2 Pedro 1
1
Je̱'e̱ yajpókxu̶ñ
1U̶u̶ch Simón Pedro, Jesucristo myu̶duumbu̶ y y'apóstol nandu'un, cham adayaaba naky miich nyajnigue̱jxku̶xy, je̱'e̱ mu̶dyiibu̶ je̱'e̱ janch oybyu̶ mu̶bu̶jku̶ñ tu̶ paatku̶xy du'un neby u̶u̶ch ajku̶xyu̶ñ, je̱' ko tu'uda'agy je̱'e̱ nDios y je̱'e̱ Nyajni'idzookpu̶ Jesucristo ajtu̶m ajku̶xy. 2Wan je̱'e̱ Dios oy'ajt may'ajt mu̶j ku̶je̱e̱ tuñ ma miich ajku̶xyu̶ñ, y xyajjootkujk'ajtku̶xu̶ch mu̶u̶d je̱'e̱ tu̶y'ajt mu̶dyiibu̶ mmu̶dajtku̶xypy ma je̱'e̱ Dios y je̱'e̱ Jesúsu̶ñ u̶u̶ch nWindzú̶n ajtu̶m ajku̶xy.
Neby je̱'e̱ mu̶bu̶jkpu̶du̶jk mu̶baad jya'ay'ajtku̶xyu̶ñ
3Dios mu̶u̶d je̱'e̱ myu̶k'ajt tu̶ xymyooyu̶m ajku̶xy ku̶xyu̶ tijaty nyajmayjyajtu̶mbyu̶ñ ajku̶xy ma je̱'e̱ ndzu̶naay njugy'ajtu̶ñ ajtu̶m ajku̶xyu̶ñ y neby mu̶baad oy yajxón ndzu̶naay njugy'ajtu̶mu̶chu̶ñ ajku̶xy, tu̶ je̱'e̱ Jesucristo xyajnejwu̶u̶yu̶m ajku̶xy je̱'e̱ mu̶dyiibu̶ xywyin'ijxu̶mu̶ñ ajku̶xy mu̶u̶d je̱'e̱ kyu̶'u̶m mu̶j'ajt y mu̶u̶d ku̶xyu̶ je̱'e̱ oybyu̶ mu̶dyiibu̶ tu̶ tuñu̶ñ. 4Y du'un du'un tu̶ xymyooyu̶m ajku̶xy, je̱'e̱ mu̶dyiibu̶ y'awaanu̶u̶y, je̱'e̱ mu̶dyiibu̶ janch mu̶j y mu̶j tzobaatpu̶ñ, wan du'un oy wa'adz ndzu̶naay njugy'ajtu̶mu̶ch ajku̶xy neby je̱'e̱ Dios tzokyu̶ñ y ngu'ugue̱e̱ku̶mu̶ch je̱'e̱ ju̶bu̶kpu̶ ajku̶xy je̱'e̱ naaxwiiñjya'ay adzojku̶ñ. 5Y paady mu̶baad mnay'amu̶jaduunu̶gu̶xy ko jak'yajmu̶jju̶u̶ygyu̶x je̱'e̱ mmu̶bu̶jku̶ñ mu̶u̶d je̱'e̱ tu'uda'agy'ajtu̶ñ; je̱'e̱ tu'uda'agy'ajtu̶ñ jak'yajmu̶jju̶u̶ygyu̶x mu̶u̶d je̱'e̱ wij'ajt ke̱j'ajtu̶ñ; 6je̱'e̱ wij'ajt ke̱j'ajtu̶ñ jak'yajmu̶jju̶u̶ygyu̶x mu̶u̶d je̱'e̱ ku̶'u̶m nay'awijtzu̶'u̶gu̶u̶; je̱'e̱ ku̶'u̶m nay'awijtzu̶'u̶gu̶u̶ jak'yajmu̶jju̶u̶ygyu̶x mu̶u̶d je̱'e̱ me̱kxtujku̶ñ; je̱'e̱ me̱kxtujku̶ñ jak'yajmu̶jju̶u̶ygyu̶x mu̶u̶d je̱'e̱ Dios windzu̶gu̶u̶yu̶ñ; 7je̱'e̱ Dios windzu̶gu̶u̶yu̶ñ jak'yajmu̶jju̶u̶ygyu̶x mu̶u̶d je̱'e̱ amuumdu'ugjoot naychoky naybya'a''ayoyiibyu̶; je̱'e̱ amuumdu'ugjoot naychoky naybya'a''ayoyiibyu̶ jak'yajmu̶jju̶u̶ygyu̶x mu̶u̶d je̱'e̱ tzojku̶ñ ju̶wu̶u̶yu̶ñ.
