Hechos 3
3
Tekymya'atpu̶ja'ay tu'ug cho'ogy
1Du'un tu'ook je̱'e̱ Pedro mu̶u̶d je̱'e̱ Juan pya'ttu̶gu̶u̶ygyu̶xy nime̱tzk ma je̱'e̱ mu̶jtzajptu̶jku̶ñ ku'udu̶gu̶'u̶xu̶u̶, je̱'e̱ hooru̶ najty mu̶naa je̱'e̱ Dios mu̶bu̶jktzoogu̶xyu̶ñ. 2Jaboom jaboom najty je̱'e̱ tekymya'atpu̶ja'ay tu'ug yajnú̶kxku̶xy ma je̱'e̱ mu̶jtzajptu̶jku̶ñ, du'un najty je̱'e̱ tekymya'at tu̶ mya'axung'áty, chi pu̶daakku̶xy ma je̱'e̱ mu̶jtzajptu̶jk'aguuy mu̶dyiibu̶ xu̶u̶'ajtpu̶ñ je̱'e̱ Janch'oybyu̶, neby je̱'e̱ limoosnu̶ jim mu̶baad yujkwa'añ ma je̱'e̱ ja'ay mu̶dyiibu̶ naty tu̶gu̶u̶ygyu̶xpu̶ñ ma je̱'e̱ mu̶jtzajptu̶jku̶ñ. 3Ko je̱'e̱ tekymya'atpu̶ja'ay ijxy je̱'e̱ Pedro mu̶u̶d je̱'e̱ Juan tyu̶jktu̶gu̶'u̶waangu̶xy najty ma je̱'e̱ mu̶jtzajptu̶jku̶ñ, chi je̱'e̱ limoosnu̶ yujkwaanu̶ ajku̶xy. 4Ko je̱'e̱ Pedro mu̶u̶d je̱'e̱ Juan du'un ijxku̶xy je̱'e̱ tekymya'atpu̶ ja'ay, chi je̱'e̱ Pedro myu̶naañ:
—Windu̶kxpe̱jtku̶ch ajku̶xy.
5Chi je̱'e̱ tekymya'atpu̶ ja'ay wyindu̶kxpejty, ju̶jp'íxy myo'owu̶u̶ju̶ch tii we̱e̱nu̶ ajku̶xy. 6Peru̶ chi je̱'e̱ Pedro ñu̶maayu̶:
—Ka'p u̶u̶ch platu̶ ni ooru̶ nmu̶u̶du̶ch, peru̶ je̱'e̱ mu̶dyiibu̶ u̶u̶ch nmu̶u̶du̶ñ je̱' nmo'owu̶py: mu̶u̶d je̱'e̱ Jesucristo je̱'e̱ Nazaretpu̶ xyu̶u̶, u̶u̶ch miich nu̶maaby: tu̶naayu̶'u̶g y yo'oyu̶'u̶g.
7Ko du'un nu̶maay, chi je̱'e̱ Pedro je̱'e̱ tekymya'atpu̶ ja'ay majch ma je̱'e̱ y'a'oygyu̶'u̶ju̶ñ y yajtu̶naaygyugu̶u̶y, y chi je̱'e̱ tyeky y je̱'e̱ tyekyyo'kt myu̶kpu̶jky y y'oyu̶u̶y. 8Chi je̱'e̱ tekymya'atpu̶ ja'ay tu'ktú̶py ñajtztu̶bu̶u̶y y chi tyu̶naaygyugu̶u̶y y yo'oychóñ, mu̶'it tyu̶gu̶u̶y ma je̱'e̱ mu̶jtzajptu̶jku̶ñ mu̶u̶d je̱'e̱ Pedro y mu̶u̶d je̱'e̱ Juan yo'oyu̶p y ñu̶du̶jp chajptu̶jpnu̶ najty cham je̱'e̱ xu̶u̶ Dios ja'aymyéch o'owu̶dáty. 9Ku̶xyu̶ je̱'e̱ mayjya'ay ijxku̶xu̶ñ ko najty yo'oyñu̶ y ja'aymyéch o'owu̶dáty je̱'e̱ xu̶u̶ Dios, 10mu̶k je̱'e̱ chu̶gu̶u̶y jyu̶wu̶u̶ygyu̶xy y yajnú̶kx yajju̶wu̶u̶ygyu̶xy ko du'un ijxku̶xy neby najty tu̶ tyuñ tu̶ jyadyii, je̱' ko y'ixy'ajtku̶xypy najty je̱', y ñejwu̶u̶ygyu̶xypy najty ko je̱' je̱' je̱'e̱ mu̶dyiibu̶ je̱'e̱ limoosnu̶ najty yujkwaan'o'kp ma je̱'e̱ mu̶jtzajptu̶jk'aguuy mu̶dyiibu̶ xu̶u̶'ajtpu̶ñ je̱'e̱ Janch'oybyu̶.
