YOBA 31
31
1Ngo wa- khonhae" re: myiqe: nau" dayaug re qu" shab' ra" khyo" malhaung" qu" nae" ein:
gang" tang: ra" dao:so: ke' to: va".
2Qam: so' bo: thao" ra" Mao"So wa ngonhaung" re pe" kad' va" i?
Xao su byu: lo, mau" dao mae pe" ru: tug' xe' byid' ra" i?
3Yao: wa- shad' ru kad' mo, re
kyi" khyag' ru we' gyoe; gyo" ru nhao: ke' byid' ra".
4Mao"So wa- ngo kad' ru ja: khao: ngo" re ba: ra".
Yao: wa nga" nho: khubyae khao: ngo" re ba byid' ra".
5Ngo wa khonhae" re: makhyang: mashab: ra" khyo" makad' mung:
su gaje: rere: mug' pyag' zo: nae" khonhae" maphin" qu" ein: jham tang" ra".
6Mao"So: yang ngore man" ra" jao jham mae lag: qu" vashao:-
ngo qobo pe" maqo" rure yao: the' myao: li" nae".
7Ngo qe- jo: ra" khyo mae" phao: nghung" lo" la,- mangad: lao"-
makhyang: mashab: ra" khyo ngoyao: re lham" vao lo" nhao: la, amung:
nga" lo, jham mae qobo de; ngad re-
8Nga" qhovo: qhoshi: jham wa phyo' qheim" pye' ru qhug' vashao: mangad: lao"- ngo qho" ra" gaugzo re su gaje: yang zo" pye' vageshao:-
9Nga" yham kyo: cao" nho: yham sang myhi" re qu" o mung:
yao" kham: taung gaung shad' mae lhaug' yang: vho' na: ngad: re-
10Nga"- yham sang myhi" wa yauggai gaje qenho: zo:ve yhaung" mung:-
yauggai gaje qenho: yab jaung: mae yab vashao:-
11Airu" ra" makhyang: mashab: mau" re shid: ruyang qobo dae byid: ca" ra".
12Airu wa- ngo qo" ru alhab' re nga" jeim" pye' ra"
phyo' qheim" ba: ra" mhomyi: we' dau: li" nae".
13Nga" nho: daui daui okaung qemae" dayaug yaug ngore qobo vhin yang nyhung: au:-
Ngo wa yao: re tae" gyo: byid: mung: tarha" nyang: ra" khyo" lhaung" kad' byid'-
14Ngo airu: qe makad' re Mao"So re ngo khoru: gai: qhug' nae" i?
Ngo re dao: kho' nae" qhid' mae" Mao"So li" ra" au: re ngo khoru: ba: ta" nae" i?
15Ngo re phan" phaug' to" ra" Mao"So wa
nga" daui daui okaung rere: phan" phaug' to: yaug ngad: ra".
16Ngo wa myaung mo, re mabao" lo: khonhae" re makad' lai: lo-
cug' mo" qere re: nhag' gae nhag' mo" mana nhao-
17Ngo zozo" na: au: re:- cug' zonau" qere ve mamoe; nhao-
18Nga" pyad dapyad: geim" mae yao: bam re ngo qu" gun caung: lo va".
19Saung" myaung mung: mai bau: maqo" vai ve; ru
dayaug yaug re ngo the' myao lao"-
20Yao: re ngoyao" yao kyaung" mae" qo" yu: ra"
yao mug' yang qo; ra" sug'gug mai bau: re ngo lhaung" byid'-
ailao" yao: wa yao" aung khug nhag' lam: alhab' yang ngore khin" ra".
21Ngo wa tarha" yung" mae aung nae" re ba gau
cug' zonau" dayaug yaug re mhug' pyag' zo" qu" ngad: re-
mhug' vhan" zo" lai: lo:ngad: re-
22Nga" lo,pau" jham gyug' lo" vageshao:-
ai: lo,pau" jham wa nga" lo, sin mae" qeim: byid: gyo" lo" vageshao:-
23Ngo wa Mao"So: yang qobo dae byid: nae" rure gyaug: ra" mathao mae
airu" mau" zo" re khonhae" re: ngo malhaung" kad'.
24Ngo wa jo,nho" mae khonhae" re: makhug ngha-
25Nga" jo,nho" dao mae re: phug: ra" myid mabo-
26Ngo wa ba re yao" bo" bao: mathao mae khonhae" re: macaung:pa" qu".
Lho" khoqhi" yaung" jo; rure re: macaung:pa".
27Ngo wa aijham re phug' myao" ra" khyo" nga" lo, re bobaug baug mung:
nga: yhe' byid' ra" khyo khyodae: madae" qu".
28Airu" ra" qobo re wa- shid: ruyang qobo dae byid: ca" ra".
Aiwa qam: so' bo: thao" ra" Mao"So re ha: pye' ru ngad: ra".
29Nga" gyevo qe dayin dayo: no: na: au: ngo khonhae" re: mangaui bau" qu"-
yao: bam kyi" khyag' ru qhug' au: re ngo mamyid: ngaui qu".
30Ngo wa yao: bam shid shao: ein: akyu" mho' ra" khyo" khonhae" re: qobo mashad' lai: lo-
31Byubang" qere khonhae" re: ngo lhaung" pang" yu: rure
nga" qhid' mae" mau" zaui" ra" mo, alhab' ba: ako".
32Ngo wa gyaung: qhang su: mo, re nga" yham khug khyo khai: yu mung:
yao: bam re khonhae" re: hau" mo" khyo jham mae mayab nhao-
33Su gaje wa- yao: bam: qobo jham re nyham" to: nae" seim" ako".
Ngadqere: ngo wa- nga" qobo re khonhae" re: manyham" to:-
34Su: yang khoru: ta" genae" rure ngo khonhae" re: magyaug: qu"-
yao: bam: yang ceim" jung" genae" rure gyaug yang: ngo khonhae" re: sae za: matae" jo,-
yham khug mae za: re: malaung" jo,.
35Ngo jhau: na: rure khag' matae" gyo: genae" i?
Dao: kheim: khao: ngo" dangman" rure ngo jham tang: mung: ta" ra".
Qam: so' bo: thao" ra" Mao"So za: ngore aphaug' tau: vashao:-
Ngore ngag: thaug' yaug: yang ngore qobo zhaug' ra" dao: jham re
ngo qo" the' myao sho' tung" to: ko" ngad: re-
36Aijham re nga" lo,sin mae nga: bo taung" ve; ci mung:
ba maug: we' dakhyo: nga" au: mae zhaung" ci nae".
37Ngo wa- ngo kad' lai: lo: ru ja: khao: ngo" Mao"So re ta" shid' mung:
yao" qhid' kheim: mae nga" au: re nga: bo taung" qo" tau: qu" nae" ru wo".
38Ngo phaug' ra" yothaung: re khug' yu mung:
yothaung: sang qemae" yu: pye' byid' ru ngad re-
39Aimae yaug: ra" gaugzo re ngo zo" pye' yang: ngad: re-
ai: yothaung: mau" zaui: mo, vae: moe, shab' geshao:-
40Alao" Jung: gaug we' bali gaug nho: atha"
mhin: jham we' zau: kyi jham yaug: li" vashao:-
Yoba ta" ra" dao: thao" va".
Currently Selected:
YOBA 31: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