8Pu̶nu̶ mduungu̶xypy adayaaba du'un y pu̶nu̶ myajmu̶j myajmayu̶u̶ygyu̶xypy, ka'p je̱'e̱ mjugy'ajtu̶ñ ñadu̶gu̶'u̶'ádu̶ch ajku̶xy y nan ka'p naty du'un nigoo tu̶ mni'imu̶bu̶jkku̶xy je̱'e̱ nWindzú̶n Jesucristo ajtu̶m ajku̶xy. 9Peru̶ pu̶n adaa du'un ka'atuungu̶xpu̶ñ, du'un je̱' ajku̶xy neby tu'ug wiindzja'ayu̶ñ o neby je̱'e̱ mu̶dyiibu̶ ka'p ju̶gue̱m y'ixyu̶ñ. Tu̶ ja'aydyu̶gooydya'ay ko je̱'e̱ Windzú̶n Jesucristo pyoky kyu̶dyeey tu̶ wyinmé̱kxu̶xu̶ mu̶dyiibu̶ jékyu̶p tyuun y'ijxu̶ñ. 10Paady mu̶gu'uktu̶jk, je̱' ko tu̶ miich je̱'e̱ Dios xymyu̶j'yaaxku̶xy y xywyin'ijxku̶xy, jatytimyyajkoptu̶gu̶u̶ygyu̶x adaa tu̶y'ajt, y ko du'un mduungu̶xu̶ch nimu̶naa mga'ajoottu̶gooy mga'awinma'añdyu̶gooygyu̶xu̶ch. 11Y du'un miich je̱'e̱ tu̶gu̶u̶ydyaakt agujk jootkujk myajmooygyu̶xu̶ch ma je̱'e̱ Windzú̶n Jesucristo, je̱'e̱ Yajni'idzookpu̶ y'ane̱'e̱mdaakt wiinu̶u̶xu̶u̶bu̶ju̶ñ.
12Paady miich adaa tu̶y'ajt je'emy ku̶xyu̶ nyajja'aymye̱jtz'o'kku̶xy, oy miich je̱'e̱ mja'anejwu̶u̶ygyu̶xy y tu'ug'aa tu'ugjoot mja'amu̶bu̶jkku̶xy, y ka'p m'u̶xtu̶gu̶'u̶wa'kku̶xy ma je̱'e̱ tu̶y'ajt mu̶dyiibu̶ tu̶ mjajtku̶xyu̶ñ. 13Mabaadu̶ch njugy'atyu̶ñ, njakwingapx njakju̶jpkapxu̶u̶ygyu̶xu̶py mu̶u̶d adayaaba u̶u̶wij kapxwiju̶ñ. 14Je̱'e̱ nWindzú̶n Jesucristo ajtu̶m ajku̶xy tu̶ xyajnejwu̶'u̶y ko u̶u̶ch ya naaxwiiñ tzojku̶ njakjugy'ada'añ, 15peru̶ nay'amu̶jaduunu̶bu̶ch ma miich ajku̶xyu̶ñ mu̶u̶d adayaaba u̶u̶wij kapxwiju̶ñ wan du'un mja'aymye̱jtzku̶xu̶ch ko u̶u̶ch naty tu̶ n'o'knu̶.
