2 Pedro 2

Pu̶njaty je̱'e̱ anu̶u̶ yaj'u̶xpu̶jkku̶xpu̶ñ

1Nan jii najty anu̶u̶'ajtpu̶du̶jk ma je̱'e̱ Israel ja'ay ajku̶xyu̶ñ mu̶dyiibu̶ mu̶naangu̶xpu̶ñ ko jye̱'e̱ju̶ch ajku̶xy je̱'e̱ Dios y'ayuuknajtzkapxu̶u̶ybyu̶du̶jk. Y nan jii'ádu̶p anu̶u̶'ajtpu̶du̶jk nandu'un ma miich ajku̶xyu̶ñ mu̶dyiibu̶ mu̶naangu̶xu̶bu̶ñ ko je̱'e̱ ayuuk tu̶y'ajt yaj'u̶xpu̶jkku̶xy. Je̱' ayu'uch amechu̶ je̱'e̱ kyu̶'u̶m'ayuuk kyu̶'u̶mwinma'añ yaj'u̶xpu̶jkku̶xu̶ch mu̶dyiibu̶ yajjoottu̶gooby yajwinma'añdyu̶gooybyu̶ñ. Myu̶naangu̶xu̶ch ko je̱'e̱ Windzú̶n Jesús y'ayuuk tyu̶y'ajt ka'p jyaanchu̶ch, je̱'e̱ mu̶dyiibu̶ xyajni'idzooku̶mu̶ñ ajku̶xy, y ku̶'u̶m naty je̱'e̱ du'un pe̱kyu̶ ñay'ayo'onmooyu̶gu̶xy. 2May je̱'e̱ ja'ay pyanú̶kxu̶gu̶xu̶ch neby je̱'e̱ ju̶bu̶kpu̶ tzu̶naayu̶ñ jugy'ajtu̶ñ mu̶dajtku̶xyu̶ñ, y mu̶u̶d je̱' gyu̶xpu̶ ajku̶xy je̱'e̱ tu̶y'ajtpu̶ ayuuk tu̶y'ajt ju̶bu̶k axu̶u̶g yajnigápx yajnimu̶dya'agu̶ch. 3Mu̶u̶d je̱'e̱ myeeñ'adzojku̶ñ ajku̶xy, xymyeeñ'ajtku̶xu̶p miich je̱' mu̶u̶d je̱'e̱ u̶xpu̶jku̶ñ ka'pu̶ tyu̶y'ajtu̶ch, peru̶ ja'ay'e̱jxu̶gu̶xnu̶py y'ayo'on je̱' ajku̶xy, y ka'p nineby'eemby ñi'idzookku̶xu̶ch, je̱' ko jékyu̶p je̱'e̱ Dios tzaachpyu̶ yajnigu'udugu̶u̶yu̶gu̶xyu̶.

4Dios ka'p je̱'e̱ ángelestu̶jk winmé̱kxku̶xy, je̱'e̱ mu̶dyiibu̶ tuundu̶gooygyu̶xu̶ñ, jiiby ayoodaaktuuby je̱'e̱ ku'uwojpnajxtaaygyu̶xy y yajwu̶'u̶mgu̶xy agootztuuby, y'ijtku̶xy jiiby cadeenu̶mu̶u̶d kweentu̶'áty u̶xtu̶ koonu̶ je̱'e̱ tiempo paadu̶ch mu̶naa yajtu̶ydyuungu̶xu̶chu̶ñ. 5Nan ka'p je̱'e̱ Dios ja'ay winmekxy mu̶dyiibu̶ jékyu̶p tzu̶naaygyu̶xu̶ñ ko je̱'e̱ Noé jyugy'ajty y je̱'e̱ komduu je̱'e̱ ju̶bu̶kja'aydyu̶jk yajni'ike̱jxku̶x, y yajni'idzooky je̱'e̱ Noé je'eyu̶du̶'ajty, mu̶dyiibu̶ je̱'e̱ tu̶y tu'uda'agypyu̶ tzu̶naayu̶ñ kapxwa'kxu̶ñ y mu̶u̶d je̱'e̱ ja'ay juxtujk. 6Nan y'ayo'onmooy, y yajku'udu̶gooy je̱'e̱ Dios Sodoma kajpt y Gomorra kajpt, ni'ino'ky u̶xtu̶ yajwu̶'u̶my pu'k pu'k, wan du'un y'ijxpe̱jt'ádu̶ch ma je̱'e̱ ju̶bu̶kja'aydyu̶jk ajku̶xy mu̶dyiibu̶ u̶x'aam jaktzu̶na'awaangu̶xpu̶ñ. 7Peru̶ yajni'idzook je̱'e̱ Lot, tu'ug je̱'e̱ ja'ay mu̶dyiibu̶ najty tu̶y tu'uda'agy tzu̶naaby jugy'ajtpu̶ñ, mu̶dyiibu̶ najty nidaj nimaaby neby je̱'e̱ ju̶bu̶kja'aydyu̶jk ju̶bu̶k axu̶u̶g chu̶naay jyugy'ajtku̶xyu̶ñ.

