প্রেরিত 12
12
পিতর রুওয়েম্রক খ্রাং
1য়াং আখিংমা হেরোদ মাং আঞ্যচিফু কিজু খ্রীট্ ক্যংসা লৈগয়ক্কু তিঃ য়ুখালিরি। 2নক্কা যোহনমা ঞিং যাকোবগু দাঃস্যিনা থুউরো সেঃলিরি। 3যিহুদীয়ারো প্যচাগো য়াংসুউ যাখা ম্রাংলিরিলি, য়াংখা য়াংসুউ পিতরগোলি তিঃফু লাঃলিইরি। দিঃ প্রাসানারোচা সুদা মিথিব্রি ভংমুঃ লুকচ্চা ফুঃখিং আখিংমা হিকলিরি। 4য়াংসুউ পিতরগো তিঃরো থংমা থিলিরি। লিঃয়ক লিঃয়ক প্যাংরো লিঃদৈং লুঃউগো পিতরগো চংফু কিজু তাওয়েং পিইলিরি। হেরোদ ম্হেলিরিচা, ক্যুওয়েম্রকতিগো ফুঃখিন নক তাঃরা চঃফু কিজু পিতরগো লুঃউ হ্রিইগা য়ুউখাফু। 5য়াংচা কিজু পিতরগো থংমা থিং থালিরি। য়জংছুগি ক্যংসা লুঃউরোচা পিতর কিজু থাওরা ফুরাবামা কংগং চিঃখ্যারো ছুউক তংগেলিরি।
6যানি হেরোদ তাঃরা চঃফু কিজু পিতরগো প্রাংদুঃ থুকখাফুলি, য়াং হ্রিঃগা ঞিমা সুরুয়িঈ নৈয়ক আক্রামা পিতর ওয়িলিরি। য়াংসুউগো সেংক্য ক্রুঃ নৈখুনা খ্যুংরো থাঃলিরি অর চংসারোচা লেংখাওয়ামা চংরো হিকগেলিইরি। 7য়াং আখিংমা ব্রুংখুনৈং প্যাংরো অাস্যা তেমেংদ তয়ক, য়াংদেমা লাঃরো রেঃলিরি। য়জংছুগি য়াং থং ঈংচা আঃলাংমা রং তকলিরি। থাওরা ফুরা তেমেংদচা পিতর কাইংথামা আঃনা তুঃরো, য়াংসুউগো নুওরো প্রলিরি, “আয়াং থাঃআ।” য়াংখা পিতরমা আঃলাক নৈফাক্কা সেংক্য ক্রুচা ক্যুয়ে ক্যাখারি।
8য়াংখা থাওরা ফুরা তেমেংদচা প্রলিরি, “নাং খাঃমা খাঃবেগু খ্যুয়েং, আখ্রিমা ফেনেং ওয়ে।” পিতর য়াংচাঞ্যং লুকলিইরি। থাওরা ফুরা তেমেংদচা য়াংসুউগো প্রলিরি, “নাং পুছুগো কাইংথামা রঃরো ঙা নক্কা নক্কা লঃ।” 9পিতর য়াংসুউ নক্কা নক্কা থং প্রাংদুঃ লাঃলিইরি। য়জংছুগি থাওরা ফুরা তেমেংদচা আম্হেং আম্হেং যা লুকতিলি, য়াংচাগো তুখুউলি য়াংসুউ মিঃসিলি। য়াংসুউ তুওয়কলিরি ঈংমাক মাকতি। 10য়াংসুউরো পাথামানা তুদিয়া আচংসারোগু ক্যরো ম্রুদুঃ ওয়ংফু লেংখাওয়াবামা রক্কেলিরি। লেংখাওয়াচা য়াংসুউরো কিজু কুঃমাকুঃ লঃ লাঃখারি অর য়াংসুউরো য়াংচাগা থুওয়ক লাঃখাগেতি। য়াংসুউরো তুখু লেংমা সুওয়াগেতি, য়াং আখিংমা ব্রুংখুনৈ প্যাংরো থাওরা ফুরা তেমেংদচা পিতরগো বৈরো লাঃখালিরি।
11য়াংখা পিতরচা সিঃদি রাঃরো প্রলিরি, “ঙা আগু আম্হেং সিঃরিচাগা, আস্যাং য়াংসুউ তেমেংদগো রুওয়েরো হেরোদ মাংগা অর যিহুদীয়ারো যা প্যাংফু ক্রেংলিরি, য়াংচাগা ঙাগো কিঃ ছিলিরি।”