Pu̶njaty je̱'e̱ Cristo myu̶j'ajtu̶ñ ijxku̶xu̶ñ
16Du'un neby miich je̱'e̱ nyaj'u̶xpu̶jkku̶xy je̱'e̱ mu̶dyiibu̶ je̱'e̱ Windzú̶n Jesucristo myu̶k'ajt nigapxp y neby ya naaxwiiñ ja'adu'ook wyimbida'añu̶ñ, ka'p je̱'e̱ kapxy mu̶dya'agy u̶u̶ch ku̶'u̶m tu̶ nyajkojku̶xy. N'ijxku̶xu̶ch je̱'e̱ Windzú̶n Jesucristo myu̶j'ajtu̶ñ mu̶u̶d u̶u̶ch je̱'e̱ ngu̶'u̶mwiin ajku̶xy. 17N'ijxku̶xu̶ch ko je̱'e̱ Dios Teedy ku'umaayu̶ñ y oy'ajtu̶ñ myooyu̶, y nan nmu̶doogu̶xu̶ch je̱'e̱ Dios y'ayuuk ko du'un ñu̶maayu̶ je̱'e̱ mu̶'it tiempo: “Adaa, u̶u̶ch adaa n'ung, mu̶dyiibu̶ u̶u̶ch oy ndzojkypy nju̶wu̶u̶ybyu̶ñ, mu̶dyiibu̶ u̶u̶ch tu̶ nwin'íxyu̶ñ.”#1.17 Nije̱' wiingpu̶ versión myu̶na'añ: janch jootkujku̶ch nayjyu̶wu̶'u̶yii mu̶u̶d miich. 18U̶u̶ch je̱'e̱ ayuuk ku̶'u̶m nmu̶doogu̶x je̱'e̱ mu̶dyiibu̶ najty tzajpjooty tzombu̶ñ, y u̶u̶ch najty tzooñ ajku̶xy mu̶u̶d je̱'e̱ Windzú̶n Jesús ma je̱'e̱ kunukxypyu̶ koptu̶ñ.
19Tu̶y'ajt adaa ayuuk tu̶y'ajt du'un neby je̱'e̱ Dios y'ayuuknajtzkapxu̶u̶ybyu̶du̶jk kujaaygyu̶xyu̶ñ, je̱'e̱ mu̶dyiibu̶ miich mguydyuungu̶xypyu̶ñ. Je̱' ko du'un je̱'e̱ ayuuk tu̶y'ajt neby je̱'e̱ lámpara tu'ug y'adu̶kxy y'ajajy ma y'agoodzu̶chu̶ñ, y du'un nandu'un neby xyu̶u̶mu̶'u̶yu̶ñ, y pyu̶dzu̶my je̱'e̱ mu̶dza'a jayjyuxtujk neby je̱'e̱ mjoot mwinma'añ xykyudú̶kxu̶chu̶ñ ajku̶xy y xyajwinju̶wu̶u̶ygyu̶xu̶ch je̱'e̱ ayuuk tu̶y'ajt mu̶dyiibu̶ ka'p mwinju̶wu̶u̶ygyu̶xyu̶ñ. 20Peru̶ jatytimy ñejwu̶u̶ygyu̶x adaa jaywiin, ko ka'p mu̶baad pu̶n ku̶'u̶m winma'añ winju̶wu̶'u̶y je̱'e̱ Dios y'ayuuk mu̶dyiibu̶ tunaan jadaanu̶bu̶ñ. 21Je̱' ko ka'p je̱'e̱ Dios y'ayuuknajtzkapxu̶u̶ybyu̶du̶jk je̱'e̱ ayuuk tu̶y'ajt nimu̶naa ku̶'u̶mjoot ku̶'u̶mwinma'añ kapxwa'kxku̶xy, Dios najty y'ayuuk je̱'e̱ ñajtzkapxu̶u̶yu̶py ajku̶xy, nebyjyaty je̱'e̱ Espíritu Santo wyinma'añmyooyu̶gu̶xyu̶ñ.
Currently Selected:
2 Pedro 1: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005