8Adayaaba ja'ay mu̶dyiibu̶ najty tu̶y tu'uda'agy tzu̶naaby jugy'ajtp ma je̱' ajku̶xyu̶ñ, jaboom jaboom najty je̱'e̱ tyajy myay ko du'un ixy tu̶kxy nebyjyaty je̱'e̱ ju̶bu̶kja'aydyu̶jk ju̶bu̶kjaty axu̶u̶gjáty y'adu̶u̶tzku̶xyu̶ñ. 9Je̱'e̱ Windzú̶n Dios ñiwe̱e̱mby yajtzookypy je̱'e̱ ja'ay mu̶dyiibu̶ je̱'e̱ mu̶jku'u joot'ijx winma'añ'ijxu̶gu̶xpu̶ñ, mu̶dyiibu̶ tu'ug'aa tu'ugjoot mu̶bu̶jku̶gu̶xpu̶ñ, y tzaachtyuna'añ je̱'e̱ ju̶bu̶kja'aydyu̶jk ko naty je̱'e̱ tiempo paady mu̶naa yajtu̶ydyuungu̶xu̶chu̶ñ. 10Je̱' je̱'e̱ Dios mu̶kta'agy chaachtyúnu̶py pu̶n je̱'e̱ ju̶bu̶k adzojku̶ñ tuungu̶xpu̶ñ, y u̶xtijku̶xy je̱'e̱ Windzú̶n Jesús kyu'utujku̶ñ. Je̱'e̱ du'umbu̶ ja'ay janch xe̱x jyoot wyinma'añ je̱'e̱ ajku̶xy y janch tu̶goy jya'ay'ajtku̶xy, y ka'p tzu̶gu̶u̶ygyu̶xy, ni'oj niyaxu̶u̶ygyu̶xy oy nejpy je̱'e̱ mu̶dyiibu̶ je̱'e̱ mu̶k'ajt jiiby tzajpjooty mu̶dajtku̶xpu̶ñ. 11Oy je̱'e̱ ángelestu̶jk mu̶k'ajt y ku'utujku̶ñ ni'igyu̶ ja'amu̶dajtku̶xy, peru̶ ka'p je̱'e̱ winma'añ du'un mu̶dajtku̶xy nu̶kxy Dios winduuy ni'oj niyaxu̶u̶ygyu̶xy je̱'e̱ mu̶dyiibu̶ je̱'e̱ mu̶k'ajt jiiby tzajpjooty mu̶dajtku̶xpu̶ñ.

12Adayaaba ja'ay du'un je̱'e̱ ajku̶xy neby je̱'e̱ ju̶yujk animaalu̶ñ: ka'p je̱'e̱ jyoot wyinma'añ ajku̶xy, nigoobu̶ je̱'e̱ jyugy'ajtku̶xy y mya'axung'ajtku̶xy neby je̱'e̱ ja'ay myajtzu̶gu̶xu̶ch y yaj'o'ku̶gu̶xu̶ch. Ju̶bu̶k axu̶u̶g je̱'e̱ nigapx nimu̶dyaakku̶xy mu̶dyiibu̶ ka'p winju̶wu̶u̶ygyu̶xyu̶ñ; peru̶ nandu'un je̱'e̱ y'o'ktu̶gajtzku̶xu̶ch neby je̱'e̱ ju̶yujk animaalu̶ñ ajku̶xy; 13ku'ayoodu̶gajtzku̶xu̶ch neby je̱'e̱ myu̶gu'ug tu̶ yaj'ayoogu̶xyu̶ñ. Janch jootkujk je̱'e̱ ñaydyiju̶gu̶xy xyondaakku̶xy ma je̱'e̱ tu'kjaxu̶'u̶gypyu̶ xondaaku̶ñ. Oycho'oydyuunu̶ du'un ko du'un y'adu̶u̶tzku̶xy y xypyuyo'oy xypyunaxu̶u̶ygyu̶xy ma mxu̶u̶duungu̶xyu̶ñ, xyondaakku̶xy neby jaanchpyu̶ju̶ñ y ka'p naty du'un ñi'ijaanchu̶chpyu̶.

