রোমীয় 15
15
লুঃউগু আখেংসা পিই
1ঙারোমা যাসুরো অাম্যা আক্যুং হিকরি, য়াংসুউরোচা কুঃরোগু য়ুউরো আপ্য য়ুউফুগো মিক্রিব্রি, যাসুরো আনৈং ক্যুংরি য়াংসুউরো মক্যুংচাগো সিঃখেংরাফু। 2ক্যুংরি ঞিংগো তুঃথুওয়ং তাংফু কিজু, ঙারো আলুংসো য়াংসুউ মাঙ্গালা কিজু য়াংসুউ ছেংদাগো আপ্য পিইরাফু। 3খ্রীটলি কুঃ ছেংদাগো আপ্য মিপিইলি। সেংস্যাংস কেইং চাউমা রুইরো হিকরি, “যাসুরো নাককো ঞ্যচি লুকতি, য়াংসুউরো ঞ্যচি লুকচা আলুংচা ঙামা লাঃরো ক্যারি।” 4সেংস্যাং কেইং চাউমা যা রুইলো হিকরি, য়াংচাচা ঙারোগু সুয়েংসাং পিইফু কিজু রুইলিইরি, যাফুলিছুগি য়াং চাউগা ঙারো সিঃখেং পারমি অর চিই আঃ রাঅং অর য়াংচা কিজু আমাখেং রাঃরি।
5খ্রীট যীশুনা লাঃফু লেংমা সিঃখেংনা চিই আঃ পিইসু থাওরা ফোরাচা নাংরো আলুংসো চিইদানাগু তিজিতৈং প্যাংগে। 6য়াহ্লক প্রিঃমা চিইনা খুঃনাং তুখুদৈং ফ্রইরো, ঙারো আস্যাং যীশু খ্রীট ফোরা অর ফাখাংগো খিঃম্যুয়েংফু রাঃমি।
আলুংসো কিজু আকং সাদাং
7থাওরা ফোরা ঈ ভুংগ্রিচা ক্যঞাঞ্যং, য়াংচা কিজু খ্রীট্ যাপুয়েং নাংরোগু কুঃচাঞ্যং প্যাংরো লাকখেংলিরি, য়াংচা পুয়েং নাংরোলি তয়ককো তয়ক কুঃচাঞ্যং ম্হেকে। 8-9ম্হেরো থাঃ, থাওরা ফোরা ঈ চাঃগা ম্হেংরিচাগু তাং প্রাফু কিজু খ্রীট্চা যিহূদীরোমা কিঃসা-লংসা ফ্রইলিরি। আদিপিচা হিকলিরি, হ্রিইগা আচৈংরোবামা থাওরা ফোরাচা যা গিধি প্যাংলিরি, য়াংচা প্রিজুংঅং। অর থাওরা ফোরা ঈ মিত্তা কিজু যিহূদীমুহুক লুঃউরোরা ফোরাগু খিংম্যুয়েংবেচি। দিঃ আক্রংগো সেংস্যাংস কেইং চাউমা রুইরো হিকরি,
দিঃচা কিজু আখ্রা লুঃউম্যুমা ঙা নাক ভুংগ্রিগু ক্যঞাফু
অর নাং কংচাগু প্রঃপ্রাফু।
10অরলি প্রচাগা,
হিকচা আলুং লুঃউম্যুও জেঃরো,
নাংরো থাওরা ফোরা ঈ লুঃউরোনা য়াংসুউ রুসিইগে।
11অরলি হিকরি,
হিকচা আলুং লুঃউম্যুরো, ফোরা ঈ ভুংগ্রিগু ক্যঞাগে;
হিকচা আলুংসুউ য়াংসুউগো রুসিইগে।
12অর যিশাইয়মা রুইলো হিকরি,
যাসু যিশয়েরোমা আগ্রিঃছুং য়াংসুউ লাঃফু,
আলুং জেঃম্যুওগো ওকখ্যুউকফু কিজু য়াংসুউ অলুক লুকফু।
