MHO" PEIM: 16
16
Lai Co' Poe
(Phao" Thug' 12.1-20)
1Abib lho" khye' mae Lai co' poe poe: ra" khyo" naonhaung" Mao"So Asang re nga: yhe' byid: ge,. Ai: lho" khye' damyi mae naonhaung" re Egutu mae" khyad' yu: ru ngad:. 2Caung:pa" jo, qo dalam: khyo ye: mung: naonhaung" Mao"So Asang re nga: yhe' ra" Lai co' poe zo: shaug' khyo" aimae naonhaung" yao mangad: lao" nung: dadau: dau: re se' ge,. 3Ce: zo: shaug' re naonhaung" zo" ra" au: man" ke' ra" mug re gai: zo: genae" mangad: Egutu mae naonhaung" ahin agyan phao: thug' lo: ru we' dakhyo: naonhaung" wa man" make' ra" mug re nhad' ba geim" mae zo: ca" genae". Ce: mug re zo: ge,- ai: mug re qug: khai: mug ga: mhang" li" genae". Ailao" she, naonhaung" adaui: na na mae ai: qug: khai: kyi" khyag' qhug' va" Egutu mung" mae" naonhaung" phao: thug' lo: ra" ba na re myid: beim" li" genae". 4Nhad' ba geim"- naonhaung" mug:myid mae" khag' re: yao" yham mae man" magai: jo, nhao nae". Aimung: sao qhid' ba myi" thao mae se' ra" gug'nyhug' sho: re ai: myi yao: zo" pye' ca" genae".
5-6caung:pa" jo, qo yao: mae- Lai co' poe gug'nyhug' jham re se' ge,- aimung: naonhaung" Mao"So Asang: yang naonhaung" re byid' li" nae" mug:myid mae" gatau khokhyi" mae re: gai: se' genae" mangad: naonhaung" Egutu mae" phao: thug' lo: ra" ayo, ba vao zo" mae airu: kad' ge,. 7Sho: re jho' mung: caung:pa" jo, qo yao: mae zo" pye' ge,. Aimung: thao: ba ne, kao mae yham phao ge,. 8Ai: thao khyaug' ba: gu: mae naonhaung" wa man" make' lo: nyhang" to" ra" mug re zo ca" genae". Aimung: nhad' ba ein: ba re naonhaung" Mao"So Asang re caung:pa" nae" qhid' mae" phaung: ham mung: ai: ba na mae mau" dazaui: ge,.
Gaug Sag' Zo: Poe
(Phao" Thug' 34.22; Xeim: Ngaui" 23.15-21)
9Naonhaung" gaug yad: qhid: ra" ayo, mae" laban nhad' lam: byang" sho' nghe' ge,. 10Ailao" naonhaung" qo" khae: yu: ra" shaman" jeju khyo" cao" yang: myid bug: ngaui" xeim: ci mung: Mao"So re nga: yhe' ra" gaug yad poe re kad' ge,. 11Asang: qhid' kheim: mae naonhaung" zo: dau qe daui nhao okaung qe we' naonhaung" vogaung: jham mae na: ra" Levi byu qe taung bug byu qe- cug' mo" cug' zo: qe we' daga" ngaui bau: ngaui lho" na: bam ge, caung:pa" ra" jo, qo dalam: mae za: ceru: kad' ge,. 12Ce: amyin" jham re khyag' phug' cao" ge,-Egutu mae naonhaung" jeim kad' co' ko" rure dato" myhid' ge,.
Zaung Khyae: Poe
(Xeim: Ngaui" 23.33-43)
13Naonhaung" wa naonhaung" gaug zo alhab' re bin: yad: yu mung: naonhaung" sabyi alhab' re bin: phyo' yu lao" zaung khyae: poe re nhad' ba geim" poe kad' ge,. 14Naonhaung" zo: dau qe- daui nhao: okaung qe we' naonhaung" vogaung: jham mae na: ra" Levi byu qe- taung bug byu qe- cug' mo" cug' zo: qe we' daga" ngaui bau" na: bam ge,. 15Naonhaung" nho: Mao"So Asang re nga: yhe' ra" khyo" caung:pa" ra" jo, qo mae yao:- nhad' ba geim" ce: poe re kad' na ge,. Naonhaung" gaug yad: ru we' naonhaung" mau" zo" re Asang: yang shaman" byid: va" rumung: ngaui bau: ngaui lho" na ge,.
16Naonhaung" byumyu" mae yauggai alhab' wa Lai co' poe we' gaug yad poe- zaung yham poe kad' ra" caung:pa" jo, qo mae dazin re sam lhang Asang re li" caung:pa" ca" genae". 17Yauggai yaug khao: ngo" wa- naonhaung" Mao"So Asang: yang yao: re shaman" byid: va" rumae cao" yang yao: yao: gai: boe" ra" khyo" jhaung qhu" daja: cili" ca" nae" ngad: ra".
Tarha" Dang Man" Rure Phyid' Kho' Ra" Khyo
18Naonhaung" nho: Mao"So Asang: yang naonhaung" re byid' ra" vogaung: khao: ngo" mae Tarha" agyi qe we' gatau: zug: ade, qere san: nhao: to: ge,. Ce: byu qe wa mung" shava byu qere myo, nho makhyin lo: tarha" phyid' kho' byid: ca" ko" ra". 19Yao: bam wa tarha" madangman" khyo" magai: kad' mangad: lao" yao: bam: tarha" dao: phyid' mau" mae re: myo,nho magai: khyin- aimung: yao: bam wa- khug vag jhaung qhu" jham rere: magai: yu zo: genae". Pe"mung:ga"re jhaung qhu" jham wa pha,jhi" bo mo, we' myid din:man: mo; nho: myo, re lhao" re jid nhao mung: yao: bam re shad' ra" khyo" dao: kho' nhao ba: ra". 20Naonhaung" nho: Mao"So Asang: yang- naonhaung" re byid: nae" ra" mug:myid re naonhaung" yeqo" sang na gemung: aimae qo" xo' na: lo" nae" qhid' mae" khonhae" tarha" nyang: ru we' tarha" nyang: tarha" din: man" ru kad' na ge,.
21Naonhaung" nho: Mao"So Asang: qhid' mae" phan re naonhaung" kad' ko" re ai: phan yae mae Ashe so myhi" nho: sag' thaung: lho re date' to: ge,. 22Aimung: solho re caung:pa" nae" qhid' mae" ci: ra" laug zang baung: re dazhaug' to: ge, Asang wa aijham re nghang" ra".
Currently Selected:
MHO" PEIM: 16: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009