2 Tesalonicenses 3
3
Mu̶bu̶jktzoogu̶x je̱'e̱ Dios mu̶u̶d u̶u̶ch kyu̶xpu̶ ajku̶xy
1Cham njaknu̶maaygyugu̶xu̶u̶ygyu̶xy mu̶gu'uktu̶jk, mu̶bu̶jktzoogu̶x je̱'e̱ Dios mu̶u̶d u̶u̶ch kyu̶xpu̶ ajku̶xy, wan je̱'e̱ Windzú̶n Jesús y'ayuuk tyu̶y'ajt tzojku̶ wya'kxta'awu̶ch ma je̱'e̱ naax kajpt kú̶xyu̶ju̶ñ y neby je̱'e̱ ja'ay mu̶baad oy yajxón ku'ubu̶jkku̶xyu̶ñ du'un neby miich tu̶ mgu'ubu̶jkku̶xyu̶ñ. 2Nan mu̶bu̶jktzoogu̶x je̱'e̱ Dios, neby u̶u̶ch je̱'e̱ Dios mu̶baad xyñiwaangu̶xyu̶ñ ma je̱'e̱ ju̶bu̶kja'ay ajku̶xyu̶ñ y ma je̱'e̱ mu̶dyiibu̶ ka'p wyindú̶yu̶chu̶ñ ajku̶xy, je̱' ko ka'p je̱'e̱ nigu̶xyu̶ mu̶bu̶jkku̶xy. 3Peru̶ tu'uda'agy je̱'e̱ Windzú̶n Jesús y je̱' miich xypyube̱jtku̶xu̶p neby je̱'e̱ mmu̶bu̶jku̶ñ myajtu'uyo'oygyu̶xu̶chu̶ñ y ka'p m'u̶xtu̶gu̶'u̶wa'kku̶xu̶ch y xykyweentu̶'ajtku̶xu̶ch ma je̱'e̱ ju̶bú̶kpu̶ju̶ñ. 4Y u̶u̶ch nmu̶bu̶jkypyu̶ch ajku̶xy ma je̱'e̱ Windzú̶n Jesúsu̶ñ ko miich mguydyuungu̶xy y mjakkuydyuungu̶xu̶ch je̱'e̱ mu̶dyiibu̶ tu̶ nyaj'ane̱'e̱mgu̶xyu̶ñ. 5Wan je̱'e̱ Windzú̶n Jesús xypyube̱jt xypyudu̶gu̶u̶ygyu̶xy neby je̱'e̱ mjuugy mmu̶gu'ug mu̶baad mdzojk mju̶wu̶u̶ygyu̶xyu̶ñ du'un neby je̱'e̱ Dios choky jyu̶wu̶'u̶yu̶ñ y mmu̶dajtku̶xu̶ch je̱'e̱ mu̶k'ajtu̶ñ neby je̱'e̱ Crístoju̶ñ ko naty nej mjajtku̶xy m'abe̱jtku̶xy.#3.5 Y mmu̶dajtku̶xu̶ch je̱'e̱ mu̶k'ajtu̶ñ neby je̱'e̱ Crístoju̶ñ ko naty nej mjajtku̶xy m'abe̱jtku̶xy: nije̱' wiingpu̶ versión myu̶na'añ: y mmu̶dajtku̶xu̶ch je̱'e̱ me̱kxtujku̶ñ neby je̱'e̱ Crístoju̶ñ.
