APAN AQAO: 46
46
Yaku We' Yao" Yham Byu Qe Egutu Mung" Khyo Ye" Lo" Ko" Ra" Khyo
1Yaku wa yao: qo" ra" gu: alhab' re seim" to: mung:- Bersheba jo, qo khyo ye: mung: aimae yao: pho" Isag nho: Mao"So re xeim: ngaui" byid' ra". 2Mao"So wa myi" re qhu" lho dalam: mae Yaku re dao: jhau: mung- Yaku- Yaku ga: khai: ra".
Yaku wa ngad va"- ngo cemae na:- ga: tau" ra".
3Ailao" Mao"So wa Ngo wa ni" pho" nho: Mao"So ngad:- Egutu mung" khyo ye: nae" qhid' mae" dagyaug wa,- ngo wa ai: mung" mae ni" myid:zo: qere: qi" qhang: ra" byumyu" boe" nhao nae". 4Ngo wa Egutu mung" khyo nao we' daga" ye: nae"- amung: ngo wa ni" myid:zo: qere ce: mung" khyo dam: jhui" tug' lo byid: nae". Nao shid: ra" au: re Yoseb wa nao we' daga" na: jo; li" nae"- ga: ta" ra".
5Yaku wa Bersheba mae" to" lo" ako". Yao: zo: bam wa Egutu kho:kham pho" yang nhao: ke' byid' ra" lhin" dao khyo yao: bam: yao: pho"- yao: bam: zoshao nau" qe we' yao: bam: yham sang myhi" qere do; zaung nhao: ako". 6Yao: bam wa yao: bam: gug'nyhug' jham Khanan mung" mae yao: bam na: qo" ra" jo,nho" jham we' daga" Egutu mung" khyo ye" lo" ako". Yaku wa yao" myid:zo: qe alhab'- 7Yao" nho: yauggai myiqe: zo: qe- yao: myid: alhab' re yao: we' daga" jhui" ye" lo" ra".
8Egutu mung" khyo yao: we' daga" ye" lo" ko" ra"- Yaku nho: yham byu qe wa- yao" zoqhid Rubin we' 9Rubin nho: yauggai zo: qe wa Hanug- Pallu- Hezron- Kami bam ngad: ako". 10Simon we' yao" yauggai zo: qe wa- Yemue- Yamin- Ohad- Yakhin- Zoha- Khanan myiqe myhi" kham: mae" yauggai zo: Shau- bam ngad: ako". 11Levi we' yao" yauggai zo: qe wa Gershon- Kohad- Merari bam ngad: ako". 12Yuda we' yao" yauggai zo: qe wa- Shela- Pere- Zera bam ngad: ako". (Yuda nho: gatau yauggai zo: tao ngad: ko" ra"- Era we' Onan tao wa Khanan mung" mae shid: byaug: ako".) Pere yauggai zo: tao wa Hezron we' Hamu ngad: ako". 13Isakha we' yao" yauggai zo: qe wa Tola- Pua- Yashub- Shimron bam ngad: ako". 14Zebulun we' yao" yauggai zo: qe wa Sered- Elon- Yahle bam ngad: ako". 15Cebam wa Mesopotamia mung" mae Lea yang khau byid' ra" yauggai zo: qe we' myiqe: zo: Dina bam ngad: ako". Lea yaug khau: ke' ra" Yaku nho: myid:zo: qe alhab' wa sam xe: sam yaug ngad: ako".
16Gad we' yao" yauggai zo: qe wa Zephon- Hagi- Shuni- Ezbon- Eri- Arod- Areli bam ngad: ako". 17Ashe we' yao" yauggai zo: qe wa Imna- Ishva- Ishvi- Beria- bam we' yao: bam: nhae: mo" Sera ngad: ra". Beria nho: yauggai zo: qe wa Hebe we' Malkhie ngad: ako". 18Cebam daxe: khyaug' yaug wa La Ban yao" myiqe: zo: Lea re byid' ra" jeim myhi" Zilpa yang khau byid' ra" Yaku nho: myid:zo: qe ngad: ako".
