SHOLAMON NGHAUI" CAUNG: 3
3
1Nga" yab qo mae yab: myhid' jo, mung: damyi: mae" damyi
ngo wa nga" jhid'de; yaug re yab mo, mo; ngo wa yao: re qho: na:-
ngadqere: yao: re maqhug' myao-
2Ngo wa vomo" jao: sho' su" du" qin" mung:
aimae" hau" mo" jham we' khyonhaung" jham mae joe" du" qin" va".
Ngo wa ngo jhid'de; yaug re qho: lau:- ngo cao" qu" qere: yao: re maqhug' qho: myao-
3Vomo" lhaug' qu" qin" mo, wa ngore the' myao: ako".
Ngo wa yao: bam re- nga" jhid'de; yaug re naonhaung" mathe' myao ko" i? ein: myid' va".
4Yao: bam mae" gao: we' yao: re ngo qhug' va".
Ngo wa yao: re zaui" ci mung: manhao: ke' lo: nga" myhi" yham khyo jhui" lo" va".
Ngo khau: li" ra" qe, khyo jhui" lo" va".
5Yerusalem mae" myiqe: qe we"- ngore dao:so: byid: gela,
tao: qao: ra" shocid we' yo: re mang lao: yang: nga" shid' zo: jhid'de; na: rure malhau: phyo' nae" ein: jham tang: ge,.
Sam Lam: Ein: Lam: nghaui" caung:
Zoqae: myhi"
6Din" pyad' yo mae myikhug' thaui: we' dakhyo: li" na: ru ceru wa pe" ngad: laug i?
Sheim nae pyo: qang: we' mura sheim xan: aung: mo, aung" ra" nae pyo: xau ceru wa pe" ngad: laug i?
7Sholamon re yao" tao" mae zhaung mung: ceim" dao: li" ako".
Israel mae gai: thao" ra" gyezo: qe kao lhaug' sulhe: khyaug' xe yaug vo; ako".
8Yao: bam alhab' wa shae ci kung: ako". Yao: bam wa gyekhe' zo" lo: ra" jhao mo, gyezo: xug' qe ngad: ako".
Yao: bam mae" yaug khao: ngo" wa shae pyang: vin: ako".
Myi" ayo, mae khe' zin" lo: rure gyevha nae" lhaug' zaung" byid' ako".
9Sholamon kho:kham re gai: thao" ra" sag' yang kad' ra" tao" mae vo; ako".
10Airu: nho: zang jham wa ngaui: yang thab' to" ru ngad: ra".
Ai: dao mae wa qhang: yang thug' shaung: pye' ra" pin: cug' nghoe' to" ako".
Ai: nho: zaung khau" nhae: jham re wa Yerusalem mae" myiqe: qe jhid'de; myid we' qo, to" ra" khalhae: nyhug pin" yang nghoe' to" ra".
11Ziun mae" myiqe: qe we"- Sholamon kho:kham re li" qu" qu" shige,-
yao: wa yao" lo,xo' ba na yao: ngaui bau: mung:
ngaui lho" ra" ba na mae yao: myhi" yang yao" au: mae zhaung: byid' ra" ba maug: zhaung" ci: ra".
Currently Selected:
SHOLAMON NGHAUI" CAUNG: 3: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009