Gálatas 2

Je̱'e̱ wiingpu̶ apóstolestu̶jk je̱'e̱ Pablo ku'ubu̶jkku̶xy

1Kumajmáktz jumu̶jt u̶u̶ch ja'adu'ook nnu̶kxy jim Jerusalén mu̶u̶d je̱'e̱ Bernabé, y nan nmu̶dnú̶kxu̶ch je̱'e̱ Tito. 2Ooy u̶u̶ch jim je̱' ko u̶u̶ch je̱'e̱ Dios najty du'un tu̶ xyñu̶ma'ay ko u̶u̶ch jim nnú̶kxu̶ch. Y jim Jerusalén u̶u̶ch nyajnayyo'oymyujku̶ agu̶ je̱'e̱du̶'ajty je'eyu̶ ajku̶xy je̱'e̱ mu̶dyiibu̶ je̱'e̱ mu̶bu̶jkpu̶du̶jk ni'igu'ubajk'ajtku̶xpu̶ñ, chi u̶u̶ch je̱'e̱ ayuuk tu̶y'ajt ngapxtu̶u̶wu̶ ajku̶xy je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ, je̱'e̱ mu̶dyiibu̶ u̶u̶ch ngapxwa'kxypyu̶ñ ma je̱'e̱ ka'pu̶ jyudíoja'ayu̶chu̶ñ ajku̶xy. Nduuñu̶ch adaa du'un je̱' u̶u̶ch najty du'un nga'atzojkypy ka'pu̶ u̶u̶ch je̱'e̱ nduung nigoo y'ayówu̶ch, je̱'e̱ mu̶dyiibu̶ u̶u̶ch najty tu̶ nduñu̶ñ y je̱'e̱ mu̶dyiibu̶ u̶u̶ch najty nduumbyu̶ñ. 3Peru̶ ni je̱'e̱ Tito, je̱'e̱ mu̶dyiibu̶ u̶u̶ch najty nmu̶u̶du̶ñ je̱'e̱ mu̶dyiibu̶ najty griegoja'ayu̶ñ, kya'ayajmu̶dzibu̶u̶yu̶ ko yajtu̶y'ajtu̶'u̶wu̶ch. 4Nije̱' je̱'e̱ mu̶gu'uktu̶jk je̱'e̱ mu̶dyiibu̶ je̱'e̱ tu̶y'ajt ka'p tu'uda'agy mu̶bu̶jkku̶xyu̶ñ amechu̶ tyu̶gu̶u̶ygyu̶xy ma u̶u̶ch najty nyajpaatku̶xyu̶ñ; y'ix y'amdo'idaangu̶xy neby u̶u̶ch najty ngápxku̶xy nmu̶dyaakku̶xyu̶ñ ko mu̶'it n'awa'adzpu̶dzu̶u̶mu̶mu̶ch ajku̶xy ma je̱'e̱ judío ja'ay kyostumbre winma'añdyu̶ñ ko je̱'e̱ Cristo Jesús nmu̶bu̶jku̶mu̶ch ajku̶xy y xyajka'awaangu̶xyu̶ch jiiby ja'adu'ook ma je̱'e̱ ane̱'e̱mu̶ñ y'ane'emyu̶ñ, du'un neby je̱'e̱ ane̱'e̱mu̶ñ mu̶baad ja'adu'ook xymyu̶dajtu̶mu̶ñ ajku̶xy neby je̱'e̱ tuumbu̶ ni'idoogypyu̶ju̶ñ. 5Peru̶ ni tu'kjaxu̶'u̶gy u̶u̶ch je̱'e̱ nga'akweentu̶tuungu̶xy nnú̶kxyu̶ch xyajkapxykyu'ubu̶jkku̶xy, je̱' ko je̱' u̶u̶ch najty ndzojkku̶xypy nu̶kxy je̱'e̱ tu̶y'ajtpu̶ ayuuk miich tu̶y'ajt mmu̶dajtku̶xy, je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ.

6Peru̶ ka'p u̶u̶ch ni tii jemybyu̶ ayuuk xymyooygyu̶xy je̱'e̱ mu̶dyiibu̶ je̱'e̱ mu̶bu̶jkpu̶du̶jk najty nigu'ubajk'ajtku̶xpu̶ñ, (u̶u̶ch ka'p u̶u̶ch tii ngweentu̶ju̶ch oy u̶xyu̶py je̱'e̱ mu̶jtuung ja'ani'igú̶xp'ajtku̶xpu̶, je̱' ko ka'p je̱'e̱ Dios ja'ay win'ixy tu̶ydyúñ, y tu'ugyu̶ Dios winduuy ajtu̶m ajku̶xy). 7Ka'anu̶ u̶u̶ch najty je̱'e̱ jemybyu̶ ayuuk xymyooygyu̶xy, ko oy ku'ubu̶jkku̶xy ko u̶u̶ch je̱'e̱ Dios je̱'e̱ tuung najty tu̶ xyajni'ipú̶ky, ko u̶u̶ch je̱'e̱ ayuuk tu̶y'ajt ngapxwa'kxu̶ch je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ ma je̱'e̱ ka'pu̶ jyudíoja'ayu̶ch ajku̶xyu̶ñ, du'un neby je̱'e̱ Pedro je̱'e̱ tuung najty tu̶ yajni'ipú̶kyu̶ñ ko je̱'e̱ ayuuk tu̶y'ajt kapxwa'kxu̶ch je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ ma je̱'e̱ judío ja'ay ajku̶xyu̶ñ. 8Je̱'e̱ Dios je̱'e̱ mu̶dyiibu̶ je̱'e̱ Pedro ke̱jx ko y'apóstol'ádu̶ch ma je̱'e̱ judío ja'ay ajku̶xyu̶ñ, nan je̱' u̶u̶ch nandu'un xykye̱jx ko u̶u̶ch n'apóstol'ádu̶ch ma je̱'e̱ ka'pu̶ jyudíoja'ayu̶ch ajku̶xyu̶ñ.

