রোমীয় 16
16
পৌল মাঙ্গালাবা পিইচা
1ঙা আগু ঙুরোমা ঞিংমা ফৈবী আক্রংলিলাগো য়ুউরো কুঃবাংরোবামা আফিই থাঃফু। য়াংসুউচা ফ্রইতি কিংক্রিয়া ম্রুঃ ক্যংমা তাগামা। 2থাওরা ফোরা ঈ লুঃউগো যাপুয়েং কুঃচা ম্হেরো য়ুউফু সাংরি, য়াংপুয়েং নাংরো য়াংসুউগো ফোরা নাঃমি প্রুকরো কুঃ লুঃউ ম্হেকেলি। তুখুমাসাগো য়ুউরো য়াংসুউ নাংরোবামা আকুউঞিং তংগি, য়াংসুউগো আকুউঞিং পিইগেলি। আক্রংগা য়াংসুউ লুঃউম্যারোগু, প্রফুছুগি, ঙাগোলি আকুউঞিং পিইরো হিকরি।
3প্রিষ্কিল্লা অর আকিলাগো ঙাঃ মাঙ্গালাবা পিইলি। য়াংসুউরো খ্রীট্ যীশু অলুকমা, ঙাগো আকুউঞিং পিইগেলিরি। 4ঙাঃ আসাককো কিঃছিঃফু লাঃরো, য়াংসুউরো কুঃ সিইফুচাগো মেচেংজাগেলি। ঙা তয়করা মুহু, হিকচা আলুং যিহূদীমুহু ক্যংসারোলি য়াংসুউবামা কিজু হিকরি। 5য়াংসুউরো ইংমা যাসুরো ক্যং লুঃউছুরো চুককেতি, য়াংসুউরোগোলি ঙাঃ মাঙ্গালাবা পিইলি।
তুদিয়া কাবাগ্রিঃমা যাসু পাথামা খ্রীট্গো লাক খেংলিরি, ঙামা য়াং মিকছুয়ি ইপেনিতগোলি মাঙ্গালাবা পিইলি। 6মরিয়ম, যাসু নাংরো আতুওয়ক কংগং পাংবেংলিরি, য়াংসুউগোলি মাঙ্গালাবা পিইলি। আন্দ্রনীক্ অর যূনিয়গোলি মাঙ্গালাবা পিইলি। 7য়াংসুউরো ঙাঃ পুয়েং যিহূদী অর ঙানা আতু থংমা হিকগেলিরি। তেমেংদরো আতুওয়ংমা য়াংসুউরো কংগং ম্যাকন্হাহিক লুঃউ। য়াংসুউরো ঙাঃ হ্রিইগাকাবাং খ্রীট্গো ক্যুংগেলিরি।
8আস্যাং ফোরাগু ক্যুংসুউ ঙাঃ মিকছুয়ি আমপ্লিয়াগোলি মাঙ্গালাবা পিইলি। 9উর্বাণ, যাসু ঙানা আতু খ্রীট্ অলুককো লুকলিইরি, য়াংসুউগো অর ঙাঃ মিকছুয়ি স্তাখিসগো মাঙ্গালাবা পিইলি। আপিল্লিসগোলি মাঙ্গালা পিইলি। 10খ্রীট লুঃউ ছুরো য়াংসুউগো আক্যুং রাঃব্যা। আরিষ্টবু ইংসারোগোলি মাঙ্গালাবা পিইলি। 11হেরোদিয়ান, যাসু ঙাঃঞ্যং যিহুদী য়াংসুউগোলি মাঙ্গালাবা পিইলি। নারকিস ইংমা যাসুরো ফোরাগো ক্যুংগেতি, য়াংসুউরোগোলি মাঙ্গালাবা পিইলি।
12ত্রুফেনা অর ত্রুফোষাগোলি মাঙ্গালাবা পিইলি। য়াং মিঃমারোচা ফোরা আতুওয়ক পাংবেংগেতি। মিত্তা হিক্জ পর্ষীকগো মাঙ্গালাবা পিইলি। য়াং মিঃমাচা ফোরা আতুওয়ক আম্যাগ্রি অলুক লুকলিইরি। 13খ্রীটগো আম্যা আক্যুং হিকরিলো, যাসু ম্যাকন্হা রাঃরি য়াং রূফ অর য়াংসুউ মিঃখাংগো মাঙ্গালাবা পিইলি। য়াংসুউ মিঃখাংচা, ঙামা মিঃখাং ঞ্যংব্যা। 14অসুংক্রিত, ফ্লিগোন, হেরমেস, পাত্রোবাস, হের্মাস্ অর য়াংসুউরোনা হিকচা খ্রীটগো ক্যুংসা ঞিংরোগোলি মাঙ্গালাবা পিইলি। 15ফিললগ অরযুলিয়া, নিরীয় অর য়াংসুউমা ঞিংমা, ওলুমপ অর য়াংসুউরোনা হিকচা যাসুরো খ্রীট্গো ক্যুংগেতি, য়াংসুউরো আলুংসোগু মাঙ্গালাবা পিইলি। 16চিইমা আখ্য ওয়াসানা য়ুউরো নাংরো তয়ককো তয়ক মাঙ্গালাবা পিইগেলি। খ্রীট্গো ক্যুংসা আলুং ক্যংসারো নাংরোগু মাঙ্গালাবা পিইগেতি।
