MHO" PEIM: 15
15
Nhad' Zin Ein: Zin
(Xeim: Ngaui" 25.1-7)
1Nhad' zin ein: zin khao: ngo" lo" thao" mae nao re jhin de; ko" ra" mo; jhin re nao phyaug' pye' byid: nae" ngad: ra". 2Ce wa- aire khoru: kad' nae" ra" khyo ngad: ra" Israel mao:nhaung: pho" re ngaui jhid' byid' ra" yaug khao: ngo" wa ai: jhin re phyaug' pye' byid: nae" ngad: ra". Yao: wa ai: ngaui re boe' yu nae" magai: seim" ngad: ra" Asang yao: ai: jhin re phyaug' pye' va"- ga: ta" ava". 3Nao re jhin de; ra" taung bug byu mae" wa nao jhin gai: boe' yu: ra". Ngadqere: nao re jhin de; ra". Naoyao" byu qemae" nao jhin magai: boe' yu ngad: ra".
4Ni" Mao"So Asang wa nao re byid: nae" ngad: ra" mung"dan: mae nao re shaman" byid' li" nae". 5Ana" ba naonhaung" re byid' ra" amyin" ja: khao: ngo" re mho dao: gyo: mung: nyang" za: phug' cao" ngad: re- naonhaung" byumyu" mae" dayaug re:- mamyaung masho: genae". 6Yao: dao:so: byid' to" ru we' dakhyo: Asang wa nao re shaman" byid' li" nae". Nao wa byumyu" myo: sho' re ngaui jhid' byid' li" nae". Ngadqere: nao wa khag' dayaug mae" re: majhid' yu qo nae". Nao wa byumyu" myo: sho' mo, re eib: li" nae". Ngadqere: nao re pe" byumyu" yang re: eib: li" nae".
7Ni" Mao"So Asang byid: nae" ngad: ra" mung"dan: mae" vogaung: dalam: lam: mae myaung sho" ra" Israel mao:nhaung: dayaug yaug na: ngad: re- naoyao" qhid' mae" za: damyid wa,- yao: re bao" thaug' byid: nae" daha: pye' wa,- 8Ai: atha"- yao: qo ca" nho" mabyag maqhag' lo: yao: re jhid' byid: wa,- 9Jhin phyaug' pye' nae" ra" zin na jhao" li" na va" ruyang yao: re daja: ja: jhid' byid: nae" rure daha: pye' wa,- airu" ru makhyang" ra" myid re ni" nhag' lam: khug khyo davao nhao wa,- nao jhid' byid: nae" ha: pye' ngad: re yao: wa nao re qobo vhin yang: Asang re zag: yao: li" nae". Ailao" nao wa qobo qo" yaug boe" li" li" nae". 10Yao: re galin: gago: byid: wa,- naoyao" qhid' mae" za: damyid wa,- ailao" Asang wa nao kad' ra" mau" zo" alhab' mae shaman" byid' li" nae". 11Aimung" mae Israel byu qe damyo" wa khonhae" re: myaung sho:- qo ca" mo, ngad: li" genae". Airumung: yao: bam re mabyag lo: bao" byid: nae" nao re amyin" byid' ru ngad: ra".
Jeim Qere Khoru: Kad' Nae" Khyo
Phao: Thug' 21- 11
12Israel mao:nhaung qemae" yauggai- mangad: lao" myiqe: dayaug yaug yao: yao" gaung re jeim khyo" nao re li" aung: yang: ngad: re yao: wa nao re khyaug' zin bin: caung da" byid: thao re nao wa yao: re lhoe' ke' nae" ngad: ra". Nhad' zin ein: zin joe" lo lao"- nao wa yao: re jeim mae" lhoe' ke' byid: ca" ra". 13Nao yao: re lhoe' ke' ra" au:- yao: re lo, keim danhao: ke' wa,- 14Asang: yang nao re shaman" byid' to" ra" yao- gaugzo- sabyi qang: jham mae" mabyag maqhag' lo: yao: re gae byid: wa,. 15Nao wa Egutu mung" mae jeim doe; lo mung: ni" Mao"So Asang: yang nao re lhoe' ke' byid' rure myid: beim: wa,- ce: mathao mae ce: amyin" ana" nao re byid' na: ru ngad: ra".
16Ngadqere: ni" jeim wa manug: phao: lo" lo:- yao: wa nao we' ni" yham byu qere jhid'de; mung: na: jo, nae" nhag' shid yang: ngad: re wa- 17Yao: re ni" yham kham: dung: khyo jhui" thug' ye: mung: yao" no khye' re yethung: byid: wa,- ailao" yao: wa pyad geim" ni" jeim ngad: li" nae" ni" jeim myhi" rere: ai we' dakhyo: za: kad' wa,- 18Jeim re lhoe' ke' ra" au:- nhag' mashid lo: damung wa,- yao: wa nao re khyaug' zin bin: caung da" byid: mung: daui daui okaung dayaug: aphug' agaung: dano" khyo" za: caung da" byid: va".Ceru re kad' wa,- ailao" ni" Mao"So Asang wa nao kad' ra" mau" alhab' mae shaman" byid' li" nae".
Sao Qhid' Xao" Ra" Nung We' Yao
19Ni" nung: we'- yao jham mae" sao qhid' xao" ra" alo: jham re ni" Mao"So Asang: qhid' mae" gatau kho' to: wa,- ai: nung: dadau: rere: mau" zaui" rumae daci wa,- ai: yao jham mae" dadau: mae" re: amug' daqaug: yu wa,- 20Zin khao: ngo" nao we' ni" yham byu qe wa caung:pa" byid' ra" dajo, qo- Asang: qhid' kheim: mae aijham re zo: genae" ngad: ra". 21Ngadqere: ai: gug'nyhug' jham mae" khyid qeim- myo, jid- qi: sho' qo daja: ja; bo yang: ngad: re- aijham re ni" Mao"So Asang re xeim: magai: ngaui" byid: ngad: ra". 22Airu" ra" gug'nyhug' jham re wa nao yham mae gai: zo" ra". caung:pa" thung" khyo" san sin" yaug masan masin" yaug ngad ngad- naonhaung" alhab' shocid sho:- yo: sho: re zo" ru we' dakhyo: aijham re gai: zo" ako". 23Ngadqere: nao wa ai jham: sa: re zo:ve datoe' wa,- ai: atha"- qid we' dakhyo: ai: sa: re myidgaung khyo zhin: khyo" pye' wa,-
Currently Selected:
MHO" PEIM: 15: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009