Pedro myu̶dya'agy ma je̱'e̱ mu̶jtzajptu̶jk winduuy mu̶dyiibu̶ xu̶u̶'ajtpu̶ñ Salomón
11Je̱'e̱ tekymya'atpu̶ ja'ay mu̶dyiibu̶ najty tu̶ cho'ogyu̶ñ, ka'p najty je̱'e̱ Pedro mu̶u̶d je̱'e̱ Juan timy'u̶xmajtzku̶xy. Y ku̶xyu̶ najty je̱'e̱ ja'ay mu̶k yajnú̶kx yajju̶wu̶u̶ygyu̶xy tyajku̶xy myaaygyu̶xy, chi je̱'e̱ Pedro mu̶u̶d je̱'e̱ Juan mu̶k'eemby nimujkku̶xy ma je̱'e̱ mu̶jtzajptu̶jk winduuy mu̶dyiibu̶ xu̶u̶'ajtpu̶ñ Salomón, jim ma najty je̱' ajku̶xyu̶ñ. 12Ko je̱'e̱ Pedro mayjya'ay du'un ijxy, chi nu̶maaygyu̶xy: “Miich Israel ja'ay ajku̶xy: ¿Ti ko mjanchwinmaaygyu̶xy mu̶j ku̶je̱e̱? ¿Ti u̶u̶ch ko xyjyanchwindú̶kxku̶xy du'un neby adaa ja'ay u̶u̶chpyu̶ nu̶wu̶'u̶y tu̶ nyajtzookku̶xyu̶ñ y tu̶ nyajyo'oyyu̶'kku̶xyu̶ñ mu̶u̶d u̶u̶ch je̱'e̱ ngu̶'u̶mmu̶k'ajtu̶ñ ajku̶xy o ko u̶u̶ch mu̶u̶d oy nDios'o'owu̶dajtku̶xy? 13Je̱'e̱ Abraham, je̱'e̱ Isaac y je̱'e̱ Jacob Dyios, je̱'e̱ Dios mu̶dyiibu̶ je̱'e̱ nmu̶j'áp nmu̶jteedy y'o'owu̶dajtu̶ñ ajku̶xy, je̱' je̱'e̱ y'Ung Jesús mu̶jpu̶ ku'umaayu̶ñ tu̶ mo'oy, je̱'e̱ mu̶dyiibu̶ miich mgu̶'u̶ye̱jku̶ñ ajku̶xy ma je̱'e̱ tuungmu̶u̶dpu̶du̶jku̶ñ, y ko je̱'e̱ gobernador Pilato ja'anajtzmadzu̶'u̶waañ ka'p mgu'ubu̶jky ajku̶xy ko yajnajtzmadzu̶'u̶wu̶ch. 14Ma najty jya'apadyii myujkwaangu̶xu̶ch ko wan yajnajtzmadzu̶'u̶y je̱'e̱ mu̶dyiibu̶ najty yajpaatp oy wa'adz y tu'uda'agy, ni'igyu̶ miich myujkwaangu̶xy ko je̱'e̱ ja'ay wan yajnajtzmadzu̶'u̶y mu̶dyiibu̶ najty tu̶ jya'ayyaj'o'ogyu̶ñ. 15Du'un myaj'o'kku̶xy je̱'e̱ mu̶dyiibu̶ je̱'e̱ jugy'ajt ye̱jkpu̶ñ.#3.15 Mu̶dyiibu̶ je̱'e̱ jugy'ajt ye̱jkpu̶ñ: nije̱' wiingpu̶ jaaybyu̶du̶jk myu̶naangu̶xy: mu̶dyiibu̶ je̱'e̱ jugy'ajt niwindzu̶n'ajtpu̶ñ, o mu̶dyiibu̶ je̱'e̱ jugy'ajt nigu'ubajk'ajtpu̶ñ. Peru̶ Dios je̱'e̱ yajjuugypyu̶jk ma najty tu̶ y'o'ogyu̶ñ, y u̶u̶ch adaa nnidu̶y'ajt'ajtypy ajku̶xy. 16Je̱' ko adaa pa'amja'ay je̱'e̱ Jesús xyu̶u̶ tu̶ mu̶bu̶ky mu̶dyiibu̶ miich m'ijxypy y m'ixy'ajtypyu̶ñ ajku̶xy. Je̱' ko tu̶ je̱'e̱ Jesús mu̶bu̶ky y paady ku̶xyu̶ tu̶ cho'ogy, du'un neby yam miich nigu̶xyu̶ m'ijxku̶xy mdú̶kxku̶xyu̶ñ.
