প্রেরিত 13
13
বার্ণবানা শৌল তাঃরা হঃফু কিজু লাঃখ্রাং
1আন্তিয়খিয়া ক্যং লুঃউমা লৈগয়ক রিসি অর কেইং ছারা হিকলিরি। য়াংসুউরো নাঃমিচা বার্ণবা, নীগ নাঃমিনা লুঃউরো সিঃগেচা শিমোন, কুরীণী ম্রুগা লুকীয়, ওকখ্যুকসু হেরোদনা আতু ম্যুয়িংজেচা মনহেননা শৌল। 2য়াংসুউরো যাখা তেথেঃচা নিংরো আস্যাংগো বাওয়ানা রুক্কেতিলি, য়াংখা সেংস্যাংস ওয়িঞেংচা য়াংসুউরোগু প্রলিরি, “বার্ণবানা শৌলগো ঙা যা অলুক কিজু খঃলৈতি, ঙামা য়াং অলুক কিজু য়াংসুউরোগু আগু আখ্রা প্যাংগে।” 3য়াংখা য়াংসুউরো তেথেঃচা নিংরো ছুউক তংগেরো য়াংসুউরো নৈয়ক আঃপমা আঃলাক তাংগেলিরি অর য়াংসুউরোগু রুওয়েলৈলিরি।
সাঈপ্রাস রিই তংমা
4সেংস্যাংস ওয়িঞেংচা বার্ণবানা শৌলগো রুওয়েলৈতি নক য়াংসুউরো নৈয়ক সিলূকিয়াদুঃ লাঃগেলিরি। নক্কা য়াংচাগা য়াংসুউরো সাংফমা তাকরো সাঈপ্রাস রিই তংদুঃ লাঃগেলিরি। 5সালামীমা রকরো য়াংসুউরো যিহুদী রিঃফুং জাংরোমা লাঃরো থাওরা ফুরা ঈঃ তাঃরাগো হঃ প্রাগেলিরি। য়াংখা আকুঃসা ছুরো যোহন য়াংসুউরোনা আতু হিকলিরি।
6হিচা আলুং রিই তংগো পেঃরো আছুংমা য়াংসুউরো পাফোদুঃ লাঃগেলিরি অর য়াংদেমা বর যীশু নাঃমিনা তয়ক যিহুদী ম্যাকখ্য ফ্যাকনা মকং রিসি তয়ক্কু তুয়িগেলিরি। 7-8য়াং মকং রিসিকগো ইলুমা প্রফুছুগি ম্যাকখ্য ফ্যাক খঃরি। য়াং ম্যাকখ্য ফ্যাকচা ওকখ্যুসু সেরগিয় পৌলমা তয়ক মিছুয়ি হিকলিরি, অর য়াং ওকখ্যুসু পুয়েংঞাহি তয়ক হিকলিরি। সেরগিয়-পৌল থাওরা ফুরা ঈঃ তাঃরাগো নাথংফু কিজু বার্ণবানা শৌলগো খঃলৈতি। ছুগি বার্ণবানা শৌলগো ইলুমাচা ছিই থাঃলিরি অর খ্রীট্ আঃপমা ক্যুংফুচাগা ওকখ্যুকসুগো হ্লিরো থাঃফু ক্রেংলিরি। 9য়াংখা সেংস্যাংস ওয়িঞেংনা প্রিজুংরো শৌল যাসুগো পৌললি খঃরি, য়াংসুউচা ইলুমাদুঃ চিঃচি ক্রিরো প্রলিরি, 10“নাং মাতারা জসুউমা মাতারা সাঃ অর আকং অলুকমা নাং রেংসুউ। নাং আতুওয়ংমা হিকচা আলুং আলিংনা আপ্যাকচা হিরি। আস্যাং পব্রং লেংগো ককক লুকতি আক্যাংচা নাকমা তাখালি মপ্যক প্যালঃ? 11ক্রি,আস্যাং নাংকু মেং পাব্যা। নাং ম্যাকচি কেইংফু অর লৈগারাক রকঅং নাং নিংগো মাম্রাং ফ্রফু।”
য়াংখা নাংনা মমৈচা য়াংসুউগো খ্যুকলিরি অর তয়ক মুসু য়াংসুউ আলাক্কু কৈ য়ুনৈঅং য়াংচা কিজু য়াংসুউ থুউদুঃ দুঃ তুওয়ালিরি। 12দিঃচাগো ম্রাংরো ওকখ্যুকসুচা থাওরা ফুরাগো ক্যুংলিরি আক্রংগা আস্যাং আক্রংলিলাগো যা সুয়েংসাং রালিরি, য়াংদেমা য়াংসুউ এংঅলিরিব্যা।