য়াংসুউ আপমা আলুং জেঃম্যুওচা ওয়েংমা থাঃরি।
13যাসু ওয়েংসা পিইরি, য়াং থাওরা ফোরাচা নাংরো অাক্যুংগা নিংরো আপ্যগ্রিইনা ঈখিয়েংখ্রাংগো নাংরোমা আব্রিচুং ফ্রইলিফি। য়জংছুগি সেংস্যাংস ওয়িঞেং গুণধনা, নাংরো চিইনুন্হুংচা প্রিজুংলিইমি।
পৌলমা ছেংদা
14ঙা ঞিং আকুরো, ঙা নাংরোগু য়ুউরো ক্যুংচাগা, নাংরো চিইনুন্হুংচা আকং ছেংদানা অাব্রিচুং হিকরি। নাংরোমা আলুং পৈঞাচা হিকরি, অর নাংরোচা তয়ককো তয়ক অওয়াদা পিইনৈংরি। 15-16য়িগিলি লৈংখু আক্রংগু নাংরো চিইমা তুওয়ক রাঃজিফু কিজু, ঙা চিই মিম্রিঃ প্যাংরো দিঃ চাঃগারুগু রুইলিইরি। আক্রংগা থাওরা ফোরাচা ঙাগো যিহুদীমুহু লুঃউরোবামা খ্রীট্ যীশুগো প্রুজুস্যাং ফ্রইফু কিজু ছুউক পিইলিরি। সেস্যাংস ওয়িঞেংনা যা যিহুদীমুহুক লুঃউরোগু আখ্রা প্যাং থাঃলিরি, য়াংসুউরোচা থাওরা ফোরামা লাকখেংফুই লুঃউ ফ্রইঅং, য়াংচা কিজু থাওরা ফোরা পিইচা আকং সাদাংগো তাঃরা হঃরো ঙা ফুংগ্রি অলুক লুকতি।
17ঙা থাওরা ফোরা কিজু যা অলুক লুকতিলি, য়াংচা কিজু ঙা খ্রীট যীশু ঈ ভুংগ্রিঃগো য়ুউরো খিম্যুয়েংফু তাওয়েং হিকরি। 18-19খ্রীট্চা ঙাগা নিংরো যা অলুক লুকলিইরি, য়াংচাগো মুহুকপ্রি ঙা কুঃদৈং তুখুওয়েংলি প্রফু রিই ঙামা মিহিক। খ্রীট্চা ঙা চাঃগানা অলুক্কা নিংরো, এংঅফুয়িই অলুকনা যে যে লাকখানা প্রারো অর সেংস্যাংস ওয়িঞেং গুণধনা যিহুদীমুহুক লুঃউরোগু থাওরা ফোরাগো রুসিইসা প্যাংলিরি। য়াংচাগা নিংরো ঙা যিরুশালেংগা চাঃরো ইল্লুরিকা রকঅং আলুং আঃরামা খ্রীট ঈ আকং সাদাংগো য়ুউরো আব্রিচুং প্যাংরো তাঃরা হঃ প্রালিইরি। 20যাদেমা খ্রীট্ নাঃমিগো তাখালি আঃমিমুথুউ, য়াংদেমা আকং সাদাংগো য়ুউরো তাঃরা হঃফুচা ঙাঃ লঃগামা আতুওয়ক। যাফুরিছুগি আখ্রা লুঃউ লুকচা তৈং আথাকমা ঙা লুকরো মাতাক রাঃঅং। 21সেংস্যাংস কেইং চাউমা রুইরো হিকরি, “যাসুরোবামা য়াংসুউ আক্রংলিলাগো য়ুউরো প্রঃ মাপ্রাসিইলি, য়াংসুউরো য়াংচা ম্রাংরামি। অর যাসুরো তাখালি মাক্রাসিই, য়াংসুউরো নাঃলিমি।”
পৌলচা রুমদুঃ লাঃখ্যাংরি