17“Mu̶gu'uktu̶jk, u̶u̶ch nejwu̶u̶ybyu̶ch ko miich je̱'e̱ Jesús myaj'o'kku̶x mu̶u̶d je̱'e̱ mwindzu̶ndu̶jk ajku̶xy, paady du'un m'adu̶u̶tzku̶xy, je̱' ko najty mga'anejwu̶u̶ygyu̶xy tii du'un mduungu̶xypyu̶ñ. 18Peru̶ tu̶ je̱'e̱ Dios du'un cham kuydyúñ neby je̱'e̱ y'ayuuknajtzkapxu̶u̶ybyu̶du̶jk nigu̶xyu̶ myu̶naangu̶xyu̶ñ: ko tzipku̶xp je̱'e̱ Kyristo y'o'ogu̶ch. 19Paady yajtu̶gajtzku̶x je̱'e̱ mjoot mwinma'añ y jootwimbijtku̶x ma je̱'e̱ Diosu̶ñ, neby je̱'e̱ mboky mgu̶dyeey mu̶baad yajwinmé̱kxku̶xyu̶ñ. Y mu̶'it je̱'e̱ Windzú̶n xyajjootkugu̶'u̶wu̶ch, 20y ké̱xu̶ch je̱'e̱ Jesús, mu̶dyiibu̶ je̱'e̱ Dios tu̶u̶yu̶p wyin'ijxu̶ñ ko ke̱xa'añ wan Cristo y'idu̶ch ma miich ajku̶xyu̶ñ. 21Oy je̱'e̱ Jesucristo jiiby tzajpjooty jada'achám y'okjakwu̶'u̶mu̶chñu̶, u̶xtu̶ koonu̶ naty je̱'e̱ Dios ku̶xyu̶ tijaty ok'yaj'oyu̶ydya'ayñu̶, je̱' ko du'un je̱'e̱ wa'adzpu̶ y'ayuuknajtzkapxu̶u̶ybyu̶du̶jk kujaaygyu̶xy, je̱'e̱ mu̶dyiibu̶ jékyu̶p tzu̶naaygyu̶xu̶ñ. 22Du'un je̱'e̱ Moisés jékyu̶p nu̶maay je̱'e̱ nmu̶j'áp nmu̶jteedy ajtu̶m ajku̶xy: ‘Je̱'e̱ mWindzú̶n mDios miich xyajnigue̱jxku̶xu̶p tu'ug je̱'e̱ ayuuknajtzkapxu̶u̶ybyu̶ mu̶dyiibu̶ pu̶dzú̶mu̶bu̶ñ ma je̱'e̱ mjuugy mmu̶gu'ug miich nidu'ugtu̶ ajku̶xyu̶ñ, du'un neby u̶u̶ch tu̶ xykyexyu̶ñ ayuukkapxwa'akxpu̶. M'amdo'ijtu̶yu̶py je̱'e̱ y'ayuuk ku̶xyu̶ ajku̶xy du'un neby naty xyñu̶maaygyu̶xyu̶ñ, 23y ku̶xyu̶ pu̶n je̱'e̱ Dios y'ayuuknajtzkapxu̶u̶ybyu̶ ka'p kapxymyu̶doogu̶xyu̶ñ, ka'p je̱'e̱ tu'ugyu̶ y'ok'ijtku̶xnu̶ch mu̶u̶d je̱'e̱ myu̶gu'ugtu̶jk, je̱'e̱ judío ja'ay, yajpu̶dzu̶u̶mu̶gu̶xu̶p je̱', tu'ook yajpu̶dzu̶myii.’
24“Y ku̶xyu̶ je̱'e̱ Dios y'ayuuknajtzkapxu̶u̶ybyu̶du̶jk, chonda'agy ma je̱'e̱ Samuel u̶xtu̶ ma kyugu̶xu̶u̶y ajku̶xyu̶ñ, ñigápxku̶x je̱'e̱ nandu'un neby cham tyuñyii jyadyiiju̶ñ. 25Miich xypyaatku̶xp mu̶dyiibu̶ je̱'e̱ Dios y'awaanu̶u̶y mu̶u̶d je̱'e̱ y'ayuuknajtzkapxu̶u̶ybyu̶du̶jk ajku̶xy, nan miich nandu'un xypyaatku̶xp mu̶dyiibu̶ je̱'e̱ Dios kyapxytyuunu̶ñ mu̶u̶d je̱'e̱ nmu̶j'áp nmu̶jteedy ajtu̶m ajku̶xy. Je̱' ko du'un je̱'e̱ Dios Abraham nu̶maay: ‘Ngunúkxu̶byu̶ch je̱'e̱ naaxwiiñjya'ay ku̶xyu̶ mu̶u̶d miich kyu̶xpu̶ m'ok'ungu̶jk m'ok'ana'ktu̶jk ajku̶xy.’ 26Ko je̱'e̱ Dios y'Ung y'o'ky, chi ja'adu'ook yajjuugypyu̶jky, y kejxy jayu̶jp ma miich ajku̶xyu̶ñ, neby mu̶baad xykyunúkxku̶xyu̶ñ y neby je̱'e̱ mju̶bu̶kwinma'añ mu̶baad nidu'ug nidu'ug m'u̶xmajtzku̶xyu̶ñ.”
Currently Selected:
Hechos 3: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005