CAUNG: KHIN" 34
34
Mao"So: Nho: Gai: Shab: Rure Caung:khin" Ru
(Hebre Dao: Au:– Abimeleg nho: qhid' mae")
1Ngo wa Asang re khonhae" re: jeju caung:khin" nae".
Yao: re caung:khin" ru khonhae" re: mathang: pye' nae".
2Yao: kad' rure ngo caung:khin" nae".
Deim" zag zo" ru qhug' mo, alhab' tae" gyo: mung: ngaui bau" na geshao:.
3 Asang qi" qhang: ra" khyo re ngo we' daga" hau" kyo: ge,-
yao" mang re daga" caung:khin" gelang:.
4 Asang re ngo akyu" mho' mung: yao: ngore tau: byid: va".
Nga" gyaug pho: alhab' mae" ngore loe; beim nhao va".
5Deim" zag zo" ru qhug' mo, wa yao: re khug ngha mung: ngaui bau" ako".
Yao: bam wa khonhae" re: qam: shan genae" mangad;.
6Bao" thaug' yu nae" ru maqo" ra" mo, yao: re khai mung: yao" yang tau: byid' ra".
Yao: bam: qug: khai: alhab' mae" khyad' yu byid' ra".
7 Asang re phug' te' nga: yhe' mo, re yao" mug: lagyo" yang lhaug' zaung" byid' ra".
Aimung: yao: bam re gyaug ci" ja: mae" khyad' khyui: yu: ra".
8 Asang khonho" gai: rure nao yao: cao" qho: qu" yang: ba wa,.
Yao: mae gug: gam qhug' myao: yu mo, wa ngaui lho" ako".
9 Asang: byu alhab' mo, we"- yao: re nga: yhe' na ge,-
yao" mho dao gyo: mo, wa yao: bam ca" ru alhab' qo" ako".
10Khangkhyi jham lhao" re: zo:ve moe' ru qhug' ako".
Asang: mho dao: gyo: mo, kam" wa gai: ru daja: re: mamyaung ngad: ako".
11Nga" ba nam nau" qe we"- li" ge,
Aire ngo wa
Asang re khoru: gyaug phug' ca" ru naonhaung" re mho" byid: geli".
12Ni" pyad mae na: dai nug: i? Kao qhang: ru we'
ngaui bau" rure nao o: i?
13Aire wa makhyang" ra" dao: re dajhau- mhug' re: damhug' ta".
14Makhyang: mashab: rumae" lhang: phaug' lo mung: gai: ru kad' wa,.
Ni" nhag' lam: alhab' yang yaug yo cae: tae" rure phin: yang: qho: yu wa,.
15Din:man: mo, re Asang lhaug' zaung" ra".
Airumung: yao: bam: hug' yao thoe re tae" gyo: byid' ra".
16Ngadqere: makhyang: mashab: ru kad' mo, re yao: lham: ngag: thaug' mung: yao: bam shid: lo" gelao"-
aijao" yao: to" myhid' pye' ru qhug' ako".
17Din:man: mo, Asang re yao ko" re- yao" yang tae" gyo: byid' ra".
Yao: bam: qug: khai: alhab' mae" khyad' khyui: yu: ra".
18 Asang wa nhag' lam: gyug: mo, we' jhao" na: ra".
Myid: lao" nae" ru maqo" lo" ra" mo, re yao" yang khyad' yu: ra".
19Byugai wa qug: khai: aja: ja: phau: zo" ra".
Ngadqere: Asang wa yao: re aijham alhab' mae" khyad' yu: ra".
20 Asang wa yao: re bin sho' lhaug' zaung" to" ra".
Yao" shoqug: dakhe' re: magyug:.
21Makhyang" ra" ru wa nhag' lam: kaui yaug re se' pye' nae".
Din:man: yaug re nghang: mo, wa qobo dae byid' ru qhug' genae".
22 Asang wa yao" byumyu" re khyad' yu: li" nae". Gug: gam byid' ru qo" yu nae" qhid' mae"
yao: jhao" gug: gam nae" yemho' mo, wa lhoe' to" ru qhug' genae".
Currently Selected:
CAUNG: KHIN" 34: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
