Hechos 16

Timoteo jaymyu̶daty je̱'e̱ Pablo mu̶u̶d je̱'e̱ Silas

1Chi je̱'e̱ Pablo mu̶u̶d je̱'e̱ Silas oy jya'tku̶xy jim Derbe y chi jim chondu̶gajtzku̶xnu̶ba y oy Listra jya'tku̶xy. Jim je̱'e̱ ja'ay tu'ug mu̶dnaybyaattu̶ ajku̶xy mu̶dyiibu̶ xu̶u̶'ajtpu̶ñ Timoteo mu̶dyiibu̶ je̱'e̱ Jesús najty mu̶bu̶jkpu̶ñ, judío ja'ay najty je̱'e̱ tyaj'ajtypy y nan myu̶bu̶jkypy je̱'e̱ Jesús, y griego ja'ay tyeedy'ajtypy. 2Je̱'e̱ mu̶bu̶jkpu̶du̶jk mu̶dyiibu̶ najty jim Listra y jim Iconio tzu̶naaygyu̶xpu̶ñ oy yajxón najty je̱'e̱ Timoteo nigapx nimu̶dyaakku̶xy. 3Pablo jya'atzojkypy najty je̱' ko je̱'e̱ Timoteo jyaymyu̶dadu̶u̶ju̶ch, peru̶ chi jayu̶jp tu̶y'ajtu̶u̶y ka'pu̶ je̱'e̱ judío ja'ay myu̶jootma'ttu̶gu̶xu̶ch mu̶dyiibu̶ najty jim tzu̶naaygyu̶xpu̶ñ, je̱' ko nigu̶xyu̶ najty nejwu̶ydyaaygyu̶xy ko je̱'e̱ Timoteo griego ja'ay najty teedy'áty. 4Kajpt kajpt majaty najty ñajxku̶xyu̶ñ, yajmu̶dmu̶dyaakku̶xypy najty je̱'e̱ mu̶bu̶jkpu̶du̶jk je̱'e̱ ane̱'e̱mu̶ñ mu̶dyiibu̶ je̱'e̱ apóstolestu̶jk y mu̶dyiibu̶ je̱'e̱ mu̶bu̶jkpu̶du̶jk jim Jerusalén nigu'ubajk'ajtku̶xpu̶ñ najty tu̶ ye̱jkku̶xyu̶ñ. 5Y je̱'e̱ mu̶bu̶jkpu̶du̶jk ni'igyu̶ najty je̱'e̱ jyootmu̶kpu̶jkku̶xy ma je̱'e̱ myu̶bu̶jku̶ñ ajku̶xyu̶ñ, y ñimayu̶y'adu̶u̶tzku̶xy jaboom jaboom.

Pablo je̱'e̱ macedonia ja'ay tu'ug kuma'ayjyooty ixy

6Ka'p je̱'e̱ Espíritu Santo ku'ubu̶jky nu̶kxy je̱'e̱ Dios y'ayuuk tyu̶y'ajt jim Asia naaxjooty kapxwa'kxku̶xy, paady je̱'e̱ Frigia naaxjooty y Galacia naaxjooty yaj'yo'oyñajxy ajku̶xy, 7y oy jim jya'tku̶xy ma je̱'e̱ Misia ñaaxtzu̶ba'anu̶ñ. Jim wyinmaaygyu̶xy ko najty jim Bitinia naaxjooty ñu̶kxaangu̶xy, peru̶ ka'p je̱'e̱ Jesús y'Espíritu ku'ubu̶jky ko jim ñú̶kxku̶xu̶ch. 8Chi Misia naaxjooty tu̶yu̶ ñajxku̶xy y kyu'unajxku̶xy jim ma je̱'e̱ barco ni'igu̶daaktaakt mu̶dyiibu̶ xu̶u̶'ajtpu̶ñ Troas. 9Jim je̱'e̱ Pablo Dios tzum kuma'ayjyooty yaj'ijxu̶; ijxy je̱'e̱ ja'ay tu'ug kyunaaxu̶ch Macedonia naaxjooty, tyu̶na'ay ma je̱' wyinduuyu̶ñ, myu̶waanda'agyii myu̶nukxta'agyii, ñu̶ma'ayii: “Tun may'ajt nu̶kx jim Macedonia y jim u̶u̶ch xypyubé̱du̶ch ajku̶xy.” 10Ko je̱'e̱ Pablo Dios du'un yaj'ijxu̶, chi u̶u̶ch nayñi'ixu̶ydyu̶gu̶u̶yu̶ ajku̶xy, nnu̶kxaangu̶xyu̶ch jim Macedonia, nwinju̶wu̶u̶yu̶ch du'un ajku̶xy ko u̶u̶ch je̱'e̱ Dios jim xykye̱jxku̶xy neby u̶u̶ch je̱'e̱ oybyu̶ ayuuk tu̶y'ajt jim mu̶baad ngapxwa'kxku̶xyu̶ñ.

