Hechos 17

Kapxy ayuuk jyajtu̶ jim Tesalónica

1Pablo mu̶u̶d je̱'e̱ Silas najxku̶x ma je̱'e̱ kajpt Anfípolis y Apolonia, chi oy Tesalónica jya'tku̶xy ma je̱'e̱ judío ja'ay ñaymyujktaakt najty tu'ug mu̶u̶du̶chu̶ñ ajku̶xy. 2Je̱' ko du'un najty je̱'e̱ Pablo kostumbre mu̶u̶du̶ch ñu̶kxy ma je̱'e̱ judío ja'ay ñaymyujktaakt ajku̶xyu̶ñ pokxyxyu̶u̶, y tu̶gu̶u̶g pokxyxyu̶u̶ jim Tesalónica kyapxy myu̶dyaaky mu̶u̶d je̱'e̱ judío ja'ay ajku̶xy. Yajmu̶dmu̶dyaakku̶xy neby kyuja'ayu̶ch ma je̱'e̱ Dios ñakyu̶ñ, 3ko je̱'e̱ Cristo ayo'on tzipku̶xp yajnajxta'awu̶ch, y chi y'o'ogu̶ch, y mu̶'it ja'adu'ook jyuugypyú̶gu̶ch. Chi ñu̶maayu̶ ajku̶xy:

—Je̱'e̱ Jesús mu̶dyiibu̶ u̶u̶ch je̱'e̱ y'ayuuk ngapxwa'kxu̶byu̶ñ ma miich ajku̶xyu̶ñ, je̱' je̱'e̱ Cristo.

4Nije̱' je̱'e̱ judío ja'ay mu̶bu̶jky ajku̶xy y puyo'oyu̶u̶ygyu̶xy je̱'e̱ Pablo mu̶u̶d je̱'e̱ Silas. Nan may je̱'e̱ griego ja'ay mu̶bu̶jkku̶xy mu̶dyiibu̶ je̱'e̱ Dios najty yajmu̶j'ajtku̶xpu̶ñ, y nan maydyo'oxyu̶jktu̶jk mu̶dyiibu̶ najty oymyu̶jpu̶daaknu̶ju̶ñ, pyuyo'oyu̶u̶ygyu̶x je̱'e̱ Pablo mu̶u̶d je̱'e̱ Silas y myu̶bu̶jku̶ je̱'e̱ y'ayuuk ajku̶xy. 5Paady je̱'e̱ judío ja'ay oy jyootma'ttaaygyu̶xy mu̶dyiibu̶ najty ka'p mu̶bu̶jkku̶xyu̶ñ, mu̶'it je̱'e̱ ju̶bu̶kja'ay oy woomujkku̶xy mu̶dyiibu̶ najty nigoo kajptjooty wu̶dijtku̶xpu̶ñ, chi yaaxtu̶gu̶u̶y jyojktu̶gu̶u̶ygyu̶xy y kyajpt yajma'tku̶xy, ane̱jp akojxtuuttu̶ je̱'e̱ Jasón tyu̶jk ajku̶xy, u̶xtaaygyu̶xy je̱'e̱ Pablo mu̶u̶d je̱'e̱ Silas y yajnu̶kxaangu̶xy ma je̱'e̱ kajpttuungmu̶u̶dpu̶ju̶ñ. 6Y ko ka'apaatku̶xy, chi je̱'e̱ Jasón majtzku̶xy mu̶u̶d je̱'e̱ mu̶bu̶jkpu̶du̶jk nije̱', yajnú̶kxku̶xy adzip pawich papo'oty ma je̱'e̱ kajpttuungmu̶u̶dpu̶ju̶ñ cham mu̶kjaty jyanchmu̶naangu̶xy:

—¡Adaa ja'ay je̱' adaa ajku̶xy mu̶dyiibu̶ je̱'e̱ naax kajpt ku̶xyu̶ yajma'tku̶xpu̶ñ, nan yabaad nandu'un tu̶ myiingu̶xy, 7adaa Jasón je̱'e̱ tu̶ yajja'ttaakku̶xy ma je̱'e̱ tyu̶jku̶ñ! ¡Y nigu̶xyu̶ je̱'e̱ mu̶j'ane̱'e̱mbu̶ y'ane̱'e̱mu̶ñ mu̶dzip'ajtu̶ ajku̶xy, myu̶naangu̶xy ko je̱'e̱ mu̶j'ane̱'e̱mbu̶ jii ja'adu'ug, y je̱' je̱' je̱'e̱ Jesús!

