APAN AQAO: 45
45
Yoseb Yao: Khag' Ngad: Rure Yao" Mao:nhaung: Bam Re Ta" Kyo" Ra" Khyo
1Yoseb wa yao: kham zo" ra" khyo re yao" daui daui mo; qhid' kheim: mae matho' zang: lomung:- alhab' mo, re ai: qe, mae" thug' lo" genae" qhid' mae" amyin" byid' ke' ra". Yoseb yao: khag' ngad: rure yao" mao:nhaung: qere ta" kyo" ra" au: yao: we' daga" gatau khag' re: mana ko" ngad: ra". 2Yao: wa Egutu byu qe the' gyo: gesho' thoe qi: we' ngug: thug' ke' ra". Amung: ai: lau dao: wa kho:kham kho" khyo joe" lo" byaug: ra". 3Yoseb wa yao" mao:nhaung: qere- ngo wa Yoseb ngad:- nga" pho" na shi" ra" i? ga: ta" ra". Ngadqere: yao" mao:nhaung: qe ce: dao: re the' gyo: gelao"- yao: bam wa dao: maqo" phaug' tau: losho' gyaug: din: byaug: ako". 4Ailao" Yoseb wa- jeju we' ngojhao" te' lo geri:- ga: yao: bam re ta" ra". Yao: bam te' lo gelao"-Yoseb wa ngo wa naonhaung" yang Egutu mung" khyo aung" pye' ko" ra" naonhaung" yao: nhaung: Yoseb ngad:- 5Ana"- naonhaung" ngore cekhyo aung" ke' ko" ruyang myid dashug ge,- mangad: lao"- yao: yao" gaung re qobo davhin ge,- byu: kao so' re khyad' yu nae" qhid' mae" naonhaung" qhid' au: mae ngore nhao: ke' yaug wa gaigai: yao: Mao"So angad: ra". 6Mung"dan: mae bao" khug' khug' ru shid' zin za: shi" angad: ra".Yothaung: phaug' yo kad'- gaug yad nae" ru majo, nae" ra" zin na ngo" zin dang shi" ra". 7Mao"So wa ce: mug' pho: mau" khyo" naonhaung" re khyad' yu mung: naonhaung" we' naonhaung" myid:zo: qe na: dang: jo, genae" rure ba nhao nae" qhid' mae" naonhaung" qhid' au: mae ngore cekhyo nhao: ke' ru ngad: ra". 8Airumung: ngore cekhyo nhao: ke' ru wa gaigai yao: naonhaung" mangad: ko" ngad: ra". Mao"So yang nhao: ke' ru ngad: ra". Mao"So wa ngore kho:kham pho" nho: myhao: thao" ra" zug: khyo" ngore kad' nhao: ava". Ngo wa yao" mung"dan: geim" re eib: ra" au: jhaung ngad mung:- ngo wa Egutu mung" geim" re eib: ra" zug: ngad:-
9Ana" nga" pho" jhao" phyad tug' phao: lo" mung: ni" zo: Yoseb ceru: ta" ra"- Mao"So wa ngore Egutu mung" alhab' re eib: ra" zug: kad' nhao: ava". Mayam" na lo: ngojhao" li" la,- 10Nao wa ngo we' jhao" ra" jo, qo ngad: ra" Goshen mug: mae qo" na: ra". Aimae nao yao: we' ni" zo: dau qe- ni" myid: qe- ni" yao jham ni" cad' be, jham- ni" nung: jham- gatau nao qo" ra" gu: alhab' we' gai: na: ra". 11Nao Goshen mug: mae na: re wa- ngo nao re qo" gun caung byid' ra". Bao" khug' ngo zin dang: ashi"- amung: ngo wa ni" yham byu qe we' ni" gug'nyhug' jham re vae: mamoe; nhao nug ngad: ra"- ein: yao: re lo" ta" ge,- ga: ta" ra".
12Yoseb wa xo' mung:- ana" naonhaung" alhab' mo, we' Benyamin nao re: ngo wa gaigai: yao: Yoseb ngad: rure the' myao: ava". 13Ngo wa ce: Egutu mung" mae khoqhi" kheim: so' qo" yaug ngad: ra" khyo re we' naonhaung" the' myao va" gu: ja: khao: ngo" re nga" pho" re lo" ta" kyo: ge,- Airumung: phyad za: yao: re cekhyo jhui" li" geri:- ga: ta" ra".
