YOBA 3
3
Mao"So Re Yoba Nyhung: Ra" Khyo
1Lo" thao" mae Yoba shi" jhau: thug' li" mung: yao: khau: li" ra" ba na re nhang" ra".
Yoba
2-3O" Mao"So we"- ngo khau: ra" ba na re nhang: wa,-
ngore de; qhid: ra" myi re nhang: wa,-
4Mao"So we"- ai: ba na re myi" boe" nhao wa,-
ai: ba na re khonhae" re: dadam: beim: lo:-
ai: ba re khonhae" re: dadam: bao: jo, nhao lo:-
5Ai: ba na re mug: dab mung: no, sang: kyid cad' na nhao wa,
ai: ba na re jham thaui" jham: yang nghoe' pye' mung:- ba re sad' paui" pye' wa,-
6Dazin: khug mae" ai: myi re sad' paui" pye' wa,-
aimung: ai: ba na re khonhae" re dadam: nghe' nhao lo:-
7Ai: myi re cae jhug tag ngaui bau: majo; ra" myi boe" nhao: pye' wa,-
8Ai: ba na re nhang: nae" qhid' mae" mandan: vha" mo, re ta" nhao wa,-
Maojaung: Levithan re ba: khang" ba: eib mo, re ta" wa,-
9Bo" myhung re mabao lo: sho' kad' to: wa,-
ai: myi re mug: bo" ru myid: lao" nae" dajo, nhao-
10Ai: myi mae ngore qug: khai: we' kaug' qhui: ru khyo khau: thug' ke' ra"
mathao mae ai: myi re nhang: wa,-
11Ngo wa nga" myhi" nho: aung mae
pe"mung: mashid: laug i? Ngo khau: li" au: yao: pe"mung: mashid: byaug: laug i?
12Nga" myhi" wa pe"mung: ngore yao" pad' laug dao mae vo; ci: laug i?
Ngo re pe"mung: yao" nug' cug jhaug' laug i?
13Ai: ayo, mae ngo shid: byaug: ngad: re ana" ngo wa dug no" na mung:-
14Ganhae" gaco' mae" kho:kham kho" jham re dam: zhaug' co' ra" kho:kham qe we'-
mung" eib zug: qe we' dakhyo: qo" yab: jo, naeva".
15Ailao" ngo wa- yao: bam yao" yham mae qhang we' ngaui jham byang" sho' ke' pyang" to: co' ko" ra".
kho:kham nau" qe we' dakhyo: mangad: lao"- 16Ashid khau: li" ra" zoshao we' dakhyo: qo" yab: jo; naeva".
17Lab khung: khug mae- makhyang: mashab mo, wa yao: bam: makhyang: mashab: mau" re thang: pye' ako".
Ai: jo, qo mae mau" khao" zo" myaung: mo, wa- lo" thao" mae dugno: qhug' yu: ako".
18Kyam: byuqe lhao" re:- hug' yhau yang: mamyan: makhyad' amyin" byid' rumae" loe, mung:-
yaug yo cae tae" ru kham zo" ako".
19Mang qi: mo, we' khag' yang maba mo, yaug khao: ngo" wa aimae joe" jo; ako".
Aimung: jeim qe wa lo" thao" mae loe; beim: ako".
20Xao su byu re pe"mung: nhag' kaug' nhag' ngai xo' daui: na nhao: i?
Kaug' qhui: na mo, re pe" kad' yang: bo" bao ba: byid: nae" laug i?
21Yao: bam wa shid: rure lao" ngadqere: aiwa khonhae" re: majoe" li" ngad: ra".
Yao: bam wa- phug' de; ra" jo,nho" pe" ja: tho' re: shid: rure aje: o: ako".
22Yao: bam shid: byaug mung: nyhab' pye' ru za: maqhug' qhug' wa mangaui bau: ngad: ako".
23Mao"So wa yao: bam: joe" lo nae" ayo, re nyham" to: mung:
yao: bam re shad' khao: ngo" khyo" go: to: byid' ra".
24Ngo wa zo: shaug' nae" atha" kaug' ngug: na mung:-
nokyang: khonhae" re: maqo" thang-
25Ngo gyaug mung: myid: ci" ru ja: khao: ngo" wa jo; boe" lo: avako".
26Ngo mae yaug yo cae: tae" ru majo, dugno: maqo" yu-
aimung: nga" qug: khai: wa khonhae" re: mathao" magan lo:ngad: ra".
Currently Selected:
YOBA 3: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