8Ko adaa du'un mu̶dooy ajku̶xy, chi je̱'e̱ kajptja'ay y je̱'e̱ kajpttuungmu̶u̶dpu̶du̶jk yaj'yumbe̱jt yaj'oxpe̱jtku̶xy je̱'e̱ Jasón mu̶u̶d je̱'e̱ mu̶bu̶jkpu̶du̶jk ajku̶xy. 9Peru̶ je̱'e̱ Jasón mu̶u̶d je̱'e̱ mu̶bu̶jkpu̶du̶jk nayjyuuybyu̶dzu̶u̶mu̶gu̶x je̱', y mu̶'it ñajtzmadzu̶u̶yu̶gu̶xy.

Pablo mu̶u̶d je̱'e̱ Silas jim Berea yajpaatku̶xy

10Ko oy kyoodzu̶u̶yñu̶, mu̶k'eemby je̱'e̱ mu̶bu̶jkpu̶du̶jk je̱'e̱ Pablo mu̶u̶d je̱'e̱ Silas kajptjooty yajpu̶dzu̶u̶mgu̶xy y ke̱jxku̶xy jim Berea. Y ko jim jya'tku̶xy, chi ñú̶kxku̶xy ma je̱'e̱ judío ja'ay ñaymyujktaaktu̶ñ. 11Je̱'e̱ jim Bereaju̶ba judío ja'ay ajku̶xy ni'igu̶ jyakmu̶u̶d najty oyjyoot oywyinma'añ je̱'e̱ ajku̶xy, ni'igu̶ ka'p je̱'e̱ Tesalónica judío ja'ay ajku̶xy, y oy yajxón je̱'e̱ Jesús y'ayuuk tyu̶y'ajt ku'ubu̶jkku̶xy, y jaboom jaboom najty je̱'e̱ Dios ñaky u̶xpu̶jku̶ ajku̶xy pu̶nu̶ jaanch du'un myu̶na'añ neby je̱'e̱ Pablo yaj'u̶xpú̶kyu̶ñ. 12May je̱'e̱ judío ja'ay mu̶bu̶jkku̶xy, y nan may je̱'e̱ griego ja'ay nandu'un mu̶bu̶jkku̶xy mu̶dyiibu̶ oymyu̶jpu̶daaknu̶ju̶ñ, to'oxyu̶jktu̶jk y ya'aydyu̶jktu̶jk ajku̶xy. 13Peru̶ ko je̱'e̱ Tesalónica judío ja'ay oy nejwu̶u̶ygyu̶xy ko je̱'e̱ Pablo Dios ayuuk najty jim Berea nandu'un kapxwa'kxy, chi jim panú̶kxku̶xy y yaaxtu̶gu̶u̶y jyojktu̶gu̶u̶ygyu̶xy ma je̱'e̱ kajptja'ay ajku̶xyu̶ñ. 14Peru̶ chi je̱'e̱ mu̶bu̶jkpu̶du̶jk Pablo mu̶k'eemby mejypya'a ke̱jxku̶xy ko wan jim nu̶kxy. Chi je̱'e̱ Timoteo mu̶u̶d je̱'e̱ Silas jim Berea jyakwu̶'u̶mgu̶xy. 15Je̱'e̱ mu̶dyiibu̶ je̱'e̱ Pablo jaymyu̶dajtku̶xu̶ñ u̶xtu̶ jim Atenas je̱'e̱ y'ooygyu̶xy mu̶u̶d je̱'. Mu̶'it je̱'e̱ ayuuk mu̶wimbijtku̶xy ko je̱'e̱ Timoteo mu̶u̶d je̱'e̱ Silas wan nu̶kxy jim Atenas mu̶k'eemby paattu̶gu̶xyu̶.

Pablo jim Atenas yajpaady

16Ko je̱'e̱ Pablo je̱'e̱ Silas mu̶u̶d je̱'e̱ Timoteo jim Atenas najty ja'ay'éxy, mu̶k najty tyajy myay ko ijxy nejwu̶u̶y ko je̱'e̱ kajpt mu̶u̶du̶ch je̱'e̱ maykyepychech maychaadzéch y ooru̶ oydyúñ mu̶dyiibu̶ dios'ajtypyu̶ñ ajku̶xy. 17Paady je̱'e̱ Jesús ja'animu̶dyaaky ma je̱'e̱ judío ja'ay ñaymyujktaakt ajku̶xyu̶ñ mu̶u̶d je̱'e̱ judío ja'ay y mu̶u̶d je̱'e̱ ja'ay jadyiiyu̶ mu̶dyiibu̶ je̱'e̱ Dios mu̶yaaxp o'owu̶dajtku̶xpu̶ñ, y jaboom jaboom najty mu̶dkapx mu̶dmu̶dyaakku̶xy pu̶njaty jim yo'oymyujkku̶xpu̶ñ ma je̱'e̱ ja'ay jyuuygyu̶xy tyókku̶xyu̶ñ. 18Chi nandu'un y'amayu̶ydyu̶gu̶u̶ygyu̶xy nije̱' mu̶u̶d je̱'e̱ Pablo je̱'e̱ u̶xpu̶kyjya'aydyu̶jk mu̶dyiibu̶ je̱'e̱ epicúrio u̶xpu̶jku̶ñ y estoico u̶xpu̶jku̶ñ mu̶dajtku̶xpu̶ñ. Nije̱' myu̶naangu̶xy:

—¿Ti da'a du'un jya'akápxypy jya'amu̶dyaakypy adaa ja'ay, nigoo yu̶'u̶ jyanch'amayu̶'u̶y?