আছুং অওয়াদা
17ঞিং আকুরো, নাংরো যা অওয়াদা রাঃরি, য়াংচাগো য়ুউরো যাসুরো ছেংগ্যাংফাক লুকরো, তয়ককো তয়ক রেং তঃরো অলুককো অং মাম্রাংজি। য়াংসুউরোগু ম্যাকচি খ্যা থাঃফু কিজু নাংরোগু আরুয়িই ম্হেরো আফিই থাঃরি। নাংরো য়াংসুউরোগা আওয়িই নিংগে, 18আক্রংগা য়াং লুঃউরোচা ঙুরোমা আস্যাং খ্রীট্গো মোরুসিইব্রি, কুঃ ওয়েংগো ফ্রিগেতি। আখ্যুও চাঃগানা মুসাওয়া চাঃগা প্ররো, আকং লুঃউগো লিংগেতি। 19নাংরো রুসিইখ্রাংগো আলুংসুউ ক্রাগেব্যা, য়াংচা কিজু ঙা নাংরো আপমা চিই প্যরি। ঙা লুঃচাগা, নাংরো ক্রিরোরা আকংগো লাক খেংগে অর মকংগা আওয়িই নিংগে। 20ঈখিয়েং পিইসু থাওরা ফোরা কংগং আয়াং রেংসুউগো নাংরো ফুওয়া অক্কা খ্যারো ন্হাংবলৈফু।
ঙারোমা আস্যাং যীশু আখ্য ওয়াসানাচা নাংরো আপমা হিকবেচি।
21ঙারোনা যাসু অলুক লুকতিলি য়াং তিমথিয় নাংরাগু মাঙ্গালাবা পিইরি; লুকিয়, যাসোন অর সোষিপাত্রলি নাংরোগু মাঙ্গালাবা পিইরি। য়াংসুউরোলি ঙাঞ্যং যিহূদী লুঃউ।
22ঙা, তর্তিয় অর পৌল দিঃ চাঃ রুওয়ককো রুইগেতি। ঙালি তয়ক ফোরা লুঃউ, য়জংকিজু ঙালি নাংরোগু মাঙ্গালাবা পিইরি।
23-24ঙা যাসু ইংমা নিংরিলি অর ক্যং লুঃউরো যাসুউ ইংমা আলুংসো চুককেতি, য়াং গাইয়লি নাংরোগু মাঙ্গালাবা পিইরি। দিঃ ম্রুমা টেংগা-পয়স্যা যাসু রুইরো থাঃফু তাওয়েং হিকরি, য়াং ইরাস্ত অর ঙুরোমা ঞিং কার্তলি নাংরোগু মাঙ্গালাবা পিইরি।
25যীশু খ্রীটগো য়ুউরো ঙা যা আকং সাদাং তাঃরা হঃরি, য়াং আকং সাদাংগা নিংরো নাংরোগু আম্রি থাঃফু ক্ষেমতাচা থাওরা ফোরামা হিকরি। আয়াং আয়াং কাবাং থাওরা ফোরাচা কুঃ চিই আথিমা ছেংদাগো তয়ককোলি মপ্রলি, 26ছুগি আগু আকং সাদাং তাঃরানা য়াংচারো ক্যঞারি অর য়াংচাঞ্যং ঙা তাঃরা হঃ প্রারি। আছুং মিহিক থাওরা ফোরা আঃনা আলৈই রিসিই রুইচা চাউগা নিংরো হিকচা আলুং লুঃউম্যুবামা ক্যঞালিরি। যাফুলিছুগি য়াংসুউরো খ্রীটগো ক্যুংরো থাওরা ফোরাগু রুসিইঞ্যং। 27য়াংসুউচা তয়কতৈং থাওরা ফোরা, য়াংসুউ পৈঞাস্যাং। যীশু খ্রীট্গা নিংরো তাসাকপেলুং য়াংসুউ ভুংগ্রিচা খিম্যুয়েংবেচি। আমেন।
Currently Selected:
রোমীয় 16: BBSRMZ
Highlight
Share
Compare
Copy
Want to have your highlights saved across all your devices? Sign up or sign in
