Gálatas 1

Je̱'e̱ yajpókxu̶ñ

1U̶u̶ch Pablo, apóstol u̶u̶ch, ka'p u̶u̶ch je̱'e̱ ja'ay tu̶ xykyexy ni je̱'e̱ ja'ay u̶u̶ch tu̶ xykya'ayajni'ipú̶ky, je̱'e̱ Jesucristo u̶u̶ch ku̶'u̶m tu̶ xykyexy y je̱'e̱ Dios Teedy, je̱'e̱ mu̶dyiibu̶ je̱'e̱ Jesucristo yajjuugypyu̶jku̶ñ. 2U̶u̶ch y nigu̶xyu̶ je̱'e̱ mu̶gu'uktu̶jk mu̶dyiibu̶ yam yajpaatku̶xpu̶ñ mu̶u̶d u̶u̶ch, cham u̶u̶ch adaa naky nyajniguéxy je̱'e̱ mu̶bu̶jkpu̶du̶jk mu̶dyiibu̶ jim Galacia naaxjooty yajpaatku̶xpu̶ñ. 3Wan je̱'e̱ Dios u̶u̶ch je̱'e̱ nDeedy ajtu̶m y je̱'e̱ Windzú̶n Jesucristo oy'ajt may'ajt tuñ ma miich ajku̶xyu̶ñ y xyajjootkujk'ajtku̶xu̶ch. 4Jesucristo naygyu̶'u̶ye̱jku̶ ma je̱'e̱ o'ku̶ñ mu̶u̶d u̶u̶ch kyu̶xpu̶ nboky ngu̶dyeey ajtu̶m ajku̶xy, tu̶ xyajpokyñi'iwaatzu̶m ajku̶xy ma adayaaba naaxwiiñ pokymyu̶u̶dpu̶ju̶ñ, du'un neby je̱'e̱ nDios Teedy najty tzojku̶mu̶ñ ajku̶xy. 5¡Wan je̱'e̱ Dios ku'umáy wiinu̶u̶xu̶u̶ ity! Jaanch adaa du'un.

Ka'p je̱'e̱ wiingpu̶ ayuuk tu̶y'ajt je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ

6Mu̶k u̶u̶ch nyajnú̶kxy nyajju̶wu̶'u̶y ko je̱'e̱ Dios y'ayuuk tyu̶y'ajt pe̱kyu̶ tu̶ myajtu̶gooyu̶ ajku̶xy, je̱'e̱ Dios mu̶dyiibu̶ xywyin'ijxku̶xu̶ñ je̱' ko je̱'e̱ Cristo xychojkku̶xy xyjyu̶wu̶u̶ygyu̶xy, y tu̶ mbadu'udu̶gu̶u̶ygyu̶xy je̱'e̱ wiingpu̶ ayuuk. 7Tu̶y'ajtu̶ñ, ka'p je̱'e̱ wiingpu̶ ayuuk tu̶y'ajt jii je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ. Je̱'e̱ ja'ay du'un nije̱' xykyapx'iingu̶xp y xyajwinma'añdyu̶goyaangu̶xy ma je̱'e̱ Cristo y'ayuuk tyu̶y'ajtu̶ñ. 8Peru̶ pu̶nu̶ jii je̱'e̱ wiingpu̶ ayuuk tu̶y'ajt je̱'e̱ mu̶dyiibu̶ aanu̶mu̶ ni'idzookku̶ñ ye̱jkpu̶ñ pu̶n xyajwingapxu̶u̶ygyu̶xy tu̶gach, ka'p dyu'unu̶ch neby je̱'e̱ mu̶dyiibu̶ tu̶ nyajwingapxu̶u̶ygyu̶xyu̶ñ, ju̶bu̶ktuum je̱'e̱ kya'awu̶ch, wanpú̶nu̶ch oy u̶xyu̶py jya'a'u̶u̶chu̶ch o je̱'e̱ ángel je̱'e̱ mu̶dyiibu̶ tzajpjooty tzombu̶ñ. 9Tu̶ du'un jékyu̶p n'o'knu̶maaygyu̶xpu̶ y cham u̶u̶ch ja'adu'ook ni'igapxpe̱jtnu̶ba: Pu̶nu̶ jii je̱'e̱ wiingpu̶ ayuuk tu̶y'ajt je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ pu̶n xyajwingapxu̶u̶ygyu̶xy tu̶gach, ka'p dyu'unu̶ch neby je̱'e̱ mu̶dyiibu̶ tu̶ nyajwingapxu̶u̶ygyu̶xyu̶ñ, ju̶bu̶ktuum je̱'e̱ kya'awu̶ch.

10U̶u̶ch ka'p u̶u̶ch n'u̶xta'ay xykyu'umáyu̶chu̶ch je̱'e̱ ja'ay ajku̶xy, je̱' u̶u̶ch n'u̶xtaaby neby u̶u̶ch je̱'e̱ Dios xykyu'umáyu̶chu̶ñ. ¡Ko u̶u̶ch u̶xyu̶py n'ok'oybyu̶dzu̶ma'añ ma je̱'e̱ ja'ay ajku̶xyu̶ñ, ka'p u̶u̶ch naty je̱'e̱ Cristo du'un n'okmu̶duunu̶!

