CAUNG: KHIN" 49
49
Jo, Nho" Re Lam Khug: Ru Wa Ago Mau" Ngad: Ra" Khyo
(Hebre Dao: Au:– Kora kaung boe: peim: ra" Nghaui"caung:)
1-2Yaug khao: ngo" cere gyo" yu ge,. Azhao" myhao mo, nyham mo, qo" mo, myaung mo, makhyin khyi" khao: ngo" mae
na mo, alhab' mo, we"- daga" tae" gyo: ge,.
3Ngo myid: ru wa gyang: gyang: sho' sho' ngad nae". Ngo wa
pha,jhi" dao: jham re ta" nae".
4Nga" nhag' lam: myid zaug: ru wa- dao: zham" shad' khyo lhang: lo" li" nae"-
ngo wa tang: be, zo" re" ai: dao: zham" jham: nho: dao: jhaug' re ngo sho' kyo: nae".
5-6Ngo wa- yao: yao" jo,nho" re lam khug mung: yao: bam: jo,nho" dao mae phug: na: ra".
Makhyang: mashab mo, gyevo qeyang lhang" kham" to: mung: gyaug ci" ca" ra" ayo, mae madin: gyaug nae".
7Byu wa yao: yao" gaung re khonhae" re: maqo" khyad' yu- yao: yao"
xao au: phug' Mao"So re maqo" xe'.
8-9Pe"mung:ga"re xao su byu dayaug: nho: kao so' xao au: aphug' wa gyai myo" ra".
Yao: qo" xe' ra" aphug' wa yao: re lab khung: mae mavao nae" qhid' mae" kham" yu mung: apyad ato mae qo" daui: na sho' khonhae" re: matho' laug ngad: ra".
10Pha,jhi" bo mo, re:- nhag' magyang" ra" kopyad' qe we' dakhyo:
shid: lo" ko" rure yaug khao: ngo" qo" gai: myao: ra". Yao: bam alhab' wa yao: bam: jo,nho" jham re yao: bam: myid:zo: qe: qhid' mae" to: co' ako".
11Yao: bam: lab jham wa yao: bam: apyad ato yham jham ngad: ako".
Yao: bam wa mug: myid jham re sang: lo gesho' ngadqere: ai: mae ayo, byang" sho' lang" jo; ako".
12Byu dayaug: nho: qi" qhang: ruwa yao: re shid: rumae" maqo" tam" yu- yao: wa gug'nyhug' jham we'
dakhyo: shid: lo" ca" shinae" ngad: ra".
13Yao: bam yao" gaung re lam khug mo,- yao: bam: jo,nho" mae nhag' dag: na: ra" mo; nho:
au: pa lo, kyo' pe" phau: zo: ko" rure qu" qu" wa,-
14Yao: bam wa yao jham we' dakhyo: shid: dam" lo" nae" za: ngad mung:- shid: ru wa yao: bam re lhaug' zaung" ra" yao zaung"
boe" lo nae". Yao: bam: mao gaung jham wa yao: bam yao" yham mae" va" ra" movo: mug: mae phyad phyad jo; bab: lo" na: re din:man: mo, wa yao: bam: dao mae aung doe; li" genae".
15Ngadqere: Mao"So wa ngore khyad' yu: li" nae".
Shid: ra" qam: so' mae" ngore khyad' khyui: yu: li" nae".
16Byu dayaug yaug wa jo,nho" qo" yaug boe" li" mung:-
yao" jo,nho" je yang: qo" li" rure myo, daqu" zau:-
17Yao: shid: lo" re aijham re yao: maqo" ci: phao: lo"- yao" jo,nho" wa yao: we' daga"
lab khung: khug khyo macao" lo" nae".
18Byu dayaug wa ce: pyad mae nhag' dag: ru qo" yu mung:
yao: aung doe; ra" mathao mae su: yang caung:khin" ru qo" yu sho' ngadqere:-
19Yao: shid: lo" re apyad ato cad' no; jo, ra" jo, qo mae
shid: rumae" yao" phug' phyid' alhab' mo, we' bo: qhan" lo" li" nae".
20Byu dayaug: nho: qi" qhang: ruyang yao: re shid: rumae"
maqo" tam" yu- yao: wa gug' nghug' jham we' dakhyo: shid: lo" ca" shi:nae" ngad: ra".
Currently Selected:
CAUNG: KHIN" 49: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