9Paady je̱'e̱ Santiago, je̱'e̱ Pedro y je̱'e̱ Juan, je̱'e̱ mu̶dyiibu̶ je̱'e̱ mu̶bu̶jkpu̶du̶jk najty nigu'ubajk'ajtku̶xpu̶ñ, oy ku'ubu̶jkku̶xy ko je̱'e̱ Dios je̱'e̱ may'ajt najty tu̶ tuñ mu̶u̶d u̶u̶ch. Y ñi'igu̶xu̶'u̶gu̶ch ko u̶u̶ch najty tu̶ xykyu'ubu̶jkku̶xy neby je̱'e̱ mu̶gu'ugu̶ñ, chi u̶u̶ch xykyu̶'u̶majtzku̶xy u̶u̶ch y je̱'e̱ Bernabé, y chi du'un ku'ubu̶jkku̶xy ko u̶u̶ch nú̶kxku̶xu̶ch ma je̱'e̱ ka'pu̶ jyudíoja'ayu̶ch ajku̶xyu̶ñ, y je̱' ajku̶xy ma je̱'e̱ judío ja'ay ajku̶xyu̶ñ. 10Je'eyu̶ u̶u̶ch xyajja'aymye̱jtzku̶xy ko u̶u̶ch je̱'e̱ judío ayoobu̶du̶jk mbube̱jtku̶xu̶ch, je̱'e̱ mu̶dyiibu̶ u̶u̶ch je'emy nxu̶'u̶mu̶'u̶ttuumbyu̶ñ.

Pablo je̱'e̱ Pedro mu̶kmu̶gapxy jim Antioquía

11Peru̶ ko je̱'e̱ Pedro jim Antioquía jya'ty, chi u̶u̶ch jim nmu̶kmu̶gapxy wiinu̶ ju̶jp, je̱' ko du'un neby najty y'adu̶'u̶chu̶ñ tuundu̶gooby najty je̱'e̱ du'un. 12Timyjyayu̶jp myu̶dkaaymyujkypy myu̶d'uukmujkypy najty je̱'e̱ ka'pu̶ jyudíoja'ayu̶ch ajku̶xy, u̶xtu̶ koonu̶ je̱'e̱ ja'ay oy nije̱' jya'tku̶xy je̱'e̱ mu̶dyiibu̶ je̱'e̱ Santiago najty tu̶ kexyu̶ñ. Mu̶'it ixy ka'a'íxy puyo'oydyuuttu̶gu̶u̶ygyu̶xnu̶ je̱'e̱ ka'pu̶ jyudíoja'ayu̶ch ajku̶xy, y ka'p okmu̶dkaaymyujk okmu̶d'uukmujkku̶xnu̶, je̱' ko tzu̶gu̶u̶by najty je̱'e̱ Pedro ko je̱'e̱ judío ja'ay du'un nejwu̶u̶ygyu̶xu̶ch je̱'e̱ mu̶dyiibu̶ je̱'e̱ tu̶y'ajtu̶'u̶yiibyu̶ najty mu̶kta'agy payo'oygyu̶xpu̶ñ. 13Y je̱'e̱ wiingpu̶ judío mu̶bu̶jkpu̶du̶jk nandu'un je̱'e̱ nandu'un y'adu̶u̶tzku̶xy neby je̱'e̱ Pedro najty tu̶ y'adu̶'u̶chu̶ñ mu̶u̶d je̱'e̱ cho'oydyu'undúk winma'añ, u̶xtu̶ je̱'e̱baad yajwin'u̶n je̱'e̱ Bernabé. 14Paady ko u̶u̶ch du'un n'ijxy, ko najty du'un ka'apaduungu̶xy neby je̱'e̱ tu̶y'ajt y'u̶xpu̶jku̶ñ myu̶na'añu̶ñ ma je̱'e̱ ayuuk tu̶y'ajt je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ, chi u̶u̶ch je̱'e̱ Pedro mu̶bu̶jkpu̶du̶jk winduuy nmu̶kmu̶gapxy: “Miich it ja'ajudioja'ay, du'un miich tu̶ mdzu̶na'ay tu̶ mjugy'aty neby ka'pu̶ mjudioja'ayu̶chu̶ñ, ¿y ti je̱'e̱ ka'pu̶ jyudíoja'ayu̶ch ajku̶xy ko myajmu̶dzibu̶'u̶waangu̶xy ko du'un chu̶naaygyu̶x jyugy'ajtku̶xu̶ch neby je̱'e̱ judío ja'ay ajku̶xyu̶ñ?”

