Vakatekivu 32
32
Vakavakarau ko Jekope me Sota kei Iso
1A sa lako tu e nona sala ko Jekope, a ra sa sota kaya na agilosi ni Kalou. 2Ia ni sa kunei ira ko Jekope, sa kaya, “Oqo na keba ni Kalou!” A sa vakatoka na yaca ni vanua ko ya ko Meeneimi.#32.2 Meeneimi kenai balebale Keba e rua
3A sa tala eso na mata ko Jekope me liu yani kivei Iso na tuakana, ki na vanua ko Sia, ki na vanua i Itomi. 4A sa vakaroti ira, ka kaya, “Dou vosa vakaoqo vua na noqu turaga ko Iso: Sa kaya vakaoqo na nomuni tamata ko Jekope, ‘Au a sa tiko vulagi ga vei Lepani, ka'u sa dede kina, ka me yacova na gauna oqo; 5ka sa tu vei au na bulumakau, kei na asa, na sipi, na tagane-bobula, kei na yalewa-bobula; ia ka'u sa qai talatala me'u tukuna vua na noqu turaga, ka me'u kune loloma e matamuni.’ ”
6A ra sa lesu mai kivei Jekope nai talaki, ka ra kaya, “Keitou a lako vua na tuakamuni ko Iso, ka sa lako tiko mai ko koya me mai tavaki kemuni, kei ira vata kaya na tamata e lewe va na drau.” 7A sa rere vakalevu ko Jekope, ka sa kidroa. A sa wasea rua na tamata era tiko kaya, kei na qele ni sipi, kei na bulumakau, kei na kameli, 8ni sa kaya, “Kevaka sa lako mai ko Iso ki na dua nai wasewase ka mokuta, ena qai dro bula nai wasewase kadua.”
9A sa kaya ko Jekope, “Na Kalou ni tamaqu ko Eparaama, kei na Kalou talega i Aisake na tamaqu, kemuni Jiova, ko ni a kaya vei au, ‘Mo lesu ki na nomu vanua, ka vei ira na wekamu, ka'u na caka vinaka vei iko’, 10au sa sega ni yaga me'u rawata e dua na ka lailai e na nomuni loloma kecega, kei na nomuni vosa dina ko ni sa cakava vei au na nomuni tamata, ni'u a qalo kosova na Joritani oqo kei na noqu i titoko wale; ia oqo ka'u sa qai tubu me rua nai wasewase. 11Au masuti kemuni, mo ni vakabulai au mada mai na liga i Iso na tuakaqu, ni'u sa rerevaki koya; de sa lako mai ko koya ka mokuti au, kei ira vata na gone kei na tinadra. 12#Vteki 22.17Ia ko ni a kaya, ‘Ka'u na caka vinaka vakaidina vei iko, ka vakatubura na nomu kawa me ra vaka na nuku mai matasawa, sa sega ni wili rawa ni ra sa lewe vuqa.’ ”
13A sa moce mai kea e na bogi ko ya, ka sa taura mai na ka sa tiko vua me ka ni loloma vei Iso na tuakana, 14e rua na drau na me yalewa, ka ruasagavulu na me tagane, e rua na drau na sipi yalewa ka ruasagavulu na sipi tagane, 15e tolusagavulu na kameli yalewa kei na luvedra, e vasagavulu na bulumakau yalewa, ka tini na bulumakau tagane, ruasagavulu na asa yalewa, ka tini na luve ni asa. 16A sa solia kivei ira na nona tamata, me lako vakai koya na qele ni manumanu yadua; a sa kaya vei ira na nona tamata, “Dou liu yani, ka me veilutuki toka na veiyawaki ni qele ni manumanu e dua kei na qele ni manumanu tale e dua.” 17A sa vakarota vua na kenai matai, ka kaya, “Ni sa sotavi iko ko Iso na tuakaqu, ka tarogi iko, ‘A nei cei ko iko? Ko sa lako tiko kivei? A nei cei na ka oqo sa liu vei iko?’ 18mo qai kaya, ‘A nei Jekope na nomuni tamata; oqo nai loloma sa kau tiko vua na noqu turaga ko Iso; ka raica, sa muri keitou tiko mai ko koya.’ ” 19A sa vakarota vakakina na kenai karua, kei nai katolu, kei ira kecega era muria na qele ni manumanu, ka sa kaya, “Dou tukuna talega na veika oqo vei Iso ni dou sa sota, 20ia dou kaya talega, ‘Ka raica, sa muri keitou tiko mai ko Jekope na nomuni tamata.’ ” Ni sa kaya ko koya, “Au na vakayalovinakataki koya taumada e na ka ni loloma sa liu yani, ia e muri ka'u na raica na matana; de sa na ciqomi au beka ko koya.” 21A sa kau yani eliu na ka ni loloma; ka sa tiko vata ga kei ira ko koya e na bogi ko ya.
Sa Veimulomulo kei na Kalou mai Penieli ko Jekope
22A sa cavu tu ko koya e na bogi ko ya, ka kauti rau na watina kei rau na vada, kei iratou na luvena tagane e le tinikadua, ka vuto-kosova na uciwai ko Japoki. 23A sa kauti ira, ka talai ira me ra vutokosova na uciwai, ia sa tala ki tai kadua na nona i yau. 24#Osea 12.3,4A sa tiko duadua ko Jekope. A sa veimulomulo kaya e dua na tamata ka yacova na kida ni mataka. 25Ia ni sa kunea ko koya sa sega ni gumatua vua, sa tara na veiuturi ni dibina; a sa mavule na veiuturi ni dibi i Jekope, ni sa veimulomulo tiko kaya. 26A sa kaya ko koya, “Mo laivi au mada me'u lako, ni sa voleka ni kida na mataka.” A sa kaya ko Jekope, “Au na sega ni laivi iko kevaka ko sega ni vosavakalougatataki au mada.” 27A sa kaya vua ko koya, “Ko cei na yacamu?” A sa kaya, “Ko Jekope.” 28#Vteki 35.10A sa kaya, “Ena sega tale ni qai yacamu ko Jekope, ko Isireli#32.28 Kenai balebale Ko koya sa veiqaliqali kei na Kalou se Sa veiqaliqali na Kalou ga, ni ko sa veiqaliqali kei na Kalou kei ira na tamata, ka ko sa gumatua.” 29#Dvei 13.17,18A sa taroga ko Jekope, “Yalo vinaka mo ni tukuna mada mai vei au na yacamuni.” A sa kaya ko koya, “A cava ko sa taroga kina na yacaqu?” A sa vakalougatataki koya mai kea. 30A sa vakatoka kina ko Jekope na yaca ni vanua ko ya ko Penieli,#32.30 Kenai balebale Na mata ni Kalou ka tukuna, “Ni'u sa veirai mata kei na Kalou, ia ka'u sa bula ga.” 31A sa cadra vua na mata-ni-siga ni sa lako tani mai Penueli, ka sa gera voli e na vuku ni dibina. 32O koya oqo era sa sega ni kania kina na ua mai na veiuturi ni dibi ko ira na Isireli ka yacova na siga edaidai, ni sa tara ko koya na ua mai na veiuturi ni dibi i Jekope.
Currently Selected:
Vakatekivu 32: FRV21
Highlight
Copy
Compare
Share
Want to have your highlights saved across all your devices? Sign up or sign in