পিষিদিয়া প্রিনিমা আন্তিয়খিয়ামা
13য়াং নক পৌলনা য়াংসুউ মিছুয়িরো পাফোগো বৈরো সাংফমা তাকরো পামফুলিয়া প্রিনি পর্গা ম্রুদুঃ লাঃগেলিরি। যোহন য়াংখা য়াংসুউরোগু ফ্রুতরো যিরুশালেংদুঃ প্রেং লাঃলিইরি। 14নক্কা য়াংসুউরো পর্গাগা পিষিদিয়া প্রিনিমা আন্তিয়খিয়া ম্রুদুঃ লাঃগেলিরি। অর সাদাং রাকমা রিঃফুংমা লাঃরো থৈংগেলিরি। 15সেংস্যাংস কেইং চাউ থুংজৈংনা রিসিক কেইং চাউরোগু ফেঃ প্রাব্রিনক রিঃফুংমা গংখ্যুকরো য়াংসুউরোগু প্ররো রুওয়েলৈতি, “ঞিংরো, লুঃউরো চিঃকু আঃ পিফু কিজু তুখুমাসা প্রফু হিগি, প্রগে।”
16য়াংখা পৌল থাঃআরো রেঃলিরি অর আঃলাক ম্রাংরো প্রলিরি, “ঈস্রায়েলীরোনা থাওরা ফুরাগো রুসিসা যিহুদী মুহু, কুবাংরো নাথংগে। 17-18ঈস্রায়েল লুঃউম্যুরো থাওরা ফুরা ঙারো আচৈংগো রুঈকক য়ুলিরি অর যাখা য়াংসুউরো মিসর প্রিমা হিকলিরি, য়াংখা য়াংসুউরোগু কংগং আগ্রিকি প্যাংলিরি। নক্কা থাওরা ফুরা মহা তেংখুংদ আঃনা য়াং প্রিগা য়াংসুউরোগু থুউখালিরি অর আন্হ লিঃছি ল্হক সিঃলি প্রাং আঃরামা য়াংসুউরো মকং সুংচাগো সিঃ খেংলিরারি। 19য়াং নক য়াংসুউ কনান প্রিগা খনৈখু জেসাগো ফ্যকরো, য়াংসুউ কুঃ লুঃউরোগু য়াং প্রি আঃপমা তাওয়েং পিইলিরি। 20দিঃ আলুং প্রাসানা ফ্রফু আন্হ লিঃরা ঙাছি লুকলিইরি।”
“য়াং নক রিসি শমূয়েং আখিং তৈঅং থাওরা ফুরাচা লৈগায়ক ওকখ্যুকসা পিইলিরি। 21য়াং নক লুঃউরো মাং তংগেলিরি। য়াংখা য়াংসুউ য়াংসুউরোমা বিন্যামীন আচৈংমা কীশমা সাঃ শৌলগো পিগেলিরি। শৌলচা আন্হ লিঃছি মাং চুলিরি। 22য়াং নক থাওরা ফুরাচা শৌলগো খ্যারো দায়ূদগো মাং তাংলিরি। য়াংসুউ দায়ূদ আক্রংগো প্রলিরিচাগা, ‘ঙা যিশয়মা সাঃ দায়ূদগা ঙা চিঃখ্যাং লুঃউগো হ্রা রাঃব্যা। ঙা যা লুকরিলি, য়াংসুউ য়াংচা লুকফু।’ 23থাওরা ফুরা য়াংসুউ গাদি আতৈং দিঃ লুঃউরো আচৈংগারা খ্যুয়েম্রকসু যীশুগো ঈস্রায়েলীরোবামা তাং প্রালিইরি। 24যীশু লেঃফু হ্রিইগা হিচা আলুং ঈস্রায়েলীরোবামা যোহনচা দিঃ চাঃগাগো হঃ প্রালিইরি, আপ্রইকা চিঃকু প্রেংরো লুঃউরোচা রিখ্যু মাঙ্গালা য়ুফু সাংরি। 25অলুক তুংফু হ্রিইগা যোহন প্রলিরি, ‘ঙা যাসুলি, নাংরো যা তুওয়ক্কেতিলি? ঙা য়াং মশীহ মুহু। য়াংসুউ ঙা নক্কা লাঃফু অর ঙা য়াংসুউমা ফেনেং খ্যুওয়েবাং থঃ মাতেং।’”
