YOBA 19
19
Yoba
1-2Naonhaung" wa pe"mung: ngore dao: kheim: jham: yang yhin" na ko" i?
3Dalhang bin dalhang naonhaung" wa ngore maphug' makhyad' cekad' mung:-
naonhaung" yang ngore mangad nghaui" caung: ceim" kad' rure maba: qho' ko" i?
4Ngo qe shad' ru kad' sho' ngadqere:-
aiwa naonhaung" re pe" no nhao: ra" i?
5Naonhaung" wa ngo tho' je: gai: ga: myid: ako".
Aimung: ngo qhug' phau: zo" ra" qug: khai: re nga" nho: qobo: sagse: ngad: ga: jho: ako".
6Ceru re kad' ke' yaug wa Mao"So ngad: rure naonhaung" mathe' myao ko" i?
Yao: yaug ngore myhi" nae" qhid' mae" lha" thaung: to" ra".
7Yao" nho: aqan alan mau" re ngo ngag: pye' ngadqere:-
khag' matae" gyo: byid: gengad: ako".
Tarha" ru qo" yu nae" qhid' mae" ngo hug' yao: rure khag' mathe' gyo: ko" ngad: ra".
8Mao"So: yang khyo jhid' to: mung: ngo maqo" lai: thug' lo"-
yao: wa nga" khyo re cad' no; yang nyham" to" pye' ra".
9Yao: wa nga" jo,nho" alhab' re yu: pye' byid' ava".
Aimung: nga" mang gai lahau: re phyo' qheim" pye' va".
10Yao: wa ngore shad' khao: ngo" khyo" be; khyad' ra".
Yao: wa nga" myid: lao" khyo re phan" pye' byid: mung:
ngore jhoe' mhai: shid: lo" nhao: ra".
11Mao"So wa ngore nhag' jam: yo" ra".
Yao: wa ngore yao" magai: thao" ra" gyevo we' dakhyo: kad' ava".
12Yao: wa ngore khe' zin: nae" qhid' mae" gyetab datab nhao: ke' byid' ra".
Yao: bam wa gyab lhao: dau: mung: nga" nho: zaung re dau" lhang" kham" ako".
13Mao"So wa nga" mao:nhaung: bam: yang ngore shapye' to: genae" khyo: kad' ra".
Ngo wa ngore ba mo; qhid' mae" taung bug lamai: boe" byaug va".
14Nga" ba nam sang: cao: qe we' ba nam qe byaug: byaug va".
15Nga" yham mae bang" lai: lo" mo, wa ngore to" myhid' pye' avako".
Nga" daui daui okaung myhi" myiqe: nau" jham wa ngore taung bug lamai: we' dakhyo: to" ako".
16Nga" daui daui okaung re ngo yao: ke' re yao: matau: ngad: ra".
Ngo re bao" yu nae" qhid' mae" yao: ke' re yao: matau: ngad: ra".
17Nga" yham sang myhi" wa nga" nhad' bab sheim nae matho' kham ngad: ra".
Aimung: nga" mao: nga" nhaung: sang qe wa nga" nhae khyo mate' li" genae".
18Zoshao qe ngore maphug' makhyad' kad' mung: yao: bam wa ngore myao lao" qi: ako".
19Nga" sang: tin: ba nam qe wa ngore qu" ca' ra" khyo" qu" ako".
Ngo jhid'de; thao" ra" mo, wa ngore ngag: phaug' pye' ako".
20Nga" shoqid jham wa nga" shoqug: jham mae pyan: gyo" jo; va".
Ngo wa kao so' we' gaungcin loe; lo va".
21Naonhaung" wa nga" ba nam qe ngad: ako". Ngo re nhag' khyag' yu gela,-
Mao"So: lo; yang ngore be; lhang" ke' va".
22Naonhaung" wa pe"mung: ngore Mao"So: yang yhin" ruru: yhin" ko" i?
Naonhaung" ngore ceim" yhin" ru maga" shiko" i?
23Nga" dao: kheim: jham re dayaug yaug: yang xam" ci mung:
mugsug' paug' mae tung" to" qa: we" ein: lhaung" taung" myid:-
24Mangad: lao" nga" dao: kheim: jham re apyad ato dung: jo, sho' laug zang mae
be, co' tung" te' to: byid' qa: we"-
25Ngadqere: lo" thao" mae ngore
gyevha gug:gam byid: nae" yaug mug:gaung mae na: ru ngo ba:.
26Nga" shoqid re no bug: yang zo" pye' sho' ngadqere:-
ce: gaung khyao mae adaui: na shi" au: Mao"So re ngo the' myao shinae".
27Ngo wa yao: re ngoyao" myo,jid' yang the' myao nae"-
aimung: yao: wa taung bug mangad: lo nae".
pe"mung:ga"re ngo wa nhag' lam: thao" va". Naonhaung" wa-
28Yao: re ngonhaung" khoru: yhin" nae"- ga: ta" geyang:
naonhaung" wa ngore khe' zin: nae" ru pyi qho: na: ako".
29Ngadqere: ana"-
qobo qhid' mae" Mao"So: nhag' jam: yo" ru cili" byid' ra" shae ngad: ra" ai: shae re gyaug ge,.
Ailao" dao: kho' ru dayaug na: rure naonhaung" ba: li" genae".
Currently Selected:
YOBA 19: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
