MHO" PEIM: 30
30
Dam: Jhui" Tug' Yu: Ru We' Shaman" Byid' Ra" Akhyo:
1Ana" ba ngoyang nao re shaman" jeju we' byuxa: voqoe, nhang: kheim: shid' ja: mae" khyin: yu nae" qhid' mae" byid' to: va". Cegu: alhab' nao mae boe" lo mung: nao wa- ni" Mao"So Asang: yang khe' sin" lhae" ke' ra" mug: mae" byumyu" qe: phaung gaung: mae joe" na: jo, ko" au: re ngoyang nao re byid: va" ra" khyin: yu nae" rure myid: beim" li" genae". 2Nao we' ni" myid:zo: qe wa Asang jhao" dam: tug' lo mung:- ana" ba nao re ngo byid' na: ra" yao" amyin" dao: jham re ni" nhag' lam: alhab' yang re: phug' cao" na: ngad: re- 3Ni" Mao"So Asang wa nao re nhag' khyag' yu: li" nae" yao: wa nao re- yao" yang khe' sin" lhae" ke' ra" mung"dan: jham mae" dam: jhui" yu mung: nao re yao: wa dam: na: dai nhao: li" nae". 4Nao wa myidgaung: dao mae" va: thao" ra" ajheim khyo khe' sin" lhae" pye' ru qhug' sho' ngadqere: ni" Mao"So Asang: yang yao: nao re khai: zhang: yu mung: dam: jhui" tug' yu: li" nae". 5Aimung: nao wa- ganhae" dalhang ni" phug' pho" qe na co' ra" mug:myid re dam: qo" sang: yu: li" nae". Aimung: yao: wa nao re ni" phug' pho" qe qhid' phyao: lhaung" qo" tho' je: qo" nhao mung: je: myo" laug nhao: nae". 6Ni" Mao"So Asang wa- nao we' ni" nho: myid:zo: qere phug' cao" ba: ra" nhag' lam: ke' byid' li" nae". Aimung: nao wa ni" nhag' lam: alhab' yang yao: re jhid'de; ru we' ai: mug: mae qo" xo' na: ye" lo" li" nae". 7Ni" Mao"So Asang wa- nao re nghang: mung: deim" zag zo" ra" ni" gyevo qere ce: byuxa: voqoe, nhang: kheim: alhab' tug' zao" nhao: li" nae". 8Aimung: nao wa yao: re dam: phug' cao" mung: ana" ba nao re ngoyang byid' na: ra" yao" amyin" dao: alhab' re kad' cao" li" nae". 9Asang wa nao kad' ru alhab' mae aung doe, nhao: ruyang nao wa zoshao myo: sho' yaug gug'nyhug' nung myo: sho' dau: byid: mung:- ni" qhovo: yo jham wa gaug zo magan: mago" thug' li" nae". Yao: wa ni" phug' pho" qere aung doe; na: dai nhao: ra" au: mae we' dakhyo: nao re aung doe; nhao: rumae ngaui bau" li" nae". 10Ngadqere: nao wa- ce: yao" mho" shid dao: mugsug' paug' mae tung" to" ra" yao" tarha" alhab' re kad' cao" ca" li" nae". Nao wa ni" nhag' lam: alhab' yang yao: jhao" dam: tug' lo ca" li" nae".
11Ana" ba ngo nao re byid' na: ra" amyin" dao: wa saung" qug' ru mangad: nao mamyhi sho' re: mangad:- 12Airu wa mug:gaung tho' mae jo; ru mangad:- nao wa khag' do, lo" mung: ai: rure ngonhaung" the' gyo: yang: qo" cao" sho' ngonhaung" qhid' mae" khag' lo" qo" yu: gyo" lo byid: nae" laug i? ein: mamyid: ca" genae". 13Airu wa nammugdara thoeshad' mae jo; rure: mangad: naonhaung" wa- nammugdara thoeshad' khyo khag' gau" khe' ye: mung: airu re ngonhaung" the' gyo: yang: qo" cao" sho' ngonhaung" qhid' mae" khag' yu: lo byid: nae" laug i? ga: mamyid: ca" genae". 14Khai: mae" ba: ngad nae" (mangad:) Airu wa cemae naonhaung" we' daga" jo; ava". Naonhaung" wa airu re ba mung: aire dam: ba: zhao: ta" ako". Aimung: ana" aire phug' cao" ge,.
15Ana" ba ngo naonhaung" re- gai: ru we' makhyang" mashab: ru- kao so' daui: ru we' shid ru agyo: mae khyin: yu nae" byid' to: va". 16Ana" ba ngo naonhaung" re byid' ra" naonhaung" Mao"So Asang: amyin" dao: re naonhaung" phug' cao" ko" ngad: re- yao: re naonhaung" jhid'de; ko" ngad: re- yao: re phug' cao" ge,. Aimung: yao" tarha" alhab' re kad' cao" ge,. Ailao" naonhaung" wa na: dai mung: byu myo" ra" byumyu" damyu" boe" li" genae"- nao yesang: na nae" za: angad: lo" ra" mug: mae ni" Mao"So Asang: yang nao re shaman" byid' li" nae". 17Ngadqere: nao wa yao: re maphug' cao" lo: matae" gyo: byid: mung:- gatau: so jham: shad' khyo jhui" nghung" ye" lo" ru qhug' ko" ngad: re- 18Naonhaung" wa phyo' qheim" pye' ru qhug' li" nae". Ana" cemae ngo nao re ta" peim" na va" lhe"- nao wa Yodan thoeshad' mae nao yesang: na nae" za: angad lo" ra" mug: mae myao" sho' maqo" daui: na nae". 19Ana" ngo nao re- kao so' daui: ru we' shid: ru Mao"So: shaman" jeju we' Mao"So: nhang: kheim: agyo: mae khyin: yu nae" byid' to: va"- aimung: nao khyin: yu: ra" rure sagse aso: boe" nae" qhid' mae" mug:gaung we' myidgaung re ngo khai: yao va". Kaoso' re khyin: yu ge,- 20Ni" Mao"So Asang re jhid'de; wa,- yao: re phug' cao" mung: yao" dao mae jhaug' zaug: na ge,. Airu: ngad: re- nao we' ni" myid:zo: qe wa ni" phug' pho" Abraham- Isag we' Yaku bam re byid: nae" ga: yao" yang dao:so byid' to" ra" mug: mae myao" sho' qo" na: li" nae".
Currently Selected:
MHO" PEIM: 30: LHCL
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© Bible Society of Myanmar 2009