ kaayu̶ñ uuku̶ñ mu̶dyiibu̶ u̶u̶ch du'un ndijpyu̶ñ, je̱' je̱' ko u̶u̶ch je̱'e̱ Dios chojku̶ñ nguydyuunu̶ch je̱'e̱ mu̶dyiibu̶ u̶u̶ch ya naaxwiiñ tu̶ xykyexyu̶ñ y nyajmaayu̶chu̶ch je̱'e̱ tyuung. 35Miich ajku̶xy du'un miich mmu̶naangu̶xy: ‘Mu̶daaxk po'o tyu̶goy'atyñu̶ ma je̱'e̱ pu̶da'aky mu̶baad nyajpu̶du̶'ku̶nu̶ju̶ñ’, peru̶ u̶u̶ch miich nnu̶maaygyu̶xypy ko ok'ijxku̶x je̱'e̱ kam, tu̶ je̱'e̱ myu̶jaanu̶ y je'eyu̶ je̱'e̱ pyu̶du̶'u̶gaanu̶. 36Je̱'e̱ mu̶dyiibu̶ je̱'e̱ pu̶da'aky yajpu̶du̶'kpu̶ñ pyaatypy myu̶ju'uñ je̱', y je̱'e̱ pu̶da'aky mu̶dyiibu̶ pu̶du̶'kpu̶ñ je̱' wiinu̶u̶xu̶u̶ ídu̶p. Y du'unu̶tz je̱'e̱ niguipxy xyondaakku̶xu̶ch je̱'e̱ mu̶dyiibu̶ niip y je̱'e̱ mu̶dyiibu̶ je̱'e̱ pu̶da'agy naty yajpu̶du̶'kpu̶ñ. 37Je̱' ko tu̶y'ajt je̱'e̱ du'un neby je̱'e̱ ayuuk myu̶na'añu̶ñ: ‘Wiingpu̶ je̱'e̱ niip y je̱'e̱ wiingpu̶ je̱'e̱ yajpu̶du̶'kp.’ 38U̶u̶ch miich tu̶ ngue̱jxku̶xy ko je̱'e̱ pu̶da'agy myajpu̶du̶'kku̶xu̶ch mu̶dyiibu̶ miich ka'p tu̶ mniipku̶xy mduungu̶xyu̶ñ, wiingpu̶ je̱'e̱ niipku̶x tuungu̶x, y je̱'e̱ju̶tz miich je̱'e̱ tyuung du'un mmu̶xoon mmu̶'ijtu̶py ajku̶xy.
39Janch may je̱'e̱ ja'ay Jesús y'ayuuk tyu̶y'ajt mu̶bu̶jku̶ ajku̶xy je̱'e̱ mu̶dyiibu̶ najty jim Samaria kugajptu̶ñ ajku̶xy, ko je̱'e̱ to'oxyu̶jk najty du'un tu̶y tu'uda'agy tu̶ ñu̶maayu̶gu̶xy: “Tu̶ u̶u̶ch je̱'e̱ ku̶xyu̶ xy'awaandaayu̶ tijátyu̶ch tu̶ nduñu̶ñ.” 40Ko je̱'e̱ samaria ja'ay jim jya'tku̶xy ma je̱'e̱ Jesús najtyu̶ñ, chi je̱'e̱ Jesús mu̶nukxtaakku̶xy ko wan wu̶'u̶my mu̶u̶d je̱' ajku̶xy. Chi je̱'e̱ Jesús jim me̱jtz xu̶u̶ wyu̶'u̶my. 41Y may je̱'e̱ ja'ay ni'igyu̶ mu̶bu̶jkku̶xy je̱'e̱ Jesús y'ayuuk tyu̶y'ajt ko du'un mu̶doogu̶xy neby najty je̱' ku̶'u̶m myu̶na'añu̶ñ. 42Chi je̱'e̱ to'oxyu̶jk nu̶maay ajku̶xy:
—Chamnu̶ u̶u̶ch tu̶ nmu̶bu̶jkku̶xy, ka'p pyaadyu̶ch ko u̶u̶ch miich du'un je'eyu̶ tu̶ xyñu̶maaygyu̶xy, paady u̶u̶ch tu̶ nmu̶bu̶jkku̶xy je̱' ko u̶u̶ch nandu'un ku̶'u̶m tu̶ nmu̶doogu̶xy y nnejwu̶u̶ygyu̶xypyu̶ch ko je̱' je̱'e̱ jaanch je̱'e̱ Cristo, je̱'e̱ naaxwiiñjya'ay ñiwaambu̶ yajtzookpu̶ ajku̶xy.