Neby je̱'e̱ Pablo paaty je̱'e̱ apóstol'adyiibyu̶

11Nejwu̶u̶ygyu̶x adaa miich mu̶gu'uktu̶jk: je̱'e̱ ayuuk tu̶y'ajt je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ, je̱'e̱ mu̶dyiibu̶ u̶u̶ch ngapxwa'kxypyu̶ñ, ka'p je̱'e̱ ja'ay tu̶ yajkojy. 12Ka'p u̶u̶ch je̱'e̱ ja'ay xymyooy y ka'p u̶u̶ch je̱'e̱ ja'ay xyaj'u̶xpu̶jk, je̱'e̱ Jesucristo u̶u̶ch je̱'e̱ ku̶'u̶m xyajnejwu̶u̶y.

13Miich tu̶ da'a du'un mmu̶doogu̶xy ko jékyu̶p, ko u̶u̶ch najty je̱'e̱ judío ja'ay kyostumbre nguydyuunu̶ ajku̶xy, n'u̶xwu̶dijt nbawu̶dijtu̶ch je̱'e̱ Dios jya'ay ju̶u̶n awa'an y mu̶kta'agy nyajku'udu̶gooydya'awa'añu̶ch najty ajku̶xy. 14Ma je̱'e̱ judío ja'ay kyostumbre ajku̶xyu̶ñ, u̶u̶ch ni'igyu̶ u̶u̶ch najty je̱'e̱ oy nbadúñ ni'igu̶ ka'p u̶u̶ch je̱'e̱ nimaybyu̶ n'amu̶gu'ugtu̶jk ajku̶xy je̱'e̱ nmu̶du'knáxpu̶ch ajku̶xy, je̱' ko ni'igyu̶ u̶u̶ch ijty je̱'e̱ nmu̶j'áp nmu̶jteedy kyostumbre wa'adzu̶ nguydyuunu̶. 15Peru̶ je̱'e̱ Dios u̶u̶ch xywyin'ijx ka'anu̶ u̶u̶ch najty nma'axung'áty, y je̱' ko u̶u̶ch mu̶k xychojky xyjyu̶wu̶u̶y paady u̶u̶ch je̱'e̱ xyajni'ipu̶jky. Mu̶naa yajmu̶baad'ajtyu̶ñ, 16xyaj'ijx xyajnejwu̶u̶yu̶ch je̱'e̱ y'Ung, neby u̶u̶ch je̱'e̱ y'ayuuk tyu̶y'ajt ngapxwa'kxu̶chu̶ñ, je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ ma je̱'e̱ mu̶dyiibu̶ ka'p jyudíoja'ayu̶chu̶ñ ajku̶xy. Y ka'p u̶u̶ch ni pu̶n nyajkápxy, 17ni nga'apa'ttu̶gu̶u̶yu̶ch jim Jerusalén ma je̱'e̱ apóstolestu̶jk najty yajpaatku̶xyu̶ñ, je̱'e̱ mu̶dyiibu̶ jayu̶jp yajwin'ijxku̶xu̶ñ apóstoles y ka'p u̶u̶chu̶ñu̶ba. Tu'uda'agyu̶ u̶u̶ch yu̶u̶y pe'typy nnu̶kxy Arabia naaxjooty, y chi u̶u̶ch Damasco nwimbijty.

18Kudu̶gu̶u̶g jumu̶jt u̶u̶ch jim Jerusalén nba'ttu̶gu̶u̶y n'ixy'ajttu̶ga'añu̶ch je̱'e̱ Pedro, y majmókx xu̶u̶ u̶u̶ch jim nmu̶d'ijty. 19Peru̶ ka'p u̶u̶ch je̱'e̱ wiingpu̶ apóstolestu̶jk n'ijxy, je̱'e̱ Santiago u̶u̶ch je'eyu̶ n'ijx je̱'e̱ Windzú̶n Jesús pyuya'ay. 20Janch tu̶y'ajtu̶ñ du'un nnu̶maaygyu̶xy y y'ijxypy ñejwu̶u̶by je̱'e̱ Dios ko du'un tyu̶y'ajtu̶ch neby yam nnijayu̶u̶ygyu̶xyu̶ñ.

21Kujeky u̶u̶ch nnu̶kxy Siria naaxjooty y Cilicia naaxjooty. 22Je̱'e̱ mu̶gu'uktu̶jk je̱'e̱ mu̶dyiibu̶ je̱'e̱ Cristo mu̶bu̶jkku̶xpu̶ñ jim Judea, ka'p u̶u̶ch najty je̱'e̱ xy'ixy'ajtku̶xy wiingú̶xy ju̶jpkú̶xy. 23Je'eyu̶ najty je̱'e̱ ayuuk du'un mu̶doogu̶xy: “Je̱'e̱ mu̶dyiibu̶ najty jékyu̶p xy'u̶xwu̶dijtp xypyawu̶dijtp ajtu̶m ajku̶xy, chi je̱'e̱ ayuuk tu̶y'ajt cham kapxwa'kxnu̶ je̱'e̱ mu̶dyiibu̶ je̱'e̱ mu̶bu̶jku̶ñ najty jékyu̶p yajku'udu̶goyaambu̶ñ.” 24Y jya'aymye̱jtz y'o'owu̶dajtku̶xypy je̱'e̱ Dios najty mu̶u̶d u̶u̶ch kyu̶xpu̶.

Currently Selected:

Gálatas 1: MIXE

Highlight

Copy

Compare