Je̱'e̱ judío ja'ay ajku̶xy y je̱'e̱ ka'pu̶ jyudíoja'ayu̶ch ajku̶xy ni'idzooku̶ñ paatku̶xy mu̶u̶d je̱'e̱ mu̶bu̶jk'ajtu̶ñ

15U̶u̶ch judío ja'ay ajtu̶m ajku̶xy y du'un tu̶ nma'axung'ajtu̶m ajku̶xy, y ka'p nbokyjya'ayu̶ch ajtu̶m ajku̶xy neby je̱'e̱ ka'pu̶ jyudíoja'ayu̶chu̶ñ ajku̶xy. 16Peru̶ nnejwu̶u̶yu̶mby ko ka'p pu̶n pyokyñi'iwa'ach ko kuydyúñ neby je̱'e̱ Moisés y'ane̱'e̱mu̶ñ y'ane'emyu̶ñ, mu̶'it yajpokyñi'iwa'ach ko je̱'e̱ Jesucristo naty yajmu̶bú̶ky. Paady je̱'e̱ Jesucristo u̶u̶ch nandu'un tu̶ nmu̶bu̶jku̶m ajku̶xy, neby mu̶baad nbokyñi'iwaatzu̶mu̶ñ ajku̶xy mu̶u̶d je̱'e̱ mu̶bu̶jku̶ñ mu̶dyiibu̶ jim tu̶ nbu̶daaku̶mu̶ñ ajku̶xy ma je̱'e̱ju̶ñ y ka'p ko nguydyuunu̶mu̶ch neby je̱'e̱ Moisés y'ane̱'e̱mu̶ñ y'ane'emyu̶ñ. Je̱' ko ka'p pu̶n pyokyñi'iwa'ach ko kuydyúñ neby je̱'e̱ Moisés y'ane̱'e̱mu̶ñ y'ane'emyu̶ñ.

17Pu̶nu̶ n'u̶xtaayu̶mby nbokyñi'iwaatzu̶mu̶ch ajku̶xy Cristo kyu̶xpu̶, nan pokyjya'aydyu̶m du'un u̶u̶ch nandu'un ajtu̶m ajku̶xy, ¿nej du'un adaa da'a du'un wyimbu̶dzu̶my ko je̱'e̱ Cristo tu̶ xyajpokytyu̶gu̶u̶yu̶m ajku̶xy? ¡Ka'p, ka'p du'un tyu̶y'ajtu̶ch! 18Pu̶nu̶ n'u̶xmajchpyu̶ch tii y chi u̶u̶ch ja'adu'ook niwimbijtnu̶bu̶ch nbaduundu̶gu̶u̶yñu̶bu̶ch, u̶u̶ch naty du'un ku̶'u̶m tuundu̶gooby. 19Je̱' ko je̱'e̱ Moisés y'ane̱'e̱mu̶ñ kyu̶xpu̶ u̶u̶ch tu̶ n'o'ogy ma je̱'e̱ Moisés y'ane̱'e̱mu̶ñ, neby u̶u̶ch mu̶baad ndzu̶na'ay njugy'atyu̶ñ, cham u̶u̶ch je̱'e̱ Dios nmu̶dúñ. Je̱'e̱ Cristo u̶u̶ch mu̶u̶d tu̶ ngruutzpéty, 20y ka'p je̱'e̱ y'u̶u̶chu̶ch je̱'e̱ mu̶dyiibu̶ jugy'ajtpu̶ñ, je̱'e̱ Cristo je̱' je̱'e̱ mu̶dyiibu̶ jugy'ajtp ma u̶u̶chu̶ñ. Y je̱'e̱ jugy'ajt je̱'e̱ mu̶dyiibu̶ u̶u̶ch nmu̶u̶d ma u̶u̶ch je̱'e̱ nni'kx ngoptu̶ñ, ni'imu̶dátyu̶ch je̱'e̱ du'un je̱' ko u̶u̶ch je̱'e̱ Dios y'Ung tu̶ nmu̶bu̶jku̶, je̱'e̱ mu̶dyiibu̶ u̶u̶ch xychojk xyjyu̶wu̶u̶yu̶ñ y ñaygyu̶'u̶ye̱jku̶ ma je̱'e̱ o'ku̶ñ tu̶gooyu̶ñ mu̶u̶d u̶u̶ch kyu̶xpu̶. 21Ka'p u̶u̶ch je̱'e̱ Dios pya'a''ayo'on n'u̶xtijaanu̶; pues ko u̶xyu̶py du'un pu̶n y'okpokyñi'iwa'ach ko je̱'e̱ Moisés y'ane̱'e̱mu̶ñ naty kuydyuunu̶, timyñi'inigoobu̶ u̶xyu̶py je̱'e̱ Cristo du'un tu̶ y'o'ogy.

Currently Selected:

Gálatas 2: MIXE

Highlight

Copy

Compare