1 Juan 3

Dios xy'ung'ajtp ajtu̶m ajku̶xy

1Ok'ijxku̶x, mu̶j je̱'e̱ Dios Teedy xychojku̶m xyjyu̶wu̶u̶yu̶m ajku̶xy neby mu̶baad Dios ung nnaydyiju̶mu̶ñ ajku̶xy, y je̱' ajtu̶m ajku̶xy. Paady je̱'e̱ naaxwiiñjya'ay xykya'a'u̶jxkajpu̶m pu̶n ajtu̶m ajku̶xy, je̱' ko ka'p je̱'e̱ nejwu̶u̶ygyu̶xy pu̶n Diosu̶ñ. 2“Mu̶gu'uktu̶jk, mu̶dyiibu̶ u̶u̶ch oy ndzojkypy nju̶wu̶u̶ybyu̶ñ, Dios ung ajtu̶m ajku̶xy. Y oy nga'anejwu̶u̶yu̶m ajku̶xy neby jiinu̶ njajtu̶mu̶chu̶ñ ajku̶xy, peru̶ nnejwu̶u̶yu̶mby ajku̶xy ko je̱'e̱ Jesucristo naty ya naaxwiiñ ja'adu'ook wyimbity du'un nja'ay'ajtu̶mu̶ch ajku̶xy neby je̱'e̱ju̶ñ, je̱' ko n'ijxu̶mu̶py je̱' ajku̶xy neby je̱'e̱ju̶ñ. 3Y ku̶xyu̶ pu̶n je̱'e̱ Jesucristo ju̶jp'ijxpu̶ñ, nayyajpokyñi'iwaatzu̶py je̱' ma je̱'e̱ jyoot wyinma'añdyu̶ñ, du'un neby je̱'e̱ Jesucristo jyoot wyinma'añ wa'adz mu̶u̶du̶chu̶ñ.

4Peru̶ ku̶xyu̶ pu̶n pokytyuumb, je̱'e̱ Dios naty kyu'utujku̶ñ je̱'e̱ myu̶duundu̶gooyu̶py, je̱' ko je̱'e̱ poky je̱'e̱ Dios kyu'utujku̶ñ mu̶u̶d yajmu̶duundu̶góy. 5Miich mnejwu̶u̶ygyu̶xypy ko je̱'e̱ Jesucristo ya naaxwiiñ y'ooy neby xyajpokyñi'iwaatzu̶mu̶chu̶ñ ajku̶xy, y nan mnejwu̶u̶ygyu̶xypy ko wya'adzu̶ch, ka'p je̱'e̱ ni tii poky mu̶u̶du̶ch. 6Y du'unu̶tz, ku̶xyu̶ pu̶n tu'ugyu̶ ijtp mu̶u̶d je̱'e̱ Jesucristo, ka'p je̱'e̱ pyokytyúñ; peru̶ ku̶xyu̶ pu̶n pokytyuumb, ka'p je̱'e̱ Jesucristo ijxku̶xyñu̶ y nan ka'p nejwu̶u̶ygyu̶xyñu̶ pu̶n je̱'e̱ju̶ñ. 7“Mu̶gu'uktu̶jk, mu̶dyiibu̶ u̶u̶ch du'un nju̶wu̶u̶by neby je̱'e̱ ung ana'ku̶ñ, ka'p myajwin'u̶u̶ngu̶xy. Pu̶n je̱'e̱ tu'uda'agy'ajtu̶ñ tuumb tu'uda'agy je̱', du'un neby je̱'e̱ Jesucristo tyu'uda'agyu̶chu̶ñ. 8Peru̶ pu̶n pokytyuumb je̱'e̱ mu̶jku'u jye̱' je̱'e̱ pyaduunu̶py, je̱' ko je̱' je̱'e̱ poky ku̶dyeey yajtzondaak mu̶naa je̱'e̱ naaxwiiñ aga'an chonda'agyu̶ñ. Y paady je̱'e̱ Dios y'Ung ya naaxwiiñ myiiñ neby je̱'e̱ poky yajku'udu̶góyu̶chu̶ñ mu̶dyiibu̶ je̱'e̱ mu̶jku'u yajtzondaaku̶ñ.