26“ঞিংরো, অব্রাহাম্মা আচৈংরোনা থাওরা ফুরাগো রুসিসা যিহুদি মুহুরো, আপ্রইকা ক্যুয়েম্রকফু দিঃ সাদাংগো ঙারোবাদুঃ পুলৈতি। 27যিরুশালেংমা লুঃউরোনা য়াংসুউরোমা গংখ্যুকরো যীশুগো মিসিগেলি। দিঃচাগো আপি রিসিইরো যা চাঃগাগো সাদাংদৈং সাদাংদৈং ফেএ প্রালিচাগো য়াংসুউরো নামিলিগেলি; য়াংচা কিজু য়াংসুউরো যীশুগো আপ্রই খ্যারো থুউ চাঃগাচা প্রিজুংলিরি। 28য়াংসুউরো যীশুগো আপ্রই খ্যারো সেঃফুঞ্যং তুখুউলি আক্রং মারালি, য়িগিলি পিলাতকু প্রগেলিরি, য়াংসুউগো সেঃ বৈলঃ। 29য়াংসুউ আক্রংলিলাগো য়ুউরো সেংস্যাংস কেইং চাউমা রুয়িরো হিচা আলুংচা প্রিজুংরি নক য়াংসুউরো য়াংসুউগো থুউগা খ্যারো, ম্রুক্কেলিরি। 30য়জংছুগি থাওরা ফুরাচা য়াংসুউগো আসিইগা আহ্রাং প্যাংরো থুকলিরি। 31গালীলগা যাসুরো য়াংসুউনা আতু যিরুশালেংদুঃ লাঃগেলিরি, য়াংসুউরো আম্যা রাক তৈংঅং য়াংসুউগো আম্রাং রাঃগেলিরি। ঙারো লুঃউবামা য়াংসুউরো আগু সাকসি পিগেতি।”
32ঙারো কুবাংরোমা দিঃ আকং সাদাংগো পিচাগা, ঙারো আচৈংরোমা থাওরা ফুরা গিধি প্যাংলিরি, 33য়াংচা য়াংসুউ য়াংসুউরো আচৈংরো কিজু, প্রফুছুগি ঙারো কিজু যীশুগো আঃসিগা আহ্রাং প্যাংরো প্রিজুলিরি। য়াং আক্রলিলাগো কাপ্যা কেইংমা তুদিয়া কাপ্যামা দিঃ চাঃগা রুয়িরো হিরি:
নাং ঙামা সাঃ,
গিনিরা ঙা নাকমা ফাখাং ফ্ররি।
34থাওরা ফুরা য়াংসুউগো আঃসিগা আহ্রাং প্যাংলিরি অর য়াংসুউ কেইংথাচা অর তাখালি মাপ্যাকপ্যা দিঃ চাঃগারোমা থাওরা ফুরা প্রলিরি, ‘সেস্যাংসনা আম্রি হিজ ছুউকমা যা গিধি ঙা দায়ূদবামা খেংলিরি, য়াংচা ঙা নাংকু পিফু।’ 35য়াং আক্রংলিলাগো অর তেরেমা রুয়িরো হিকচাগা,
নাং রুসিসা কেইংথাগো নাং মাপ্যাকচিমু।
36দায়ূদ য়াংখা রাকমা লুঃউরোবামা থাওরা ফুরা আতুওয়ক্কু প্রিজুং নক সিঃ লাঃখারি। য়াংসুউ আচৈংরোনা আতু ম্রুংলিরি নক য়াংসুউ কাইংথা প্যাক লাঃখারি। 37ছুগি থাওরা ফুরা যাসুগো আঃসিগা আহ্রাং লুকলিইরি, য়াংসুউ কাইংথা মাপ্যাকলি 38য়াংচা কিজু ঙা ঞিং আকুরো, কুবাংরো সিইরাফু তেংরিগা, যীশুগা নিংরোরা কুঃবাংরোবামা আপ্রইকা খুুওয়ং রাঃফু আক্রলিলাগো য়ুউরো হঃ প্রাচা। 39কুবাংরো মোশি থুংজৈংনা আপ্রই ডেংগা মারুওয়েনৈলি। য়িগিলি খ্যাংসুমুছু যীশু আঃপমা ক্যুংরিছুগি, য়াংসুউ আপ্রই ডেংগা রুওয়েতি। 40য়াংচা কিজু কুবাংরো সিদি রেঃকে, যাস্যালি ছুগি রিসিইরো প্রচা চাঃগাচা কুবাংরোমা মাক্যারাঅং:
41ঙাংরো যাসুরো থাওরা ফুরাগো য়ুউরো আঃরি আসুওয়েং প্রুক্কেতি, য়াংসুউরো নাথংগে,
নাংরো আঃমেং মিঃসি ফ্ররো, প্যকরো লাঃরি;