Y je̱'e̱ wiingpu̶ mu̶naangu̶xpu̶py:

—Je̱' da'a jya'akapxwa'kxypy je̱'e̱ wiingpu̶ dios ayuuk.

Paady najty du'un myu̶naangu̶xy je̱' ko je̱'e̱ Pablo je̱'e̱ oybyu̶ Jesús y'ayuuk tyu̶y'ajt najty kapxwa'kxy y du'un neby jyuugypyu̶jkyu̶ñ ko y'o'ky. 19Chi je̱'e̱ Pablo mu̶dnú̶kxku̶xy ma je̱'e̱ u̶xpu̶kytyu̶jk najty ñaymyujku̶gu̶xy mu̶dyiibu̶ xu̶u̶'ajtpu̶ñ Areópago, y yajtu̶u̶gu̶xy:

—¿Mu̶baad u̶u̶ch nnejwu̶u̶ygyu̶xy adaa jembyu̶ u̶xpu̶jku̶ñ mu̶dyiibu̶ tu̶ mmu̶miñu̶ñ? 20Je̱' ko je̱'e̱ u̶u̶ch miich xyajmu̶dmu̶dyaakku̶xp je̱'e̱ ka'pu̶ u̶u̶ch nwinju̶wu̶u̶ygyu̶xy, y je̱' u̶u̶ch nja'anejwu̶'u̶waangu̶xypy neby je̱'e̱ du'un ku̶xyu̶ wyimbu̶dzu̶myu̶ñ.

21Ku̶xyu̶ je̱'e̱ Atenas ja'ay ajku̶xy y nandu'un je̱'e̱ mu̶dyiibu̶ najty jim adzu̶naaygyu̶xpu̶ñ, je̱' najty je̱'e̱ je'eyu̶ y'aa'ajtypy jyoot'ajtku̶xypy amdo'idaangu̶xy y nimu̶dya'agaangu̶xy je̱'e̱ jembyu̶ ayuuk y jembyu̶ u̶xpu̶jku̶ñ.

22Mu̶'it je̱'e̱ Pablo tyu̶naayu̶'ky mayjya'ay'agujk jim Areópago, y myu̶naañ:

—“Atenas ja'ay ajku̶xy, n'ijxypyu̶ch ko miich ka'anaagnáx mjanch'o'owu̶dajtku̶xy mu̶dyiibu̶ mdios'ajtypyu̶ñ ajku̶xy. 23Ko u̶u̶ch ya tu̶ nwu̶dity ma adayaaba kajptu̶ñ, ma je̱'e̱ mdios ka'anaagnáx m'o'owu̶dajtku̶xyu̶ñ, chi u̶u̶ch tu̶ nbaady tu'ug je̱'e̱ poch ma je̱'e̱ windzu̶gu̶'u̶ñ yaj'yékyu̶ñ ma du'un jya'ayu̶chu̶ñ: ‘Je̱'e̱ Dios mu̶dyiibu̶ ka'p pu̶n ixy'atyu̶ñ.’ Je̱'e̱ Dios mu̶dyiibu̶ miich m'o'owu̶dajtku̶xypyu̶ñ y ka'p m'ixy'ajtku̶xy, adaa je̱' je̱'e̱ mu̶dyiibu̶ nyajnu̶maaybyu̶ñ ajku̶xy.

24“Je̱'e̱ Dios mu̶dyiibu̶ je̱'e̱ naaxwiimbu̶ yajkoju̶ñ y ku̶xyu̶ tijaty jii'ajtp, je̱' ku̶xyu̶ niwindzu̶n'ajttaaby je̱'e̱ tzajp y je̱'e̱ naax. Je̱'e̱ Dios ka'p je̱'e̱ chu̶na'ay ma je̱'e̱ tzajptu̶jk mu̶dyiibu̶ je̱'e̱ ja'ay kyojku̶xypyu̶ñ, 25y ka'p ni tii tyu̶goy'ajtku̶xyu̶ nu̶kxy je̱'e̱ naaxwiiñjya'ay pyubedyii, je̱' je̱'e̱ jugy'ajtu̶ñ nigu̶xyu̶ xymyooby ajtu̶m ajku̶xy y nan je̱' ye̱jkp mu̶dyiibu̶ nxe̱ju̶mby ajku̶xy y ku̶xyu̶ tijaty.