9Pu̶n je̱'e̱ Dios ung'ajtu̶bu̶ñ ka'p je̱'e̱ y'okpokytyuunu̶, je̱' ko jembyu̶ jugy'ajt je̱'e̱ myu̶u̶d, mu̶dyiibu̶ je̱'e̱ Dios tu̶ myo'oyiiju̶ñ. Y ka'p mu̶baad y'okpokytyuunu̶ je̱' ko Dios ung je̱'e̱ju̶ñ. 10Paady yajnejwu̶u̶by pu̶n Dios ungu̶ñ y pu̶n mu̶jku'u ungu̶ñ, wanpú̶nu̶ch pu̶n je̱'e̱ oybyu̶ ka'p tuñ o pu̶nu̶ ka'p je̱'e̱ myu̶gu'ug tzoky ju̶wu̶'u̶y, ka'p je̱'e̱ Dios y'ung'adyii.

Tzu̶k amíñ u̶xyu̶py naychojk nayjyu̶wu̶u̶yu̶ ajku̶xy

11Adaa je̱'e̱ ayuuk tu̶y'ajt mu̶dyiibu̶ mmu̶doogu̶xu̶ñ ko aga'an mmu̶bu̶jktzóngu̶xy, ko amíñ u̶xyu̶py naychojk nayjyu̶wu̶u̶yu̶mu̶ch ajku̶xy. 12Ka'p du'un n'adu̶u̶tzu̶mu̶ch ajku̶xy neby je̱'e̱ Caín y'adu̶u̶chu̶ñ, je̱'e̱ ju̶bu̶kpu̶ ka'a'óybyu̶ najty jye̱' je̱' pyaduunu̶py y chi je̱'e̱ y'uch yaj'o'ky. ¿Y tii ko yaj'o'ky? Je̱' ko je̱'e̱ ju̶bu̶kwinma'añ najty mu̶u̶du̶ch, y je̱'e̱ y'uch oy tu'uda'agy najty jyoot wyinma'añ je̱'.

13“Mu̶gu'uktu̶jk, ka'p myajju̶wu̶u̶ygyu̶xy pu̶nu̶ ka'p je̱'e̱ naaxwiiñjya'ay xy'ixaangu̶xy, je̱'e̱ mu̶dyiibu̶ je̱'e̱ Dios y'ayuuk ka'p mu̶bu̶jkku̶xyu̶ñ. 14U̶u̶ch ka'p jada'achám ndzu̶naayu̶m ajku̶xy ma je̱'e̱ ayodaakt nbaattu̶mu̶chu̶ñ ajku̶xy, jii jada'achám ndzu̶naayu̶m ajku̶xy ma je̱'e̱ jugy'ajt wiinu̶u̶xu̶u̶bu̶ nbaattu̶mu̶chu̶ñ ajku̶xy, y nnejwu̶u̶by du'un ajtu̶m ajku̶xy je̱' ko je̱'e̱ nmu̶gu'ugtu̶jk ndzojk nju̶wu̶u̶yu̶m ajku̶xy. Pu̶n je̱'e̱ myu̶gu'ug ka'p tzoky ju̶wu̶'u̶y, je̱'e̱ ju̶bu̶kpu̶ ka'a'óybyu̶ je̱'e̱ mu̶dajtu̶p ajku̶xy. 15Ku̶xyu̶ pu̶n je̱'e̱ myu̶gu'ug ka'p ixa'añ du'un je̱' neby je̱'e̱ ja'ayyaj'o'kpu̶ju̶ñ, y miich mnejwu̶u̶ygyu̶xypy ko ni tu'ug je̱'e̱ ja'ayyaj'o'kpu̶ jugy'ajtu̶ñ wiinu̶u̶xu̶u̶bu̶ ka'apaatku̶xu̶ch. 16Nnejwu̶u̶yu̶mby neby je̱'e̱ Jesucristo xychojk xyjyu̶wu̶u̶yu̶mu̶ñ, paady xykyu'u'o'ogu̶u̶yu̶m ajku̶xy. Y nandu'un je̱'e̱ nmu̶gu'ug u̶u̶ch mu̶baad ndzojk nju̶wu̶u̶yu̶m ajku̶xy y ngu'u'o'ogu̶u̶yu̶mu̶ch ajku̶xy. 17Pu̶nu̶ jii pu̶n kyumeeñu̶ch y ixy ko je̱'e̱ myu̶gu'ug y'ayoy yajmayjyáty ku̶xyu̶ tii, y ka'p pubety, ka'p je̱'e̱ du'umbu̶ ja'ay Dios tzoky ju̶wu̶'u̶y. 18“Mu̶gu'uktu̶jk, mu̶dyiibu̶ u̶u̶ch du'un nju̶wu̶u̶by neby je̱'e̱ ung ana'ku̶ñ, ka'p nigoo nmu̶naanu̶mu̶ch ajku̶xy ko je̱'e̱ nmu̶gu'ug ndzojk nju̶wu̶u̶yu̶m ajku̶xy, tzu̶k du'un tuunu̶m ajku̶xy, wan du'un ñi'igu̶xu̶'u̶gu̶ch ko jaanch ndzojk nju̶wu̶u̶yu̶m ajku̶xy.

