YOBA 32
32
Elihu Ta" Ra" Dao:
( 32.1- 37.24 )
1Yoba wa yao: qobo maqo" ga: tin: tin: myid: ci: ra" mathao mae yao" ba nam byin cao: sam zo: wa yao: re phaug' tau: nae" khyo re to" pye' ako". 2Ngadqere:- ayae mae ye; jo; yaug Elihu ga: mang yaug wa- Yoba yao" gaung re dangman" ga: myid mung: Mao"So re qobo vhin: ruyang yao: nhag' yo: nug: rure matho' zang: lo: ngad: ra". (Elihu wa Bu myid:zo: qemae" Barake nho: yauggai zo: ngad mung: Ram kaung boe: mae bobo: ra".) 3Yao: wa Yoba nho: ba nam byin cao: sam yaug rere: nhag' yo" ra". Yao: bam wa Yoba re phaug' tau: nae" khyo khoru: maba: qho lomung: ceru wa Mao"So shad' ra" ga" khyo" myao: thug' li" nhao: ra". 4Elihu wa aimae na mo, mae" ngai: thao" yaug ngad yang: yaug khao: ngo" bin: jhau sho' lao" na: ra". 5Ai: byu sam yaug: geim" yang Yoba re maqo" phaug' tau: loko" rure yao: the' myao lao" yao: nhag' yo" li" ra". 6Aimung: yao: jhau: qhid: li" ra".
Elihu
Ngo wa zolau: ngad mung: naonhaung" wa mao" avako"
aimung: ngo myid: to" ru naonhaung" re mavae" ta" kyo:-
7Naonhaung" je: qao" va" mo, shi" naonhaung" pha,jhi" re gae: myho" byid: ca" rumung:
naonhaung" shi" jhau ca" ra" ein: ngoyao" gaung re ta" peim" ra".
8Ngadqere:- byu re pha,jhi" byid' ru wa byu qe: dao mae
gyo" li" ra" qam: so' bo: thao" Mao"So: byo angad: ra".
9Byu jham wa na: mao" lo" yang: pha,jhi" bo: li" ru mangad:- mangad: lao"
na: mao: yang: jo: ru pe" ngad: ga" re ba: li" rure: mangad:-
10Aimung: ana" ngo wa- naonhaung" re ngo ta" ru tae" gyo: nhao nug:
ngo myid: to" ru naonhaung" re ta" kyo: geli". 11Naonhaung" jhau: na: au:- ngo nhag' lam: qhang qhang to: mung: sae za: tae" gyo" na:-
Aimung:- pha,jhi" dao: kheim: jham re myid: qho: na ko" au: ngo lao" na:-
12Ngo te' dai" za: gyo" na: re naonhaung" madoe, loko" ru the' gyo"
Yoba ta" lai: lo: rure majo: ga: naonhaung" maqo" ceim" qhu" ngad: ako".
13Naonhaung" wa pha,jhi" re qhug' qho: myao va" ein: khoru: ba: qo" ta" genae" i?
Naonhaung" maboe" lo: geyang: Yoba re Mao"So yao: phaug' tau: ca" ra".
14Yoba wa naonhaung" re jhau: na: ra"- ngore jhau: na: ru mangad:-
Ngadqere: ngo wa naonhaung" ru: khonhae" re: maphaug' tau: nae".
15Yoba we"- yao: bam pe" dao: dakheim: maqo" qho lo:ngad: ako".
Nao re phaug' tau: nae" dao: phyid yao: bam maqo" ngad: ako".
16Yao: bam sae za: tae" jo; au: ngo xo' yang: lao" na gai: i?
Yao: bam wa ta" nae" pe" majo, lo: aimae ye, bam: ako". 17Mangad: nae"- ana" ngo wa ngoyao" dao: phyid re byid: mung:
ngo myid: ci: ru nao re ta" shid' nae".
18Ngo dao: jhau nae" matho' lao" lo:-
nga" dao: jham re matho' zang" cilo:-
19Ngo dao: jhau nae" akhang" maqo" re-
sabyi qang: asag' byang" sho' bo: ra" shoqid thaung re" ru: baug: go; lo" li" nae".
20Ngo maqo" zang: lo: ngo jhau yao: jhau ca" va".
21Ngo wa- ce: jho" ta" ngag: ra" phaung mae khoshad' re: mabode, nae"-
ngo wa khag' rere: makhin" nae".
22Ngo wa su re maba: khin"
amung: ngo qe airu: jhu" yang: ngad re Mao"So: wa ngore phyad phyad qobo dae byid' li" nae".
Currently Selected:
YOBA 32: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
