2 Pedro 3

Ko je̱'e̱ Windzú̶n Jesús ya naaxwiiñ ja'adu'ook wyimbídu̶ch

1Adaa je̱' je̱'e̱ mu̶me̱tzkpu̶ naky mu̶dyiibu̶ nyajnijayu̶u̶ygyu̶xypyu̶ñ, miich mu̶gu'uktu̶jk mu̶dyiibu̶ u̶u̶ch oy ndzojkypy nju̶wu̶u̶ygyu̶xypyu̶ñ. Nandu'un yam nnijayu̶u̶ygyu̶xy neby jayu̶jp'ajt nwingapx nju̶jpkapxu̶u̶ygyu̶xyu̶ñ, neby je̱'e̱ mjoot mwinma'añ du'un tu̶y tu'uda'agy myiin mye̱jtzku̶xu̶chu̶ñ. 2Ja'aymye̱jtzku̶x je̱'e̱ ayuuk neby je̱'e̱ Dios y'ayuuknajtzkapxu̶u̶ybyu̶du̶jk jékyu̶p myu̶naangu̶xyu̶ñ, je̱'e̱ mu̶dyiibu̶ jyoot wyinma'añ wa'adzu̶ñ ajku̶xy; y je̱'e̱ Windzú̶n Jesucristo, je̱'e̱ Yajni'idzookpu̶ y'ane̱'e̱mu̶ñ, je̱'e̱ je̱'e̱ ane̱'e̱mu̶ñ mu̶dyiibu̶ je̱'e̱ apóstolestu̶jk miich xyajni'ixu̶u̶ygyu̶xu̶ñ.

3Jatytimy ja'aymye̱jtzku̶x adaa: ko je̱'e̱ xu̶u̶ tiempo naty myu̶baad'ajtnu̶, mu̶naa je̱'e̱ naaxwiimbu̶ kyu̶xaan tyu̶goyaanu̶ju̶ñ, miingu̶xu̶p je̱'e̱ ja'ay chu̶naay jyugy'ajtku̶xu̶ch mu̶u̶d je̱'e̱ kyu̶'u̶mju̶bu̶k'adzojku̶ñ ajku̶xy, y ñixi'ig yajxi'igaangu̶xy, 4myu̶naangu̶xu̶ch: “¿Neby je̱'e̱ ayuuk tu̶ jyaty mu̶dyiibu̶ je̱'e̱ Cristo xyajwinwanu̶u̶ygyu̶xu̶ñ ko najty ya naaxwiiñ ja'adu'ook wyimbida'añ? Tu̶ je̱'e̱ nmu̶j'áp nmu̶jteedy y'o'ktaayu̶nu̶ ajtu̶m ajku̶xy, y je'emy du'un ku̶xyu̶ y'ityñu̶ maabu̶ je̱'e̱ naaxwiiñ chonda'agyu̶ñ y ka'p tii tyuñ jyadyiiñyu̶ neby je̱'e̱ Cristo xyajwinwanu̶u̶ygyu̶xyu̶ñ.” 5Je̱'e̱ du'umbu̶ ja'ay ka'p je̱'e̱ mu̶bu̶jkku̶xy ko je̱'e̱ tzajp najty jii jeky'ajty jye'emyu̶ch, y ko mu̶u̶d je̱'e̱ Dios y'ane̱'e̱mu̶ñ, je̱'e̱ naax nu̶u̶jooty pyu̶dzu̶u̶my mu̶dyiibu̶ najty nu̶u̶jooty ijtpu̶ñ. 6Nan mu̶u̶d je̱'e̱ Dios y'ane̱'e̱mu̶ñ je̱'e̱ ayo'onduu jékyu̶p yajku'udu̶gooydya'ay je̱'e̱ naaxwiiñjya'ay mu̶u̶d je̱' nu̶u̶. 7Peru̶ je̱'e̱ tzajp y je̱'e̱ naaxwiimbu̶ je̱'e̱ mu̶dyiibu̶ jada'achám jii'ajtpu̶ñ, ju̶u̶n'aam je̱'e̱ nandu'un kyu̶xa'añ tyu̶goya'añ mu̶u̶d je̱'e̱ Dios y'ane̱'e̱mu̶ñ. Je̱'e̱ ju̶u̶n je̱'e̱ no'kta'awu̶u̶ju̶p ajku̶xy ko naty je̱'e̱ tu̶ydyuunu̶ñ paady, mu̶naa je̱'e̱ ju̶bu̶kja'aydyu̶jk kyu'udu̶gooygyu̶xu̶chu̶ñ.

