SHOLAMON NGHAUI" CAUNG: 2
2
1Ngo wa Sharon mae yaug ra" seyo: bin:- bam gyo: mae yaug: ra" nghin bin: ngad:.
Zoqae: pho"
2Zau: kyin yo mae" nghin bin: we' dakhyo: nga" jhid'de; myhi" wa myiqe: qe: phaung mae" ngad:-
Zoqae: myhi"
3Seyo: sag' mo" yo agaung: mae" bin: cug shigae we' dakhyo:-
nga" jhid'de; thao" yaug wa yauggai gaje qe tho' baug thug' jo; ra".
Ngo wa ai: aqab khug mae zaung nug: ra". Yao" ashi: wa nga" qhid' mae" cug: ra".
4Yao: wa ngore yao" zo: shaug' qe, khyo jhui" lo" mung: nga" dao mae jhid'de; ra" khyi to' byid' ra".
5Nga" nho: qam: re sabyi shi: kyaug' yang dam: pyang" byid: la,-
Bin: cug shi: jham: yang qam: dam: pin" byid: la,. Ngo wa gaungsho: jhid' myid qam: nang" ra".
6Yao" nho: lo, kaung: lo, wa nga" au: gyid' mae jo; ra".
Aimung: yao" lo, yo lo; yang ngore po: ci: ra".
7Yerusalem mae" myiqe: qe we"-
ngore dao:so: byid: gela, tao: qao: ra" shocid we' yo: re mang lao: yang: nga" shid' zo: jhid'de; na: rure malhau: phyo' nae" ein: jham tang: ge,.
Shid' Lam: Ein: Lam: nghaui" caung:
Zoqae: myhi"
8Ngo wa nga" zoqae: pho" nho: thoe re the' gyo" ra". Yao: wa bam jham mae tao" lai mung: li" ra".
Bug gaung jham mae tao" phyid' mung: ngo jhao" li" ra".
9Nga" zoqae: pho" wa xe' we' dau: ra". Xe' nau" ru"ru ngad: ra".
Yao: wa vang yae mae ye; jo; ra". Yao: wa bao: zo: kham: khug khyo" qu" ke' ra".
Aimung: kham: pyid' khyo" qu" ra".
10Nga" zoqae: pho" wa ngore jhau: ra".
Zoqae: pho"
Li" lo ri:- nga" zoqae: myhi" we"- nga" zoqae: myhi" we"- ngo we' daga" cao la,.
11Gyo, yo thao" va"- mug: qu nghin va".
12Seyo: vogaung: mae bin: jham bu" yaung" jo; va".
Ce: yo, wa nghaui"caung: yo, ngad:- jao: gyu" khaung: mae phaung" kyug' myang thoe the' gyo: va".
13Pho' ham" shi: jham mhang" li" va".
sabyi naui bu" jo, mung: la wa sheim nae pyo" jo; ra".
Aimung: li" lo ri:- nga" jhid'de; myhi" we"- nga" zoqae: myhi" we"- ngo we' daga" cao" li" wa,.
14Nao wa laug bam jhe' gyo: mae vho' laung" jo; ra" phaung" kyug' we' dau: ra".
Ni" nho: jhid'de; taung" ra" myo,khung: re ngo qu" shili"-
aimung: ni" nho: gyo: nug taung" ra" thoe re ngo tae" gyo: shive.
15Ngonhaung" nho: sabyi yo re zag ne jham we' zag ne nau" jham: yang maqo" phyo' qheim" shire aijham re taung" pye' wa,.
Zoqae myhi"
16Nga" zoqae: pho" wa nga" mae" ngad: ra".
Aimung: ngo wa yao" mae" ngad:- yao: wa yao" cad' yao jham re nghin bin: phyu yo mae-
17Ne,seim la cae: hug' sho' cad' no; ru baui" lo" sho'- mhin: lhae: zo: nhao: ra".
Nga" jhid'de; zoqae: pho" we"- yo: we' dakhyo: dam: tug' lo ri:-
Bethe bam jham mae" xe' we' dakhyo: phao: lo wa,.
Currently Selected:
SHOLAMON NGHAUI" CAUNG: 2: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009