CAUNG: KHIN" 31
31
Mao"So Re Khug Ngha: Ra" Akyu" Mho' Dao:
(Hebre Dao: Au:– Davi peim: ra" Nghaui"caung:)
1 Asang we"- gug: gam: ru qo" yu nae" qhid' mae" nao jhao" ngo li" ra".
Ngo re khonhae" re: dajeim: nhao la,- nao wa din:man" ra" Mao"So ngad: ra"- ngore khyad' yu la,- ngo mho' ra".
2Ngo re gyo: byid: la, wo"- ngore ana" khyad' yu la, wo"- ngore gug: gam byid: nae" khug ngha jo, qo boe" byid: la,-
ngore khyad' yu nae" gug: gam jao: boe" byid: la,.
3Nao wa ngore gyevha byid: yaug- nga" khug ngha jo, qo ngad: ra".
Nao dao:so: to" ru we' dakhyo:- ngore khyo shid' mung: jhui" she byid: la,.
4Nga" qhid' mae" thaung: to" ra" lha" mae mamyi" losho' ngore lhaug' zaung" la,- gyaug ci" ja: mae" ngore aqab go byid: la,.
5Ni" lo, khug mae ngo yao" gaung re qhaug' to: va". Asang we"- nao ngore khyad' yu: li" nae"- nao wa jhaug' zaug: ra" Mao"So ngad: ra".
6So apyag' jham re pa" caung: mo, re nao nghang" ra". Ngo kam" wa nao re lam khug: na:.
7Ni" mabaui mabyo; jhid'de; myid: mathao mae ngo
ngaui bau" na nae". Ngo dayin yo" na: rure nao myao: ra"- nga" qug: khai: re nao ba byid' ra".
8Nao wa ngore nga" gyevo qenho: lo, khug mae mathe' taung: nhao ngad: ra". Ngo ye: nug: ra" khyo ye: nae" qhid' mae" galin: gago: akhang" ngore nao byid' ra".
9 Asang we"- ngo qug: khai: qhug' na: ruyang ngore nhag' khyag' yu la,- nga" myo,jid' jham wa saung" ngug mung: kyam: byaug va". Ngo wa bin sho' qam: gyug' byaug va".
10Ngo wa nhag' kaug' ruyang qam: gan: byaug va"- ngug yang: nga" kao so' lang" byaug va". Ngo wa qug: khai: qhug' mung: qam: nang" byaug va"- nga" sho:qug: jham lhao" re: qeim" lo" na va".
11Nga" gyevo alhab' mo, we'- je yang: nga" yham kyo: qe wa ngore manug makhyad' zam" khug: ako". Ngo re ba mo, wa ngore gyaug: ako". Hau" mo" khyo mae ngore myao lao"- yao: bam tao" phao: lo" ako".
12Yaug khao: ngo" wa ngore shid: byaug va" yaug ru: to" myhid' pye' ako". Ngo wa shapye' pye' va" zai daja: ja: ru"ru ngad: ra".
13Gyevo myo: sho mo, jho"' so' ta" na: ru ngo the' gyo". Nga" avai: ayae mae gyaug: din ja: lhang" kham" to" ra". Yao: bam wa ngore magai: ra" khyo" yaung mung: ngore se' pye' nae" ga: byin phyo: khug' zin" na: ako".
14O" Asang we"- ngo kam" wa nao mae khug: ngha: na:-
nao wa nga" Mao"So ngad: ra".
15Ngo wa khonhae" re: nao qu" gun caung: na: ra" khug mae ngad:. Nga" gyevo qenho: lo, mae" ngore khyad' yu mung: ngore yhin" ra" mo; lo, mae" ngore loe; beim nhao la,.
16Ni" daui daui yaug re nhag' khyag' myid: yang qu" byid: la,.
Ni" mabaui mabyo; ra" jhid'de; myid mae cao" yang: ngore khyad' yu la,.
17 Asang nao re ngo mho' yao: ra"-
Ngo re qho' daphau: nhao la,. Makhyang: mashab mo, myo, nho qeim vageshao:- yao: bam wa movo: mug: khyo sae za: gyo" lo" vageshao:.
18Ai: mhug' hab' qere- din:man: mo, re manug makhyad' ta" ra" ngad beim: nga: kad' mo, re tae" byaug nhao byid: la,-
19Nao re nga: yhe' mo; qhid' mae" nao to" to: byid' ra" gai: ru jham wa khonho" mug' pho: ngad: ra" i? Nao khonho" gai ru we' nao re lam khug: na mo, re nao khonho" gug: gam taung" lhaug' zaung" mung: gyevha byid' rure yaug khao: ngo" ba: ako".
20Nao wa yao: bam re sape" yang magai: ra" byin phyo: zin" rumae" gug: gam: ra" jo, qo mae nyham" to" ra". Yao: bam: gyevo qeyang ce: roe" lhau: rumae" gug: gam: ra" qab khug mae nyham" to" ra".
21 Asang re caung:khin" na ge,- ngore ceim" lhang" kham" yang: gye kad' ru qhug' au: yao: wa ngore khonho" jhid'de; nhag' lam: qhu" byid' ra" i?
22Ngo re yao" qhid' kheim: mae" khe' thug' pye' naeva" laug ein:-
myid: gyaug: pye'ngadqere: yao: mae" bao" yu nae" qhid' mae" ngo hug' yao: ke' re- nga" hug' yao thoe re yao: gyo: byid' ra".
23 Asang: jhaug' zaug mo, alhab' we"- Asang re jhid'de; ge,
Asang wa jhaug zaug mo, re gug: gam byid' ra". Ngad beim: mo, re kam" wa yao: bam phau: zo: nae" man: qi" ru we' dakhyo: qobo dae byid' ra".
24 Asang mae myid: lao" na mo, alhab' mo, we"- qam: bo mung: nhag' lam: mae vae" myid bo: na ge,
Currently Selected:
CAUNG: KHIN" 31: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