22য়াংচা কিজু ঙা নাংরোদুঃ অাপ্রেং আপ্রেং লাঃফু ক্রেংরোলি মাঃলানৈংলি। 23ছুগি আগু য়াং আঃরারোমা ঙা অলুক লুকফুঞ্যং আঃরা মিহিকব্যা, 24য়জংকিজু আগু সেপন প্রিদুঃ লাঃরিখা, ঙা নাংরোদুঃ লাঃফু ক্রিরি। ঙা চেংজাচাগা, সেপন প্রিদুঃ লাঃখা নাংরোবাদুঃ লাঃনৈংমি অর নাংরোনা অাতু তছং আপ্যনা নিংব্রিরি নক, নাংরোরা ঙাগো সেপনদুঃ লাঃফু কিজু য়াংরো পিইগেমি। 25ছুগি আগো ঙা থাওরা ফোরা ঈ লুঃউরোগু আকুঅাঞিং পিইফু কিজু যিরুশালেংদুঃ লাঃরি। 26আক্রংগা যিরুশালেংমা যাসুরো থাওরা ফোরা ঈ লুঃউ ফ্রইরোলি ছাংরি ক্যা হিকরি, য়াংসুউরো আতুওয়ক ম্যাসিডোনিয়া অর আখায়া ক্যং লুঃউরো লৈংখে টেংগা মিত্তা রেঃকেরি। 27য়াং মিত্তা টেংগাচা য়াংসুউরো চিই আপ্যনা কক্কেরি। দিঃচা মুহুকপ্রি য়াং ক্যং লুঃউরো যিরুশালেংমা থাওরা ফোরা ঈ লুঃউরোবামা কিজু হিকরি, অাক্রংগা যাখা যিহুদীরোচা য়াংসুউরোমা ওয়িঞেং ছুউককো যিহুদীমুহুক লুঃউরোগু আঃফু পিইরি, য়জংছুখা যিহুদীমুহুক লুঃউরোমালি তাওয়েং সাংরিচা ফ্রইতি যিহুদীরোগু কিজুপ্রুকরাফু। 28ঙামা দিঃ অলুকচা তুংগি, ঙা ক্রারাফুচাগা, য়াং মিত্তা টেংগাচা আহ্লাপা রকরি, য়াংখা ঙা নাংরানা সেপন প্রিদুঃ লাঃফু। 29ঙা সিইচাগা, যাখা ঙা নাংরোদুঃ লাঃফু, য়াংখা খ্রীট ঈ আব্রিচুং ছুউককো য়ুউরোরা লাঃফু।
30ঞিং আকুরো, ঙারোমা আস্যাং যীশু খ্রীট্গা নিংরো অর সেংস্যাংস ওয়িঞেং পিইচা আখ্যকা নিংরো, ঙা নাংরোগু আরুয়িম্হেরো আতংবেং থাঃচাগা, নাংরো থাওরা ফোরাবামা ঙানা আতু ঙা কিজু ছুউক তংরো নিংগে। 31নাংরো ছুউক তংগে, যিহূদীয়ামা যাসুরো থাওরা ফোরাগো লাক মেখেং গেলি, য়াংসুউরো আলাক্কা ঙা রুওয়েঅং, অর যিরুশালেংমা থাওরা ফোরা ঈ লুঃউরোচা ঙামা দিঃ মিত্তা রেঃচা টেংগাগো লাখ খেংঞ্যং। 32য়াংখা থাওরা ফোরা ঈ ছেংদা আলৈই ঙা চিই আপ্যনা নাংরোবাদুঃ লাঃনৈংঅং অর নাংরোনা আতু নিংরো চিইকো ঈঃম্রা প্যাংফু। 33ঈখিয়েং পিইসু থাওরা ফোরা নাংরো আলুংসোবামা হিকলিফি। আমেন।
Currently Selected:
রোমীয় 15: BBSRMZ
Highlight
Share
Compare
Copy
Want to have your highlights saved across all your devices? Sign up or sign in