Jesús yajtzo'ogy tu'ug je̱'e̱ mu̶j'ane̱'e̱mbu̶ myu̶jtuungmu̶u̶dpu̶ y'ung
43Ko me̱jtz xu̶u̶ ñajxnu̶, chi je̱'e̱ Jesús choñ jim Samaria naaxjooty y ñu̶kxy jim Galilea. 44Je̱' ko du'un je̱' ku̶'u̶m myu̶naañ, ka'p je̱'e̱ Dios y'ayuuknajtzkapxu̶u̶ybyu̶ yajmu̶j'adyii ma je̱'e̱ kyu̶'u̶mnaax kyu̶'u̶mgajptu̶ñ. 45Ko je̱'e̱ Jesús jim Galilea jya'ty, chi je̱'e̱ jimbu̶ ja'ay xi'ig xon kyu'ubu̶jku̶ ajku̶xy, je̱' ko tu̶ najty je̱'e̱ nandu'un xu̶u̶'ajtpu̶ y'ooygyu̶xy Pascua xu̶u̶ jim Jerusalén y tu̶ najty je̱'e̱ mu̶jwinma'añ jim ku̶xyu̶ ijxku̶xy mu̶dyiijáty je̱'e̱ Jesús najty jim tu̶ tuñu̶ñ.
46Chi je̱'e̱ Jesús ja'adu'ook wyimbijty jim Caná Galilea naaxjooty, ma najty je̱'e̱ nu̶u̶ tu̶ yajviinokojyu̶ñ. Y jim najty je̱'e̱ mu̶j'ane̱'e̱mbu̶ myu̶jtuungmu̶u̶dpu̶ tu'ug mu̶dyiibu̶ najty y'ung jim tu'ug pu̶jku̶bu̶ñ jim Capernaum. 47Ko je̱'e̱ mu̶jtuungmu̶u̶dpu̶ du'un nejwu̶u̶y ko je̱'e̱ Jesús najty tu̶ wyimbity Galilea, tu̶ chooñ najty jim Judea, chi oy ixy y mu̶nukxtaaky ko ñú̶kxu̶ch ma je̱'e̱ tyu̶jku̶ñ y yajtzookku̶xu̶ch je̱'e̱ y'ung mu̶dyiibu̶ najty timy'o'ogaanu̶py. 48Chi je̱'e̱ Jesús adzooy je̱'e̱ mu̶jtuungmu̶u̶dpu̶:
—Miich ajku̶xy ka'p miich mmu̶bu̶jkku̶xy, pu̶nu̶ ka'p je̱'e̱ ijxpe̱jt y je̱'e̱ mu̶jwinma'añ naty jayu̶jp m'ijxku̶xy.
49Peru̶ chi je̱'e̱ mu̶jtuungmu̶u̶dpu̶ myu̶naañ:
—Windzú̶n, tun je̱'e̱ may'ajt, jam tzojku̶ ma u̶u̶ch je̱'e̱ n'ung ka'anu̶ y'o'ogyñu̶ju̶ñ.
50Mu̶'it je̱'e̱ Jesús nu̶maay je̱'e̱ mu̶jtuungmu̶u̶dpu̶:
—Wimbit ma je̱'e̱ mdu̶jku̶ñ; je̱'e̱ m'ung mu̶baadu̶'u̶waamb je̱'.
Je̱'e̱ mu̶jtuungmu̶u̶dpu̶ myu̶bu̶jk je̱' neby je̱'e̱ Jesús ñu̶maayu̶ju̶ñ, y chi wyimbijty ma je̱'e̱ tyu̶jku̶ñ. 51Wimbijtnu̶py najty ma je̱'e̱ tyu̶jku̶ñ ko je̱'e̱ tyuumbu̶du̶jk oy jyu̶jpkubaadu̶u̶yu̶gu̶xy y chi ñu̶maayu̶ ajku̶xy:
—¡Tu̶ je̱'e̱ m'ung myu̶baadu̶'u̶y!
52Chi je̱' yajtu̶u̶y tii hooru̶ je̱'e̱ y'ung najty oy tu̶ ñayjyu̶wu̶u̶ydyu̶gu̶'u̶yiiju̶ñ, y chi je̱'e̱ tyuumbu̶du̶jk y'adzoowu̶gu̶xy:
—U̶xu̶u̶y, ku'udu̶gu̶'u̶xu̶u̶ je̱'e̱ jyu̶u̶nba'am u̶xu̶u̶y tyu̶jch.
53Chi je̱'e̱ ungteedy ja'aymye̱jtzpaaty ko je̱'e̱ hooru̶ najty mu̶naa je̱'e̱ Jesús najty du'un tu̶ ñu̶ma'ayiiju̶ñ: “Tu̶ je̱'e̱ m'ung myu̶baadu̶'u̶y.” Chi je̱'e̱ ungteedy je̱'e̱ Jesús nigu̶xyu̶ mu̶bu̶jkku̶xy du'uñdyu̶ najty tyu'kju̶u̶n tyu'ktu̶jk'ajtku̶xyu̶ñ.
54Adaa je̱' je̱'e̱ mu̶me̱tzkpu̶ ijxpe̱jt mu̶jwinma'añbyu̶ mu̶dyiibu̶ je̱'e̱ Jesús tyuunu̶ñ jim Galilea, ko najty jim Judea tu̶ y'oy.
Currently Selected:
San Juan 4: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005