Jootkujk'ajtu̶ñ ma je̱'e̱ Diosu̶ñ

19Y du'un nnejwu̶u̶yu̶m ajku̶xy ko je̱'e̱ tu̶y'ajt nguydyuunu̶m ajku̶xy, y nnayjyu̶wu̶u̶yu̶nu̶ch jootkujk ajtu̶m ajku̶xy Dios winduuy; 20pu̶nu̶ je̱'e̱ njoot winma'añ oy xykya'ayajnayjyu̶wu̶u̶yu̶mb ajku̶xy ko je̱'e̱ oybyu̶ nga'atuunu̶m ajku̶xy ko je̱'e̱ tzaachpyu̶ xywyinmajtzu̶m ajku̶xy, mu̶j je̱'e̱ Dios ni'igyu̶ mu̶dyiibu̶ ku̶xyu̶ nejwu̶ydyaaybyu̶ñ, ni'igu̶ ka'p je̱'e̱ njoot nwinma'añ du'un myu̶daaknu̶ba ajtu̶m ajku̶xy. 21“Mu̶gu'uktu̶jk, mu̶dyiibu̶ u̶u̶ch oy ndzojkypy nju̶wu̶u̶ybyu̶ñ, pu̶nu̶ ka'p je̱'e̱ njoot nwinma'añ ju̶bu̶k xyajnayjyu̶wu̶u̶yu̶mu̶ ajku̶xy ko je̱'e̱ oybyu̶ nduunu̶m ajku̶xy, mu̶baad jootkujk Dios winduuy nnayjyu̶wu̶u̶yu̶mu̶ ajku̶xy; 22y xymyooyu̶mu̶p je̱'e̱ Dios ku̶xyu̶ tii naty nyujkwaanu̶yu̶py ajtu̶m ajku̶xy, je̱' ko nguydyuunu̶yu̶py je̱'e̱ y'ane̱'e̱mu̶ñ ajtu̶m ajku̶xy y nduunu̶mby ajku̶xy mu̶dyiibu̶ Dios kyu'umaaybyu̶ñ. 23Y du'un je̱'e̱ y'ane̱'e̱mu̶ñ myu̶na'añ ko je̱' Dios y'Ung Jesucristo nmu̶bu̶jku̶yu̶ch ajtu̶m ajku̶xy, y ko amíñ u̶xyu̶py nnaychojk nnayjyu̶wu̶u̶yu̶mu̶ch ajku̶xy du'un neby je̱' tu̶ xy'ane̱'e̱mu̶mu̶ñ ajku̶xy. 24Pu̶n je̱'e̱ Dios y'ane̱'e̱mu̶ñ kuydyuungu̶xpu̶ñ Dios je̱'e̱ mu̶u̶d y'ijtku̶xy, y je̱'e̱ Dios ijtp mu̶u̶d je̱' ajku̶xy. Y adaa du'un xyajnejwu̶u̶yu̶mb ajku̶xy ko je̱'e̱ Dios yajpaady ma u̶u̶ch ajtu̶m ajku̶xyu̶ñ mu̶u̶d je̱'e̱ y'Espíritu Santo mu̶dyiibu̶ tu̶ xyaj'adu̶gu̶u̶y xyajjoottu̶gu̶u̶yu̶mu̶ñ ajku̶xy.

Currently Selected:

1 Juan 3: MIXE

Highlight

Copy

Compare