26“Y tu'kjoot tu'kne'pty je̱'e̱ ja'ay ku̶xyu̶ oydyuundaay neby mu̶baad chu̶naaygyu̶xy jyuugy'ajtku̶xy ma je̱'e̱ naaxwiimbu̶ kú̶xyu̶ju̶ñ, y tu̶ je̱'e̱ tu̶y'ajt yeky neby je̱'e̱ xu̶u̶ tiempo tyu'uyo'oyu̶chu̶ñ, y ma je̱'e̱ ja'ay mu̶baad chu̶naaygyu̶xy jyuugy'ajtku̶xyu̶ñ, 27neby je̱'e̱ Dios mu̶baad u̶xtaaygyu̶xyu̶ñ, oy it toonda'ay'eemby xajta'ay'eemby paadu̶ch ajku̶xy, je̱' ko ka'p it je̱'e̱ jya'aju̶gué̱mu̶ch ma u̶u̶ch nidu'ug nidu'ug ajtu̶m ajku̶xyu̶ñ. 28Je̱' ko Dios kyu̶xpu̶ u̶u̶ch ndzu̶naay njugy'ajtu̶mb ajku̶xy, nyu'kxu̶m y njii'ajtu̶m ajku̶xy; du'un neby je̱'e̱ mjaaybyu̶ nidu'ugtu̶ myu̶naañu̶ñ ajku̶xy: ‘Dios xy'ung'ajtp xy'ana'k'ajtp ajtu̶m ajku̶xy.’ 29Pu̶nu̶ Dios xy'ung'ajtp xy'ana'k'ajtp ajtu̶m ajku̶xy, ka'p je̱'e̱ nwinma'añ du'un mu̶baad nbu̶daaku̶m ajku̶xy ko je̱'e̱ Dios dyu'unu̶ch neby je̱'e̱ ooru̶ oydyúñ, platu̶ oydyúñ y tzaadzéch kepychech oydyúñ mu̶dyiibu̶ je̱'e̱ ja'ay yajkojku̶xypyu̶ñ mu̶u̶d je̱'e̱ kyu̶'u̶mwinma'añ ajku̶xy. 30Dios ka'p je̱'e̱ aa'adyii joot'adyii je̱'e̱ ja'ay jyekychuwinma'añ ajku̶xy ma najty ka'anu̶ myu̶bu̶gyiiyñu̶ju̶ñ, peru̶ jada'achám y'ane'emby je̱'e̱ ja'ay ku̶xyu̶ wantimymya'eembyu̶ch ko wan jootwimbijtku̶xy ma je̱'e̱ju̶ñ. 31Je̱' ko tu̶ je̱'e̱ Dios xu̶u̶ tzuu tu'ug niwinmayu̶'u̶y mu̶naa je̱'e̱ naaxwiiñjya'ay tu̶ydyuna'añ mu̶u̶d je̱'e̱ tu̶y'ajtu̶ñ mu̶u̶d je̱'e̱ ja'ay mu̶dyiibu̶ tu̶ win'ixyu̶ñ. Adaa tu̶y'ajt je̱'e̱ Dios ja'ay ku̶xyu̶ tu̶ yaj'íxy tu̶ yajnejwu̶'u̶y ko je̱'e̱ Jesús yajjuugypyu̶jky ko y'o'ky.”

32Ko du'un mu̶dooy ajku̶xy ko je̱'e̱ o'kpu̶ jyuugypyu̶jkku̶xu̶ch, chi nije̱' ñixiiktu̶gu̶u̶y ñiyaaxtu̶gu̶u̶yu̶ y myu̶naangu̶xy jadyiiyu̶:

—Jii u̶u̶ch je̱'e̱ m'ayuuk mu̶naa ja'adu'ook n'amdo'ídu̶ch ajku̶xy.

33Mu̶'it je̱'e̱ Pablo jim chonnu̶ ma je̱' najty ajku̶xyu̶ñ. 34Peru̶ chi je̱'e̱ ja'ay nije̱' pyadzonnu̶ mu̶dyiibu̶ je̱'e̱ y'ayuuk najty tu̶ myu̶bu̶jkku̶xyu̶. Ma je̱' ajku̶xyu̶ñ jim najty je̱'e̱ ja'ay tu'ug mu̶dyiibu̶ xu̶u̶'ajtpu̶ñ Dionisio, tuungmu̶u̶d je̱'e̱ najty jim Areópago, y nan mu̶u̶d je̱'e̱ to'oxyu̶jk tu'ug mu̶dyiibu̶ xu̶u̶'ajtpu̶ñ Dámaris, y mu̶u̶d je̱'e̱ wiingja'ay jadyiiyu̶ ajku̶xy.

Currently Selected:

Hechos 17: MIXE

Highlight

Copy

Compare