2 Tesalonicenses 2
2
Yajkapxtú̶y neby je̱'e̱ windzú̶n Jesucristo ya naaxwiiñ wyimbídu̶chu̶ñ
1“Mu̶gu'uktu̶jk, jada'achám nyajmu̶dmu̶dyaakku̶xy neby je̱'e̱ nWindzú̶n Jesucristo ajtu̶m ajku̶xy ya naaxwiiñ ja'adu'ook wyimbídu̶chu̶ñ y neby naybyaattu̶mu̶chu̶ñ ajku̶xy mu̶u̶d je̱'. Nmu̶nukxtaakku̶xypy 2ko ka'p nigoo mu̶k'eemby mwinmaaydyu̶gajtzku̶xy y ka'p myaj'adzu̶gu̶u̶ygyu̶xy mu̶u̶d je̱'e̱ ayuuk pu̶nu̶ jii pu̶n myu̶na'añ ko je̱'e̱ Dios tu̶ myu̶gapxyii ajku̶xy, o pu̶nu̶ jii du'un yaj'u̶xpu̶jkku̶xy o pu̶nu̶ jii je̱'e̱ naky xypyaatku̶xy ko u̶u̶ch tu̶ ngue̱jxku̶xy, myu̶naangu̶xy ko je̱'e̱ Windzú̶n Jesucristo tu̶ wyimbity ya naaxwiiñ. 3Ka'p nineby'eemby myajwin'u̶u̶ngu̶xy. Ma naty je̱'e̱ xu̶u̶ tiempo ka'anu̶ myu̶baad'átyñu̶ mu̶naa je̱'e̱ Jesucristo ya naaxwiiñ wyimbida'añu̶ñ; ñi'igu̶ mu̶dzibu̶'u̶wu̶py je̱'e̱ ja'ay je̱'e̱ Dios jayu̶jp ajku̶xy, ko naty je̱'e̱ ju̶bu̶kja'ay ñayyajni'igu̶xu̶'u̶gyii, je̱'e̱ mu̶dyiibu̶ je̱'e̱ Dios tu'u'ook yajku'udu̶góyu̶ yajku'udu̶goye̱e̱mbyu̶ñ. 4Je̱'e̱ ju̶bu̶kja'ay y'agu̶mu̶dzip'ade̱e̱mby je̱'e̱ ku̶xyu̶ tijaty mu̶dyiibu̶ je̱'e̱ Dios jye̱'e̱'ajtypyu̶ñ o mu̶dyiibu̶ je̱'e̱ Dios mu̶baad mu̶u̶d yaj'o'owu̶dátyu̶ñ, u̶xtu̶ naaxwe̱e̱dzu̶p jiiby ane̱'e̱mbu̶ ma je̱'e̱ Dios myu̶jtzajptu̶jku̶ñ, ñayyajnaxu̶u̶ju̶ch neby je̱'e̱ Diosu̶ñ.
5¿Nej ka'p mja'aymye̱jtzku̶xy ko adaa du'un nyajmu̶dmu̶dyaakku̶xy mu̶naaba u̶u̶ch najty nyajpaadyñu̶ mu̶u̶d miich ajku̶xy? 6Y jada'achám miich mnejwu̶u̶ygyu̶xypy tii je̱'e̱ du'un yajwa'kxu̶jpu̶pnu̶ju̶ñ je̱'e̱ ju̶bu̶kja'ay, ka'pu̶ chojk nayyajni'igu̶xu̶'u̶gu̶u̶ju̶ch ma je̱'e̱ xu̶u̶ tiempo ka'anu̶ myu̶baad'átyñu̶ju̶ñ. 7Je̱'e̱ ju̶bu̶kja'ay ni'ixu̶'u̶y je̱'e̱ ju̶bu̶kpu̶ cham mu̶dajtnu̶, je̱'e̱ mu̶dyiibu̶ tyune̱e̱mbyu̶ñ; je'eyu̶ tyu̶goy'ajtnu̶ mu̶naa je̱'e̱ tyu'u y'awa'adzu̶chu̶ñ, je̱'e̱ mu̶dyiibu̶ jada'achám yajwa'kxu̶jpu̶bu̶ñ. 8Mu̶'íttu̶tz je̱'e̱ ju̶bu̶kja'ay ñayyajni'igu̶xu̶'u̶gu̶u̶ju̶ch, je̱'e̱ mu̶dyiibu̶ je̱'e̱ Windzú̶n Jesús yaj'o'ogu̶byu̶ñ mu̶u̶d tu'u'ooktu̶ je'eyu̶ pu̶xúju̶ch y yajku'udu̶góyu̶ch mu̶u̶d je̱'e̱ y'ajaj y'adu̶kxu̶ñ ko naty ya naaxwiiñ wyimbity. 9Ko naty je̱'e̱ ju̶bu̶kja'ay myiñ, je̱'e̱ mu̶jku'u je̱'e̱ pube̱daanu̶p, y je̱' myu̶k'ajt je̱'e̱ mu̶k myu̶minaanu̶py, y tuna'añ ijxpe̱jt y mu̶jwinma'añ je̱'e̱ ka'pu̶ tyu̶y'ajtu̶ch. 10Y mayñax je̱'e̱ ju̶bu̶kpu̶ yajtuna'añ neby win'u̶u̶ngu̶xu̶chu̶ñ je̱'e̱ mu̶dyiibu̶ tu̶goydyuum yajpaatku̶xpu̶ñ, je̱' ko ka'p je̱'e̱ tu̶y'ajt tu̶ ku'ubu̶jkku̶xy y tzojkku̶xy neby je̱'e̱ aanu̶mu̶ ni'idzooku̶ñ mu̶baad paatku̶xyu̶ñ. 11Y paady je̱'e̱ Dios kyu̶'u̶ye̱jku̶gu̶xyu̶ ko wan yajwin'u̶u̶ngu̶xy mu̶u̶d je̱'e̱ mu̶dyiibu̶ tu̶ tuundu̶gooygyu̶xyu̶ñ y ko je̱'e̱ anu̶u̶ mu̶bu̶jkku̶xu̶ch, 12neby tu̶goydyuum nigu̶xyu̶ ñú̶kxku̶xu̶chu̶ñ je̱'e̱ mu̶dyiibu̶ je̱'e̱ tu̶y'ajt ka'p tu̶ mu̶bu̶jkku̶xyu̶ñ, y ni'igyu̶ je̱'e̱ jootkujk ñayjyu̶wu̶u̶yu̶gu̶xy ko je̱'e̱ ju̶bu̶kpu̶ tuungu̶xy.