Pablo mu̶u̶d je̱'e̱ Silas jim Filipos yajpaatku̶xy

11Chi u̶u̶ch jim Troas nbarcu̶tu̶gu̶u̶ygyu̶xy nú̶kxyu̶ch tu̶yu̶ ajku̶xy ma je̱'e̱ naax mejy'agujkpu̶ mu̶dyiibu̶ xu̶u̶'ajtpu̶ñ Samotracia, kujaboom u̶u̶ch jim Neápolis nja'tku̶xy. 12Ko u̶u̶ch jim ndzóngu̶xy, chi u̶u̶ch jim Filipos nu̶kxy ajku̶xy, je̱'e̱ romano ja'ay kyajpt ajku̶xy y je̱' je̱'e̱ jakmu̶jpu̶ kajpt ma je̱'e̱ Macedonia ñaaxpa'aju̶ñ. Jim u̶u̶ch jeky nwa'kxu̶jpy ajku̶xy. 13Pokxyxyu̶u̶ u̶u̶ch kajppa'a nu̶kxy ajku̶xy, mu̶wingón tu'ug mu̶jnu̶u̶ ma je̱'e̱ judío ja'ay je̱'e̱ Dios o'owu̶dajtaakt najty mu̶dajtku̶chu̶ñ. Chi u̶u̶ch jim nnaxwé̱tzku̶xy y ngapxwa'kxku̶xyu̶ch je̱'e̱ Jesús y'ayuuk tyu̶y'ajt ma je̱'e̱ to'oxyu̶jktu̶jk mu̶dyiibu̶ najty jim tu̶ yo'oymyujkku̶xyu̶ñ. 14Nidu'ugtu̶ je̱'e̱ to'oxyu̶jktu̶jk mu̶dyiibu̶ najty xu̶u̶'ajtpu̶ñ Lidia, jim Tiatira je̱'e̱ najty kyugajptu̶ch y óyjyatypyu̶ uky wit najty je̱'e̱ tyoogy'ajtypy. Je̱'e̱ Lidia yajmu̶j'ajtypy najty Dios je̱' y amdo'ijtp najty je̱'e̱ jim, y je̱'e̱ Windzú̶n Dios je̱'e̱ jyoot wyinma'añ yaj'yuungu̶u̶yu̶xu̶ neby mu̶baad oy amdo'ítyu̶ñ neby je̱'e̱ Pablo je̱'e̱ Dios y'ayuuk tyu̶y'ajt kapxwa'kxu̶ju̶ñ. 15Chi je̱'e̱ Lidia ñu̶u̶bejty kipxy mu̶u̶d je̱'e̱ jyuugytyu̶jk myu̶gu'ugtu̶jk nigu̶xyu̶ ajku̶xy, y chi u̶u̶ch xymyu̶waandaaky xymyu̶nukxtaaky ajku̶xy, xyñu̶maaygyu̶xyu̶ch:

—Pu̶nu̶ mu̶naamb du'un ajku̶xy ko u̶u̶ch je̱'e̱ Windzú̶n Dios nmu̶bu̶ky, minxu̶ ja'ttaakku̶x ma u̶u̶ch je̱'e̱ ndu̶jku̶ñ.

Y adzip u̶u̶ch jim xyajwu̶'u̶my ajku̶xy.