12দিঃ চাঃগাগো নাঃলিরো য়াংসুউচা যোহন আঃমিঃ ঈংদুঃ লাঃলিইরি। দিঃ যোহনগো মার্ক লিঃ খঃরি। য়াং ঈংমা আম্যা লুঃউ ছুরো ছুঃউক তংরো হিকলিরি। 13পিতর প্রাংগা লেংখাওয়াগু খকরি নক রোদা নাঃমিনা আঙাসামা তয়ক লেংখাওয়া ল্হফু লাঃলিইরি। 14পিতর আঃসেংগো সিঃরো য়াংসুউ কংগং প্যলিরি অর লেংখাওয়া মল্হপ্রি ঈং আঃথিদুঃ ব্রি লাঃরো সাদাং পিরিলিচাগা, “পিতর লেংখাওয়ামা রেঃরো হিরি।”
15য়াংখা তিবিরো য়াং মিঃমাগো প্রগেলিরি, “নাং তুখু মিঃসিব্যাদি।” য়িগিলি য়াংসুউ আপ্রইেং আপ্রইেং প্ররি কিজু, য়াংসুউরো প্রগেলিরি, “য়জংছুগি দিঃ লুঃউচা পিতরগো কিঃ ছিসাঃ তেমেংদ।”
16দিঃমা ক্রিগি পিতরচা লেংখাওয়াগো খকরো নিংরিব্যা। য়াংখা তিবিরোচা লেংখাওয়া ল্হরো, পিতরগো ম্রাংগেরিখা কংগং এংঅগেলিরি। 17পিতরচা য়াংসুউরোগু তিঃতি নিংফু কিজু, আঃলাকনা সিঃদি প্রালৈতি। অর থংগা আস্যাং তেমেংদ যা পুয়েং থুউ য়ুখালি, য়াংচা আলুংচা প্রঃ প্রালিইরি। আছুংমা য়াংসুউ প্রলিরি, “দিঃ সাদাংচা যাকোবনা অর ঞিংরোগুলি পিগেলি।” দিঃ চাঃগা প্ররো য়াংসুউ য়াংগা থওয়করো অর তেরেদুঃঃ লাঃলিইরি।
18মুঃলাংখা পিতর যাদুঃ লাঃখালি য়াংচাগো য়ুউরো সুরুয়িরো ক্যক্যরোছা ফ্রক্কেরি। 19হেরোদ কংগং সিঃদি খ্যারো হ্রালিরি, ছুগি য়াংসুউগো মাঃরাব্রি আচংসাগো আক্রক থিঃরো মিংলিরি। অর নক্কা থুউ চংসারোগু সেঃ বৈফু কিজু আঃনা পিইলিরি। য়াং নক হেরোদচা যিহুদীয়াগা কৈসরিয়াদুঃ লাঃলিইরি অর য়াংদেমা লৈগারাক নিংলিরি।
হেরোদ মাং সিঃখ্রাং
20য়াং আখিংমা হেরোদ সোরনা সীদোন ম্রুসা লুঃউরো আঃপমা কংগং মেং তাকলিরি। য়াংখা য়াংদেমা লুঃউরো তুজুকতৈং চুঃরো হেরোদনা আতুয়ি খেংফু লাঃগেলিরি। ব্লাস্ত নাঃমিনা মাং ওয়িরা খেংমা মাং কংগং ক্যুংসু য়ুংসিগো ব্রাক্কা ঙাংরো, য়াংসুউরো মাংনা ওয়ে ওয়াসানা খ্যাফু ক্রিগেলিরি, আক্রংগা মাং হেরোদ প্রিগারা য়াংসুউরো প্রিদুঃ আঃচা লেঃতি।
21য়াংখা হেরোদ তারাক আখিংগো মেলিরি। য়াংসুউ য়াং রাকনি, মাং আওয়ে ওয়েরো মাং পেংলাংমা থৈরো লুঃউরোনা চাঃগা প্রলিরি। 22য়াংসুউ চাঃগাগো ক্রারো, য়াংসুউরো অঃরো প্রগেলিরি, “দিঃচা নেঃ চাঃগা, লুঃউ চাঃগা মুহু।” 23হেরোদচা থাওরা ফুরাগো খি মমুওয়েংলিরো, খ্যাং খ্যাং আস্যাং তেমেংদ তয়ক য়াংসুউগো সেঃলিরি অর সেং এংরো য়াংসুউ সিঃ লাঃখারি।
24য়জংছুগি থাওরা ফুরা ঈঃ হঃদ তাঃরাচা অর আম্যা প্রেংলিরি অর আম্যা লুঃউ য়াংচাগো ক্যুংগেলিরি।
25দিঃমা ক্রিগি বার্ণবানা শৌলচা আলুক তুংব্যারো য়াংসুউরো যোহনগো য়ুউরো যিরুশালেংদুঃ প্রেং লাঃখাগেতি। দিঃ যোহনগো মার্কলি খঃরি।
Currently Selected:
প্রেরিত 12: BBSRMZ
Highlight
Share
Compare
Copy
Want to have your highlights saved across all your devices? Sign up or sign in