Je̱'e̱ ja'ay win'ixypyu̶ ajku̶xy neby je̱'e̱ aanu̶mu̶ ni'idzooku̶ñ paatku̶xu̶chu̶ñ
13Peru̶ u̶u̶ch ajku̶xy, je'emy u̶u̶ch je̱'e̱ Dioskujuuyu̶p nye̱jkku̶xy mu̶u̶d miich kyu̶xpu̶ mu̶gu'uktu̶jk ajku̶xy, mu̶dyiibu̶ je̱'e̱ Windzú̶n Jesucristo oy xychojkku̶xp xyjyu̶wu̶u̶ygyu̶xpu̶ñ, je̱' ko je̱'e̱ Dios miich jayu̶jp xywyin'ijxku̶x wan je̱'e̱ aanu̶mu̶ ni'idzooku̶ñ mbaatku̶xu̶ch#2.13 Je̱' ko je̱'e̱ Dios miich jayu̶jp xywyin'ijxku̶x wan je̱'e̱ aanu̶mu̶ ni'idzooku̶ñ mbaatku̶xu̶ch: nije̱' jaaybyu̶du̶jk myu̶naangu̶xy: je̱' ko je̱'e̱ Dios miich xywyin'ijxku̶x maabu̶ je̱'e̱ naaxwiiñ yajkojyu̶ñ ko je̱'e̱ aanu̶mu̶ ni'idzooku̶ñ mbaatku̶xu̶ch. mu̶u̶d je̱'e̱ Espíritu Santo je̱'e̱ mu̶dyiibu̶ je̱'e̱ mjoot mwinma'añ xyajwaatzu̶u̶ygyu̶xpu̶ñ y mu̶u̶d je̱'e̱ tu̶y'ajt je̱'e̱ mu̶dyiibu̶ tu̶ mmu̶bu̶jkku̶xyu̶ñ. 14Mu̶u̶d adaa gyu̶xpu̶ je̱'e̱ Dios xywyin'ijxy ajku̶xy mu̶u̶d je̱'e̱ ayuuk tu̶y'ajt je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ, je̱'e̱ mu̶dyiibu̶ u̶u̶ch ngapxwa'kx ajku̶xyu̶ñ: neby jiiby mja'tku̶xu̶chu̶ñ ma je̱'e̱ nWindzú̶n Jesucristo ajtu̶m ajku̶xy y'oy'ajtu̶ñ.
15Y du'unu̶tz mu̶gu'uktu̶jk ajku̶xy, yajtu'uyo'oy'adu̶u̶tzku̶x je̱'e̱ mmu̶bu̶jku̶ñ ajku̶xy y ka'p m'u̶xtu̶gu̶'u̶wa'kku̶xy, y ka'p je̱'e̱ u̶xpu̶jku̶ñ mja'aydyu̶gooygyu̶xy je̱'e̱ mu̶dyiibu̶ wiinu̶ ju̶jpu̶ tu̶ nmooygyu̶xyu̶ñ y je̱'e̱ mu̶dyiibu̶ naky'aam tu̶ nmooygyu̶xyu̶ñ. 16Wan je̱'e̱ nWindzú̶n Jesucristo ajtu̶m ajku̶xy ku̶'u̶m y je̱'e̱ nDios Teedy ajtu̶m ajku̶xy je̱'e̱ mu̶dyiibu̶ tu̶ xychojku̶m xyjyu̶wu̶u̶yu̶m ajku̶xy mu̶u̶d je̱'e̱ y'oy'ajtu̶ñ y tu̶ xymyooyu̶m je̱'e̱ wiinu̶u̶xu̶u̶bu̶ jootkujk'ajtu̶ñ ajku̶xy je̱'e̱ oybyu̶ yajxónba ju̶jp'ijxu̶ñ ko je̱'e̱ oy'ajtu̶ñ jiiby tzajpjooty xymyo'owaanu̶m ajku̶xy. 17Je̱'e̱ m'aa mjoot xyjyootmu̶kmooyu̶ ajku̶xy y xypyube̱jtku̶xu̶ch neby je̱'e̱ mmu̶bu̶jku̶ñ myajtu'uyo'oygyu̶xu̶chu̶ñ y ka'p m'u̶xtu̶gu̶'u̶wa'kku̶xu̶ch, wan ku̶xyu̶ neby naty mmu̶naangu̶xyu̶ñ y neby naty mduungu̶xyu̶ñ du'un ku'umáyu̶ch ko du'un y'óyu̶ch.
Currently Selected:
2 Tesalonicenses 2: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005