CAUNG: KHIN" 48
48
Mao"So: Vogaung: Mo" Ziun
(Hebre Dao: Au:– Kora kaung boe: peim: ra" Nghaui"caung:)
1 Asang wa qi" qhang yaug ngad mung: ngonhaung" Mao"So: vomo" khug mae jo; ra"
yao" gyang" lho" ra" bug gaung dao mae qi: sho' caung:khin" byid: nae" gai: ra".
2Mao"So: bug gaung Ziun wa myhao: ru we' yaung" ra"
kho:kham mo" nho: vogaung: mo" wa mug: myid re ngaui bau: ngaui lho" ru byid' ra".
3Ai: vogaung: mo" nho: gye vho' zaung khug mae
yao: we' na: re gug: gam: ru qo" ra" ga" rure Mao"So qhu" byid' ava".
4Kho:kham qe daga" zang" ham mung:
Ziun re gye li" ceim" khe' ako".
5Ngadqere: yao: bam aire myao gelao" mug' hao" byaug: ako".
Yao: bam gyaug mung: tao" phao: lo" ako".
6Aimae yao: bam wa zo:khau nae" seim" ra" myiqe: we' dakhyo:.
7Thin: ra" la qam" mae hug' lhaui" qin" ra" sang pho we' dakhyo: gyaug: ru we' khyag' qhui: ru wa yao: bam re aung: pye' ra".
8Mao"So kad' ra" mau" re ngonhaung" gyo" qu" bam va".
Ana" kam" wa aire qam: bo: thao" ra" Asang ngonhaung" nho: Mao"So: vogaung: mo" mae ngonhaung" the' myao: bam va". Yao: wa ai: vogaung: mo" re apyad ato mae gug: gam byid' li" nae".
9O" Mao"So we"- ni" Caung:pa" Yham khug mae-
ngonhaung" wa ni" mabaui mabyo; ra" jhid'de; myid re ceim" myid: beim" bam va".
10Khyi" khao: ngo" mae" byu qe wa nao re
caung:khin" byid' ako". Aimung: ni" mang qi" ra" lahau: wa myid gaung byang" sho' je" lo" ava".
Nao wa tarha" din: nyang: ru we' eib: na: ra".
11Ziun mae" byu qe ngaui bau" na vageshao:- nao wa dangman" ra" khyo" dao: kho' byid' ra".
Yuda vogaung: mo" jham mae ngaui bau: ngaui lho" ru ajo; jo, vashao:.
12Mao"So: byu qe we"- Ziun re su" gam: mung:
gyebyu zaung jham re nghe' qu" ge,.
13Ce:thao: qae: mae" myid:zo: qere qo" ta" kyo: nae"
vomo" vang jham re nyang" za: qu" xam: mung: vang jham re nghe' to: ge,.
14Ce: Mao"So wa apyad ato mae ngonhaung" nho: Mao"So ngad:- joe" lo nae"
Ce: thao: qae: alhab' geim" mae yao: wa ngonhaung" re khyo jhui" shid' na nae"- ein: qo" ta" kyo" bam nae".
Currently Selected:
CAUNG: KHIN" 48: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