8Jadu'knáx, mu̶gu'uktu̶jk mu̶dyiibu̶ u̶u̶ch oy ndzojkypy nju̶wu̶u̶ybyu̶ñ, ka'p mja'aydyu̶gooygyu̶xy ko ma je̱'e̱ Windzú̶n Diosu̶ñ du'un je̱'e̱ tu'kxu̶u̶bu̶ neby tu'kmíl jumu̶jtpu̶ju̶ñ, y je̱'e̱ tu'kmíl jumu̶jtpu̶ neby je̱'e̱ tu'kxu̶u̶bu̶ju̶ñ. 9Ka'p it je̱'e̱ Windzú̶n Jesús du'un ja'aje̱jkpu̶ch ma je̱'e̱ y'ayuuk kuydyuna'añ mu̶dyiibu̶ tu̶ awanu̶'u̶yu̶ñ, neby je̱'e̱ ja'ay nije̱' myu̶naangu̶xyu̶ñ, miich je̱'e̱ du'un xyjya'amu̶me̱kxtujkku̶xp, je̱' ko ka'p je̱'e̱ tzoky nu̶kxy pu̶n ayoduum ñu̶kxy, je̱' je̱'e̱ chojkypy neby je̱'e̱ ja'ay jyootwimbijtku̶xu̶chu̶ñ ma je̱'e̱ Diosu̶ñ.

10Peru̶ ko naty je̱'e̱ Windzú̶n Jesús ya naaxwiiñ jadu'ook myiñ tu̶ydyuumbu̶, du'un je̱'e̱ myínu̶ch neby je̱'e̱ me̱e̱tzpu̶#3.10 Nije̱' wiingpu̶ versión myu̶na'añ: du'un je̱'e̱ myínu̶ch neby je̱'e̱ me̱e̱tzpu̶ koodz myiñu̶ñ. ixy ka'a'íxy myiñu̶ñ. Mu̶'it je̱'e̱ tzajp du'uñyu̶ y'adu̶goyu̶'u̶wu̶ch mu̶u̶d je̱'e̱ oychu̶gu̶u̶yñu̶bu̶ ne̱'e̱mu̶ñ, tooydya'awu̶p je̱'e̱ xu̶u̶, je̱'e̱ po'o, je̱'e̱ mu̶dza'a y je̱'e̱ naax mu̶u̶d ku̶xyu̶ mu̶dyiibu̶ ya yajpaatpu̶ñ ni'itooydya'awu̶p je̱'e̱ ku̶xyu̶ mu̶u̶d je̱'e̱ Dios tyu̶ydyuunu̶ñ.

11Je̱' ko ku̶xyu̶ wyindu̶gooydya'awa'añ mu̶u̶d je̱'e̱ mu̶kpu̶ ayo'on, paadyu̶tz oy yajxón mdzu̶naaygyu̶xu̶ch mu̶u̶d je̱'e̱ wa'adz'ajtu̶ñ y mu̶duungu̶xu̶ch je̱'e̱ Dios tu'ug'aa tu'ugjoot. 12Ja'ay'e̱jxku̶x je̱'e̱ xu̶u̶ tzuu mu̶naa je̱'e̱ Dios ya naaxwiiñ wyimbida'añu̶ñ, nay'adzijpu̶gu̶x y joottu̶gooygyu̶x. Je̱'e̱ mu̶'it xu̶u̶ je̱'e̱ tzajp ju̶u̶n'aam tyu̶góyu̶ch, y je̱'e̱ xu̶u̶, je̱'e̱ po'o y je̱'e̱ mu̶dza'a aju̶yu̶ydya'awu̶p je̱'e̱ ku̶xyu̶ ju̶u̶njooty; 13peru̶ u̶u̶ch ajtu̶m ajku̶xy je̱' nja'ay'e̱jxu̶mby ajku̶xy je̱'e̱ jembyu̶ tzajp y je̱'e̱ jembyu̶ naax, je̱'e̱ mu̶dyiibu̶ je̱'e̱ Dios tu̶ xyajwinwanu̶u̶yu̶mu̶ñ ajku̶xy, ma je̱'e̱ tu'uda'agy'ajtu̶ñ y je̱'e̱ oybyu̶ ku̶xyu̶ yajpaadyu̶ñ.