14Yoseb wa yao" lo, re yheim" ke' mung: yao: nhaung: Benyamin re yepo mung: ngug: ra"- Benyamin re: yao: re po: ci zo" re" ngug: ra". 15Ai: thao ngug zo" re" yao" mao:nhaung: yaug khao: ngo" re po mung: yao: bam re bobaug baug: ra". Ai: thao re yao: mao: bam wa Yoseb we' dao: jho" jhau: ako".
16Yoseb nho: mao:nhaung: qe joe" li" ko" ra" ga: ra" lau thoe kho:kham kho" khyo joe" lo" lao"- Kho:kham pho" we' yao" amad' zug: qe wa ngaui: ako". 17Kho:kham pho" wa Yoseb re- yao: bam: gug'nyhug' jham mae qo seim" mung: Khanan mung" khyo dam: tug' lo" genae" qhid' mae" ni" mao: ni" nhaung: bam re ta" wa,- 18Yao: bam: yao: pho" we' yao: bam: yham byu qe cekhyo lo" jhui" yu nhao wa,- ngo wa Egutu mung" mae" gai: thao" ra" mug: myid yao: bam re byid: nae". Amung: yao: bam wa qo: ra" tho' mae je sho' qo" li" genae". 19Yao: bam: yham sang myhi" qe- zoshao nau" qe we' yao: bam: yao: pho" re yao: bam we' daga" qo" jhui" li" gesho'- Egutu mung" mae" lhin" jham re celo" genae" rure re: yao: bam re ta" wa,- 20Yao: bam: jo,nho" zai yo to" pye' co' ko" rure myid: ci" gaung yug maca" genae". Egutu mung" geim" mae" gai: thao" ra" mug: myid re yao: bam sang: li" genae"- ga: ta" ra".
21Yaku yao: zo: qe wa yao: bam re ta" ru we' dakhyo: kad' ako". Yoseb wa kho:kham pho" amyin" khyo" to" ru we' dakhyo:- lhin" jham re we' gyaung: khyo mae" zokho yao: bam re byid' ra". 22Yoseb wa yao: bam yaug khao: ngo" re mai tha" bau: tha" dazam" zam" re: byid' ra". Ngadqere: yao: wa Benyamin re ngaui sam yo we' mai tha" bau: tha" ngo" zam" byid' ra". 23Yao: wa yao: pho" qhid' mae" gai: thao" ra" Egutu xan:jham- loze daxe dau: seim" vhin: mung: loze daxe dau: wa gaug- mug- we' gyaung: khyo qhid' mae" gatau zo:ve seim" vhin: ke' ra". 24Yoseb wa yao: bam re nhao: ke' mung: yao: bam to" lo" na ko" au: yao: wa yao: bam re- khyole; mae dajho" byo, ge,- ga: ta" ke' ra".
25Yao: bam wa Egutu mae" to" lo" mung: Khanan mung" mae" yao: bam: yao: pho" yham khyo phao: lo" ako". 26Yao: bam wa Yaku re- Yoseb daui: na: shi" ra". Yao: wa Egutu mung" alhab' re eib: ra" zug: ngad: ra"- ga: ta" kyo" ako". Yaku wa nhag' cad' gyo" cad' mung: yao: bam: dao: re maqo" lam" ngad: ra".
27Ngadqere: yao: bam wa Yoseb yang yao: bam re ta" ra" gu: alhab' Yaku re ta" kyo: gemung:- yao: re Egutu mung" khyo jhui: nae" qhid' mae" Yoseb yang nhao: byid' ke' ra" lhin" jham re the' myao lao"- yao: wa nhag' lam: qam: qo" li" ra". 28Ailao" Yaku wa- nga" zo: Yoseb daui: na shinhaung- ngo mashid shire yao: re ngo yeqhug' ca" ra". Cere za: ngo mho' ra"- ga: ta" ra".
Currently Selected:
APAN AQAO: 45: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009