16Du'un tu'ook jyajty, ko u̶u̶ch najty nnú̶kxku̶xy ma je̱'e̱ Dios o'owu̶dajtaaktu̶ñ, chi u̶u̶ch oy nbaatku̶xy tu'ug je̱'e̱ to'oxy'ana'k tuumbu̶ ni'idoogypyu̶. Mu̶jku'u winma'añ najty je̱'e̱ myu̶u̶d mu̶dyiibu̶ mu̶u̶d ñi''ixy xyu̶u̶máyu̶ñ, y myu̶u̶d najty wyindzu̶ndu̶jk mu̶dyiibu̶ mu̶u̶d tyuñu̶ñ, y je̱'e̱ wyindzu̶ndu̶jk oy najty je̱'e̱ jyanchkumeeñgyojku̶xnu̶ ko je̱'e̱ to'oxy'ana'k ñi''ixy xyu̶u̶máy. 17Je̱'e̱ to'oxy'ana'k je̱'e̱ Pablo je̱'e̱ najty jyanchpawu̶dijtypy y u̶u̶ch ajku̶xy cham janch mu̶kjaty myu̶na'añ:

—¡Adaa ja'ay ajku̶xy je̱'e̱ mu̶jmu̶k'ajtmu̶u̶dpu̶ Dios mu̶duumbu̶ yu̶'u̶ ajku̶xy, y Dios y'ayuuk tyu̶y'ajt yu̶'u̶ kyapxwa'kxu̶py ajku̶xy du'un neby je̱'e̱ m'aanu̶mu̶ ni'idzooku̶ñ mu̶baad mbaatku̶xyu̶ñ!

18Ka'anaag xu̶u̶ u̶u̶ch je̱'e̱ du'un xyjyanchnu̶ne̱'e̱mu̶u̶ygyu̶xy, ko je̱'e̱ Pablo chijpu̶nu̶, chi wya'agwimbijty nu̶maay je̱'e̱ mu̶jku'u mu̶dyiibu̶ je̱'e̱ to'oxy'ana'k najty mu̶dajtu̶bu̶ñ:

—Mu̶u̶d je̱'e̱ Jesucristo xyu̶u̶ yam n'ane'emy ko pu̶dzu̶m ma adaa to'oxy'ana'ku̶ñ.

Timymyu̶'ityu̶ je̱'e̱ mu̶jku'u je̱'e̱ to'oxy'ana'k yaj'yo'oydyuuty.

19Peru̶ ko je̱'e̱ to'oxy'ana'k wyindzu̶ndu̶jk du'un ijxku̶xy ko du'un ka'p y'okmeeñbyadaangu̶xnu̶ mu̶u̶d je̱'e̱ to'oxy'ana'k kyu̶xpu̶ mu̶dyiibu̶ ni''ijxp xu̶u̶maaybyu̶ñ, chi je̱'e̱ Pablo mu̶u̶d je̱'e̱ Silas majtzku̶xy y yajnú̶kxku̶xy ma je̱'e̱ tuungmu̶u̶dpu̶du̶jk ma je̱'e̱ ja'ay jyuuygyu̶xy tyókku̶xyu̶ñ. 20Chi jiiby mu̶dja'tku̶xy ma je̱'e̱ kudungtu̶jk ajku̶xyu̶ñ, cham myu̶naangu̶xy:

—Adaa ja'ay judío ja'ay adaa ajku̶xy, nigoo nnaax ngajpt yu̶'u̶ xyajma'ttu̶yu̶ ajtu̶m ajku̶xy, 21y yaj'u̶xpu̶jkku̶xy je̱'e̱ kostumbre mu̶dyiibu̶ u̶u̶ch ka'p mu̶baad ngu'ubu̶jku̶m ajku̶xy y ni mu̶baad nga'akuydyuunu̶m ajku̶xy, je̱' ko nromanoja'ayu̶ch ajtu̶m ajku̶xy.