14Paady, mu̶gu'uktu̶jk mu̶dyiibu̶ u̶u̶ch oy ndzojkypy nju̶wu̶u̶ygyu̶xypyu̶ñ, ma adaa du'un mja'ay'e̱jxku̶xy mu̶dyiibu̶ tunaan jadaanu̶bu̶ñ, nay'adzijpu̶gu̶x ma je̱'e̱ mdzu̶naay mjugy'ajtu̶ñ ajku̶xyu̶ñ wan je̱'e̱ Dios oy yajxón xypyaatku̶xu̶ch ka'p je̱'e̱ tzip ma'ad maa, ka'p je̱'e̱ ju̶bu̶kpu̶ y ka'p je̱'e̱ poky ku̶dyeey maa. 15Kweentu̶tuungu̶x ko je̱'e̱ me̱kxtujku̶ñ mu̶dyiibu̶ je̱'e̱ Windzú̶n Jesucristo myu̶dajtypy ma u̶u̶ch ajtu̶m ajku̶xy, je̱' je̱' neby je̱'e̱ n'aanu̶mu̶ ni'idzooku̶ñ du'un nbaattu̶mu̶chu̶ñ ajku̶xy. Nan tu̶ adaa du'un miich xyajnijayu̶u̶ygyu̶xy je̱'e̱ nmu̶gu'ug Pablo ajtu̶m ajku̶xy, je̱'e̱ mu̶dyiibu̶ oy ndzojkypy nju̶wu̶u̶yu̶mbyu̶ñ ajku̶xy, du'un neby je̱'e̱ Dios wij'ajt ke̱j'ajt tu̶ myo'oyiiju̶ñ. 16Ku̶xyu̶ majaty je̱'e̱ ñaky tu̶ je̱' du'un xyajmu̶dmu̶dyaakku̶xy, oy nije̱' jya'atzipwinju̶wu̶u̶ygyu̶ch mu̶dyiibu̶ je̱'e̱ tzuuja'ay wiing ñi'igue̱jku̶xypyu̶ñ y je̱'e̱ mu̶dyiibu̶ myu̶bu̶jku̶ñ yuu pu̶ma'ayu̶ñ ajku̶xy, du'un neby je̱'e̱ jakmaybyu̶ Dios ñaky wiingjáty ni'igue̱jku̶xyu̶ñ, ñay'ayo'ongu'udiju̶gu̶xy du'un ku̶'u̶m.

17Paady, mu̶gu'uktu̶jk mu̶dyiibu̶ u̶u̶ch oy ndzojkypy nju̶wu̶u̶ybyu̶ñ, je̱' ko tu̶ miich adayaaba tu̶y'ajt du'un pa'kyu̶ mnejwu̶u̶ygyu̶xy, naygyweentu̶'ajtu̶gu̶x ka'pu̶ je̱'e̱ ju̶bu̶kja'aydyu̶jk xywyin'u̶u̶ngu̶xu̶ch ni mga'ayajwin'u̶u̶ngu̶xu̶ch ma je̱'e̱ tu̶y tu'uda'agypyu̶ mmu̶bu̶jku̶ñ mmu̶dajtku̶xyu̶ñ. 18Peru̶ nejwu̶u̶ygyu̶x miich ni'igyu̶ je̱'e̱ nWindzú̶n y Nyajni'idzookpu̶ Jesucristo tyu̶y'ajt ajtu̶m ajku̶xy, y yajmu̶j yajmayu̶u̶ygyu̶x je̱'e̱ tzojk ju̶wu̶u̶yu̶ñ mu̶dyiibu̶ tu̶ xymyooygyu̶xyu̶ñ. ¡Wan ku'umáy ity jada'achám y wiinu̶u̶xu̶u̶ wiinu̶u̶tiempo! Jaanch adaa du'un.

Currently Selected:

2 Pedro 3: MIXE

Highlight

Copy

Compare