19Yaku nho: yham sang myhi" Rakhela wa Yoseb we' Benyamin ga" ra" yauggai: zo: shid' yaug re khau byid' ra". 20Yoseb wa Egutu mung" mae Helipeli vogaung: mae khinjaung Potiphera nho: myiqe: zo: Asenad yang khau byid' ra" Manashe we' Ephrim ga" ra" yauggai zo: tao qo" ra". 21Benyamin nho: yauggai zo: qe wa- Baal- Bekhe- Ashbe- Gera- Naman- Ehi- Rosha- Muppim- Huppim- Ard bam ngad: ako". 22Cebam daxe: byid yaug wa Rakhela yang khau byid' ra" Yaku nho: myid:zo: qe ngad: ako".
23Dan we' yao" yauggai zo: wa Hushim ngad: ako". 24Nabhtali we' yao" yauggai zo: qe wa Yahze- Guni- Yeze- Shilem bam ngad: ako". 25Cebam nhad' yaug wa La Ban yang yao" myiqe: zo: Rakhela re byid' ra" jeim myhi" Bila yang khau byid' ra" Yaku nho: myid:zo: qe ngad: ako".
26Egutu mung" khyo ye" lo" ko" ra" Yaku phyid' dam: mae" gyo" li" ko" ra" myid:zo: qe alhab' wa yao" yauggai zo: qe: yham sang myhi" qe mabo ngad: re khyaug' xe: khyaug' yaug ngad: ako". 27Egutu mung" mae Yoseb wa yauggai zo: shid' yaug qo" ra". Airumung: Egutu mung" khyo joe" ye" ra"- Yaku nho: yham byu alhab' wa nhad' xe yaug ngad: ako".
Yaku We' Yham Byu Qe Egutu Mung" Mae Na Ko" Ra" Khyo
28Yaku wa Goshen mug: mae yao: bam re Yoseb li" qhug' nae" qhid' mae" gau: qhid' khae" yang: Yuda re ta" nhao: ke' ra". Yao: bam joe" li" lao"- 29Yoseb wa yao" myao: lhin" dao mae do; zaung mung: yao: pho" re yeqhug' gelao"- Yoseb wa yao: pho" nho: lang zang: re ge; ci mung: myao" sho' ngug: ra". 30Yaku wa Yoseb re- Ana" ngo wa nao re qhug' myao va"- nao daui: na shi" rure ba va" rumung: ngo wa shid nae" jin" jin" ngad va"- ga: ta" ra".
31Ailao" Yoseb wa yao: mao: yao: nhaung: qere we' dang: ra" yao: pho" yham byu qere- ngo wa kho:kham pho" re- Khanan mung" mae na ko" ra" nga" mao:nhaung: qe we' nga" pho" yham byu qe wa ngojhao" joe" li" avako"-ein: ta" nae". 32Ngo wa yao: re naonhaung" wa yao lhaug' mo, we' gug'nyhug' jham re zam: mo, ngad: gemung: naonhaung" yao" yao kyaung"- cad' kyaung" nung: kyaung: jham we' gatau naonhaung" qo" ra" gu: alhab' jhui" li"avako"- ein: re: ta" kyo: byid: nae". 33Kho:kham pho" wa naonhaung" re khai: yu mung:- naonhaung" pe" mau" kad' zo: ko" ga: myid: lao"- 34Naonhaung" phug' pho" qe we' dakhyo: naonhaung" yao cad' jham re zam: yang: vae: dug: khau mau" kad' zo: mo, ngad: ein: yao: re ta" ge,- ceru: lao" yao: wa naonhaung" re Goshen mug: mae na nhao: li" nae"- ga: ta" ra". Yoseb cedao: ta" ru wa Egutu byu qe wa yao lhaug' mo, re pe" masun" li" genae" ruyang ta" ru ngad: ra"
Currently Selected:
APAN AQAO: 46: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009