22Mu̶'it je̱'e̱ mayjya'ay je̱'e̱ Pablo mu̶u̶d je̱'e̱ Silas nibu̶du̶'kku̶xy, y chi je̱'e̱ jueez ane̱'e̱mu̶ñ ye̱jkku̶xy ko wan yajni'ije̱e̱n yaj'u̶xje̱e̱ngu̶xy y wan yajwojpku̶xy mu̶u̶d je̱'e̱ paxy. 23Ko wojptaaygyu̶xy janch mu̶k, chi pujxtu̶gooty pu̶daakku̶xy y ane̱'e̱mgu̶xy je̱'e̱ pujxtu̶jk windzú̶n ko wan oy yajxón kweentu̶'ajtku̶xy. 24Ko je̱'e̱ pujxtu̶jk windzú̶n ane̱'e̱mu̶ñ pyaattu̶, chi jiiby jak'o'og'aamdu̶góy pujxtu̶gooty pu̶daakku̶xy y chi je̱'e̱ tyeky pu̶daaku̶ ajku̶xy ma je̱'e̱ kepy yajtze̱jtztu'udy mu̶dyiibu̶ xu̶u̶'ajtpu̶ñ cepo.

25Chi du'un jyajty mu̶jkuwa'kxychuum najty, ko je̱'e̱ Pablo mu̶u̶d je̱'e̱ Silas Dios najty mu̶bu̶jktzoogu̶xy y win'u̶u̶gu̶xy winyaaxku̶xy, cham je̱'e̱ wiingpu̶ pujxtu̶jkja'ay je'eyu̶ y'amdo'ijtku̶xy. 26Chi je̱'e̱ temblor amoñygyu̶joot myiiñ janch mu̶k, winxijty je̱'e̱ pujxtu̶jk poch'u̶jx. Chi je̱'e̱ pujxtu̶jk agu̶'u̶ mu̶k'eemby ku̶xyu̶ y'awaatztaay, y y'aje̱e̱nduuttaay je̱'e̱ cadeenu̶ ku̶xyu̶ ma je̱'e̱ maybyujxtu̶jkja'ay kyu̶'u̶ tyeky najty ajku̶xyu̶ñ. 27Ko je̱'e̱ pujxtu̶jk windzú̶n oy mya'aybyu̶du̶'u̶gy y ko du'un ijxy ko agu̶ awa'adz je̱'e̱ pujxtu̶jk agu̶'u̶, chi je̱'e̱ pyujxk espaadu̶ juty, ñayyaj'o'oga'añyii najty, je̱' ko du'un najty je̱'e̱ myu̶na'añ tu̶ ndijy je̱'e̱ pujxtu̶jkja'ay najty ku̶xyu̶ kye̱e̱ktaaygyu̶xy. 28Mu̶'it je̱'e̱ Pablo mu̶k'eemby mu̶k mu̶gapxy je̱'e̱ pujxtu̶jk windzú̶n, y nu̶maay:

—¡Ka'p nej mnaydyuuñyii, cheeby u̶u̶ch nigu̶xyu̶ ajku̶xy!

29Mu̶'it je̱'e̱ pujxtu̶jk windzú̶n ju̶u̶n yujkwaañ, y tyu̶gu̶u̶y poyu̶'u̶gyu̶ pujxtu̶gooty, y janch tzu̶yuuby mu̶u̶d je̱'e̱ tzu̶gu̶'u̶ñ, chi ñayñajtzkojxtu̶na'awu̶u̶yu̶ ma je̱'e̱ Pablo y je̱'e̱ Silas wyinduuy ajku̶xyu̶ñ. 30Chi yajpu̶dzu̶u̶mgu̶xy y yajtu̶u̶y ajku̶xy:

—Windzu̶ndu̶jk, ¿ti u̶u̶ch mu̶baad nduñ neby u̶u̶ch je̱'e̱ nni'idzooku̶ñ nbaadu̶chu̶ñ?

31Chi je̱' y'adzooy ajku̶xy:

—Mu̶bu̶k je̱'e̱ Windzú̶n Jesús, y du'un je̱'e̱ aanu̶mu̶ ni'idzooku̶ñ mbaadu̶ch miich y mu̶u̶d je̱'e̱ m'ung mdo'oxyu̶jk.