14Ka'p je̱'e̱ to'oxyu̶jk mu̶baad nigoo ni'i''ijxku̶xy, tyimy mu̶dtuundu̶goyaangu̶xypy je̱'. Pokytyuundu̶u̶gu̶xp y ka'p chijpu̶gu̶xyu̶, wyin'u̶u̶ngu̶xypy je̱'e̱ ja'ay oy yajxón mu̶dyiibu̶ je̱'e̱ mu̶bu̶jku̶ñ we̱e̱nu̶ mu̶dajtku̶xpu̶ñ; y janch kuwinma'añ ajku̶xy ma je̱'e̱ adzojku̶ñ winma'añdyu̶ñ; mu̶k je̱'e̱ Dios yajkumu̶doowu̶gu̶xu̶ch. 15Tu̶goydyuum je̱'e̱ yajpaatku̶xy, je̱' ko je̱'e̱ tu̶y'ajtpu̶ nu̶u̶ tu'u tu̶ u̶xmajtzku̶xnu̶. Je̱' je̱'e̱ pya'ijxku̶xypy je̱'e̱ ayuuknajtzkapxu̶u̶ybyu̶ Balaam y'ijxpe̱jt, je̱'e̱ Beor y'ung, je̱'e̱ mu̶dyiibu̶ oy tii ju̶bu̶kpu̶ tuumb nigoo ko je̱'e̱ meeñ adzoky. 16Y chi je̱'e̱ pyoky yaj'oju̶: myu̶gapxu̶ je̱'e̱ buurru̶to'oxy tu'ug neby je̱'e̱ ja'ayu̶ñ, y du'un je̱'e̱ lyooku̶winma'añ yaj'u̶xmajtzu̶.

17Adaa anu̶u̶ yaj'u̶xpu̶jkpu̶du̶jk du'un je̱'e̱ ajku̶xy neby je̱'e̱ nu̶u̶gópt tu̶'u̶tzpu̶ju̶ñ, neby je̱'e̱ jok ye̱e̱g mu̶dyiibu̶ pojnajxpu̶ñ y ka'p yajtu'uy. Jiiby je̱'e̱ wiinu̶u̶xu̶u̶ tu̶ yajnigu'udugu̶u̶yu̶gu̶xnu̶ ma mu̶k y'agoodztuuybyu̶chu̶ñ. 18Mu̶k je̱'e̱ tii nigapx nimu̶dyaakku̶xy y kápxku̶xy mu̶dyaakku̶xy je̱'e̱ ayuuk mu̶dyiibu̶ ka'p chobaadyu̶ñ, y mu̶u̶d je̱'e̱ ju̶bu̶kwinma'añ y naaxwiiñ adzojku̶ñ win'u̶u̶ngu̶xy oy yajxón je̱'e̱ mu̶dyiibu̶ adzaach tu̶ jya'apu̶dzu̶u̶mgu̶xyu̶ñ ma je̱'e̱ mu̶dyiibu̶ pokymyu̶u̶d ku̶dyeeymyu̶u̶d tzu̶naaygyu̶xpu̶ñ. 19Je̱'e̱ du'umbu̶ tzu̶naayu̶ñ je̱'e̱ ja'ay yajwinwanu̶u̶ygyu̶xypy ma mu̶baad oy nejpy y'adu̶u̶tzku̶xyu̶ñ, ma je̱'e̱ ju̶bu̶kpu̶ ku̶'u̶m y'ane̱'e̱mu̶gu̶xyu̶ñ; je̱' ko ku̶xyu̶ je̱'e̱ ja'ay je̱'e̱ poky je̱'e̱ ane̱'e̱mu̶gu̶xp je̱'e̱ mu̶dyiibu̶ tu̶ myu̶madaaku̶gu̶xyu̶ñ. 20Pu̶n je̱'e̱ Windzú̶n y je̱'e̱ Yajni'idzookpu̶ Jesucristo tu̶ mu̶bu̶jkku̶xy, tu̶ je̱'e̱ du'un pyu̶dzu̶u̶mgu̶xy ma je̱'e̱ ju̶bu̶ktzu̶naayu̶ñ ya naaxwiiñu̶ñ, peru̶ pu̶nu̶ yajwin'u̶u̶ngu̶xp ja'adu'ook y pu̶nu̶ mu̶madaaku̶gu̶xp je̱'e̱ ju̶bu̶ktzu̶naayu̶ñ ja'adu'ook, o'ktú̶y je̱'e̱ du'umbu̶ ja'ay ni'igyu̶ jyajtku̶xy. 21Ni'igu̶ oy u̶xyu̶py ni'igyu̶ ko je̱'e̱ tu̶y'ajtpu̶ nu̶u̶ tu'u tu̶ ka'amu̶bu̶jkku̶xy, y ko o'kja'amu̶bu̶jkku̶xy, chi je̱'e̱ wa'adzpu̶ Dios kyu'utujku̶ñ tu̶ u̶xmajtzku̶xnu̶, je̱'e̱ mu̶dyiibu̶ ja'ayajmooygyu̶xu̶ñ. 22Peru̶ jii je̱'e̱ tu̶y'ajtpu̶ ayuuk du'un yajkuydyúñ, je̱'e̱ mu̶dyiibu̶ du'un mu̶naambu̶ñ: “Je̱'e̱ uk ñiwimbijtypy je̱'e̱ y'u̶u̶ch, ju̶kxu̶'knu̶ba ja'adu'ook y je̱'e̱ kuch mu̶dyiibu̶ naamdziidaaybyu̶ñ, chi ja'adu'ook yajtztu̶gu̶u̶y kyi'ttu̶gu̶u̶yñu̶ba mo'ondzjooty.

Currently Selected:

2 Pedro 2: MIXE

Highlight

Copy

Compare