আক্রংগা নাংরো আখিংমা ঙা, ম্রাংঅং তুখু অলুক লুকফু
য়াংচাগো নাংরো তাখ্যাকলি মুক্যুংমু,
লুঃউ প্রগিলি মক্যুংমু।
42পৌলনা বার্ণবাচা রিঃফুংগা লাঃফু রিঃগা লুঃউরো য়াংসুউরোগু আতংবেং থাগেলিরিচাগা, য়াংসুউরো নক্কা সাদাংনিমা দিঃ আক্রংলিলাগো য়ুউরো চাঃগা প্রগে। 43লুঃউরো রিঃফুংগা থুওয়ক লাঃগেতি নক আম্যা যিহুদী অর যিহুদী বাসাগো ক্যুংসা, থাওরা ফুরাগো রুসিসা যিহুদী মুহু লুঃউরো পৌলনা বার্ণবা নক্কা আতু লাঃগেলিরি। য়াংখা থুউ লুঃউরোনা আতু পৌলনা বার্ণবাচা চাঃগা প্রলিরি অর য়াংসুউরোগু চিঃ আঃ পিইলিরি, যাফুলি ছুগি য়াংসুউরো থাওরা ফুরাগো আক্যুংচা আম্রি হিঅং।
44নক সাদাং রাকমা ম্রুমা হিচা আলুুং লুঃউ থাওরা ফুরা ঈঃ তাঃরাগো তাথংফু কিজু তেরেমা চুক্কেলিরি। 45আম্যা লুঃউ চুক্কেচাগো ম্রাংরো যিহুদীরো ম্যাকচি মুংগেলিরি অর পৌল যা প্রলিরিলি, য়াংচাগো য়ুউরো য়াংসুউগো ছেংগ্যাংফাক চাঃগা প্ররো, মুংলিরি। 46য়াংখা পৌলনা বার্ণবা গুংধ আঃনা য়াংসুউরো গো দিঃ আপ্রইি পিইলিরি, “পাথামা ঙারো কুঃবাংরোবামা থাওরা ফুরা ঈঃ তাঃরাগো হঃ প্রাফু সাংলিরি। ছুগি কুবাংরো যাখা য়াংচাগো লাক মেখেংলি অর তিম্রিজ বাওয়াগো তাথৈতি ছুরো কুঃরোগু মতুওয়ক্কে, য়াংখা ঙারো যিহুদী মুহুরোদুঃ লাঃগেলিরি। 47য়াং আক্রংচা ফ্রত্তি, আস্যাং ঙারোগু দিঃ চাঃগা প্রলিরি, ‘ঙা আখ্রা লুঃউ মুয়িবামা নাংকু আরং প্যাংরো থাঃরি। যা স্যালি ছুগি নাং আতুওয়ংগা নিংরো কাবালুং লুঃউরো আপ্রইকা রুওয়েঅং।’”
48যিহুদী মুহুরো দিঃ চাঃগাগো ক্রারো চিঃ প্যগেরি অর আস্যাং তাঃরাগো খিম্যুংগেলিরি অর তিম্রিজ বাওয়াগো রাঃফু কিজু থাওরা ফুরা যাসুরোগু মেএ থাঃলিরিলি, য়াংসুউরোরা ক্যুংগেলিরি।
49আস্যাং তাঃরাচা য়াংমা হিচা আলুং আঃরামা প্রি লাঃখারি। 50য়জংছুগি যিহুদীরোচা থাওরা ফুরাগো ওয়িপাসানা রুক্কেসা ঞুঞো ওয়েওয়ে মিঃমারোগু অর ম্রুমা আগ্রি আগ্রি লুঃউরোগু চাঃগা থুকরিলি। দিঃ পুয়েং প্যাংরো য়াংসুউরো পৌলনা বার্ণবা আঃপমা আঞ্যচিঃ প্যাংরো য়াং আঃরাগা লৈঃ থুককেতি। 51য়াংখা বার্ণবানা পৌলচা, য়াং লুঃউরোগু ছেংগ্যাংফাক প্যাংরো কুঃরো খুঃমুংগো খাঃ বৈরো ঈকনিয় ম্রুদুঃ লাঃগেলিরি। 52য়িগিলি য়াংদেমা তিবিরোচা আপ্যানা সেংস্যাংস ওয়িঞেং প্রিজুংগেলিরি।
Currently Selected:
প্রেরিত 13: BBSRMZ
Highlight
Share
Compare
Copy
Want to have your highlights saved across all your devices? Sign up or sign in