32Chi je̱'e̱ Windzú̶n Dios y'ayuuk tyu̶y'ajt yajmu̶dmu̶dyaakku̶xy, je̱', y ku̶xyu̶ pu̶njaty najty jim ma je̱'e̱ pujxtu̶jk windzú̶n tyu̶jku̶ñ. 33Mu̶jkuwa'kxychuum najtyñu̶ ko je̱'e̱ pujxtu̶jk windzú̶n je̱'e̱ Pablo y je̱'e̱ Silas chu̶chu̶'u̶'aa puju̶ ajku̶xy, chi nigu̶xyu̶ ñu̶u̶be̱jtku̶xy mu̶u̶d je̱'e̱ y'ung tyo'oxyu̶jk. 34Chi je̱'e̱ Pablo mu̶u̶d je̱'e̱ Silas mu̶dnú̶kxku̶xy ma je̱'e̱ tyu̶jku̶ñ y yajkaay yaj'uuky ajku̶xy, janch jootkujk najty nigu̶xyu̶ ajku̶xyu̶ñ ko je̱'e̱ Dios najty tu̶ mu̶bu̶jktaaygyu̶xy.

35Ko jyobu̶u̶y, mu̶'it je̱'e̱ kuduung policiatu̶jk ke̱jxku̶xy jim ma je̱'e̱ pujxtu̶jk windzu̶nu̶ñ mu̶u̶d je̱'e̱ ane̱'e̱mu̶ñ ko je̱'e̱ Pablo mu̶u̶d je̱'e̱ Silas wan najtzmadzu̶u̶ygyu̶xy. 36Chi je̱'e̱ pujxtu̶jk windzú̶n Pablo nu̶maay:

—Tu̶ je̱'e̱ kuduungdu̶jk ane̱'e̱mu̶ñ ke̱jxku̶xy ko miich mu̶baad nnajtzmadzu̶u̶ygyu̶xy; y mu̶baad jootkujk mnú̶kxku̶xnu̶.

37Chi je̱'e̱ Pablo je̱'e̱ policiatu̶jk mu̶gapxy, nu̶maay ajku̶xy:

—Romano ja'ay u̶u̶ch ajku̶xy, je̱'e̱ kajpttuungmu̶u̶dpu̶ u̶u̶ch mayjya'ayjyooty tu̶ xywyojpku̶xy y ka'p u̶u̶ch jayu̶jp tu̶ xy'oktu̶ydyuungu̶xy, y tu̶ xypyu̶daakku̶xyu̶ch pujxtu̶gooty; ¿y chámu̶tz amechu̶ xyñajtzmadzu̶'u̶waangu̶xyu̶ch? ¡Ka'p du'un y'óyu̶ch! Wan je̱'e̱ ku̶'u̶m miingu̶xy míñu̶ch xyajpu̶dzu̶u̶mgu̶xy.

38Chi je̱'e̱ policiatu̶jk oy ku̶jx myu̶dyaaktaaygyu̶xy ma je̱'e̱ kuduungdu̶jk ajku̶xyu̶ñ ku̶xyu̶ je̱'e̱ Pablo y'ayuuk. Chi je̱'e̱ kuduungdu̶jk mu̶k chu̶gu̶u̶ygyu̶xy ko oy du'un nejwu̶u̶ygyu̶xy ko je̱'e̱ Pablo mu̶u̶d je̱'e̱ Silas najty ryomanoja'ayu̶ch ajku̶xy. 39Chi je̱'e̱ kuduungdu̶jk ku̶'u̶m ñu̶kxy ajku̶xy oy kyapxnukxtaakku̶xy jiiby pujxtu̶gooty ma je̱'e̱ Pablo mu̶u̶d je̱'e̱ Silas najty yajpaatku̶xyu̶ñ. Chi pujxtu̶gooty yajpu̶dzu̶u̶mgu̶xy y mu̶ju̶u̶ydyaaky mu̶nukxtaaky ajku̶xy ko wan kajptjooty pu̶dzu̶u̶mgu̶xy. 40Ko je̱'e̱ Pablo mu̶u̶d je̱'e̱ Silas pyujxtu̶jkpu̶dzu̶u̶my ajku̶xy, chi ñú̶kxku̶xy ma je̱'e̱ Lidia tyu̶jku̶ñ, y ko je̱'e̱ mu̶bu̶jkpu̶du̶jk oy ku'ijx mu̶gápxku̶xy y joot'amu̶jmooygyu̶xy, chi jim chóngu̶xnu̶.

Currently Selected:

Hechos 16: MIXE

Highlight

Copy

Compare