Xyjyatytimypyaattu̶mb nduunu̶mu̶ch ajku̶xy
6“Mu̶gu'uktu̶jk cham n'ane̱'e̱mgu̶xy mu̶u̶d je̱'e̱ nWindzú̶n Jesucristo xyu̶u̶ ajtu̶m ajku̶xy ko puyo'oydyuutku̶x oy mu̶dyiibu̶ mu̶gu'ugu̶ch je̱'e̱ mu̶dyiibu̶ ka'p tyunaangu̶xy y ka'p du'un chu̶naay jyugy'ajtku̶xy neby je̱'e̱ u̶xpu̶jku̶ñ myu̶na'añu̶ñ, je̱'e̱ mu̶dyiibu̶ u̶u̶ch tu̶ nmooygyu̶xyu̶ñ. 7Miich mnejwu̶u̶ygyu̶xypy neby mdzu̶naaygyu̶x mjugy'ajtku̶xu̶chu̶ñ. Mba'ijxku̶xu̶ch ma u̶u̶ch ajku̶xyu̶ñ du'un neby u̶u̶ch tu̶ ndzu̶naay tu̶ njugy'ajtku̶xyu̶ñ. U̶u̶ch ka'p u̶u̶ch tu̶ nuux'ajtku̶xy ko u̶u̶ch jim tu̶ ndzu̶naay tu̶ njugy'ajtku̶xy ma miich ajku̶xyu̶ñ, 8y ni pu̶n u̶u̶ch je̱'e̱ jyu̶ch kyaagy jaygyujuy tu̶ nga'akaay nga'a'uuku̶ ajku̶xy. Ni'igu̶ tuun ni'igu̶ ayoowu̶ch ni'igyu̶ xu̶u̶m tzum ajku̶xy, nga'a''adzíp nga'a''abe̱daangu̶xy najty miich nitu'ug ajku̶xy. 9Y xyjya'apaatpu̶ch najty ajku̶xy nyujkwaanu̶ch ajku̶xy ko u̶u̶ch xypyube̱jtku̶xu̶ch, peru̶ tuun ayoowu̶ch ajku̶xy; mba'ijxku̶xu̶ch du'un ma u̶u̶ch ajku̶xyu̶ñ. 10Ko u̶u̶ch n'ijtku̶xy ma miich ajku̶xyu̶ñ, adaa ane̱'e̱mu̶ñ nmooygyu̶x: Je̱'e̱ mu̶dyiibu̶ ka'p tyuna'añu̶ñ, nan ka'p je̱'e̱ kyáyu̶ch. 11Peru̶ tu̶ u̶u̶ch du'un nnejwu̶u̶ygyu̶xy ko miich du'un nije̱' mdzu̶naaygyu̶xy ka'p mdunaangu̶xy, je̱'e̱ nuux'adyiibyu̶ miich xyaj'o'ogaangu̶xnu̶py.#3.11 Nije̱' wiingpu̶ versión myu̶na'añ: myajkápx myajxiigu̶u̶ygyu̶xy je̱'e̱ mu̶dyiibu̶ ka'p xypyaatku̶xy myajtu̶gu̶u̶ygyu̶xu̶chu̶ñ. 12N'ane̱'e̱mgu̶xypy y nyajni'ipu̶jkku̶xypyu̶ch je̱'e̱ du'umbu̶ ja'ay ajku̶xy, mu̶u̶d je̱'e̱ Windzú̶n Jesucristo y'ane̱'e̱mu̶ñ, ko wan oy yajxón tuungu̶xy neby je̱'e̱ kyaayu̶ñ y'uuku̶ñ mu̶baad paatku̶xyu̶ñ.
13“Mu̶gu'uktu̶jk, tuun'adu̶u̶tzku̶x je̱'e̱ oybyu̶ y ka'p mmu̶dzijpu̶gu̶xyu̶. 14Pu̶nu̶ jii pu̶n nidu'ugtu̶ mu̶dyiibu̶ adaa ayuuk ka'p kweentu̶túñu̶ñ mu̶dyiibu̶ yam naky'aam nyajnu̶maaygyu̶xypyu̶ñ, ijxwu̶'u̶mgu̶x pu̶n je̱'e̱ju̶ñ y ka'p mbuyo'oyu̶u̶ygyu̶xu̶ch wan du'un cho'oydyúnu̶ch. 15Peru̶ ka'p myajmu̶dzip'ajtku̶xy, ni'igyu̶ oy'eemby wingapx ju̶jpkapxu̶u̶ygyu̶x neby je̱'e̱ mu̶dyiibu̶ je̱'e̱ Cristo mu̶bu̶jkpu̶ñ.
Pablo myu̶gu'ugtu̶jk kunukxu̶ñ jak'yajniguéxy
16Y wan je̱'e̱ Windzú̶n Jesucristo ku̶'u̶m je̱'e̱ mu̶dyiibu̶ je̱'e̱ jootkujk'ajtu̶ñ ye̱jkpu̶ñ xymyooygyu̶xy je̱'e̱ jootkujk'ajtu̶ñ oytimymyu̶naaxu̶u̶ju̶ch y oytimyñeby'eembyu̶ch. Wan je̱'e̱ Windzú̶n Dios ity mu̶u̶d miich nigu̶xyu̶ ajku̶xy.
17U̶u̶ch Pablo, cham adaa yajpókxu̶ñ nyajnijayu̶u̶ygyu̶xy mu̶u̶d u̶u̶ch je̱'e̱ ngu̶'u̶mgu̶'u̶ ngu̶'u̶mleetra. Du'un u̶u̶ch je̱'e̱ nfirma nbu̶da'agy ma u̶u̶ch je̱'e̱ nnaky kú̶xyu̶ju̶ñ, du'unu̶ch nja'ay. 18Wan je̱'e̱ nWindzú̶n Jesucristo ajtu̶m ajku̶xy oy'ajt may'ajt tuñ ma miich nigu̶xyu̶ ajku̶xyu̶ñ. Jaanch adaa du'un.
Currently Selected:
2 Tesalonicenses 3: MIXE
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005
